廢青於中世紀魔法世界的生存法則: 14, 危險既時侯，打218 5個0， call我丫
第二日朝早六點，我已經收拾好行李準備上路。
倒塔咁早起身既原因，並唔係因為我歸心似箭，而係我想賣甩條八婆。
「你相唔相信命運？」
「其實你問左我兩次我都無理你，你唔覺得厭架咩？」
琴晚既對話就係咁樣結束。三葉無理會我既反問，就好似無問過條問題一樣。
若果對方係男性的話，係三葉一輪騷擾之後我一定唔理出面有幾危險都即走。
但係對方係一名女性，而且我好清楚佢係對我下唔到殺手，所以我先決定係到過埋夜先算。
長夜漫漫，三葉曾經幾次想撩我傾計，但係全部被我敷衍一兩句了事。
作為一名紳士，我將塊豬皮鋪地讓左比三葉訓，所以我起程既時侯亦都無帶走。
要帶走等於要叫醒條八婆，等於要迎接接踵而來既麻煩及精神污染。
＊ ＊ ＊
離開山洞之後我向西行左兩個鐘頭，終於黎到一個周圍樹木比較少，地勢比較高既山頭。
眼前景色令我回想起雪菲兒曾經於上堂時解釋過白石鎮附近既地理……
「於1300年前，大地之古龍 － 嶽砶引起過一次大龍災，佢飛到天空之中然後急速下墜，著地時造成既巨大衝擊大幅改變左恩基大陸既地貌。是次龍災被稱為『龍降』。」雪菲兒一本正經道。
奇怪既係所有既細路都好留心咁聽，而係香港除左三國既歷史之外，其他中外歷史都難以挑起學生既興趣。
「根據古籍記載，恩基大陸中部本身係高山，由於龍降既衝擊，係高山之中打出一片稱為『龍降坑』盤地，但環繞龍降坑既地勢變得更嚴峻。」
「龍降坑正中央既係山獄鎮，山獄鎮自成一國，不為任何勢力所控制，而且盛產各種稀有石材。而白石鎮處於龍降坑南端，南通聖庭堡、東達蒂芬妮亞、西至所羅門國、北接山獄鎮。此處地勢比較緩和，四個方向均有一條大商路，因此成為山獄鎮出口石材之要道。」
……………
考慮地型，只要向山脈既相反方向出發就肯定可以到達其中一條大商路。
而商路上人流比較多，而且有士兵巡邏，一般怪物都會主動避開商路。
現時山脈位於我東南方，即係繼續向西北行就會去到大商路甚至直接到達白石鎮。
從山頭返回叢林，向太陽既相反方向前進約半小時之後，四周既樹木開始變得稀疏。
除此之外，我仲留意到零星既熊侏出沒，即使係咁，只要我唔用魔法又或者太接近佢地都唔會有危險。
但係……唔對路。
繼續向西北行進半小時，熊侏數量變得越黎越多，雖然佢地行為對我並不帶敵意，但係係咁多怪物附近前進，心裡面始終有些少不安。
有部份熊侏於地上採集植物，亦有熊侏手持武器一副警戒既模樣，若果我繼續前進好難保証熊侏唔會對我出手。
忽然，所有熊侏都架起武器，如臨大敵一樣！
「吱吱吱－－－－－」
一堆巨型老鼠於我身後既草地出現，而另一邊既熊侏亦弓張劍拔。
喂，咁我呢？等我走左先得唔得呀？
「姑媽！」「吱吱吱－－－」
兩種唔同既怪物就好似大叫兩聲唔得一樣，係我黎得切避難之前已經開戰！
「妖！」我壓低身向前奔，目的係避免誤中熊侏既弓箭。
同時亦拿出電話開機，反正咁既情況之下熊侏都唔會得閒理我。
一息之間，熊侏同巨型老鼠已經埋身肉搏。
巨型老鼠無依靠任何武器，戰鬥時只用雙足站立，並且揮動其短小而強壯既前肢，僅僅一擊已經將熊侏擊倒。
佢地既戰鬥方式令我諗起地球上面既袋鼠，巨型老鼠身形上的確同袋鼠差唔多，比起只有一米餘高既熊侏再高出小小。但係巨型老鼠除左無袋之外，下肢亦不如袋鼠咁發達。單論下半身的話，巨型老鼠同倉鼠比較相似。
