廢青於中世紀魔法世界的生存法則: 72, 人類係柒完先會成長既生物

「……………」乜我呢個答案好出奇咩？做乜全車靜晒？
「唔……」兩名老坑非常懊惱，似乎呢個要求超出佢地能力範圍。

「異鄉人回歸故土，可謂聞所未聞。」

「我都未聽過，但係我識一個可能會知道方法既人。」回答我問題既係三葉，說畢後佢就企起身準備往房門走過去。
出面唔係千軍萬馬架咩？

「國立祭既時侯，果個人會黎白石鎮。」
大門打開，三葉毫不猶豫地踏出房間，最後留低一句：「你地既委託我接受。」




三葉離開房間之後，兩名老坑都好似放下心頭大石一樣，一幅射完精既嘴臉。

由於畫面太嘔心，於事我都急急腳離開審問之間，沿住旋轉石梯落返去禮拜堂，有三個人係到。
一個係非常困惑既伊曼，一個係忙於解釋既都鐸，仲有一個係火氣衝衝既三葉。

「小姐，拜託你，就一下。」

「都鐸先生，請你自重。」
呢段對話點睇都非常唔健康，十足係街邊勸人踏上魔鏡號既展開。





伊曼一見到三葉既一刻就好似見到救世主一樣，撲去佢旁邊道：「呢個男人原來係癡線佬黎！」
哦，係咩。

三葉同我都處之泰然，因為我地都好清楚都鐸係一個尾隨左人十年既超級癡漢，相信佢都好難突破呢個下限。
係呢個時侯，我已經明白三葉頭先走得咁急既原因。
「Ｍａｇｍａ　Ｓｐｅａｒ！」三葉一招火球轟於都鐸身上，但都鐸並無非常型棍地用單手檔住並吸收火球既力量，佢由火球直接擊中佢肉體，然後仲開始燒著左……
伊曼此刻已經目定口呆，雖然都鐸係個癡線佬姐，使唔使一句都唔問就出咁重手？
燃燒緊既都鐸跪左係地，好彩佢企既位置係一塊石地，周圍無地毯木凳之類可以燒著既野，若果唔係可以打定999叫消防員。
十數秒之後，都鐸身上既火炎漸漸熄滅，佢既肉體並無任何傷痕，但係佢既上身衫已經變成灰爐，一幅健美既男性軀體就此露出。利申非gay。
「抱歉，令你受驚。」





露出胸部既都鐸把握機會向伊曼道歉，但係伊曼既眼神已經唔再一樣。
「你就好，咁就令到個女人唔會再煩住你。」三葉對形象破滅既都鐸竟然流露出葡萄之情。

係一個寧煩勿柒既環境長大既我，好難理解三葉呢種寧願形象破滅都唔想受人歡迎既思想。
此時聖堂既大門被推開，有人大嗌：「邊個係都鐸？」
「在下正是。」半裸上身既都鐸說道。

「我要同你決鬥。」
一講到呢句，IP都唔使CHECK就知道呢條友係邊個。

全盛時期既蘭卡特可以柒幾多次？

好快我地就會知道答案。
＊　＊　＊





「其實蘭卡特係咪被虐狂？」我問。

「係都唔出奇。」伊曼回答。
係無乜娛樂既中古小鎮，食完午飯之後有咩好過食花生？
呢個就係此刻大草地上聚集左好多人既原因。
其實我好擔心，琴晚蘭卡特先柒完一次，若果今日佢再係全村面前柒多次，佢仲有無顏面留係白石鎮？
都鐸及蘭卡特二人企係大草地中間既焦土之上，我地關事既人就企得近啲，唔關事既人就企得遠啲，順帶一提頭先射完精既兩位老坑已經抹完地換過條底褲企係到準備食花生。
「不如就將呢次決鬥當係都鐸既就職測試，各位點睇？」伯雷主教作出左提議。

佢或者唔知道呢個提議已經幫左白石鎮避免另一次被核武轟炸既危機。
「老身沒有意見。」

「點解佢既就職測試簡單咁多。」三葉曲線話緊做低蘭卡特易過唱Ultranova。
「雖然我唔係特別想成為呢到既鎮民，但既然你地都決定左……」





「嬴左再討論。」唔知點解蘭卡特既語氣好似無之前咁囂張，但係行動上佢依然極之衝動。
蘭卡特此刻已經擺晒pose，然後問都鐸：「你無武器？」

「咦？我可以用武器？」都鐸此刻惡意賣萌，然後召喚出菱型紅晶道：「咁我就唔客氣。」
我低聲係三葉耳邊講：「你呀哥都幾厚面皮喎，鐘意虐菜？」

「又或者係條菜鐘意比人虐。」你又幾有道理。
同三葉相處左一段時間，再加埋知道左佢兩兄妹既真正身份，我都大概知道粒寶玉可以話係佢地力量既來源（雖然原理我依然唔清楚）。
「佢出全力喎，我地係咪應該去安全既地方暫避呀？」

