我去左間 Cafe 打工 , 想溝入面個 Mk 妹女同事: 女人都係午時花六時變既生物！

我想怎麼也好，牛奶妹腹中骨肉也是無辜，
 
這是她少年貪玩惹的禍，惡果自然是要受啊，
 
怎麼可以如此就把一條性命害掉，
 
「你點解可以咁狠心架？」我問她，「個個 …… 個個 ……
 
點都係你骨肉啊 …… 第日你諗返 …… 就會唔安落啦 …… 」
 


牛奶妹聽著只是怔怔的看著我，然後深深的嘆了一口氣，
 
「你根本唔明 …… 」她說著淒然一笑，我卻只想她是死不悔改，
 
「你今日可以落得一個，第日就可以有第二、第三個啦，
 
我 …… 我係唔想你泥足深陷咋 …… 」其實最錯的該是馬醫生，
 
替人墮胎這麼作孽的事，他做起來難道又能過得了自己？
 


「我明你係想我好啊，」她強撐起一個微笑，「不過唔好講我啦，
 
你頭先講咩小草啊？」
 
「啊，係啊係啊 …… 」我想此事來得比較重要，
 
牛奶妹還是個小女孩，以後勸加善誘的日子長著，小草的事卻是當前所急。
 
「佢 …… 佢呢 …… 佢係我朋友 …… 都 …… 都係馬醫生朋友 ……
 


咁我係度諗 …… 馬醫生佢可能知佢去左邊，咪上黎囉 …… 」
 
「哦 …… 原來係咁小事咋 ……
 
Mason佢都返緊黎，你係度等佢一陣啦 …… 」
 
牛奶妹笑說，仿佛是這間屋的女主人。
 
「係呢 …… 佢 …… 佢呢排無同你提起過類似既野咩 …… ？
 
又 …… 又或者 …… 或者可能 …… 你有冇發覺佢最近有咩唔妥啊？」
 
「佢有冇咩唔妥？」牛奶妹笑道，「無啊，我都好少管佢D野既，
 
竹生啊，做一個女人，有時候只要全心全意對一個人好就夠啦，


 
又或者咁講啊，有時對住一個人，知道得太多都唔係好事啊，
 
好似我同你咁啊，我地做朋友，我就淨係知道你好既野就夠啦，
 
其餘既你唔洗講，我都唔會問，人同人就係要有返D距離先好啊，
 
如果你知道晒我既野，你可能就會討厭我啦，」
 
牛奶妹有感而發，我聽著卻莫名其妙的，
 
「我好地地又點會討厭牛奶妹你喎，」我說。
 
「竹生你對人好，對人無機心，你唔會明啦，
 


不過啊，可能似你咁樣先係好事啊，
 
世間太殘酷，似你胡里胡塗，自己過得開心，其實先係最重要，」
 
我聽著只覺牛奶妹一個小女孩，能有多少歷練，
 
怎地竟跟我說起教來啊，喂，論資排輩我也該是她大哥哥才對啊。
 
「唉，其實我都有我既煩惱啊，我邊度係成日都開心？」我禁不住要說。
 
「你講黎聽下，睇下係咪真係咁煩？」她笑說，又大口大口的喝啤酒，
 
我想起這半月以來的煩事，不其然的又學她拿起來呷了幾口，
 
雖覺其味苦澀難當，但做人比一罐啤酒苦上十倍我也做得來，


 
其實多喝一罐，也就差不了多少，
 
於是我把這一個月以來跟小草的事都跟牛奶妹說了，
 
當然對於馬醫生的身份是含糊其辭，隨便找個人名代替，
 
「咁其實如果你知道個個男人係一腳踏兩船既，
 
你就應該同你兩個朋友講啊，你咁樣左瞞右瞞，長此落去都唔係辦法啊，」
 
 
 
我聽著連聲叫苦，牛奶妹剛才還跟我說甚麼胡里胡塗的過日子最幸福，
 


現在又說我該坦白一切，唉，女人果都是性情飄忽的，
 
「咁 …… 咁 …… 咁 …… 但係我驚佢會接受唔黎喎，」我說。
 
「接受唔黎都要接受啊，長痛不如短痛嘛，
 
你唔講比佢聽係害左佢啊，比著係我，
 
你唔講比我知我一定即刻同你絕交添啊，」
 
牛奶妹笑說，卻不知自己就是這樁情案的女主角，
 
「咁 …… 咁 …… 咁 …… 咁啊 …… 」我聽著滴下黃豆般大的汗水來。
 
「嗯？」牛奶妹微微笑著，「不過我都係講下架姐，
 
人地既事我地又邊理得咁多，都係陪你傾下計姐 …… 」
 
我卻想她所言成理，有些事總不能隱瞞一世，
 
若再讓牛奶妹她給馬醫生騙財騙色，我也實在太不夠義氣了，
 
「牛 …… 牛奶妹啊 …… 」我顫聲道，
 
要揭破如此殘酷的真相，也不是容易啟齒的。
 
「嗯？」她喝著啤酒，卻不知道真相正在向她進迫。
 
「其實 …… 其實 …… 」我正要跟她道明一切，
 
大門卻忽爾打開，馬醫生竟在此時回到家裡來了。