「突發」打打下丁比人捉左去研究所做實驗品: 目的

(呀鴉第一身視角)




「呯」，隔離傳出一聲巨響，「班細路唔係出左事呀.....」，比巨石分隔開左嘅六人，

佢地面前都係王牌小隊嘅人，「又係你！」，手手腳腳都插入刀片嘅男人，一二三四，分別係四塊，

我問佢「點解你會係道！」，第一次見佢嘅時候係我一入黎嘅時候，嗰時我第一次打沙包，就對上佢，





佢速度極快，出刀收刀都係一瞬間嘅事，係佢眼中嘅我只係隻蟻，一隻手指就可以殺死，

我好快就比佢打低左，順理成張，我代替左佢做沙包，由嗰刻開始我就以打敗佢為我係呢道嘅目的，

「呢把刀我就送比你，你要記住，每一把刀都有一個目的，希望你會明白呢個道理，

如果唔係你永遠都唔會成為一個出色嘅武者」呢句說話係我師傅同我講嘅，我係一個孤兒，

每一日都過住行屍走肉嘅生活，有野就食，冇野食就餓，直到遇上師傅，師傅唔止收留左我，





仲開始教我刀術，師傅就好似我爸爸一樣，教我做人，而頭先嗰句說話就係佢第一次比刀我嘅時候，

我一直都唔明，直到遇上佢。

「我冇義務同你講」刀片男終於開口，「答我一樣野，你叫咩名？」，

係開打之前知道對手嘅名係一個尊重，「刃」，知道左佢個名咁就可以安心打啦，我首先跑到佢前面，

拔刀向揮出一刀，「鐺！」一道強而有力嘅金屬碰撞聲出現，我頭先揮出嘅一刀，





比佢用手肘上嘅刀擋左，佢擋住我嘅瞬間，我即刻再順勢向下揮出一刀，今次冇再出現金屬碰撞聲，

刀片男向後一跳，輕鬆避開我嗰一刀，「進步左wo，但咁仲未夠」，

手肘上嘅兩塊刀片不由自主咁飛左出黎，血不停係佢手肘上流出，刀片飛到佢兩隻手前面就停低左，

好似等緊刀片男拎起佢一樣，刀片男拎起後，刀片上發出陣陣藍色嘅光芒，話口未完，佢將刀片拋出，

刀片一直飛向我嘅方向，刀片男同刀片嘅路線一樣，都係一直線咁跑向我，我手握刀柄準備迎戰，

刀片終於飛到我面前，近睇，原來嗰兩塊並唔係刀片，而係兩個彎彎曲曲嘅金屬，鋒利無比，

向我心口襲來，而刀片男都係一樣，係我比佢插中嘅一刻，「一閃」，我使出一閃黎避佢嘅攻勢，





再突襲佢背面，好明顯刀片男黎唔切反應，「再見啦！」我用刀係佢身上揮出個一字，

見到嘅並唔係血流成河嘅畫面，而我見到嘅又係兩個彎彎曲嘅金屬，

兩個金屬將我把刀卡住左兩塊金屬之間，想拎都拎唔到出黎，

「異能都用到啦，幾有趣呀，可惜係佢地面前都係冇用」，

刀片男慢慢咁轉身，兩塊金屬終於分開，我馬上捉緊我把刀，

「點解佢d金屬反應仲快過佢本人嘅，佢根本唔知我嘅異能，點解佢會反應得切嘅」

我心底出現大量疑問，刀片男拎起兩塊金屬以極速向我襲來，我馬上拔刀防禦，

一擊，兩擊，雙手都有武器嘅人，好處就係可以連綿不絕咁攻擊，而我只可以不斷防守，搵時機攻擊，





「係宜家啦」，當佢落空一擊後，我趁機一刀斬向佢左邊膊頭，我知道佢嘅金屬都會防禦，

見到金屬作出防禦時，我即刻閃去右邊，一刀見血，唔只見血，佢成隻手都比我斬斷左，

只見佢面無表情咁話「手，冇左有咩所謂」，突然跟住佢隻手跌左落地下嘅金屬飛番上黎，

「點解會咁架！」我驚訝地問，刀片男笑一笑之後話「我嗰d並唔係普通金屬，係一把古代武器黎，

宜家就比你見識下」，我聽到佢咁講，我即刻跳後，因為我都唔知一陣會發生咩事，

佢係心口拎出一粒寶石，我睇一睇咁熟口面嘅，「唔洗估啦，就係北極之星！」，咩話北極之星，

咁我地要搵咩呀，「我地一早就有北極之星啦！」佢將北極之星拋係半空中，





然後北極之星發出藍色嘅光芒，嗰種光同金屬上嘅光係一樣嘅，

「集」

刀片男一聲令下四塊金屬合而為一，發出極大嘅光芒！我本能地閉起眼，一開眼，見到嘅竟然係，

一把類似手裏劍嘅野，陣陣藍色光芒係把野身上發出，「今日就比你見識下咩叫力量，

你嘅進步只係微不足道！」

我拔刀，一步一步咁向前，「師父，宜家我要達到目的，打敗佢就係呢把刀嘅目的！」