「佢真係出全力的話，方圓百里都唔會有安全既地方。」然後佢頓一頓，再話：「唔係喎，其實有。」

「係？係邊到？」





「管理員小姐既附近，同時亦即係你既附近。」世事都被你看透了！我都爭啲唔記得左都鐸依家比我摙住左個春袋，要鍚住我。
你唔好大聲同我講野呀，我自殺架！驚唔驚？

但係依家要驚既係蘭卡特，因為佢並無菲兒呢個免死金牌。
「喝－－」蘭卡特搶先上前正面攻擊，係自信定係魯莽？我睇唔透。

「視乎對手係邊個，若果對手係你的話呢招已經可以分勝負。」三葉將我帶返落地面，此刻我先重新意識到我先係呢個世界裡面最下位既生物。
若果對手係都鐸的話，又會有咩分別呢？

佢單手手持粒紅晶，直接了當地用紅晶檔住蘭卡特既劍鋒。
「唔使遷就我，粒紅晶無咁易刮花。」

「既然你咁講我就唔留手。」蘭卡特竟然為對方既裝備耐久度著想，真係哪來的自信。
下一招蘭卡特果然就唔留手，佢雙手舉起短劍，然後再出全力揮斬。





此擊出招既視覺效果並唔算非常華麗，但係短劍擊中目標之後，都鐸腳底既地面就此裂開。
負責保養大草地既各位，真係辛苦晒你地。
但即使地面裂開，都鐸依然絲毫不動。

「我應該點樣攻擊佢先唔會死？」都鐸問。

「單靠身體素質戰鬥應該可以。」三葉回答。
蘭卡特陰公豬，係所有人面前被呢對兄妹戲弄。

但係非常出奇地蘭卡特聽到之後並無發癲，莫非佢已經比人玩壞左？
「真係嚴苛既戰鬥條件……」都鐸手執紅晶既左手繼續同蘭卡特既刀鋒較勁，而右手就握拳攻擊。

蘭卡特見狀立即用左手舉起銀盾格檔，估唔到都鐸如此平平無奇既一拳一下就將銀盾打凹。
「塊盾都幾重，從你既動作真係睇唔出。」

琴晚又好，今晚又好，蘭卡特既動作都非常靈活，同佢一身著齊全套裝甲既形象不乎。
但另一方面蘭卡特並無回應到都鐸，佢深深明白到正面突破都鐸非常困難，於事變招。

「縮土！」
蘭卡特大力踏地，然後於都鐸眼前消失。

呢招將軍對三葉既表演賽都用過，其實都係類似瞬間移動既招式。
「咁同你招Teleport有咩唔同？」除左中英文之外。

「首先，縮土係人語。」多謝三葉同學你既解釋呀！「換而言之呢招係人類自己開發出黎既招式。」
「咁樣代表乜野呢？」

係三葉老師解說既同時，蘭卡特已經繞到都鐸身後，將左腕上既銀盾當係回力鑣咁飛出去。
「呢啲招式可以突破人類自己界限，但係自然法則既界限並無超越到……而魔法就可以做到後者。」

「下？蘭卡特呢招縮土係我眼中都已經係超越自然法則。」

「Teleport既使用對象可以係自己、物件甚至係其他生物，涉及空間扭曲之類超越物理法則既技巧；相對之下使用縮土真正縮短既並唔係空間，而係體感時間……當然呢點只係我觀察既結論，實際如何運作你要向將軍請教。」

佢當睇野越黎越慢，我就知佢越黎越快。
你真係無睇過頭D？

蘭卡特既飛盾攻擊出乎都鐸意料，盾牌擊中佢露出既背部後雖然無劃出血痕，但成功令都鐸失去平衡，再加上佢腳底已經碎裂，令到都鐸失足向前傾。
「矣，都幾有本事喎，可以令到都鐸失足。」唔知都鐸身份既外人眼中，呢個並唔係成就。

「龍始終都係生物，若果唔小心的話一樣可以死。」Dragon Slayer既各位前路一片光明。
蘭卡特握劍儲氣，然後帶劍上前，當佢去到都鐸背後既時侯包圍銀劍既赤紅色能量已經非常顯眼！
「獅吼！」招式名一出，劍身及劍氣直接擊中都鐸背部，熾熱既金光貫穿都鐸，剩餘既劍氣係貫穿都鐸之後仲繼續向前擴散，使都鐸前方既地面劃出一大條劍痕。
有樣野即使係我呢種戰五渣都可以斷言：蘭卡特非常認真！

