那年玩社，四位靚女: 五

比 Yvonne 打到有啲頭暈，行去隔離坐一坐，順便避一避佢，費事佢又再搞我。

「喂，你見點？我哋冇咗你唔得個喎！」原來莉曦坐咗係我隔離，仲問我有冇事。

「ok 啦，不過下次見到張依韻呢條友都真係要掉頭走。」

「哈，鬼叫你咁唔識講嘢咩。睇你個樣，咁唔識同女仔講嘢，你應該都係未出過pool架啦。」

「唔係，我A1嚟，但係個女仔轉咗校，我哋先散咗。」其實我係A0。





「估唔到喎。」

「唉，唔好再講喇。係喎，咁你呢？你就肯定1架啦，你以前仲有冇同其他人一齊過？」

莉曦突然變得好認真，「無呀，之前都冇，申屠係第一個，第一次有人咁傻，走去追我。」

「以前都有好多男同學想追我，但係我阿哥成日就喊打喊殺，啲人見到咁，都比阿哥嚇走晒。」

「但係申屠好唔同，佢好難得冇嚇親，最後連阿哥都話佢係好仔，可以放心比我同佢一齊咁話喎。」





聽到呢度，我都估唔到原來申屠子成係啲咁有毅力嘅人，睇嚟佢真係好鍾意莉曦。不過講到佢阿哥，我而家同佢阿哥熟到不得了，如果我要追莉曦，阿Sky可能會即刻批准。

「唔講咁多住，好似就快到下一場波，你去唔去睇？」佢問。

「梗係要。」

第二場社際足球比賽，黃社對綠社，亦都正式開始。紅社同藍社啦啦隊稍作休息，輪到黃社同綠社嘅表演時間。

而我所知，黃社有屯門區學界神射手申屠子成，的確應該較有勝算。但係相對場上嘅球員，台上嘅啦啦隊似乎遜色咗少少。





綠社啦啦隊聲勢浩大，全社用盡所有道具同口號，務求用聲浪拉近場上雙方嘅差距。佢哋啦啦隊嘅威力令其他社嘅同學都會停低睇一睇。

「綠社！綠社！We are Green！」企喺看台最前面，係啦啦隊其中一個隊長嘅，竟然係果日笑我基佬嘅莫嘉瑜！

佢換上啦啦隊制服，的確為佢帶嚟另一個形象。之前我都冇乜留意呢個坐我附近嘅同學，直到今日，我先可以有一個機會觀賞佢，同佢班社員嘅表現。認真，莫嘉瑜跳舞都ok。

講返場波先，唔知係咪怯於綠社啦啦隊初段嘅聲勢，黃社攻勢似乎欠缺組織，更加俾咗綠社一啲反擊機會，仲有一次，綠社爭啲就入一粒。但係過咗頭十五分鐘，黃社企穩陣腳，申屠又點會放過你班友仔？

上半場完，申屠一球禁區外遠射，黃社一比零領先。

雖然上半場輸緊，但係綠社社員似乎並冇放棄，中場休息時間不斷打氣同舉banner，令球場真係有一種地獄主場嘅感覺。係「綠社奧脫福」！

莉曦見申屠身水身汗，即刻落去遞支水比佢。認真，我係有啲妒忌申屠，有莉曦咁樣嘅女伴，真係入多幾粒都制！

下半場，綠社繼續啦啦隊政策，再加上半場休息時教練比佢哋嘅指示，進攻即時變得更加流暢。





終於，佢哋嘅努力並冇白費。綠社10號黃英傑同8號譚兆倫做一個撞牆，然後扭過最後一個黃社防守球員，形成單刀局面！黃英傑輕鬆射入，一比一！

看台上邊，綠社社員震耳欲聾嘅歡呼，真係好有氣氛（同埋好嘈）。

但係，綠社並無開心得太耐。申屠開始發力，三分鐘內連入兩球頭槌，大演帽子戲法。綠社兵敗如山倒，最後輸一比三。

咁即係話，我哋決賽嘅對手，將會喺黃社！

申屠，放馬過嚟！