愛．限期（真人真事）－續集: <<第二十一集>>

第二十一集 

之前講到Miki會喺佢男朋友返來香港之後，同我會保持距離，間唔中先聯絡，而佢接機嗰晚，我為左分散注意力所以去左露營。 

其實我真係好唔捨得佢，成晚我都訓得好差，無一刻我係唔諗起佢。到左第二朝，我同班營友落山飲茶，朝早10點幾，我就收到佢既message！「HALO」，哈囉依兩個字喺我同Miki之間有一個特別既意思，就係掛住對方咁解。我估唔到就係第二日我就可以同佢聯絡，我真係好開心！我第一時間問佢傾唔傾得電話。

雖然個心癮癮作痛，因為我愛既人攬住第二個男仔，但係佢第二日就搵我，依個係意料之外既甜蜜。跟住嗰幾日，佢都會一得閒就覆我message...夜晚返到屋企會同我傾電話...我...完完全全地成為了第三者。雖然之前所發生既事已經同道德背道而馳，但我仍然抱住一個心態，就係唔可以影響到佢地兩個既關係。不過到左今日，我再冇藉口啦，我絕對係影響緊佢地...而我都覺得Miki好辛苦，每日要搵兩個男人...

而我如果用同理心，企係佢男朋友角度睇既話，我一定唔會放過個第三者！應該要捉左佢，斬開18件再拎去餵恐龍！不過我企返係自己角度睇...我好愛Miki，佢又好愛我，我唔想放手...我愛佢鍾意食野，又識整野食，識得欣賞我，經常令我感受到佢既愛；而佢愛我夠成熟，識煮野食，諗野會客觀分析，夠肉麻。





佢開始會講，最衰我唔鍾意小朋友...如果唔係...佢一定揀我...而我依個時候...我有一絲諗過...中意返小朋友好冇呢？依個諗法係之後嗰個星期，完完全全浮現出來，原因係Miki同我講，今個星期日佢男朋友唔得閒，所以佢上來我屋企搵我...究竟嗰日發生咩事？我好自私，好冇理性咁...做左一件根本唔應該做既事...