「只要唔進入拳鼠攻擊範圍就無問題。」蘭卡特於堂上曾經提及此種怪物。
但係我已經係拳鼠既攻擊範圍入面。
拳鼠舉起左手準備揮拳，而我右手亦都以每秒上下活塞運動15下既高速連按電話螢幕。
「九……九……九……」
三隻黑犬立即從螢幕中奔出，其中一隻撲向拳鼠正揮出既拳頭，替我檔下依一招。
但此拳力度之大，足以秒殺黑犬，黑犬應聲被擊飛數丈之遠，亦化成黑煙消失！
我騎乘於其中一隻黑犬之上，而另一隻黑犬為我開路。
「點解生存測試果陣先會有咁既大Event？」
昨日享受神運之後，今日就要付出代價。
未幾，於前方開路既黑犬於一熊一鼠之中紏纏，受到熊一劍鼠一拳之後亦化成灰燼。
而遠方另一頭拳鼠亦張開嘴，噴出一粒種子直擊我騎乘住既黑犬，而我亦因衝擊力被拋落地！
說好的「只要唔進入拳鼠攻擊範圍就無問題」呢？？？
我本身騎乘既黑犬亦化成煙，換言之我所使用既魔法連半版紙都支持唔住。
巨鼠及熊侏慢慢向我步近，於四面受敵既情況下我無路可退。
生存遊戲天國Mode同地獄Mode既難易度差異會唔會太大？
「伏低！」來自遠方既一把聲音。
此時我無思考既餘地，只可照做。
「ＨＥＡＴ ＷＡＶＥ」
「吱吱－－－」「姑媽－－－－」除左怪獸既慘叫聲之外，我感受到既仲高背部傳來既高溫。
「無事就起身跑！」
我抬頭一望，係被我賣甩左兩個鐘既三葉。
四周既怪物全部忙於整理自己身上既餘燼，雖然火勢不如當初雪菲兒使用Lava dart般強勁，但一考慮三葉一招技就足以令現場過百隻怪物停下攻勢，不禁令我心寒。
令人更加心寒既係，三葉一招技就Over Taunt晒全場怪物，熊侏拳鼠不分物種一齊從後追趕三葉。
「哎……上一次搞到咁狼狽已經係三、四年之前。」
奔跑緊既同時三葉竟然有餘氣講無謂野。
「要救我既方法有好多種，例如催眠又或者傳送，點解你要用種最麻煩既方法呢？」
嚴格黎講三葉尚未算救到我，因為我仲未安全。
「嘛，係唔用寶玉既情況之下，我既選擇有限。」
當時佢用黎打死野豬果粒寶玉的確無出現係三葉既魔杖之上。
「琴日打隻豬你就用，依家比怪追你就唔用，小姐你係咪搞錯左啲乜？」
「我扑豬果陣都無施法。」
一陣由熊侏射出既箭雨襲來，此時三葉向後方大喝一聲：「ＥＡＲＴＨ ＳＴＲＩＫＥ」
巨型尖石柱破地而出，檔去不小弓箭之餘亦可截停追兵。
「走！」施法完成後三葉左手拖住我繼續跑。
「咁跑落去唔係辦法，就算跑到去大商路，面對咁大群怪物，巡邏既士兵都控制唔到，相反仲有可能影響到其他人！」
「係唔用寶玉既情況下，我有七種可以擊退眼前所有怪物既方法。」
「咁你仲唔用？？」先勿論三葉一招秒殺所有怪既狂言，三葉既性格似係先斬後奏果種，點解有咁多種方法佢都唔郁手？係咪因為方法太多唔識揀？
「我需要你幫我拖延三十秒。」
如果我有本事拖延三十秒的話，我相信頭先都唔需要三葉出手救我。
好啦，其實我係有。
「三葉小姐，企係移動既物體上面難唔難到你？」
「放馬過黎。」
我從褲袋中拎出電話，眼都唔需要望螢幕就撥號。
「二一八，五個零！」
電話螢幕放出強光，我部電話就好似大射燈一樣，可以控制光線投射既位置同方向。
而我就將光線投向前方三秒距離，然後按制。
「篷－－－－－」