(無甜)上天給我的一個玩笑 (新增外傳): (19)

有試過搭由東涌去貝澳嘅巴士嘅人都知道，個部車係好鬼搖…
 
「仲…有…幾耐…落車呀…」我已經面都青埋
 
「忍住呀，仲有一陣就到啦，我無嘔肚袋架」啊螢慌慌張張
 
「到啦，落車先好嘔呀你」啊恩係咁掃我背脊
 
司機一開門，我即刻衝左落車…
 




「嘔……嘔……」我真係頂唔順，嘔哂落個私家嘔吐袋
 
「咁廢架你」啊恩恥笑我…
 
成車人得我一個嘔…
 
「拿」我拎起我岩岩嘔完嘅個個袋「你今晚嘅晚餐」
 
啊恩走都走唔切「你好噁心囉」
 




吵鬧過後，我地都急急走去霸營地，好彩暑假只係岩岩開始，黎嘅人都唔多
 
啊怡同啊珊兩個即刻快手快腳已經紮好營
 
而我…仲坐係到休息…
 
個個都紮好哂營…我先至開始郁手
 
佢地個個即刻去左士多舖到租左個排球，就開始係到打排球…得返啊螢陪住岩岩嘔完嘅我…
 




「你而家點呀，仲有無頭暈」啊螢拎出一支水比我
 
「無野啦，係岩岩個啲班次特別搖，我先頂唔順」我係到掩飾緊我易暈車嘅事實「你唔落去玩?」
 
「唔啦，我唔識打排球」
 
我紮好個營之後，就拎左啲麵包出黎食，填補下個胃
 
「喂，換衫落去游水啦」啊恩跑住返黎咁同我講
 
「哦，好呀」我去個袋到拎左條波褲出黎
 
「我…唔識游水」啊慈好尷尬咁講「我幫你地睇袋算啦」
 
係我呢一級到…男仔唔識游水係一件好羞恥嘅事…




 
「咁好啦」啊恩都拎左袋衫出黎「我地去換衫嚕」
 
就係咁，一男四女衝左去沙灘到游水…其實係玩水，全程都係我一個人四面受敵…反抗都多餘嘅…當然個氣氛咁好唔通我又真係企定定比佢地潑咩
 
我即刻向沙灘上面跑，佢地當然唔會放過我啦，我就慢慢越跑越慢，等佢地就追到個陣黎一個大反樸…但事實同幻想係另一件事，當我轉身個陣…啊珊同啊怡兩個都捉實我隻手，啊恩掃低左我，最後啊螢坐左係我背上…有無咁好默契呀…我比佢地用沙堆埋，堆到得返個頭…
 
當然我要反抗嘅話就緊係出到黎…但我好後悔無咁做…
 
「1 2 3 笑」啊恩拎起佢部手機係咁影相
 
四個女仔不停影，個情景就好似四個勇者打嬴大魔王咁…我就係個隻無得郁嘅大魔王…
 
慢慢天色逐漸入黑
 




「係時候要煮飯啦」佢地掘返我出黎
 
我藉佢地唔為意拎左啲濕到貼身嘅沙放落佢地四個個背脊到，然後向住廁所直跑
 
「喂呀」四個一齊大叫仲追住我
 
我用我奇快嘅跑速衝入廁所，成功達陣
 
「陣間你就知死」啊恩係廁所門口大聲叫入黎「我要你為你岩岩做嘅野後悔」
 
啊恩個語氣一啲都唔認真，所以我都無理佢
 
我沖一沖身，洗走身上嘅沙就返去準備煮我地嘅晚飯