千禧港女神探（一）春風化雨殺人事件: 第廿三話　發現漏洞

第廿三話　發現漏洞

於是，葉雨虹就致電黎國光，請他記得帶生日派對的錄影片段回來。

星期一回到學校，午飯時間黎國光在5A班課室中，用攝錄機將生日派對的片段播放出來。

葉雨虹和葉雨晴留心觀看每個細節，嘗試發現兇手留下的珠絲馬跡。

葉雨晴說：「點解有八、九成都係拍家姐嘅大特寫？乜唔係拍攝成個生日party嘅過程咩？」





被葉雨晴這麼一說，黎國光立刻嚇得臉紅耳赤，果然是初入情關。

黎國光說：「Rainbow⋯⋯係壽星女，梗係主要拍佢，咁係好正常。」

葉雨虹說：「Solar正經啲啦！快啲認真搵下邊個似係兇手！」

葉雨晴說：「咁好啦！不如妳先講吓每個人叫咩名，妳對佢哋有乜嘢感覺。」

葉雨虹說：「負責錄影嘅係Edward黎國光，佢份人忠忠直直，擔屎都唔偷食。」





黎國光說：「咁妳算係讚我定踩我呢？」

葉雨虹說：「我讚你純品呀！司儀Winson黃傳聲份人蠱蠱惑惑，連天上面嘅雀仔都氹到落來。」

葉雨晴說：「呢個肥仔我認得佢，專門勸人唔好跳樓嗰個。」

葉雨虹說：「佢叫Ronald謝隆恩，我哋慣咗叫佢肥隆，份人論論盡盡，做嘢求求其其。」

葉雨晴說：「咁死咗嗰個份人係咪好多仇家？」





葉雨虹說：「Victor古偉達成日蝦蝦霸霸，得罪人多稱呼人少，應該有好多人好憎佢。」

葉雨晴說：「咁戴眼鏡嗰個女仔呢？」

葉雨虹說：「佢係Charlotte林嘉慧，份人古板，同佢一齊都幾悶。」

葉雨晴說：「短髮嗰個女仔又點呀？」

葉雨虹說：「佢係April何四悅，性格比較豪爽，成個男仔頭咁。」

葉雨晴說：「派紙杯、紙碟、膠叉嗰個男仔呢？」

葉雨虹說：「佢係Kenneth張宇傑，佢比較細膽，做唔到大事。」

葉雨晴說：「切蛋糕嗰個男仔又點呀？」





葉雨虹說：「佢係Jeffery徐梓俊，佢比較醒目，練精學懶嗰種。」

葉雨晴說：「妳嘅同學個個都好有性格喎！」

葉雨虹說：「過奬！睇咗咁耐，見唔見到有乜嘢唔妥？」

葉雨晴說：「我認為Edward、Winson、Charlotte、April四個無乜問題，

反而我直覺覺得Victor、Kenneth、Jeffery、肥隆四個有啲古怪。」

葉雨虹說：「女人嘅直覺？」

葉雨晴說：「唔係，而係偵探嘅直覺。」





葉雨虹說：「第一次查案，已經當正自己係偵探，果然好有台型。」

葉雨晴說：「使乜講，話曬都有Season爸嘅遺傳。」

葉雨虹說：「咁妳講吓佢哋四個有乜嘢問題啦！」

葉雨晴說：「首先係Kenneth，佢拆開紙杯、紙碟、膠叉嘅包裝嗰陣背向所有人。」

葉雨虹說：「會唔會只係巧合呢？」

葉雨晴說：「咁妳再睇下Jeffery，佢切蛋糕嗰陣，都係背向所有人。」

葉雨虹說：「妳嘅意思係佢哋係餐具同埋蛋糕度做過手腳？」

葉雨晴說：「呢個可能性好高，再睇Victor，佢係第一個去攞餐具，同埋佢搶妳粒車厘子。」





葉雨虹說：「唔通兇手連Victor嘅呢兩個行動都預計到？」

葉雨晴說：「兇手有可能喺餐具同車厘子落瀉藥同毒藥，Victor跟住就先肚屙，再中毒而死。」

葉雨虹說：「如果係咁，餐具上面同埋車厘子粒核，應該會有瀉藥同毒藥。

咁我提議將垃圾掉去小圓邨垃圾收集站，咪等於幫兇手毀滅證據？」

葉雨晴說：「兇手恐怕連肥隆會將垃圾就咁掉喺活動室個垃圾桶，都喺佢嘅預計之內。」

葉雨虹說：「呢個就係妳話肥隆有古怪嘅原因？」

葉雨晴說：「就係，唔理邊個係兇手，Kenneth同Jeffery肯定有份參與，不過未必係主謀。」





葉雨虹說：「既然係咁，不如直接嗆佢哋，就可以知道主謀係邊個。」

葉雨晴說：「乜嘢證據都俾妳兩個毀滅曬，佢兩個可以死口唔認，唔會嗆到啲乜嘢。」

葉雨虹說：「一日都係我衰多口，咁依家有乜嘢辦法呢？」

葉雨晴說：「依家唯有密切監視佢兩個嘅行動，睇吓會唔會同主謀聯絡。」

黎國光說：「咁呢個重要任務就交俾我啦！我會小心行動，盡可能套佢哋口風。」