[真人真事+少少甜] 一切，由MSN開始: 第四十二章、藍：溫暖頸巾

大雄： 
17:35 藍藍BB 就到聖誕啦 賞唔賞面同我去約會？ 

我： 
17:35 我好忙嫁喎 差唔多full booking 
17:36 考慮下啦 

大雄： 
17:36 咁都仲要考慮!? 
17:36 咁算啦... 

我： 
17:36 我講下笑炸 果幾日一早預左比你 

大雄： 
17:37 不嬲都話藍藍係最好  

聖誕節緊係要忙下聖誕禮物啦。記得識大雄無耐，佢就話想要條頸巾。 

果時就淨係織條手繩，依家都比佢載到鬆哂啦。所以，今次就織條溫暖頸巾比佢啦。 





係就係要花多d時間，但為左大雄，點都值得既。 

「藍藍，你諗好送乜比大雄未？ 」Kelly小息個時偷偷地走黎問我。 

「唔話你知！費時你抄我！」 

「講啦講啦，你最了解丁當啦！ 」 

腦海中突然浮現丁當一直都仲用緊我F.1個時送佢既深藍色頸巾。 





雖然係係商場買，但佢非常珍而重之，我仲應承佢話大個織一條比佢。 

依家條頸巾都好舊，係時候換啦... 

「我記得佢條頸巾用左好多年啦。我打算織一條紅色既比大雄，你不如一齊織翻條藍色既比丁當，佢一定好鐘意。」 

「好呀好呀！ 」 

第二朝一翻到學校，就見到Kelly好興奮拎住一大疊織頸巾既書。 

「藍藍！原來有好多花紋嫁！你覺得邊款靚d? 」Kelly其實都好可愛，佢對於所有有關丁當既事都非常熱衷。 

「喂喂喂！你快d收埋先啦，我想比個驚喜佢地呀！」 





「好！我知道啦，咁我地放學再搵個角落慢慢傾。」 

我地左簡右簡，最係都係選擇最簡單既「一針高、一針低」算。上Youtube睇教學，結果成粒鐘先學識起個頭。 

「嘩！大雄佢地黎緊啦！ 」大雄同丁當補完physics課，我地即刻收埋所有野。 

「你兩個做緊咩不法勾當呀？」大雄見我地心虛樣就問。 

我即刻話：「關你咩事！我地傾緊少女心事。 」 

「威啦！依家要姊妹唔要男朋友啦！ 」 

「係呀係呀。 」 

「行啦傻妹，你又話趕時間。」之後大雄就拖左我走。





「大雄，我地Christmas去邊到好？」講真，今次係我地第一次一齊過既聖誕，點都有d興奮。 

「我一早book左海麗啦哈哈 」 

「咩係海麗？ 」 

「時鐘酒店囉！一齊爆房算，唔洗出去同人迫。 」 

「乜你咁衰嫁！ 我毒在家中算啦...」 

「我講下笑炸！我一早安排好啦，不過唔同你講住，係秘密！ 」 

「好叻咩，懶神秘！」把口就咁講，其實超級期待！