廢青於中世紀魔法世界的生存法則: 8, 幻想故事總係離唔開又長又煩既世界觀解說

日光透過窗戶射入寢室之內，再加上窗外傳來雀仔啼叫既聲音，兩者加埋比起鬧鐘更加有效。係我黎到之後既第一個日出。
我伸伸懶腰，同時打開房門，雪菲兒已經準備緊早餐。
「早晨。」

「早晨呀嘉穎，琴晚訓得好唔好呀？」

「體力勞動完之後訓教一定係最爽。」所以我打完丁之後果晚都會特別好訓。
係圖書館中央既長檯之上有雪菲兒準備好既早餐。

包括有一瓶鮮黃色既液體，係太陽既映照下好難唔令人覺得依一瓶係尿。




除此之外，仲有一碗暗啡色既糊狀物體，睇起上黎好似一陀爛屎。
「做乜唔食呀，係咪唔岩你胃口？」

我吞吞口水，視線於雪菲兒為我準備既屎尿之間來回。
琴晚係營入面食既明明仲係類似餅乾既物體，點解今日一起身就要食屎？
「唔係，只不過我故鄉無類似咁樣既料理，所以唔知點食啫。」香港唔興食屎好對唔住。

「呀，當左你係本地人添，等我幫下你。」雪菲兒走到我旁邊，摺起衫袖，然後拎起壺尿，再將壺尿倒入埋爛屎之中搞拌。
最後雪菲兒仲係盤排洩物上面放左一張白色好薄既野，就好似廁紙一樣。





「就係咁樣，你快啲試下。」最終既成品係點既樣，你有邊日柯爛屎係沖之前望一望個屎塔就見到。
我係食同唔食之間掙扎緊，而雪菲兒笑笑口咁望住我。
唔食，就即係唔比面雪菲兒。

但係食屎，我又過唔到自己果關。
「果然唔岩你胃口？」雪菲兒露出一副失望既表情。

「咕～～」係我肚既響聲。琴晚晚餐之後我已經有十二個地球小時無食野，而且琴晚仲做左咁多激烈既運動，稍為肚餓都好合理，係咪先？
為左避免雪菲兒唔開心而導致要敬屎唔食食罰屎，我決定依家就食左篤屎。





我拎起個碗，然後吞一吞口水。
「死就死啦！咕嚕咕嚕咕嚕咕嚕……」

我一口氣吞晒碗屎，口腔傳來既感覺係……
「點呀點呀？好唔好食呀？」佢既眼中充滿住期待。

「好有趣既味道。」
肯定唔係難食，但又唔係大家睇食戟之靈果種好食到要高潮既地步。

算係中上既好食，食落去既感覺似係用熱朱古力奶溝蜜糖星星。
至少蜜糖星星仲算係早餐。
＊　＊　＊

早餐之後不久我就跟隨雪菲兒出門口，終於有機會一睹白石鎮係點樣。





「我地所在既係圖書館，幾乎位於鎮入面最中心既位置，去邊到都好方便。」
圖書館前面既係一塊好大既草地，我身處既位置望出去感覺非常開揚，微風吹埋黎既感覺亦都十分舒服，同香港市區焗束既感覺好唔同。
大草地上面有幾個小朋友係到耍樂，營造出非常之休閒既氣氛。
而係大草地既彼方，我留意到一座巨型建築物。

建築物睇起上黎好似哥德式既白色主教堂，旁邊仲有座鐘樓。
「前面果座呢，就係白石聖堂，亦即係琴晚長老落車既地方。聖堂係我地既歷史入面係非常有地位，我慢慢講比你聽丫。」
「每日打開窗就望到座咁既建築，都幾厲害。」個感覺就同你一打開窗就見到自由神像一樣，平時係香港一打開窗我只係見到隔壁鄰居既廁所。

