(無甜)上天給我的一個玩笑 (新增外傳): (41)

「好啦，今日係新郎同新娘嘅大日子，我地比新娘子講幾句啦」司儀將個麥克風遞給我
 
「首先，今日我第一個多謝嘅人係我爸爸，我一出世媽媽就離開左我，由細到大都係爸爸一手一腳湊大我，照顧我，我唔聽話佢唔會打我，而係一直慢慢開解我，而我亦都好多謝一班契媽，佢地好寵我，對我好好，我而家最想講嘅係，I love you all。最後，我亦都好多謝我老公，佢一直都肯包容我…(以下刪略)」
 
「好啦，我地而家亦都將個時間交比新娘嘅爸爸，等佢講下自己今日嫁女嘅感受」司儀將個麥克風遞左比爸爸
 
「咳咳，今日我好開心，啊女終於都大個啦，要嫁人啦，爸爸唔可以再留係你身邊啦，你都要學識照顧自己啦，要做一個稱職嘅老婆啦。不過呢雖然你嫁左人，但係屋企嘅大門永遠為你打開，只要掛住爸爸嘅，隨時可以返黎，我想講嘅就係咁多」爸爸面上充滿住開心同喜悅
 
我亦都不禁流下眼淚…
 




新婚過後，我經常都會返屋企去照顧爸爸，而過住半退休生活嘅爸爸經常電腦前傳出打鍵盤嘅聲音，有時亦都去媽媽嘅墳前探望媽媽，係呢段期間爸爸顯得蒼老左好多…
 
過多兩個星期後…爸爸突然經常拎返佢同媽媽以前嘅相片，回味以前嘅往事，但係我心中總感覺到不安，不過點都好幾日後就係爸爸嘅生日，要好好同爸爸慶祝下…
 
就係爸爸生日當日，我諗住一早起身上去爸爸到，煮早餐比爸爸食，之後帶爸爸去玩返日，但係爸爸卻一早已經出左門口…我不斷打電話比爸爸都無人聽，我心中嘅不安慢慢擴大，我唯有打比老公…
 
「老公，爸爸佢唔見左呀」我非常之驚
 
「唔洗驚我而家換件衫出去同你搵下岳父去左邊」
 




我同老公去過好多爸爸同媽媽經常去嘅地方，但始終搵唔到爸爸…
 
「去墓園」老公靈機一觸「去岳母個到」老公立即伸手截左一部的士
 
落車之後，我立即飛奔去媽媽個墓旁，見到一個人拎住一本書坐左係媽媽嘅墓旁，係爸爸呀，我慢慢走過去
 
「爸爸」我拍一拍爸爸，但爸爸唔應我「爸爸，你唔好嚇我呀」我嘅淚水浮出眼框
 
「老公」老公呢個時候亦都追上黎「爸爸佢唔識應我呀」
 




「岳父佢…」老公佢把一把爸爸嘅脈搏「走左啦…」
 
爸爸面上帶著微笑，但仍然能夠看見兩行淚痕
 
我嘅淚水瘋狂流下「爸爸呀」
 
老公亦都打電話叫黑車…
 
返到屋企後，我拎起爸爸手上無封面嘅書黎睇…係爸爸同媽媽嘅故事…原來爸爸一直都係到寫緊佢同媽媽嘅故事…書入面，爸爸未曾對媽媽講過我愛你…但係爸爸對媽媽嘅愛卻一直無離開過…去到書嘅最後一頁…上面貼住爸爸同媽媽係籃球場擁抱嘅照片，親筆寫住一句「啊螢對不起，我愛你」
 
《完》