那年玩社，四位靚女: 三十五

好快又到派卷嘅日子，到時除咗可以知道我嗰餐有冇著落之外，仲可以知道有冇人會因為成績問題而留班。

第一科派嘅數學。「各位同學，今次奇跡降臨係你哋嘅身上，呢份卷係冇人唔合格嘅！」

數學卷竟然冇人肥，呢個消息實在太震撼，大家太過興奮，全部人起勢咁喺度嗌，嗌得最大聲嘅大部份都係女仔；有幾條友直頭企咗上張枱到慶祝，爭啲就跌咗落嚟。我老懷安慰，坐咗喺個位到自己喺度笑。

Yvonne 收到份卷之後，即刻反轉份卷，將寫住分數嗰頁顯示比我睇。見到佢嘅分數啱啱好過咗四成，掹車邊合格。我對住佢微笑咗一下，用眼神同佢講咗句「叻女喎，自己都搞得掂」，佢亦都用一個得戚嘅眼神回應我。然後嘉瑜突然喺中間插入，攞住一份五成分數嘅數學卷，對住我講：「阿文你睇下，我今次都有五成呀，我爭四成幾分數就可以同你同分啦嘻嘻嘻。」

「哦，咁你以後慢慢做三十年past paper，到時你就可以追到嗰四成幾嘅分數差距啦叻豬。」





嘉瑜即刻面色一變，一臉不悅。「你家下即係寸我啫！你睇死我唔好以攞高分咩？你睇住嚟！」我都冇佢咁好氣，不過女人係咁。

之後無論係 Serena，定係一班男人，攞到嘅分數都唔差，證明咗我嘅特訓班初見成效，康洛文 and his elite team 大獲全勝。當然，去到其他科，我同其他人嘅差距就更加好明顯，尤其是係英文同某啲選修科，我好懷疑呢班友仔係咪文盲嚟，最簡單嘅英文對佢哋嚟講就好似同量子力學一樣難度咁。

不過，最後大家（如果以班主任嘅睇法嚟講，係竟然）都係順順利利，冇人因為成績問題而留班。

不過講到明冇人因為成績問題而留班，換言之即係有人因為其他理由而留班。

嗰日放咗學之後，陳天元打電話嚟比我。





「洛文哥，我估我要留班。」佢把聲聽落好慌張。

「咩事？點解要留班？」佢成績應該未至於要留班，所以應該唔係學業問題。

「你得唔得閑出一出嚟？我而家唔方便講。」