那年玩社，四位靚女: 十八

（試下兩日一更 希望大家唔好介意）

「豬你係咪真係好攰啫 我陪下你啦」

「要寫稿 不了」

我又比嘉瑜請食檸檬。

真係奇怪，以前係嘉瑜佢掛住我，想搵我出去；而家反而係我冇咗佢唔得，佢成日都唔得閒。





真係怪怪地，不過應該都係一陣嘅姐，完咗比賽就ok。

希望係。係我諗多咗姐。

「咁你快啲寫好稿囉喎 等我可以見下你」

「傻啦 你日日返學都見到我架啦」

又好似係，不過我而家上堂，除咗寫下稿之外，就係瞓吓覺，又點會留意嘉瑜。





「對唔住呀 呢排好似唔係點理你咁」

「其實我都係 我哋兩個都忙 努力完 遲下再慢慢見啦[心]」

嘉瑜真係善解人意，我可以擁有佢，真係太好彩。

有時我都會諗我係咪襯唔上嘉瑜，有一次我仲同佢講，佢即刻就話：「我唔准你咁諗！我鍾意得你，你就唔會襯唔起我！」

佢越係咁講，我就越內疚。我究竟係咪係度浪費緊佢嘅時間？我真係唔係幾識點同佢相處。





算啦，唔好諗咁多，我唔想嘉瑜見到我咁諗嘢。如果佢真係見到嘅話，一定會嬲咗我。

我覺得，我要搵個人傾下。

搵邊個？佢？

唔好啦，唔好搵佢啦......

但係唔搵佢，又可以搵邊個？

但係搵佢真係最好喎......

唉好啦好啦，搵佢啦，申屠兄。

「喂，有啲嘢想同你傾下。」





「做咩呀，同嘉瑜姐散咗呀？」

「屌，乜你份人咁陰毒架。」

「咁搵我做乜先得架。」

「有啲感情上嘅嘢，覺得你會俾到啲意見。」

「唔係散咗，咁會係咩嘢？」

「我覺得我同佢好似淡咗。」

「咁對對情侶都實係會咁嘅，一開始大家梗係好開心，好sweet，但係蜜月期一過就奶嘢。如果你哋捱得過，就通常都ok，可以一齊到好耐。」





「咁點先捱得過？」

「我估你覺得同嘉瑜淡咗，係因為你哋兩個都忙緊姐。過咗個比賽之後，你咪搵啲嘢同佢做下，或者之後放新年假同佢去下旅行囉，我之前都同我嗰個去咗轉韓國啦，開心死佢。」

「又好似幾好，等我諗下點樣做。」

「你話兩個人拍拍吓淡咗，我同我嗰個都試過，咁咪試下一齊創造啲好嘅記憶比佢囉。我上次同陳莉曦去首爾，佢係弘大食住嘢，我就笑鳩佢，我哋兩個都好開心架。」

「你嗰個，食嘢就開心，咁就易攪啦。但係我嗰件唔同呀，人哋才女嚟架嘛，好複雜，又唔知佢啱咩。」

「唉，我就唔知你哋兩個啲嘢啦，不過你條仆街都係返去寫吓稿啦，如果唔係到時決賽輸咗，要搵郭玲玉carry，我笑撚柒你呀。」

「多撚謝喎，有你呢句，我一定贏得好好睇睇，唔好失禮你。」

雖然申屠比我嘅意見聽起上嚟好有用，但係實際執行上有難度。我真係唔知莫嘉瑜呢個人鍾意啲咩。





我究竟要點樣同佢一齊，我真係好想維持呢段關係。