《唔係啩！真係有個老婆教我追女仔！》: 第十二章
又幾天過後，我才看到更新了的第七章。
跟『樂言』他們在飯堂偷聽到『Roy』跟他朋友的對話? 他的朋友是誰? 跟故事有關係嗎? 然後說『我』前一天上P.E.課時因為吃醋的關係激怒了『小惠』，令『Fiona』也在懷疑『我』和『小惠』的關係，然後是......咦? 竟然是『小惠』的視角? 那豈不是我連小惠的想法也能知道嗎?
小惠她......她在故事裏的反應，分明就是喜歡『我』啊！但對於『我』追求『Fiona』這件事，一方面又很積極的幫『我』，但另一方面又獨自黯然神傷，『她』到底是怎麼想的?
雖然事實上，我好像也感到了一點點小惠的心意，但卻無法理解她這些矛盾的行為。還是她真的是我的未來老婆，所以一方面很喜歡我，但另一方面又幫我追Fiona?
不知不覺，我又鑽進了這個想不通的死胡同，我決定先將小惠真正的心意擱下，又繼續看下去。
啊！定時找『Fiona』這條計策真的有效！『我』才沒有找『Fiona』一次，已經令『她』心亂如麻了！而且看『她』和『小惠』逛街時，那些對白和想法，看來『她』已經喜歡上『我』了！這可真是一個好消息！看來『我』很快就會和『Fiona』一起吧！
我想了想自己的情況，心錨已經進行到第四個星期，我還差兩個星期才完結，大概那時候Fiona也會有同一個反應吧！
又來到了每星期一次的P.E.課。
音樂響起，我牽著Fiona的手悠然起舞。
Fiona道﹕「咦Sam，你今日跳得好順喎。」
「呵係咩? 咁都係我partner帶得我好啫。」每每想起再過不久就能永遠牽著Fiona的手，我就充滿了力量。
Fiona白了我一眼﹕「唓！賣口乖！」
我笑了笑，然後望向小惠和Roy他們。他倆好像跳得斷斷續續的，看來那個Roy沒甚麼節奏感，不過經小惠帶領之下，倒也開始似模似樣，而且他們還有空談天說笑，好像挺愉快的。
『我』就是因為看到這個場面而心生醋意嗎? 雖然看見小惠和其他男生這麼親近，心中也有些微不快，但也不至於像『我』一樣，要去絆倒Roy那麽誇張。
我隨口道﹕「小惠同嗰個男仔都跳得幾好喎。」
Fiona瞄了一眼﹕「你講呀Roy? 係喎，而家睇落去佢哋又幾襯喎。」
合襯? 真的嗎?
我又多看了一眼，心底有些戚戚然。
「係咩? 我覺得Gary同小惠襯啲喎。」任何可以抽Gary後腿的機會，我當然都不會放過。
Fiona想了想，道﹕「係咩? 但我覺得小惠對Gary好似無乜意思喎。如果有意思，嗰日睇戲佢點會坐你側邊喎。」
我想，那可能是因為小惠對我有意思吧......
我解釋道﹕「咁...可能係佢由細到大都鍾意痴住我啫......」
Fiona微笑道﹕「咁佢而家唔痴住你你就可以鬆一口氣啦。」
我有點口不對心﹕「哈...係呀......」
下課時，小惠和Roy轉眼就不見了，我正想問問Jodi有沒有看到他們，但連Jodi也無影無蹤。
走得那麼快幹嗎? 趕著投胎嗎?
