那年玩社，四位靚女: 十二

「咁，你之後同你條仔搞成點？」

「無咩嘅，我哋咪見少咗，關係差咗。到咗上個禮拜，佢whatsapp我，話唔知點樣同我相處好，所以大家都係分開好啲。」

聽到 Yvonne 都會比人飛嘅事，我自己都有少少驚，好驚第時我同嘉瑜都會咁。

「咁而家有我呢個情緒輔導員同你輔導下，你有冇好返啲？」

「乜你有輔導過我咩？」我唯有苦笑。「不過，又真係好返啲嘅，多謝你。」





「唔好多謝我，多謝嘉瑜啦。佢肯比我出嚟，同你吹下水，佢先應該多謝。」

「係囉，咁你仲唔快啲返去錫下佢？佢呢幾日犧牲咗好多架，去搵佢啦，我冇事。」

張依韻，你真係掂。

我即刻whatsapp嘉瑜搵佢。過咗一陣佢終於覆咗。

「終於肯搵我啦咩」





「唔好嬲啦豬」

「好嬲呀 唔好搵我」

憑佢呢句「好嬲呀」，我就知嘉瑜一定冇嬲我。

「我同 Yvonne 傾完啦 最多我陪你去買嘢啦」

「算你啦」





你睇下？邊有嬲呀！

「喂喂喂你睇下！好靚呀個袋！」其實我真係唔知嗰個袋又有幾靚，但係只要佢開心，我就夠。

「你想要咩，咪買俾你囉。」

「乜你份人咁膚淺架！唔知用錢可唔可以買到你啲時間呢？」

「你想嘅話，唔使錢都可以有！」

「傻豬嚟嘅，你啲時間一早已經係我架啦！」

「唔係架，我啲時間仲要攞嚟幫你班好姊妹補全科架。」

「唔駛你麻煩啦，我哋諗住報燈塔學校，睇下koopa教數好啲定你教教得好啲囉。」





「唔係掛？攞我同佢比？我啲水準好明顯好過佢啦！唔係喇，如果你係嗰度聽唔明嘅話，記得搵番我，我教返啲實用啲嘅知識俾你。」

「唔使你啦！你要專注啲陪我，唔好再搞其他嘢啦。」

「傻妹！」

嗰晚，正當我打完兩場LOL，想瞓返陣嘅時候，有個人打電話比我，原來係鄧國燊。

「喂阿文，我哋又有下一個社際比賽啦！今次希望都係你嘅強項啦。」

「今次又玩乜呀？社際籃球？」

「唔係，今次靜態啲，玩辯論比賽。」





「幾好呀，我講嘢都ok，你搵咗其他人未？」

「咁就梗係搵咗啦，不過你識嘅應該係得我同郭玲玉。」

「郭玲玉？Serena？」

「係呀，就係Serena。你唔知咩？佢以前係學校辯論隊係主辯嚟咯喎。」

「又真係睇唔出喎！咁實冇問題啦。下次meeting個陣見啦！」

估唔到呢間學校真係臥虎藏龍。咁多勁人，相信係呢間學校嘅生活只會越嚟越有趣。

我即刻 whatsapp 比 Serena。

「乜你原來咁勁 係辯論隊主編[laughcry]」





「失敬失敬 我點夠洛文兄你抽」

「點都好啦[laughcry] 我都會去辯論比賽 合作愉快」

我突然醒起啲嘢，我可以問下嘉瑜，chok下料，睇下綠社嗰邊會搵咩人。

「豬 綠社搵咗人去辯論未？」

「haha 你一定估唔到 我都有份！！」

「又真係估唔到喎 希望你到時唔好講講下離題俾人扣撚曬啲分[laughcry]」

嘉瑜都有份？我對綠社嘅勝算感到憂慮。