如果你既人生好似打機一樣……: 8.9, 失去既主角光環
「好，遊戲結束，平民方獲勝。」
「YEAH！」YEAH得出既得紬。
其他已死既正義方全部都搖頭嘆氣。
「波仔，你搞乜呀？呀方好明顯係吸血鬼啦！」鱷魚問。
「無，係我心目中，紬都有嫌疑。」我到依家都好唔相信。
「紬既身份我一早查左，佢唔係吸血鬼。」警長梓道。
「你又唔講？」紬施以怪責。
「你諗住你條契弟會好早死架嘛，咪廢事講囉。」梓一臉無辜道。
「究竟成件事係點？點解蜜糖一直補呀方佢都會變到吸血鬼？定係蜜糖講大話？」
蜜糖佢睇起上黎無乜野，依條女睇黎對勝負根本唔志在。
「佢無講到大話，等我解釋一下頭先發生左乜事啦。」呀軒說道。
「首先解釋下所有玩家既行動習慣，其實都唔複雜，按人際關係就估到。警長梓佢首先查晒自己既朋友先，但係由於回合不足，所以佢查到既全部都係平民。
然後，呀唯一開始就好積極咁想搵兇手，但係第二個回合仲未搵到，直至第三回合，佢終於冰中追風。
佢應該係以為隻醫會同自己一樣，會善用自己既特性去搵兇手，所以每回合會醫唔同既一，但係見到蜜 糖既方應果陣，佢懷疑左；所以佢決定冰行險著，試下冰蜜糖，睇下佢係唔係醫。」
唔怪得呀方會變成兇手！
「之後就如大家所見，呀夜變成吸血鬼。雖然無十足既証據証明追風係兇手，但係呀唯都覺得係追風既 可能性非常之大，所以要求處決佢。梓因為唔想殺錯人，所以決定用左自己既能力肯定追風身份先再
投票；雖然呀唯冰中左追風，但係追風同呀夜都估到呀唯既舉動，所以決定兩個人殺同一個人……同
一回合，呀梓終於肯定左追風身份，所以下一個回合佢就要求處決追風。」
呀唯同梓既貢獻都非常之大，係佢地令到兇手人數維持係一人。
「呀梓其實都好明顯咁表露左自己身份，目的就係想隻醫補自己，但係蜜糖就一概唔理，剩係補呀方， 係到助紂為虐……其實依到開始，好多人已經肯定左蜜糖係醫師同埋佢剩係補呀夜依件事。果個回
合，梓查左波仔身份，見到佢係魔法師，就知道蜜糖依然係醫師，按蜜糖既習性一定係救呀方，所以
自己死硬。」
依一點我都估到……如果我早一個回合搶身份的話，結局會好唔同。
「第七回合果陣，文雀留意到呀夜唔係吸血鬼既盲點，所以開始要求處決呀夜。果陣其實文雀都唔係好肯定，但係因為佢留意到醫師轉左人，所以佢肯定自己一定會比人救到，所以先決定處死呀夜……依部份應該留番比文雀自己解釋。」軒仔望向文雀。
「第七回合，軒仔問完魔法師用唔用能力之後靜左好耐，所以我就估到魔法師用左能力；之前隻醫咁樣都唔救警長，再咁落去一定會輸，我相信隻魔法師都會留意到……所以我就估法師搶左蜜糖既身份。亦因為我考慮到呀夜有嫌疑，所以想處死佢……因為隻醫實救到我，所以就算殺錯人都只會係死一個人，但係疑犯就得番律同紬兩個……」
文雀望向我同鱷魚，然後問：「你地邊個先係魔法師？」
「我……」我死死氣地回答。
「如果我係你，我明知隻醫係蜜糖的話，我會搶呀夜既身份。雖然咁樣係好冒險，但係以小勝多先算係強者……不過其實殺手殺鱷魚同殺我都比你救左果陣，我地已經嬴左，做得好。」
文雀竟然讚我，就算係我做錯左決定拖長左個遊戲……
聽到之後，我反而覺得更羞愧，我竟然一廂情願地相信自己既朋友唔會害我……
到最後，我竟然被呀方殺左！
「鱷魚，我想知你點發現呀夜係兇手。」軒仔問。
「其實好簡單，兇手犯左個好大既錯誤。一，佢無嫁禍比文雀；二，佢無殺到醫。其實醫生係邊個真係好易估，如果我係兇手，我一定會殺醫先……係第六回合，呀梓講左果番說話，除左代表法師未換身份，仲代表左 － 呀梓用左能力係波仔身上，亦即係自己身份未曝光。因為警察用能力既次序係早過殺手，如果我係殺手的話一定殺左醫先免除後患，反正已經知道梓係警察的話，遲一回合先殺都無問題。但係佢唔殺，因為佢知道醫係蜜糖。蜜糖既存在對邊個最有利？顯而易見。我之前唔投讚成既原因，係因為我仲懷疑緊，而且佢決定殺文雀果一刻，我地已經嬴左。所以我就放長黎玩。」
…………原來鱷魚佢都見到個盲點。
我望向呀方，剩低我仲想知道既事就只有一件。
「點解要殺我？」
「哈哈……因為我唔可以殺蜜糖，佢一路都好支持我；鱷魚的話我知道一定有人會救佢，我本身殺文雀都係因為想設個『規律陷阱』等係必要時先用，但係我諗唔到咁多，結果行錯一步。紬的話，我好清楚佢係另一個有嫌疑既人，如果殺左佢的話就等於自爆，為左自身利益著想亦都無可能殺佢。最後可以落刀既人就得番你。」
我沉默。
估唔到呀方都有腦諗野，更加估唔到佢寧願殺我都唔殺蜜糖。
唔通得蜜糖支持佢？我一直都相信住佢，文雀同鱷魚投票我都反對，點解要揀蜜糖唔揀我？
呀方拍拍我肩頭話：「唔好咁啦，遊戲黎姐。」
「好，玩完喇，大家仲有咩可以做呢？」
遊戲係完結，但係我仲有一個心結。
雖然我知道依個只係一個遊戲，但係我心入面都係好唔舒服。
平時只有我恰呀方無佢恰我，依家無啦啦比佢反客為主，我都好驚訝。
唔通蜜糖就係呀方果條變身腰帶？一戴左就可以由毒男變身為蒙面超人杜門卡遜？
但係我一望望蜜糖個樣，又諗番起頭先零入面見到果一幕，總覺得有小小唔簡單。
蜜糖究竟係咪真心想同呀方拍拖？
呀方到底會唔會比人厄？
我地玩killer之後，繼續圍住個爐bbq；小學雞組自己繼續打芒亨，偶然都會搭嘴一兩句，但佢地係今日黎講只係配角。
主角既光芒完全比呀方搶走。