如果你既人生好似打機一樣……: 5.4, 毒L溝到女=死亡FLAG
而依一刻，我聽到打開門既聲音，應該係四樓！
此路不通，想搵番桑妮要兜路！
於事我就係二樓就離開左中樓梯，然後去前樓梯既方向移動，雷達無特別反應。
我經過男廁，已經到達左前樓梯。
「劉驚波。」
我回頭一望，係光管腳！
點解雷達會見佢唔到既？
由於太突然，我完全做唔切任何反應，而光管腳就一手捉住我，將我推埋前樓梯中男廁之間，一個放雜物既暗角。
「呀光，有無見到條仆街？」係猩猩把聲。
「無，我一直企左係到好耐都唔見有人經過。」咦！佢竟然無篤我出黎？
唔通係因為依個原因，所以雷達無顯示到佢？
「見到佢就同我講，頭先刀疤強係中樓梯發現大熊暈左，應該係條友做，見到佢千祈唔好放過佢！」
「哦。」然後我聽到腳步聲，猩猩已經離去。
「無事喇，出番黎先講。」
「點解你要幫我？」我滿頭問號。
「猩猩想搵你尋仇，因為佢以為你同佢爭女。」
「我知，但係我無。」
「佢就係咁既人，太過魯莽。其實我一直都反對佢依種諗法。」佢將聲線盡量壓低，廢事比其他人聽到。
「咁你又幫佢？」
佢嘆一口氣，然後話：「雖然我同其餘七個人唔同，我本身係一個循規蹈矩學生，但係兄弟叫到，唔通我托佢手肘咩？做兄弟就係咁，你會努力阻止佢做傻事，但係決定左果陣，你又會陪埋佢一齊傻。」
佢地之間都有一份深厚既友誼。
「我諗你都應該會明我地之間既關係，咁大隻死貓你都肯幫Ace啃。傻既都知道范雪怡同Ace先係堅料。」
「依條都係流料，佢地兩個之間無野。」其實點解釋D消息，好多時都會比自己既主觀引導左。
一條友一比人蓋左個毒撚圖章，之後佢無論做乜野都會被認定為毒撚所為。
「乜係咩？不過你同佢兩個熟啲，我諗你條料先係堅料。點都好啦，下面門口得番火機一個，如果你夠大熊打的話，應該唔會唔夠火機打，要走趁依家。」佢提供左好有用既情報。
但係我唔可以扔低桑妮自己一個走左去。
「唔得，我要番上去，我要接一個人。」
光管腳諗一諗，然後話：「哦，我明喇，祝你好運。」
一路留意住雷達，繼續由前樓梯直上六樓。
四樓上五樓既時侯，發現前面有人，於事我調頭想落番去，但同時下面一層亦都有綠點接近。
今次仆街鳥，比人夾擊？
兩個打一個點都死，加上頭先打大熊果陣體力已經有一定消耗……
要強行突破！
我跑上四樓，然後其中一隻我唔識既金剛就係我面前出現，我一手將佢推開然後直奔走廊到後樓梯。
「咪走！」隻金剛係後面死跟，於事我需要打開遊戲視窗，代表我肺活量既氣力計不斷下降。
終於跑到上六樓，見到代表住桑妮既藍點正係中樓梯入面。
到喇，我無減慢到速度，因為當務之急係同桑妮會合先。
我用僅餘既氣力打開道門，然後撲左入去，桑妮就係左手面既牆角到等緊我。
見狀之後我即刻放心晒，然後大字型咁撻左係佢面前。
「嘎……嘎……」
「你無事嘛？」我跪左係我頭後面問。
「如果……有人工呼……嗚………」
我無機會講晒佢，因為被另一對嘴唇封閉住既口係發唔到聲。
一陣陣暖意傳入我既喉嚨，伴隨而來既仲有聞到既幽香，眼睛見到既係無發相信既景象。
桑妮竟然將我開玩笑既請求付諸實行！
「嘎……」
交錯既雙唇終於分開，桑妮見到我順番條氣即刻別過臉，然後問：「你……你好番啲未？」
我既氣力BAR就同我身體既某部份一樣谷到超衡，對唔住各位高登仔，我只係一條青頭仔，各位期望既除晒佢啲衫就野正法我無勇氣做。
女神係用黎瞳景既，當你真係成功征服左果陣佢既價值就會直線下降，依家既我仲好享受桑妮同我之間保持住既距離，所以我要留個目標比自己。
當然啦，D班班人係唔會因為你打緊茄輪就停晒手唔搵你；你估隻隻怪物都會等班超人企定定變完身合完體先郁手咩？就係樓下五樓，傳來開門聲，同埋雷達上越黎越接近既綠點。
我無時間理咁多，我即刻拖住桑妮走出左天台往前樓梯奔過去，但係被光管腳同另一隻金剛封閉住。
光管腳係佢朋友面前應該唔會放過我地，雖然見到佢個表情有些許抱歉，但係都於事無補。
依家就得番後樓梯，我跑過去既同時，後樓梯亦都比包括暴龍在內既三隻金剛封住。
無喇，今次無喇。
我緊桑妮隻手然後話：「無事既……無事既……」
而此刻中樓梯既門打開，猩猩慢條斯理咁走出黎，同時幫雙手鬆緊根。
唔通毒撚真係無資格同女仔KISS？一旦做左就要進入Dead End？我唔想比人扔落街呀……
更加重要既係，一旦我衰左，以佢地六個既性格桑妮會好危險，咁各位期待既加甜就可以出現。
而且係重口味輪住黎果隻，我唔可以比依個情況發生！
如果我學到大字燒，十萬伏特又或者石修催眠法的話，眼前場景要解決根本唔係難事。
非常可惜既係我學唔到依啲招式，我係考試期間都多睇左電視，發覺學習條件有幾個：
一、必需要係真人做既動作，特攝片既Rider kick又或者係撻出愛火花既雙手割都因為有真人示範，所以我先學到；亦因此卡通片入面既大字燒我係學唔到。
二、所有後期添加既特殊效果無用，我做到既只係力度同動作。所以Rider kick可以踢啲火呀，踢條龍出黎果啲我完全複製唔到。舉例來講，如果我翻睇戀愛自由式，去學招破冰轉身我係學到，但係用出黎果陣唔會成個泳池都結晒冰咁
三、物理影響降低但依然有效。舉例黎講，有啲特攝片，個超人會跳到幾層樓咁高；我都可以支付相應既氣力去增加跳既高度，但唔會好似劇中咁過份到真係跳到幾層樓咁高；又或者啲超人可以踢穿舊石，而我最多係踢到有裂痕。招式既威力同我本身既能力值係有相輔相成既作用。
四、石修催眠術無效，因為催眠本身係一種智識，催眠要造成效果，需要既唔單止係動作咁簡單；唔信你試下對住你老母用石修催眠術，睇下有無用。