那年玩社，四位靚女: 二十九

唔知老麥係咪特別關照同姓嘅人，總之佢個陣時好鐘意呢個麥思宏。班長比佢做，成日叫佢答問題。我估老麥調佢同我坐，就係因為我同八婆之前嗰單嘢。

呢個麥思宏，都係嗰句啦，其實幾 nice，不過幾 nice 都好，都係扮出嚟。

喺嗰陣時，當我同八婆單嘢揚到全班，甚至全級都知道嘅時候，我突然成為咗呢班藍血貴族嘅公敵。比人反枱，玩書包，幾小學雞嘅嘢都做得出。雖然我係足球隊同社嘅高 form 師兄師姐都叫做係背後支持我，同老師反映過問題，但係 form 1 從來都係一個冇王管嘅地方，規矩唔識守，人情世故又唔明，小學雞行為都係搣唔甩。

我心諗：大佬呀，入得嚟呢間學校，好心就唔好咁戇鳩啦。又要人唔好叫你做小學雞，自己又唔係特別成熟。

如是者，我同呢班戇鳩仔嘅緊張關係持續咗大概一個月。喺呢一個月裏面，我盡量嘗試忍耐，祈求會有人睇到問題存在。





有一日，我依舊都係比人撚狗咁撚。四五個好似係 form 2 嘅男仔用言語同肢體攻擊我，我個書包又比人當做波咁玩。嗰啲人我稱佢哋為死士，佢哋好似係比八婆一個靚女 friend 收咗兵，佢哋恃住自己 form 2，就以為自己媾到 form 1 妹妹好威水，就乜嘢都肯為佢做。殊不知，呢條臭雞已經係籃球場隔離，同籃球隊大師兄一齊玩緊。

呢個時候，麥思宏衝入班房，嗌咗一句：「停手。」

「你邊位呀？」

「唔洗理，總知呀琳搵你哋。」

聽到娘娘搵佢地，呢班狗公緊係即刻衝出去。但係聽聞，佢哋係大師兄面前，變咗做龜公，柒到冇眼睇。





「你有冇事？」佢捉住我隻手扶起我。

「ok 呀，慣咗。」

「你唔好介意，佢地喺咁㗎啦。」

「我明嘅。」我到而家都唔知點解會爆咗呢句嘢出嚟。

「唔好理佢地，我帶你搵麥 sir。」