於是我沒有管他們，樂得跟Fiona兩個人撐枱腳。
午飯後跟Fiona道別，回宿舍時剛好碰到Jodi。
「頭先你走得咁快嘅? 去咗邊呀? 」
Jodi不懷好意的笑道﹕「唔走快啲咪阻住你同Fiona撐枱腳囉。」她見我一臉尷尬的樣子，又笑道﹕「講笑咋，頭先我同小惠同埋呀Roy一齊去食飯。」
哦，原來如此，難怪一起不見了。
這時候我想起故事中的小惠知道Roy不是好人，於是我忍不住向她打聽Roy的情報﹕「係呢，嗰個Roy係咩人嚟㗎? 」
Jodi想了想﹕「佢? 佢好似讀Physic......嗯......佢都無咩特別吖，咪正常男仔一個囉，不過我覺得佢笑起上嚟都幾charm嘅。」
Charm? 說的也是，以女生的角度來看Roy這種男生是頗吸引的，個子夠高，而且很陽光的樣子。
「嗯...咁你有無察覺到佢有咩可疑嘅地方呀? 」我很在意現實中的Roy是否也是壞人，所以想從Jodi口中打聽出端倪。
Jodi以古怪的眼神盯著我﹕「佢呢，我就唔覺有咩唔妥喇。不過你呢......就相當可疑！做咩係咁問Roy啲嘢呀? 」
我直言﹕「我擔心小惠唔知同啲咩人一齊啫......」
她恍然大悟﹕「哦......原來係咁，我仲以為你心入面剩係得Fiona，乜你咁關心小惠嘅咩? 」
我有點心虛﹕「咁......佢係我...表妹嘛......」然後我連忙岔開話題﹕「係呢，唔見小惠嘅? 」
「小惠話有啲唔舒服，所以去咗睇獸醫，本來我想陪佢嘅，但我又要上堂，而家呀Roy陪緊佢。」
我聽到小惠不適，緊張的問道﹕「小惠佢邊度唔舒服呀? 佢無事嘛? 」
Jodi看了我一眼﹕「唔駛咁緊張，照我睇係m痛啫，放心啦，有我睇住唔駛驚喎，我上完堂會去睇吓佢有無事。」她看一看手錶﹕「喂唔同你講住，我要去上堂啦。」說罷就一溜煙的跑掉。
那個Roy......是對小惠有意思嗎?
我陡然驚覺過來，發現自從知道小惠喜歡自己後，就變得很在意她了。我知道我真正喜歡的還是Fiona，只是小惠的存在，不時向我的心湖投下石塊，泛起一陣陣的漣漪。
這只是錯覺而已，可能是我潛意識裏認定小惠是我未來的老婆，又知道她喜歡我，因而對她產生了佔有慾，而剛巧又好像有人對她有意思，所以才會這麽在意的。
其實從一開始我就懷疑她在說謊，只是想不通的地方太多，所以才將這個想法擱在一旁沒有多想。若果我能證明她根本不是我的老婆的話，我對她的態度應該會改變吧。但若果...她真是我的未來老婆......
算了算了......現在空想有甚麼用? 還是先找出答案再說。
翌日我跟樂言他們到飯堂吃飯時，果然看到Roy坐在一旁等人。
我跟樂言他們交代一聲﹕「我見到熟人，去say個hi先。」
我坐到Roy對面﹕「Hi，乜咁啱呀? 」
Roy看見是我好像有點愕然，但轉眼又露出他的陽光笑容﹕「咁啱呀，你又嚟食飯呀? 」然後他望望四周﹕「係呢，小惠呢? 唔見佢嘅? 佢無事呀嘛? 」
劈頭一句就關心小惠，難道他真的對小惠有意?
「佢無乜事喇，而家上緊堂。」
「哦...係呀......係呢，聽小惠講你係佢表哥喎。」
我點點頭。
「咁你知唔知佢有無男朋友呀? 」
！? 他真的想追求小惠? ！
正當我考慮怎樣回答他時，我聽到Gary的聲音。
「喂Roy，咁早到? 」
吓? 原來Roy的朋友就是Gary！
我跟Gary四目交投，彼此都露出驚訝的神色。
Roy看見我倆的模樣，訝道﹕「乜你哋識㗎? 」
Gary給了Roy一個眼色﹕「佢就係讀Account個Sam囉。」
Roy愣了一下，然後笑道﹕「哈！原來你就係呀Sam！世界真係細！」
從他們的對話當中，我猜Gary應該有跟Roy提起過我，所以Roy現在應該知道我是甚麼人了。
我冷冷的盯著Gary﹕「係囉呵，世界真係細。」
Gary沒有回答我，只是拿出了電話像是打給誰。
「喂，Fiona? Gary呀。無...一陣上堂份notes我幫你print咗啦......哦，唔駛，我都係順手啫......」Gary一邊談電話一邊趾高氣揚的看著我。
你老......！只是同班而已！有甚麼了不起！才幫忙印個筆記囂張個甚麼勁? 還不只是一個觀音兵? 是觀音兵！知道嗎?
