如果你既人生好似打機一樣……: 8.5, 魔法師係終身職業

飲飽食醉，無理由唔搵啲野玩。
「各位團友。」鱷魚道。
本來一呼百應既鱷魚依家完全無叫座力。
 
軒仔係隔離見到，於事幫手。
「各位團友。」所有人即刻停晒所有動作，望向軒仔。
 
「為左促進我地既友誼，不如玩番個遊戲呢？」
「有咩遊戲好玩呀？捉依因？」輕音組其中一隻小學雞發問。
 




「其實我都有考慮過，不過我唔想大家太過體力勞動，所以都係玩番啲斯文小小既遊戲。」
說畢時，軒仔拎出一副啤牌。
 
「唔係鋤DEE下話？」我暗道。
「我DEE王黎架喎！」追風搖晒尾咁。
 
「我地玩KILLER，有無人玩過？」軒仔一路講既時侯，抽出所有葵扇牌，煙至KING已經齊左。
KILLER？屌你正呀喂！
 
KILLER，故名思義係一隻殺人既GAME，可以話係BANG同三國殺既始祖。




遊戲入面會有一個殺手不斷殺手，其他人要估邊條契弟係殺手並將佢繩之於法。
 
本身隻GAME剩係得殺手一個職業，最多都係得護士。
但係咁悶既話，邊可以令我地滿意？
 
於事好多人開始加鹽加醋，依家既KILLER已經有好多種唔同既角色。
 
「我估你地有人會唔識玩，既然係咁由我做主持教你地玩啦。」
軒仔抽出葵扇二同三，放番入卡組入面。
 




「每張卡代表唔同既身份，我地玩既版本係有殺手、有醫、有警察、有魔法師、有雪妖同吸血鬼既版本。」
我聽到一堆名詞，好彩我有小小底，唔係聽完都會頭暈。
 
佢開始解釋唔同角色既效果，第一隻係ACE。
「ACE代表警察，佢既特殊能力係每回合確定一個人既身份。」係依種估身份既遊戲，依個能力簡直係強大無比！
 
然後軒仔拎出一隻KING：「KING代表殺手，每回合必需要殺一個人。遊戲既目的就係要搵出殺手並且通過過半數既投票進行制裁繩之於法。」
「制裁即係點？」小學雞問道。
 
「被制裁既角色必需揭開自己既角色卡而且離開遊戲，唔可以再參與討論；如果目標係殺手的話，其餘所有人獲勝；若果目標係殺手以外既角色，遊戲繼續。」
「即係死左？」
「無錯。」依到非常好理解，所有人都點點頭以示明白。
 
然後佢再拎出Q：「囡代表護士，每回合都可以救一個人　－　包括自己。該回合目標就算被殺手指定，都可以生還。不過就算生還左，各位都可以知道殺手指定既係邊個。」
一隻好既護士係可以拯救世界。不過，一隻柒既醫會剩係補一個人。而失去一隻醫既真正用途。




 
下一隻既係J。
 
「J代表既係吸血鬼，當吸血鬼被殺手擊殺果陣，吸血鬼將變成殺手二號；但係係吸血鬼變成殺手之前，勝利條件同平民一樣　－　捉到殺手。」
吸血鬼係另一隻扭轉戰局既角色，如果係早期有兩個殺手的話，每晚殺兩個人再加上投票制裁，兩三個回合平民就會全滅。
 
軒仔翻開10。
「10代表既係魔法師。唔同其他角色，佢既能力只可以用一次。魔法師既能力係強奪對方既身份，使對方變成平民。」
「如果搶左殺手既身份，咁對方咪知道？」文雀收埋左本書，睇黎佢都充滿興趣。
 
「無錯，所以魔法師放技既時機同對象好重要；如果真係搶左殺手的話，你就要好好用你既說服力誤導其他人。」
講就易，玩依隻GAME大把ON9仔係制裁果陣亂咁叫YES。
 
然後佢打開9號牌。
「9代表雪妖，雪妖可以使目標能力無效化。包括殺人，搶身份，醫人又或者查身份；但係吸血鬼同魔法師既能力唔會因此而消失。」




雪妖可以話係依個遊戲入面最大既變數，因為依個職業增加左好多可能性。
 
最後佢將4至8一次過翻開。
「最後就係平民，毫無特殊能力；不過獲得平民既信任都非常之重要。」
雖然佢地無特殊能力，但係佢地都可以投票。
 
「大致就係咁，無問題的話遊戲開始。」
 
軒仔將十一張牌洗完之後向右手邊順時針咁傳過去。
班小學雞要搞完一輪先揀到，而文雀就只係好隨便咁拎左頭果張。
 
「等我殺晒你地啦！」追風抽左一張，然後再傳比蜜糖。
 
「揀邊張好呀？」
「依張啦。」依Pair人越睇越眼冤。




 
黎到我依到，已經得番兩隻牌，我求其揀左一隻之後傳左比鱷魚，就係咁，所有人都有自己既角色卡。
 
我地既位置順序係：梓→紬→律→澪→唯→文→風→糖→方→我→鱷→梓 （輕音小學雞自己帶黎果個朋友）
睇落去好似唔係好重要，但亦都可能會見到小小規律。
 
但係唔好講咁多，即刻開左牌睇下我要做乜角色先。
我一開，嘩屌！
魔法師。
 
打機已經係玩開法師既我，黎到killer一樣要做法師，唔通我逃唔過廿五歲做童貞魔法師既命運？
雖然我個能力得一次，但係都好過做on9平民陪玩。
 
「各位確認好自己身份未？千祈唔好比人睇。第一晚開始，請所有人合埋眼。」
我合上眼細心聆聽，睇開liar game既我知道任何風吹草動都唔可以放過。