如果你既人生好似打機一樣……: 8,11. 天水圍&柴灣=LONG D

「ok啦，見下班網友都係一件幾刺激既事。」
 
「咁就好。」
「呀方條毒溝有女溝！」我諗依樣先係最刺激既事。
 
「……………………………」電話中傳來沉默。
「你都覺得意外呢？雖然條女個樣都好平凡，但係估唔到佢可以係三次元溝到女。」
 
「嗯，唔好講佢，講番你自己。」
「我？我有咩好講？」今日係我身上無乜特別事發生。




 
「我比你既訓練你有無做完？」!
「噢弊！仲爭一個添！」
 
「依個挑戰對你太難……我會調整難度。星期一就番學，早啲訓。」
「我依排都好早訓，唔洗擔心。」
 
「星期一見。」
「拜拜。」
 




我關上電話，下一秒久違既對話框出現。
《任務失敗　懲罰Debuff餘下 23:59》
原來任務失敗真係有懲罰！個Debuff究竟係乜？
我係街上面做出跳，跑之類既動作，無感到任何問題。
 
睇黎依個所謂既Debuff對我日常生活無影響，既然係咁我就唔叫小智住。
 
行到番屋企，老母仲係廳睇緊電視，而我就即刻打開部電腦然後沖涼。
我有時沖涼會沖好耐，唔知既人以為我係入面打緊飛機，其實實際上，我係思考緊自己既人生。
 




浴室就係人最後既冥想空間。柯屎果陣你手上一定有份報紙，有部遊戲機或者雜誌，令到你有野睇而唔去思考，但係斷估你唔可以帶依啲野去沖涼掛？
 
我實在百思不得其解，點解無見呀方幾日佢就有如此轉變，佢明明之前幾日仲係到打機打到癲。
但係既然連呀方都做到，我無理由做唔到！
 
雖然我之前已經開始改變自己既習慣，但係我依家有個明確既目標！
我一定要有女溝！
 
依一刻遊戲畫面入面，有既就只係DEBUFF既倒數。
 
因為時間仲早，所以我決定登入左隻game先，睇下有人番到未。
好耐無見過個團頻會係依個鐘數咁小人，上一次已經係岩岩開團果陣。
 
依家就只有四隻小學雞同埋追風on左，我同佢地無乜兩句，所以除左打招呼之外就乜都無講。
 




我自己一個去解每日任務，解到七七八八既時侯文雀上線。
而厹風一見到文雀上線既通知，即刻就搖晒尾咁迎接佢。
 
「番到屋企拿？屯門去西灣河咁快就到？」
「我唔係住西灣河。」文雀唔知係唔記得自己講過乜定係特登，但係佢依家咁講同「我就係唔想你送我番屋企，吹咩？」無分別。
 
「你唔係約左人架咩？」文雀反擊。
「哦……佢地甩左我底，咁我咪番屋企先囉。」追風敢怒不敢言，「我就係唔鐘意送你番屋企，吹咩？」之類咁有性格既說話，厹係講唔出。
 
我一直係到等呀方online，想睇下佢今日係唔係食錯藥。
但係等到一點零鐘都唔見佢on，亦都見唔到蜜糖on。
 
嘩！佢地唔會發展得咁快掛？
我唔想為左條戇尻搞亂自己既生理時鐘，就算佢真係有得啪啪啪都唔關我事，所以我點零鐘就訓左。
第二朝一起身既時侯，全團依然係冷冷清清。




 
我見到係咁就主動叫左我老母一齊去飲茶。
飲完番黎十一點鐘，先開始有人出現。
 
軒仔同鱷魚已經起左身。
「琴日你地玩得開唔開心？」軒仔問。
老老實實，無乜野值得我特別開心（尤其係全程被閃好不爽），但係都算不過不失。
 
「ok啦，不過鱷魚真人我真係想像唔到。」
我毫無忌諱咁係鱷魚面前咁講。
「我都慣架喇，不過我見你平時串呀夜毒，佢琴日出到黎都唔似你平時所描述一樣，我都好意外。」
鱷魚只要隔住左個螢幕，個大佬feel即刻番晒黎。
 
