如果你既人生好似打機一樣……: 8.7, 魔法師之一手

又一輪沉悶既指令，我留意到雪妖，兩個殺手同醫師都揀得非常之快。
就係咁，回合結束。
 
「回合結束，一人死亡。」
一人死亡？
 
正路黎講兩個殺手，應該死兩個，但係考慮到雪妖，醫師既存在，死一個既可能性都唔係無。
 
「被殺既係唯，請你翻牌。」
唯搖頭嘆氣。




 
上局唯想追風死，如果追風係兇手，佢真係會殺唯？
但係以上局殺手爽快既作風，佢一定好有信心。
 
跟住落黎，就要睇下唯係乜野身份。
九號，即係雪妖。
 
翻牌一刻開始，唯不可再發言。
佢睇起上黎好唔忿氣。
 




「有無人想發言或者投票？」
「有，我要求制裁追風。」
 
提出制裁既係梓。
 
「有趣有趣，上一回合投反對既你點解忽然間改變立場？」
「如我所言，我唔想冤枉好人。」
 
我完全搞唔清楚眼前既狀況，如果呀梓係殺手的話，佢既戲可以砌低黎耀祥。
以殺手既立場黎講，越多人死越好，即係上一個回合佢就應該投YES整死追風。




 
「追風，又係你喎，你洗唔洗辨護下？」
「我有無咁蠢去殺呀唯先？咁樣會唔會太明顯？」的確，如果我係殺手的話我唔會咁做。
 
比人嫁禍？
 
「我係差人，我已經知道你既身份。」梓冷冷道。
 
「…………」
對於梓既爆炸性發言，無人夠膽出聲處理。
因為依家比人誤會，危機性好大。
 
再次進入投票環節，輕音部剩低三個都投ＹＥＳ；而文雀出於各種私人恩怨都ＹＥＳ左。
要多一個人變節，追風先會被處死到。
 




「ＮＯ。」「ＮＯ。」閃光組投左兩個ＮＯ。
然後到我，仲未有証據顯示到追風就係兇手，梓既兇手然後誤導其他人既可能性一樣存在。
 
「ＮＯ。」最後我都投左ＮＯ。
得番落黎既就係團長大人決定性既一票。
 
「ＹＥＳ。」
「好，五對三通過處決追風。請追風翻開你既身份牌。」
 
點解鱷魚會無啦啦轉軚？
 
「開之前，我可唔可以問下點解你會改變立場？」追風問。
 
「因為唯係冰巫，而第二第三夜殺手殺唔到呀方，所以呀唯冰中殺手既機會好高。雖然無法証實到，而且醫師救呀方既可能性亦都存在……再加上本身反對既梓言之鑿鑿咁話你係殺手，我覺得都信得過。不過有言在先，若果你唔係兇手的話，我下回合會要求處決梓。今次投YES，對平民一方黎講點都係有好處。」
 




高招！佢唔指解釋到個決定，仲將左有殺手嫌疑既梓一軍！
 
鱷魚雖然佢個樣好細個，但係講出黎既野非常之井井有條，就如平時網上既佢一樣。
果然人不可以貌相，亦都係因為有網路世界依個平台，鱷魚先有機會一展權腳。
 
追風聽到之後搖搖頭，翻開自己既底牌。
KING，殺手。
 
「好！」在場所有人都叫一聲好。
雖然口裡面咁講，但係我地其中一個就係吸血鬼。
 
「拿，我無講錯啦！我今次冒險指証追風，醫師記住要保住我！保住我就嬴硬！」梓好興奮咁講左依一句。
 
雖然呀風真係殺手，梓既嫌疑消減唔少。
但若果佢係同追風夾埋做一場戲誤導所有人？




 
「好，廢話小講，跟住落黎既係第六夜。」
夜幕低垂，一輪詢問。
 
「法師請張開眼，是否需要使用能力？」
依家我幾乎肯定蜜糖就係醫，而且佢剩係用能力救呀方。
 
下一回合梓被殺死既機會好大，我到底搶唔搶醫既身份救梓好？
醫除左「救人」之外，其實仲有一個好重要既隱藏功用，依家既我……好需要依種效果！
 
經過一輪考慮，我都係決定唔用效果住。
我驚蜜糖係平民，雖然我都頗為肯定，但係呀方自己係醫既可能性都存在住。
 
以呀方既淆底仆街性格，佢做醫狂補自己唔出奇。
 




考慮到依到，我搖搖頭。
 
「明白，魔法師請閉眼……警察請開眼，指定想鎖定的目標。」
「唉……仲有魔法師，即係今個回合我死梗啦……」
 
來自呀梓既聲音。
聽到梓講依一句，我無感到不安，反而仲令我估到跟住落黎有咩會發生。
 
「第六夜結束，一人死亡。」
我唔意外，因為好合理。
 
「呀梓死亡，請你翻開身份牌。」
「搞錯呀，隻醫識唔識玩架！」呀梓好氣忿咁翻牌。
 
回想起頭先佢果句睇起上黎無乜野既句子其實包含住好多訊息。
 
一黎，代表佢真係警察；佢唔係尻吹。
按佢第一次反對處決既語氣，佢意思係想查完追風先再作決定。
 
而第二次，因為小左唯一票，佢需要有多一個人支持先可以殺死追風，因此佢兵行險著暴露自己身份。
佢之所以咁樣做，係因為相信隻醫會救佢，可惜隻醫係戇尻既。
 
因此佢期待魔法師，亦即係我進行身份交換，然後代隻戇尻醫救佢。
而因為魔法師用左能力之後，就唔會再有魔法師既身份存在（魔法師搶得身份，對方變成平民）。
 
雖然比隻廢既醫累到我地依面死左隻強力DPS，但係佢始終都叫係成功殺死左一隻王。
 
此外，我應都掌握到　－　只要邊個宣告要求制裁，就會有被殺既危險。
所以隻醫係好易救到人，但係隻醫實在太戇尻，所以放棄左咁好既機會。
 
「有無人想發言？」
全場沉默。
 
「咁第七夜依家開始，請所有人合埋眼。」
我要行動了。