愛．限期（真人真事）－續集: <<第十三集>>

2014年5月31日 星期六

今日我同Miki plan好左去塔門郊遊。我平時都鍾意去玩下露營，所以我就帶齊哂爐具，午餐就係塔門煮一餐愛心午餐俾佢食。我仲帶左一張天幕，等我地做對天幕下的戀人。

朝早到達之後，行左20分鐘上山頂，搵左個位起天幕。起完就開始煮野食，我煮左一個表面上好簡單，實際上都好簡單，但係食落就十級好味既日式牛肉烏冬。當然冧得掂Miki啦！食飽飽之後帶佢周圍行左陣，去到一個遠無人煙既地方，情不自禁，相擁再擁吻。我地既感情再升左一大級。

當我地有左第一個吻之後，我發覺佢好鍾意錫人，每隔一陣，就會錫埋黎，而我都俾佢影響到我都成日主動錫佢。依個感覺太好啦！我好鍾意依種感覺！我諗...我已經愛上左Miki...可惜佢有男朋友...雖然我明白做第三者有幾咁衰，但係我既理性已經被感情完全遮蓋，我決定唔理任何野，好好咁愛一場！但係...我地得返17日...

我地黃昏左右執好哂野搭船離開，美麗既夕陽陪伴住我地既船慢慢駛離碼頭，究竟我地既愛會唔會好似夕陽咁，雖然美好，但黑暗正慢慢霸佔成個天氣呢？我地返左沙田，佢陪我食左餐M記...其實M記都已經越來越貴，所以港女可能會進化到唔肯陪你食魚蛋！





Miki今日同我講...原來佢媽咪都已經發現左我同佢之間既關係...但係Miki竟然唔係聽到一d責備既說話，而係話「係幾開心既，小心d囉」...我身為第三者...其實正確d講都唔算第三者...因為我無名份...不過是但啦，身為一個第三者，我都知道做第三者係好x街，但係聽到佢媽咪咁講，真係唔知好嬲定好笑。

最後倒數17日。