「唔單止你，我都好意外，因為佢平時都唔係咁。」
「唔通因為有拖拍就唔同晒？」軒仔搭句嘴。




 
「佢兩個琴晚有無on？」
「無，我等到點幾鐘佢地都無出現過。」
 
「唔通……… 」軒仔既語氣勁奸。
不要再說了！連呀方都有蝦條，而我就仲係青頭仔？
 
冷夜已經上線。
 
異端審問會即將開始。
「琴晚去左邊？做乜唔on呀？」
我即刻發問，正路黎講我地係會say下hi先。
 
「我？送蜜糖番屋企囉。」
毒撚方無轉灣末角咁答，就好似話「係呀，我係上佢屋企就地正法佢，你班毒撚係唔係唔抵得丫？」咁。




 
「送到成點都未番到屋企？定係琴晚係人地屋企過夜呀  」
軒仔就輕鬆過我好多，佢係出於八卦性質咁問。
 
「無啦，蜜糖係乖女黎架。」嘩，幫人地講說話添。
「對你好失望！」軒仔咁講，但係我都鬆一口氣。
 
我怕蜜糖識耐左毒撚方會後悔。
 
「你呢？你琴晚同文雀一齊番去又點？」
「woo 」
「有人有隱瞞喎！」連鱷魚都咁講我。
 
「我琴晚好早番左屋企喇，唯同追風佢地可以做我人証。」
「原來你更加令人失望！」軒仔，乜原來你咁八！
 
「我要澄清，我對依種女人無興趣，而且我唔似呀方咁，見一次了解唔深就拍到拖。」
「乜你燒埋我果疊架？仲有，我唔準你抵毀蜜糖！」醒下啦呀方，你識左條女一日咋！
 
「將我同依種男性相提並論，係對女生既恥辱。」
咦？文雀幾時on架？
 
「你幾時on架？」軒仔好好奇咁問。
佢本身比我個印像係好成熟，但係依家破壞晒。
 
原來網上同現實係可以相差咁遠。
 
「就係你地抵毀緊蜜糖果陣。不過有言在先，我對細過我既異性亦都無興趣。」無啦啦我又收左張好人卡。
 
平時係團頻唔出聲既文雀，今日存在感激增。
「講番呀夜先，你琴晚幾點番到屋企？」八公軒續道。
「五點左右囉。」
 
「咁夜先番到屋企，仲唔係去左  」
「我去到柴灣果陣已經十一點幾啦，之後蜜糖叫我陪佢行一陣，我咪行囉……點知行到成一點幾……果陣已經無晒車。我要搵車番屋企，轉黎轉去，番到屋企果陣都天光…」
 
「hahahahahahahahaha」
「哈哈哈哈哈哈」
「lol」
「你看看你！」
 
成個團頻即刻比一堆恥笑訊息沖洗。
但係知道條毒撚無蝦條，我都安心啲。
 
我認我係一個仆街，so what？
 
過多一陣蜜糖就on左，連團醫都出現，我地已經夠人打副本。
打副本果陣，「蜜糖剩係識得補呀夜」依個題目不斷被抽水。
 
一個坦王，一個醫師，仔細諗一下都覺得理所當然。
 
簡單黎講，假期既最後一日，我就係毒住咁過。
黎到夜晚九點幾十點，debuff既時間已經倒數完畢，但係乜野都無發生。
 
不過無事發生係一件好事，所以我都無去深究。
平淡既一日過去，聽日就要番學。
 
總結今個假期，相比前幾年既新年假都尚算充實。
今日真係好開心呀，聽一日定會更加開心架姐，你話係咪呀？哈姆太郎？