１.【淚痕是一滴心痛】【換個時代再愛你】: Chapter 20一早約定 (下)
在我只顧追著香味來源的期間，並沒有認真的望著前路，
於是在轉角的刹那間，跟迎面而來的途人一個碰撞，
一把嬌羞得有點沙啞的嗓子說著，
「哎呀。」
此刻我才回過神來，眼前的女孩.......是清琴；
我們還真是有緣，經常性「撞到」對方。
她被我撞倒後坐在地上，痛得眉頭緊皺，望見她這個模樣我趕緊走上前，
「對唔住呀，清琴。」
正準備伸手扶起她之際，她抬起頭來帶點慨嘆對我說道，
「唉，又係你撞到我！」
她不屑的拍打我的手掌喃喃自語埋怨著，
「正一衰人！琴日俾你攪到整親隻腳，跟住淋雨發燒準備去睇醫生，仲要俾你撞。」
我立即半跪在她面前，一邊耐疚得低下頭，同時望著清琴懶在地上撒嬌，
說真的，她這個模樣十分可愛，同時又令我徘迴於愧疚和發笑之間。
「對唔住呀，唔好嬲啦。」
她扁著咀續說，
「你真係恩將仇報呀，枉我仲諗住睇完醫生食埋藥休息下今晚同你揉藥酒。」
想不到清琴待我如此真心，唯有下回走路帶眼，畢竟讓我失神的是這位少女的一切，
她的盈盈一笑，她的可愛，她那獨有的氣味，只要是她的記認，便會使我魂不附體。
「對唔住呀，咁你睇左醫生未呀？」
她不服氣的看著我喊道，
「緊係未啦，仲要黑到佢提早休息添呀，依家要去另一間度睇啦。」
「轉角果一間？」
「係！呀！」
我苦笑的對她說，
「咁你行唔行到呀？隻腳點呀？」
「仲好講，本來好返好多，依家又整親啦，都唔知係咪前世同你「咁有緣」。」
對，我們上一輩子經已認識對方，我更深信是有了約定，在今生重逢；
我慨了一口氣答道，但慨嘆不是出於她的斥責，
「咁我抱你去睇醫生啦，一齊去睇。」
清琴聽到後立即住口不罵，更換了另一張臉憂心仲仲的追問，
「有無事呀？感冒定係只係發燒？」
「其實退左燒啦，不過都去睇一睇醫生啦，我抱你去啦，好似琴晚咁。」
她趕緊搖頭回答，
「唔制，依家日光日白咁多人！」
「但你真係想坐係度坐到醫生閂門？」
她立即笑了一笑，伸出左手對我說，
「你扶我行過去咪得。」
我嘖笑了一口，想不到清琴原來也有愛要臉子的一面，
然後我從地上拉起清琴，一拐一拐的走過去，情景十分令人發笑，
而且行動十分緩慢，深信當我們走到診所時，診所經已關門大吉。
有見及此，我對清琴提出，
「不如一係我揹你過去啦。」
她一拐一拐的答道，
「一日都係你呀，攪到我咁，依家仲好意思同我討價還價。」
清琴說畢後還打了一個噴嚏。
我溫柔地對她說，
「你睇下你呀，依家仲打乞嚏啦，都係快啲去睇醫生啦，好無？」
她愣著了數秒，尷尬地把頭擰向另一面，點點頭以示可以；
當清琴點下頭的刹那間，我二話不說的把她抱起，
她害羞得紅透了臉，還故意的側著臉，但期間還是跟她有說有笑，
「清琴，你話我地成日都撞到，你估我地係咪真係咁有緣？」
她立即轉過頭來說道，
「如果因為有緣而係咁俾你撞，我遲早唔洗到三十歲已經行動不便啦。」
「咁......仲有我會抱起你。」
清琴頓時顯得小鹿亂撞，
「咩意思呀？等價交換呀，咁你咪好著數？你試下係咁俾我撞呀！」
「好呀，咁你每日都要撞我一次。」
她假裝生氣的使勁的捏著我的臉頰，
「哼，岩岩識你既時候以為你呢個人好怕羞，點知依家發現你呢個人都幾口花！」
