如果你既人生好似打機一樣……: 4.5, 於作文考試時有靈感係好事，但係靈感多到掛住回味而唔寫就係大忌

水牛出現，隔離既仲有呀方。
「考成點呀？」考試之後例問。
 
「我頭先，簡直係徐志摩上身咁！」呀方你竟然識徐志摩？
「我輕輕的走，就如我輕輕的來……」佢劍指向天，然後大力一揮右手：「我揮一揮衫袖，不帶半邊雲彩。」
 
「係衣袖，同埋一片雲彩。」水牛指出佢既錯處，但係識得背番一兩句詩既呀方已經覺得好勁，我為表示讚賞，所以完全無半句吐槽。
 
「呀波，頭先發生乜事？」指正完呀方之後，就算係坐到好前既水牛都知道有野發生左。
「下？有事發生左咩？我頭先訓著左乜都唔知喎。」




 
「無乜野，無穿無爛，陣間仲可以繼續考試，但係閱讀卷就凍過水。」
係呀方面前，我唔方便將頭先發生既野同水牛講。
 
「之後考既係寫作，琴日我同你溫過議論文要點寫，如果題目岩你寫的話應該唔會太難。」
水牛鐘意寫議論文，因為佢覺得如果對題目熟既話，議論文係最好寫。
 
一黎議論文有正方雙方，每邊都講下好快就寫到唔錯既字數。
二黎如果寫啲老師岩睇既野，評分亦都會高啲　－　雖然老師唔承認，但係咁樣對個分一定有影響。
三黎，水牛本身係一個好實際既人，抒情文果種無病呻吟對佢黎講並唔討好，記序文又太唔突出。




 
一論閒聊之後小息鐘又響，我要收拾頭先既心情繼續考試。
 
入到試場，我好驚頭先既情況再發生，當份卷派到我面前既時侯，我用左成分鐘先敢掂佢。
 
無事發生。
我即刻鬆一口氣，然後正正常常咁打開份卷。
 
我要搵既係議論文。
「你認為中學生應談戀愛嗎？」行貨到仆街既題目，就算係我都貼得中，唔洗搵蕭源。




「試加上個人經驗及意見闡釋你的立場。」
 
個人經驗？我依條毒撚撚有咩！
 
雖然我準備得最多既題目係議論文，但係面對咁既情況，我都係放棄左。
抒情文既題目非常簡潔：「雨後清晨。」
 
下雨的聲音十分嘈吵，把昨晚打機至凌晨三時才睡的我吵醒；那種濕漉漉的感覺最討厭了！
 
以我既性格，我一定會寫啲咁既野出黎，所以都係算勁數。
記序文題目：「誰是你的最好朋友？詳述你與他或她相識的經過。」
 
係依條喇，講起上黎我係點識呀方同水牛架呢？
是咁的。
 




我踏入禮堂，對我黎講依到仲係一個未知既世界，一切事物都好新奇。
每個小學雞轉變成中學牛既時侯，都會經過一個叫「迎新」既洗禮。
 
雖然無大學果啲要伸晒脷既活動咁好玩，但係比賽型既活動都算係最易令一班人團結既活動，幾時都係。
 
我地係禮堂集合，聽完校長一論尻UP之後，就番入班房互相自我介紹，有啲人會冷係好動，冷係外向咁做啲奇怪既小學雞舉動搏人注意，亦都有人一粒聲都唔出。
 
只有一個人例外。
 
「各位同學，我叫龐毅斯，英文名Ace，大家亦都可以咁叫我。」無非常鋪張既開場白，但係佢既言談字裡行間都充滿住自信。
 
雖然任個人講完野之後，所有人都會象徵式拍手掌，但係佢渗出黎既果種氣質，係同其他人唔同。
我發出既掌聲係非常之真心。
 
無人會否認第一印像既重要性，係依一刻，眼前既Ace已經為我地留下作為領袖應有既印像。




「劉驚波，下一個到你。」
 
男性，上至呀伯下至小學雞都有一份想同人比較既心，前面既做得好，我要做得更好。
 
「各位同學，我叫劉驚波，我無英文名，但係你地可以叫我做呀波。」小學果陣係高材生既我，用左非常之強既語氣去講，相比Ace，我表現出既係另一份自信。
 
但另一個問題係，我好矮。
 
果陣既我仲未發育，身高係全班最矮既果一兩個；當你得咁上下既身高，就算你講既野幾有說服力，幾自信都一樣無用。
 
無人放我係眼內，就除左Ace。
 
佢眼神一直望住我，佢無好驚訝，亦都無任何特別既反應，而係一種老朋友既眼神。
佢既眼神帶住與年齡不相付既智慧，由我第一日識佢開始，佢已經係一個好特別既人。
 




「我係游立方，你地可以叫我靚仔方，我優點係無缺點，缺點係無優點。哈哈哈哈……」
毒撚方既煩膠本色，係第一日已經顯露無遺。小學雞到爆既自我介紹，冷好笑，到依家一直都係。
 
自我介紹完之後，我地有一小段時間自由活動，一般人都係好拘熨，但係Ace唔同，佢好主動就走黎我面前：「呀波。」
 
「係，你叫做……」
「龐毅斯。」佢個名對中一生黎講其實真係幾難記。
 
「A屎你做乜咁主動呀？唔似你喎。」正如我所講，呀飯由小一到依家只係得一年唔係同水牛同班。
佢既口吻同依家好似，但係聲音同語氣都十分幼稚。
 
「同你介紹，佢叫范雪怡，我地同一間小學。」雖然頭先每個人都有機會自我介紹，但係老老豆豆，邊到可以真正了解你個人？單係記個名就難啦。
「范同學你好。」
「唔好咁見外，叫呀飯得喇。」
「我地第一日識，我媽媽教我男女授受不親，所以都係唔好咁熟好。」




果陣既我就係咁小學雞，講埋啲依家我諗起都會覺得柒既野。
「係男人就唔好咁婆婆媽媽啦。」
 
中一時既呀飯就係依家既幼稚版，除此之外性格無乜大分別。
 
「今個暑假你做左啲乜呀？做乜唔同晒既？之前你好奄春架？」呀飯問Ace。
「我去左個夏令營姐。」夏令營依樣野我無參加過，我無屋企無咁多閒錢比我去參加課外活動，依個亦都係其中一個日後我成日縮係屋企既原因，但係曾幾何時我唔係咁。
 
基本上，Ace同我係中一好快就熟左，同呀方熟就係再遲一年既事。
果一年我同水牛唔同班，而我因為小學個底打得好，所以黎到中一果陣讀得好hea，一直hea到中二。
 
本身我唔打機，但係果排全班都打緊同一隻game，為左打入佢地圈子所以我都玩左。
更加仆街既係，呀方條毒撚坐係我隔離，次次上堂佢唔係訓教就係撩我傾隻game。
 
果陣我仲未意識到佢既戇尻，所以毫無芥蒂咁同佢傾計，就算傾既都係有關game入面既野，聽起上黎我都覺得有紋有路，但當我同佢相處耐左，就發覺佢真係好戇尻。
 
但係果陣，佢已經習慣左經常黎搵我，所以我都唔好意思趕佢走。
就係咁，我就同佢熟左。
 
回想完畢之後，我將頭先既回憶轉化成書面語，配搭極度煽情既文字寫落張紙到。
寫完之後仲有小小時間，我望住隔離既呀方，佢竟然仲寫緊！
 
鐘聲再響，收卷時間已到。