「係呀，白石聖堂係大公及教皇既加冕之地，上次有加冕儀式果陣都好熱鬧。」雪菲兒帶我往市集方向前進。
「你地無神既概念，但係有宗教？你地既宗教係祟拜乜野？」我問。

歷史堂又開始，希望唔好太沉悶。
「乜宗教一定要祟拜神架咩？我由細到大都無祟拜既對象，所以唔係好清楚。果面就係白石鎮既高街，你平時有咩想買都可以去果到搵到。」我跟隨雪菲兒進入高街。
高街有三條行車線咁闊，地下鋪既全部都係大大塊既石磚，甚有中古氣式。





街道兩旁全部都係賣各種唔同商品既店鋪。
店鋪既建築一邊兩層樓高，一邊三層樓高。一樓主要係用石頭建成，所有商店都係依層，除左用黎陳列商品既大玻璃及門口之外，亦有放置花槽等等裝飾。二樓或以上係用木頭建成，牆外亦都掛住左好多花槽，似乎係用黎居住個地方，樓下收工上層樓梯就係屋企，對於每日要坐車返工放工既的黎講簡直係奢侈品。屋頂係尖型既屋頂，鋪住啡色既瓦磚，同街道一樣係中世紀風格既建築，依一刻我就好似去左歐洲既小鎮旅行咁。.
「係我地既世界入面，有好多用唔同世界觀解釋事物既神話故事，而唔同既故事亦都衍生左唔同既角色。」我係一個疑似水果檔面前停低，睇下有無我熟悉既食物，同時亦不忘補充：「亦即係我地口中既神。而我地既宗教就圍繞住神而建立。咦，依塊乜野黎？」
我拎起一舊類似茄子既物體，唔同既地方係塊皮有好多微細既窿窿，摸落去既質感似海綿。

唔知食落去個口感會有幾獵奇？
「只要好似我咁，大力渣一下。」雪菲兒用力捏一下舊茄子，續道：「入面既汁液就會浸出黎，你睇下。」

佢攤開手板，果然成隻手都係白色既液體。
「茄子既話題都係到此為止。」眼前既畫面實太意淫，我要係篇文變質之前阻止。

但係我未講完既時侯，雪菲兒竟然將手上面既白色液體奶乾淨，然後仲用一副人畜無害既目光黎望住我反問：「做乜？」
「不如我地搵個地方坐一坐低先，我行唔郁喇。」其實我地由圖書館出黎行左三個字都無，但此刻我行唔到並唔係因為我攰。





我走到去最近既長凳上面坐低，作出一個步驚雲既經典坐姿。
「你頭先咪提到，你地既世界有唔同既故事衍生唔同既神既？」雪菲兒坐係我旁邊，睇黎宗教話題都適合佢口味。
「無錯。」

「你地既神話有咁多種，但係世界又只有一個喎，亦即你世界既咁多咁多既神話故事裡面，只有一個係真，而其餘都係假既。」佢遲疑左數秒，然後：「由始至終，我生活既世界都只有一個解釋世界萬物既世界觀。所以我呢，係聽到你既世界竟然有咁多種神話之後，我覺得好奇怪。係你世界入面，有唔同信仰既人，又會點樣睇對方呢？」
我笑一聲，然後回答：「或者係好奇怪。係我地既世界，宗教明明係導人向善，但係另一方面亦都引發左唔小既戰爭。到現代，一個名為『科學』既宗教推翻晒前人幾千年以黎既信仰。但即使係咁，自古開始流傳落黎既宗教依然不乏信眾。講返轉頭，你地無神既概念，咁你地既宗教究竟係乜野一回事？」
「我地既宗教，應該係大約700年前創立。」雪菲兒視線移向右上角，作出思考狀。

700年，對一個宗教黎講其實唔係一段好長既日子，至少我地世界既三大宗教耶、回、佛，仲有其他古埃及神話、美索不達米亞神話、北歐神話及希臘神話等等全部都有更長歷史。
「可唔可以問一下你地既歷史係幾耐之前開始？」我問。

