[真人真事+少少甜] 一切，由MSN開始: 第四十五章、丁：當年今日

藍藍： 
13:24 放假好悶呀:( 
13:24 你做緊咩呀 

我： 
13:25 打緊機囉 
13:25 一唔一齊丫 

藍藍： 
13:26 唔洗lol 

13:26 陪我出下街得唔得呀 

我： 
13:27 去邊先 

藍藍： 
13:27 不如去唱k丫:0) 
13:27 我唱歌好好聽嫁^^ 

我： 

13:28 你唱歌咪同胖虎差唔多囉haha 

藍藍： 
13:28 一定好過你先啦 
13:28 當你應承左嫁喇 
13:28 我依家打去book房 

果陣時係升f.3嘅暑假，我就係咁無啦啦俾藍藍拉左去唱k，亦都係我第一次去唱k(毒向左走向右走平時點會去唱k呀 ) 

去到k房、一切都好陌生。成間房黑媽媽咁，枱面有2枝咪，有部電視。我坐低左，呆左咁唔知做咩好 。 





藍藍一坐低就拎起左個遙控猛咁揀歌，不過差唔多首首都係周杰倫嘅，而我識嘅就只得<給我一首歌的時間>同<說好的幸福呢> 。 

結果，藍藍順利做左咪霸。雖然9坐係度係有d悶，不過係側邊偷偷地望住藍藍唱歌，其實我心裏都有暗爽下 。 

終於都唱到我識果兩首。不過唔知係咪因為我無開聲，搞到把聲好沉又走哂音  。 

『hahahahaha，笑死人喇，你識唔識唱歌嫁？ 』藍藍發自真心咁笑７我。 

我啤左佢一下之後無理到佢。果陣咁岩下一首係<淘汰>，我就同佢講：『<淘汰>不嬲都係我首飲歌黎嘅，你“new”乾淨d耳屎聽啦 』 

一開頭都無乜問題嘅，點知我唱『情歌歌詞何必押韻』果陣，唔小心將『押韻』唱左做『呃冤』，結果藍藍笑到紅都面哂。 

『Hi，支咪壞嘅，唔向左走向右走唱喇 』 





『根本就係你唔識普通話，笑死我啦hahahaha… 』 

呢個時候，播到一首我唔識嘅歌<唯獨你是不可取締>，藍藍話：『呢首歌好正嫁，等姐姐唱俾你聽啦 』望住佢個得戚樣，真係唔知笑定喊好。 

『曾聽說有許多戀愛…』首歌又真係幾好聽，加埋藍藍把聲就更加好聽 。 

『唯獨你一個是不可給取締…』藍藍唱到呢句嘅時候，突然擰轉頭望我，原來我又望緊佢，變左做四目交投。 

藍藍可能因為太投入首歌，搞到佢個樣好深情款款咁，再加埋佢岩岩笑到好紅嘅果塊面，我俾佢迷住左。 

我地一直互望到首歌停左先至醒返無繼續望。不過係果一刻開始，我知道自己鍾意左藍藍。

果一下，唔知邊度黎嘅勇氣，可能因為間房得我地兩個，可能果陣時我仲年少無知，我突然同藍藍表白。 

『藍藍，我愛你，你可唔可以做我女朋友…』我好順口咁就講左出黎。 





藍藍面對住我嘅表白，佢“dup”低左個頭，諗左一陣，跟住同我講：『對唔住呀，不過我唔想因為拍拖令到我地嘅感情變質，我覺得我地做朋友先至可以一直一齊，唔會分手』 

藍藍伸左佢隻手出黎：『應承我，我地以後都要keep住咁老友，勾手指尾』 

就係咁，我同藍藍就一直都企係朋友嘅界線後面，無再行前過一步  。 

依家同kelly黎到k房，又令我諗返起藍藍，我一坐低就點返哂我同佢唱過嘅歌。雖然都仲係唱得好難聽，不過kelly就好似聽得好受落咁。 

『丁丁，你依首歌係咪特登唱俾我聽嫁？』我岩岩唱完首<唯獨你是不可取締>。 

『唔係，我係唱俾藍藍聽嘅』我係個心入面想咁講，不過緊係無講出口 。 

不過，我突然好有衝動同kelly就咁講清楚…