愛．限期（真人真事）－續集: <<第八集>>

2014年5月19日 星期一

連續兩晚都同Miki傾電話傾到半夜，初戀既感覺...已經遺忘左好耐，重新重拾返依個咁甜蜜既感覺真係好奇妙。

雖然依家個感覺有少少似做左人地隻兵，不過我唔能夠否認...我鍾意左Miki...而且我覺得佢對我既好感都唔太少，我諗...
今日佢第一日返暑期工，竟然可以繼續同我send message！我當然唔會放過依個機會，而今日我喺公司完全做唔到野，因為滿腦子都係Miki。係我太易喜歡一個人，定係依個女仔太吸引呢？我其實發覺左我喜歡人既其中一個原因，就係我要感覺到佢對我有好感，我先會鍾意佢。可能係因為怕失敗...但依個規則，已經長埋在我既潛意識入面，連我自己都已經唔係太記得。

今日佢話星期二要去另一個地方site visit，因為唔知頭唔知路既關係，我地既早餐活動會順延一日，星期三先進行。我真係好想快d見到佢，不過唔知會唔會因為上星期五晚黑媽媽，佢其實根本睇唔清楚我個樣。到星期三，晨光斜斜咁打係我塊面上邊，咩都睇得清清楚楚，佢就會發覺我根本好唔吸引...然後離我而去。

或者我仲係有d在意，究竟點解佢有男朋友都肯同我發展...唔通真係好似呀輝咁講，我既優勢，可能係好單純咁因為我依刻喺香港。





因為佢有提過佢會留意人地既鞋靚唔靚，佢既一句說話，令我做左24年來第一次做既野，擦鞋。我將我嗰對著左8年，已經著到綠綠地色既皮鞋，用岩岩放lunch係超級市場買既鞋臘擦左一次。做完之後，雖然有d地方既塵清唔走，但係已經靚左好多。我認為在每一段關係之間，都能夠學會一d新既野；而我今日學會了，擦鞋原來係必需既動作。