「對唔住，我不善溝通。」
「係咩，觀察多一段時間就知！」
我們互相嘲弄，說笑的期間，偷偷瞧了在我手抱著輕巧的清琴一眼，
要是可以的話，不論過了多少年後，我還想抱著她，背著她，
跟她走過每一段路，到每一個地方，看盡春花綻放，秋葉寒冬；
幾經辛苦波折重重，我汗流浹背的抱著清琴推開診所的玻璃門，
診所的護士紛紛對我們投以好奇的目光，清琴更害羞得不敢抬頭，
把她安置下來後，我走到護士面前辦理登記的手續，但護士竟然囂張答道，
「唔好意思喎，我地就快閂門嫁啦，下次你地可以再早啲既。」
要不是「經常」的那一間診所提早休息，我才不會走到這一間診所，
還敢期盼我們有下次嗎？她以為這裡是餐廳嗎？
但為了清琴的健康著想，我懇求著護士，
「唔該你呀，睇埋果位小姐啦，佢仲要整親隻腳.....」
怎想到那位護士打斷我的話，臉色更差得很，
「個個都話睇埋咁我地仲洗放工？話明收一點，如果你女朋友真係咁等住睇醫生既，我提議你坐小巴去醫院啦先生。」
「一點放工？但依家仲係四十五分？」
「你咪當個鐘慢左十五分鐘囉。」
我跟那位臭臉護士爭持不下，另一位護士立即從醫生房內走出來，
當白臉心平氣和的對我說，
「醫生話無問題呀，仲未到一點我地都仲會繼續睇症，等我幫小姐登記左先啦，唔好意思唔好意思。」
白臉護士其後更支開了臭臉護士，替清琴辦理登記，然後扶著她走進醫生房，
我在醫生房外等待著清琴，期間跟臭臉護士不屑的互相對望。
心想，要不是有求於你的話，我定不會如此忍氣吞聲。
我相信臭臉護士心想，要不是你們的話，我才不會晚了下班，阻人下班死全家！
直到清琴緩緩地從醫生房走出來對我嫣然一笑，我緊張地問道，
「醫生點講呀？」
她微笑的答道，
「普通感冒咋，而且岩岩醫生俾左鎮痛貼我呀，隻腳行得返啦。」
清琴還特意在我面前轉了一圈，示意她的活動如常；
「得啦得啦，知你行得走得啦，但都要睇住隻腳。」
臭臉護士大聲喊道，
「杜清琴，拎藥啦。」
清琴前去取藥的時候，我故意的瞪著臭臉護士，
別人說過，心善則美，難怪臭臉護士悉心打扮也是如此面目可憎。
步出診所門外，清琴立即問道，
「點解你寧願唔睇都要俾我睇呀？」
我笑意盈盈的回答，
「抱你抱到出曬汗啦，咩燒都退啦。」
清琴不忙反擊，
「係呀係呀，你撞多我幾次呀，可能以後醫生都唔洗睇啦，都俾你撞死左啦！」
我們一邊走著，一邊再度說笑，
「哼，無咁容易俾你死，你都未同我揉藥酒，嘿嘿。」
「今晚我會用力係咁揉係咁揉，揉到你叫痛，哼！」
「哈哈，好呀！不過話時話，我有小小肚餓，我想食小小野。」
「好呀，去買麵包呀，提子包四蚊三個，腸仔包三蚊個，菠蘿包依家買二送一。」
「但我想食飯呀姐姐。」
「食麵包啦，飽肚又減肥，嘿嘿。」
「果然係麵包店太子女，幾時都識賣廣告！」
「嘿嘿。」
過了一會，清琴再次追問，
「喂呀，認真呀，點解你唔睇醫生都要俾我睇呀？」
我說笑的答道，肩膊不爭氣的發痛，幸好我拼命的忍著，
「你睇我咁精神咁大隻，邊會有事呀！哈哈。」
此時我的心中暗道，因為在數百年前我一早約定了好好保護著你，
不論多少年後，我依然會遵守這個約定。
她說，一生深情，也許情是一種默默無言的承諾，一種從心而發的約定。