若果對手係一般人的話，蘭卡特可能已經Killing spree。
都鐸被擊中後馬上向前趴倒，背上仲有一條打斜既血痕！

「真失態。」食完大招之後，都鐸若無其事地爬返起身。
而眾人已經係用見到怪物既眼神望住都鐸。
「真可惜，若果我中左果招的話應該會好傷。」短短既戰鬥因為各人既解說同唔同既回憶而無限量地拖長，呢種常見既拖稿戰術大家都係時侯習慣下。
「咁可惜係邊呢？」

「呢招擊中目標後會產生高熱。而都鐸對『熱』既熱愛就僅次於管理員小姐……大概。」

「即係呢招係扣完血之後又幫都鐸補返血？」

「你可以咁樣理解。」
「少年。」都鐸拍乾淨啲泥之後即刻企返好，然後問蘭卡特：「你與我初次見面，點解你對我會充滿住仇恨？」類似既問題我都問過都鐸。
「我無憎恨你。」蘭卡特從口袋中拎出一塊布將劍鋒上既血抹走。

「你既顏色係唔會講大話。」
「佢依家係咩顏色？」我低聲問三葉，爭啲唔記得左佢地有呢種睇穿人思緒既能力。

「代表憤怒既紅色，同埋代表悲傷既藍色。」
「我真係無憎恨你。」蘭卡特既情緒同行動非常反想，睇黎一定有啲野發生左。

「咁你向我挑戰既動機又係乜？」
「我要試下你有無資格。」

「資格？鎮民資格？」都鐸仲未明白蘭卡特講緊乜。
「同十年前一樣，係呢方面佢真係好遲頓。」三葉大師又出口術。

「咩遲頓？」

「可以令到個臭毛孩情緒崩潰既原因諗都諗到啦。」

「因為你一次又一次打擊左佢既自信？」我回答。

「琴晚離開既時侯，佢既顏色只係得紅色。」
咁剩低果一半藍色係邊到黎？
「留係菲兒身邊既資格！」媽，呢個展開同呢種台詞會唔會太老土？

蘭卡特講完呢句之後好似失控咁衝往都鐸，明明一開始已經知道正面突破係無可能，佢都選擇左呢種攻擊方式，足以証明佢已經失去理性。
但失去理性既並唔止得蘭卡特一個，聽到菲兒個朵之後都鐸立即換左個眼神。
今次都鐸並無坐以待斃，佢一個側身避開蘭卡特既斬擊，然後手握紅晶重拳打落蘭卡特塊臉到，力度之大連蘭卡特既配劍都從手中甩出。，呢種攻擊方式要比喻的話就好似用萬能插頭打臉一樣，將粒寶玉咁樣用真係令我大開眼界。
而係蘭卡特倒地之前都鐸馬上就用另一隻手揪起蘭卡特既衣領。

「你同佢講過乜？」
「點解係佢身邊十幾年既我會比唔上琴晚先係佢人生中出現既你？？」

我搖頭嘆氣，後生仔，mark左菲兒十年既人並唔止你一個。
「你同佢講過乜？」

都鐸將蘭卡特高高舉起，蘭卡特用雙手握住都鐸隻手，爭取呼吸既空間。
堂堂白石鎮士兵隊長就此被公開處刑，更甚既係無人出手幫助。

連肯特及伯雷兩位都靜靜地食花生。
唯一用行動支持蘭卡特既就係佢既手下，但係佢地持槍上前既時侯就被三葉攔住。

「等我黎。」三葉道。
「點解可以同佢一齊出去見識世界既唔係我？」

「佢依家係邊？」

「停手。」三葉舉起土豪法杖指住都鐸，但顯然九爺一牽涉到菲兒就唔會輕易罷休。
於事三葉就開出左個非常好既條件：「放手的話就話你知管理員小姐係邊。」

果然，都鐸一聽到呢句就即刻鬆手，蘭卡特應聲落地。
而三葉亦都無拖延任何時間，立即就將答案講出：「係白石親王邸。」

即係我地間屋。
都鐸此時本能地跳起，但係好快就跌返落地面，似乎佢唔記得左自己身處人形形態，稍稍回神之後就立即往小丘既方向奔跑。
「無野睇喇，散啦散啦。」我立即掉頭就疏散一眾花生友，而伊曼係草地既另一面亦都做緊同樣既野。
三葉蹲於崩潰既蘭卡特面前道：「安慰人並唔係我既專長，但我建議你去個無人見到既地方冷靜下先。」

蘭卡特並無任何回應，於事少女轉頭就向其手下道：「抬佢入禮拜堂坐陣先。」

兩名士兵聞言後立即照做，而三葉就走向兩名老人面前。
「我都好清楚個臭毛孩係幾乞人憎，但我唔明白點解兩位可以完全事不關己咁。」

「這行事風格真不像我所認識的三葉姑娘。」我同意長老既觀點。

「我只係忽然醒起有人拜託過我唔好太難為佢。」