我臉色鐵青的站起來，跟Roy道﹕「你哋慢慢食喇，我去搵返我班friend喇，拜。」說罷頭也不回的離坐而去。
「嘩你頭先去廁所呀? 個樣好似食咗屎咁嘅? 」樂言這個臭小子見我臉色不善還是繼續揶揄我。
冷靜冷靜！現在最需要的是冷靜！我有小惠幫忙，又有羊先生的故事輔助，難道還會敗給Gary?
我深呼吸一口氣，終於能冷靜下來，並開始在腦海整理一下我得到的資訊。
故事中Roy跟Gary討論的那個女生，應該就是Fiona吧！而他們說那個礙手礙腳的，按推斷應該是Mandy。但現實中Mandy可沒有做些甚麼礙著Gary，反而是小惠好幾次壞了他的事。若果Roy要幫Gary支開小惠，最直接就是將小惠追到手，而且看樣子他也對小惠有意思，那就正中他的下懷了。
小惠......小惠......若果Roy真的追求她，她...不會接受吧......但萬一......嗯...我該怎麽辦呢?
想不到解決辦法，還是先撇下吧。
另外Roy教Gary的追女要點，看起來還挺有道理的。
「投其所好」嗎? ............
Fiona她，喜歡的是甚麼呢?
當天傍晚，小惠下課回來後我問她﹕「小惠，你知唔知Fiona有啲咩興趣呀? 」
小惠側頭想了想﹕「據我所知呢，Fiona佢鍾意啲文化藝術嘢，好似去聽音樂會呀，去美術館博物館呀咁囉。」
音樂會? Concert? 她喜歡那個歌星? 陳奕迅? 容祖兒?
「音樂會? 咁你知唔知佢鍾意邊個歌星呀? 」
小惠白了我一眼﹕「我講嘅音樂會係交響樂，鋼琴演奏嗰啲呀！唔係演唱會呀！無啲文化氣質！」
吓? 不是吧......
小惠看見我一臉為難的樣子，懶洋洋道﹕「如果你諗住約Fiona去睇呢啲嘢呢，我勸你都係算吧啦。睇你個款對呢啲嘢都係無興趣，一陣你去到瞓著埋咪盞失禮街坊。獻醜不如藏拙啦。」
雖然我也認同她的說話，不過還是有點不忿氣﹕「唔試過又點知呢......」
小惠﹕「如果你係約佢嘅，咁不如戶外活動啦，反正佢都鍾意而你一定唔會瞓覺。」
我想了想，小惠說的也有道理，但現在我單獨約Fiona的話她會應約嗎?
我將這個疑慮告訴她。
小惠沉思一會，道﹕「本來就無乜可能嘅，不過如果用吓手段嘅話......」然後她就將辦法告訴了我。
嗯，小惠的方法應該可行，怕只怕Fiona馬上離去而已，但以她的為人，這個可能性頗低。
討論完我的事，我想起Roy的事。
我一邊玩電話，一邊裝作不經意的問她﹕「係呢，尋日P.E.堂之後眨吓眼就唔見咗你嘅，去咗邊呀? 」
「無呀，同Jodi呀Roy佢哋食飯咋嘛。」
「係呢，嗰個Roy......點㗎? 」
小惠看了我一眼﹕「做咩咁關心呀Roy呀? 」
才不是，我關心的可是你。
我將Roy是Gary朋友的事告訴了她，但她好像沒有甚麼反應。
「係Gary個friend又點? 又唔會阻到你追Fiona嘅。」
我本來很想將Roy有意追求她的事告訴她，但這樣又顯得很在意她似的，於是我只是旁敲側擊﹕「無......諗住知多啲敵軍嘅嘢，點都會有用嘛......咁你覺得佢點呀? 」
「Roy佢呀......個人都幾nice呀，唔錯吖。」
但故事中的你不是知道他是壞人嗎?
我忍不住追問﹕「就係咁? 」
「係呀，唔係仲有啲咩呀? 喂！肚餓啦，去食飯！」