愛．限期（真人真事）－續集: <<第二十集>>

2014年6月17日 星期二

今日就係我地既最後一日...因為講到尾，咩事情都有可能發生，所以即使佢應承我九月會返來搵返我...我都唔可以抱太大期望。雖然我真係好希望我地既關係可以繼續咁樣走落去...

Miki男朋友今晚11點機，所以我地夜晚都仲可以傾一陣電話。而簡單來講我都算係失戀...為左分散注意力，我約左朋友今晚放工去露營，聽朝請左半日假，返屋企沖完涼再開工。

我真係好唔捨得...我d同事講依d叫沉左船。雖然原本沉船既意思唔係咁解，但我認為都幾貼切既...兩個唔應該相愛既人，係夜場認識，然後相愛...係個天玩緊我地？定係其實我成為左一隻棋子？被派去考驗佢地兩個之間既愛情？咁即係只係玩緊我姐...

Miki約左8點係機場同朋友食飯，然後一齊等佢男朋友落機。放工既時候，我同佢都係向荃灣方向，所以我地約埋，一齊搭最後一程既地鐵...去到荔景既時候，我捉住佢唔俾佢落車，要佢陪我去荃灣，因為佢都未需要咁早去到。到左荃灣，我陪佢過返對面，陪佢等車返去荔景轉車...依一刻我真係好想部車永遠都唔到。我地相擁，交換最後既體溫...





當然部車會到站，離別既一刻始終都會來臨...Miki上車，我地好唔捨得咁繼續四目相交。我好想留住最後既佢...當我拎左個電話出泥...打開相機App，枱頭發現...佢都不約而同拎出手機，用鏡頭對準車箱出面既我...我地連心意都一樣！如何教我不愛妳...我地好sweet咁互相對望，直到部車開走...我地再見唔到對方為止。

上左山之後都繼續同Miki send message，十點幾，傾埋最後一通電話，依依不捨咁收線...佢應承左我佢會搵我，我唔可以主動打俾佢，唔可以whatsapp佢，只可以SMS，然後佢會收埋SMS既notification，佢掛住我既時候就會打開個app，覆下我message，得既話就會打俾我，最後約定9月等佢男朋友返去讀書就再續前緣。

我好愛Miki，我岩岩同女朋友分手無耐，竟然俾我遇到一個咁既女仔...如果我仲拍緊拖既時候遇到佢...可能依家個情況仲慘...

關係暫時告一段落...希望Miki能夠再喺我既人生路途中出現啦。