「唔……應該係大概3400年之前？」人類既信史可以追溯到古埃及文明，大概係公元前3500年，即係現代大概5500年。相比之下，此世界於3400年前文明已經先進到有歷史既記載，但係直至700年前先有宗教信仰出現，依點更加令我意外。
「但係我對宗教創立之前既歷史都唔係太清楚，好似我咁既一般人對歷史既認識都係限於宗教創立至今所發生過既事，所以答你唔到，真係唔好意思。哈哈……」雪菲兒摸摸後腦。

「矣……」我，很好奇！




「係700年前發生左一場『公元大龍禍』，然後我地既宗教　－　『方舟教』就創立左。目的係確保人類可以係龍禍既威脅之下生存。係白石鎮入面，所有人都係方舟教既教徒，當然我都係啦。」

短短既一句裡面有兩個專有名詞出現，雖然解釋世界觀好沉悶，但係我必需要問：「等等……公元大龍禍究竟係乜野一回事，方舟教又係乜？點解我會聽到我自己世界既宗教用語？」
「哦～公元大龍禍，就係由古龍　－　『公元』所引發既大規模龍禍。據歷史記載，當時世界上七成既人口都係場龍禍之中死左，諗起都覺得可怕。」世界人口死七成係乜野概念？黑死病係數年之間殺死左當時歐洲人口既30%，即係7500萬人，順帶一提二次世界大戰既死亡人數係7000萬人左右，資料由維基百科提供。
再講個具體既例子，你既老豆、老母、哥哥、弟弟、姊姊、妹妹、最好朋友、女朋友、仇人同任何一個陌生人入面有七個人會死，若果你無女朋友的話，Sorry。
「即係，公元係一條龍？。」「係呀，『公元』係創世古龍　－　提默及亞祖既長子。」

公元唔止係一條龍咁簡單，仲係一條輩份好高既龍。用打機黎比喻，佢應該夠資格做表關boss。而裡關boss通常由睇起上黎最正義既人擔當，以我現所在知既世界觀黎睇，八九不離十會由教皇黎擔任。
「咁方舟又係乜？有個叫挪亞既聖人聽左提默同亞祖既指示起出黎既船？」

「『方舟』都係古龍，佢係提默亞祖既四子。曾經係多次大龍禍中拯救世人，除此之外亦有極多其行善既事跡，所以就被人稱為『善龍』。點解你會覺得方舟係一隻船咁得意既？」即係所謂既公元大龍禍就係兄弟嗌交，過程中唔小心波及到七成既人類咁樣？
「咁岩係我地既世界都有方舟既傳說，不過方舟係一隻船。想知再講。」

「我想知呀，你快啲講啦。」雪菲兒不斷拉扯我既手臂，我唯有略略將洪水滅世同挪亞方舟既事績解釋左比佢聽。
講解完之後，我覺得我既身體已經平伏返，於是再次上路。
「所以你地既方舟教就係信奉多次拯救你地既方舟？你唔係話你地既宗教無祟拜對象？」

「我地並唔祟拜方舟。方舟教最核心既教義係相信人類本身既善。所有人不論自己既特長係乜都好，只要肯為其他人貢獻並且團結一致，所有人就可以獲得更美好既生活。」
眼前街道上既一切都非常新奇，再加上同雪菲兒既對話，此刻我接收既資訊量非常多。
「方舟教同龍既關係又如何？」我又問。

「龍對我地黎講係又敬又畏既存在，一方面，我地所擁有既一切都係由龍帶比我地。我地生存係『大地之龍　－　嶽砶』所創造既土地之上，生活係由『天與海之龍　－　渡澄』掌管氣侯既世界，每日都進食由『生命與傳承之龍　－　瑞亞』所創造既生物。」
地球上唔同既文明都有各司各職既神，而係依個世界，取代左神既就係龍。
雪菲兒續道：「但係另一方面，公元、嶽砶、渡澄及其他龍族都引發過不小龍禍……而方舟就係係多次龍禍入面拯救我地既龍。我地相信人同龍一樣，每個人都有唔同既能力，但係更加重要既係將自己既能力用正途。」
「你咁樣解釋完我開始明白點解你地既宗教要取名為方舟教。」
歷史堂完結，Good bye class。