【現代武俠】每個男人心中都有個武俠夢: 第十節　彈指神通

第十節 彈指神通
 
我們回到旅舍時，呀星已經準備好早餐，可惜我們全身濕透，再餓也沒有心情吃那一桌熱騰騰的早餐，但似乎只得我一個這樣想，他們三個已經圍住餐桌，站著搶桌上的油條、饅頭、豆漿、白粥，行走中國大陸，只要有早餐四寶就不會餓死。大食精：「十九，你唔洗過嚟啦，呢度啲嘢唔夠食。」我冷笑了一下就回房。「均均呢？」我問呀星，星：「佢話返屋企拎啲嘢，食埋早餐先再嚟。」
 
我洗完澡，換上了另一套乾爽的背心沙灘褲，以防下午的訓練又要下水。走到大堂，又回復寧靜一片，他們三個怕弄髒沙發和椅子，坐在地上靠著牆睡了。
 
我見桌上的早餐都被這班山賊掃光，就問呀星：「仲有冇早餐？」
 
呀星：「冇哂啦，我叫咗佢地留啲俾你……我帶你去買呀。」
 




我：「佢地餓就俾佢地食先，我自己去買得啦。」
 
呀星：「你邊識路，又冇銀包，點買嘢。我帶你去嗰間好食啲。」
 
今天陽光太耀眼，走到室外眼睛幾乎睜不開。呀星：「你平時係咪咩心事都唔同人講啦？」
 
我驚訝的看著她，然而陽光令我表情不能表達感情，只剩僵硬的眯眼，說：「你點知？」
 
「你成日第一反應就拒絕人地……有時唔係推得一清二楚就可以保護自己嘎。」難道她有讀心術？一下被她刺中要害，掩藏住的不安一湧而上，幸好有陽光掩護，她應該看不出我的表情吧。
 




「你有咩心事，可以試吓……試吓同我講，我讀心理學，應該可以幫到你……」然而我不知道心理學會怎樣幫到我，不過我知道是她一片好心，心裏暖暖的。
 
「既然都嚟到，不如坐低食埋先走。」呀星說。
 
「唔……好呀！坐低食呀。」
 
「你地今朝發生咩事，點解你同均均都奇奇怪怪咁。」我肯定她懂讀心術，不想瞞她，於是從頭到尾把今朝的事告訴她，當然有輕微刪改。
 
「……之後就係你見到嘅咁，你話點算？」
 




她低著頭若有所思：「我都唔知呀。不如我晏晝陪你地訓練呀？」
 
回到旅舍，均均還未到，三個土匪還未醒，我一個坐在沙發上，看看呀星工作，打打瞌睡，享受從小花園吹來的清風，這種天氣真的很適合悠閒生活，可惜這種閒逸只享受了半個上午。均均：「全部起身，拎哂啲手機，銀包出嚟。」他們在半睡半醒間回到房間，把手機錢包都拿出來，放在枱上，均均一把掃到她的布袋裏：「喺你地成功推我落水之前，你地嘅手機銀包都由我保管。」聽到這句，他們都醒來，毛毛把手伸向布袋，想把手機搶回，向前踏了一步，又讓均均捉了後背，輕輕一送，像今早一樣，跌了個狗吃屎，這次毛毛不但沒有發怒，反而像小狗一樣折服於均均的威嚴之下。
 
均均開啟教官模式：「你地四個夾埋都推唔到我落水，係因為基本功唔好，不過要你地一星期之內贏我就冇可能，唯有同你地做啲針對性嘅訓練。毛毛，庭園有棵矮樹，你單腳企，另一隻腳水平伸直，圍住橫枝轉圏，轉到攰就換腳，唔准停。大食精，你吹小喇叭。教主……教主你自己搵嘢做啦。鴻晏，你跟我嚟。」均均拉我到一旁：「聽呀星講你由細到大都眼明手快，我教你彈指神通。不過講明先，我淨係聽師父講過吓點練，唔包你一定學得識。」我連忙點頭。「你去用左手捉石頭，淨係可以用指尖。」我：「咁右手呢。」均均：「用呢個。」她把手握力器遞給我後就轉身打算離開，突然又回頭說：「今朝嘅事唔准你再諗。」我才醒覺：「對唔……」均均捂住我的嘴說：「都話唔准再諗。」我們又再次靠得很近，我看見她面又是紅紅的，可是為甚麼她的手如此粗糙，我捉住她的手問：「點解你對手……」均均：「練功搞成咁……爸爸對我好嚴，一個動作做唔好，佢就打我手板，不過我最怕都唔係呢樣，我最怕佢話我冇用，怪我唔係男仔。」說完她抽手轉身去看毛毛和大食精。教主：「原來均均咁慘。」那廝居然站在旁偷看。
 
為了不辜負均均的心意，我拼命練習，忍痛一下又一下，任由粗糙的石頭與指尖磨擦，後來石頭表面上的凹凸就算一片片小刀片，一刀一刀劃著最敏感的指尖，我開始「揸流攤」，故作抓石，東張西望，喝水借尿遁，又喝水借尿遁，好不容易才捱到下午茶時間，呀星買來杭州特產龍井酥和桂花酥給我們做茶點，也讓我們一躲教官嚴厲的看管。吃茶點的時候我才發覺雙手沒勁，連拿起茶點也做不到，我慌張看著他們，兩個土匪只顧吃茶點，只有呀星和均均留意我，呀星捉住我的前臂：「均均，你過嚟睇吓，佢對手硬哂，好紅好熱。」均均二話不說，從櫃台抽屜裏取出一枚鋼針，刺進我的曲澤穴，抽出鋼針時，連帶一點黑血流出。我：「點解會咁嘅？」均均：「我都唔知，應該係你體內嘅氣亂咁走。」
 
「你都係唔好練住啦，今日到此為止啦。」毛毛和大食精高興地看著我，是在感激我助他們脫苦海，均均：「你兩個繼續練。」他倆表情瞬間的反差實在精彩。我躺在沙發上吃葡萄，笑眯眯的看著他們大汗淋漓，但心裏卻不好受，難得終於有人肯教我武功，我卻學不了。