那年玩社，四位靚女: 七

我一隻手攞住未飲完嘅cappuccino，另一隻手拖住嘉瑜白滑而溫暖嘅手，一齊離開starfucks。

「你開唔開心？」

「唔開心！但係我點都要拖住你！」嘉瑜似乎好享受拖住我隻手嘅時光。

我突然覺得，嚟咗呢間學校之後，太多嘢發生咗係我身上，無論係新嘅死黨，定係新（應該話係第一個）嘅女朋友，都帶比我好多改變。我好想快啲忘記我嘅舊生活，盡快迎接新生活。

「唔開心呀？咁你想做咩先開心啲？」



「嘻，講笑咋。有你係我身邊，乜都夠啦！」

估唔到我人生中竟然有咁幸福嘅時刻，仲要我隔離嗰個係一個靚女。

「係喎，其實點解你會鍾意我？學校大把仔，你又睇中我？」

「你問埋晒呢啲問題，而家好唔想我同你一齊咩？」

女人啲嘢，真係問又死，唔問又死。



「嚟啦，認真答。我真係想知，你唔係貪我靚仔呀嘛？」

「你就想呀！我都唔知點解我會鍾意你！總之我就想同你係埋一齊啦！」

我用隻手捏住佢塊面，「乜都好啦，總之你而家無論點都好，都要跟住我架啦。」

行下行下，我哋都行咗過去巴士站。嘉瑜要搭巴士返屋企，我同佢唔同路，唯有講再見。當然，又要借啲意挨落我度，搞一輪先走到。

搭緊西鐵果陣時，我諗返起今日發生嘅嘢。太刺激，太幸福。我好希望咁樣嘅生活可以繼續咁維持落去。



返到屋企，訓咗落張床度，我不斷咁傻笑，因為嘉瑜實在太可愛。有佢做我女朋友，我心滿意足。莉曦？我唔應該再諗佢。我要好好享受嘉瑜帶俾我嘅嘢。

「阿仔，你傻咗呀？全晚係度笑，係咪病咗呀？」

「冇嘢喎阿媽，真係冇嘢。」

跟住個幾日，我都特別早起身，搭車去龍門居到接嘉瑜返學。

唔知係咪已經有人見到我哋一齊返學，我哋兩個拍拖嘅事開始係學校流傳，咁我哋除咗承認之外都冇嘢好做。

「掂喎你，文哥！咁快就溝到女，睇嚟你都幾適應呢度嘅生活喎！」天元喺練波嗰陣，係咁提起我同嘉瑜啲嘢。

「你就好啦，有莫嘉瑜，唔係，要改口做康太喇！」連F3仔黃展賢都知道件事，睇怕遲下連老師都會知。

對於佢哋嘅嘲笑，我通通只會回覆一句：「屌。」



因為綠社仲有一場季軍戰要打，所以嘉瑜都忙住搞啦啦隊啲嘢，所以每一日我哋只能夠係上堂時間親密一下。我隔離嘅陳天元都好識做－應該話係冇眼睇，瞓著咗。

上緊英文堂嘅時候，天元訓得最冧，嘉瑜都冇心機聽書，又撞正個英文呀sir係嗰啲唔係好理我哋，自己講自己嘢嘅老師，我哋先可以於入無人之境咁，想做乜都得。

「唉，而家搞啦啦隊果邊啲嘢好攰呀，你可唔可以得閒嚟陪下我呀？」

「我都有嘢做架，最多我借個膊頭比你，訓落嚟啦。」

點知佢真係成個人訓咗落去，壓住我個膊頭，痛到我唔想郁。

「康洛文，好嘢喎，咁都未訓得著。嚟，同我講下呢篇news article講咩。」

屌呀！你叫個唔訓嘅人答問題，無天理呀！



我攞起份報紙，睇一睇佢叫我睇嘅文章。呢篇文章用字對我嚟講相當淺，我估我F3個陣都睇得明。

「哦，篇article就講政府將會喺新界北收地發展新市鎮，個作者認為政府應該做多啲諮詢同埋評估，聽多啲市民意見囉。就係咁喇吳sir。」

「Easy right？你咁聰明，幫下你啲同學仔啦。」

就係咁，吳sir叫我完咗社足之後，得閒教下其他同學英文。屌，其實姐係自己教唔掂姐，做咩推個波比我姐？不過咁，其實有比多咗時間我同嘉瑜相處。