入到痕管，原來有個陰謀係從來無人發現......: 第四章　我的校園生活

第二日，我就繼續番學，繼續自己生活。
日頭就繼續上堂，但基本上我都係訓著，因為夜晚要幫佢地製冰。

點解我會識？其實咪又係睇電視劇影響，考試之前狂褒「絕命毒師」，搞到自己上曬腦，不斷去圖書館去睇化學書，然後不停試下玩下，就比我發現到呢個獨特製冰方法。

其實我都覺得自己幾有天分，奈何學校呢一類科全部都係英文，我一個字都唔明，其實呢堆化學字母都好死，只要我記得份量、步驟、我就已經知道點製造出黎。

而家我製毒，只係想保住自己條命，其他都係其次。

返學一個禮拜，搞到咁大件事，呢鋪都可算係代表作。晚上我見到阿Sue急急腳行入A Build頂層，於是我八卦心又起。我偷偷地跟到佢門口，我見到門入面有一大堆人望住電腦。





「幫我係將倫敦ｄ資金抽走，快快快！我要第二日港股開市前有四十五億現金用得到！」我係隊隻耳仔係門口，貼近聽到阿sue係度講野。
「未必得，如果要set程式買賣我地可能唔見最少可能唔見十億，咁急拋貨我怕....」
「我既世界無話唔得！香港個市死你同我都唔惦！盡拋，務求套現！另外阿Ben，美國果邊競價盤如何?」
「而家果邊未收到消息，重放得切，已經甩左好多貨，另外好多我地做莊既牛仔應該開市後會打曬靶，我地可以盡賺。」
「GOOD，最緊要就係咁，今日Ｄ錢全部放曬係香港，絕對唔可以比大陸班人造低香港個市，唔係我地做莊既貨全部會死。」阿Sue叫得好大聲！

「OK大家聽住，聽日大陸班人會將Ｄ資金抽走頂大陸個市，我已經搵左幾間大行同銀行一齊掃貨，總之聽日條線係23000點，低過呢條線就同大陸佬鬥放貨，佢地放幾低我就低半格！就算我地輸都唔可以比大陸佬贏！大家加油」！

突然，道門好似電視劇Ｄ劇情咁，好自然咁打開左，我就好自然咁趴係度，阿Sue就好自然咁見到我跌低係地。





「你識唔識玩電腦買賣股票？」
「識......識地。」
「入黎幫我手。」
阿Sue突然捉住我隻手，我好似有初戀既感覺。

「坐係度。」阿Sue推張凳過黎。
「係咪好似輸入價錢咁，幾多錢就買幾多錢就賣咁？」我問。
「而家邊度重有人會咁慢，你咁買賣盤，已經輸左九萬條街。呢度有堆list，全部打好曬幾多錢買幾多錢賣，你幫我將呢度５００隻日本、馬來西亞、台灣、新加波既股票入落個程式到，佢就會自動幫我買賣，而且佢會重複，唔洗人手操盤。你既任務就係入好曬佢就得。」
「咁簡單架咩？」我問。




「而家全球大行都玩高頻交易，散戶先會人手買賣盤架炸，讀多ｄ書啦！」阿sue笑笑口咁同我講，然後督一下我個頭。

就係咁，我全晚就係度入ｄ數字，入到我眼都花埋，係凌晨五點終於入好。

「我入好啦，然後呢？」我問阿sue。
「無架啦，聽日場仗唔會係度打，呢度日頭重要比學生上堂。我地幾十人會係各自部電腦睇實，除非好大改變，否則我地個程式會幫我地自動買賣，只要聽日個寬頻唔斷線就得。」
「咁我係咪可以去訓啦？」
「你去我宿舍到訓，間房得我一個人，係m213房，聽日我會幫你同老師講請假，會照計返你出席率。」
「會唔會唔太好，我訓左你地方。」
「都辛苦左你一晚，要你再返屋企確實唔太好。」

凌晨五點十七分，我去到阿ｓｕｅ間房，佢間房可以話係咩都無，得一部電腦，然後一套粉紅色少女的被鋪，而被鋪重有一陣淡淡的少女味。

我好自然咁訓左落去，一來自己已經太累，二來我未訓過少女既床，實在太興奮啦！！





但唔使三分鐘我已經訓著左，我的校園生活原來就係向製毒同買賣股票中渡過左一個禮拜。

唉。