[真人真事+少少甜] 一切，由MSN開始: 第二十五章、藍：二人世界

㊣唔需要法寶.大雄： 
16:12 藍藍 
16:12 你今次UT考得好似幾好喎 

我： 
16:13 都ok啦haha 
16:13 你好似進步左好多咁 

㊣唔需要法寶.大雄： 
16:13 最佳進步獎非我莫屬hahahahahahaha 

我： 
16:13 自大獎就有你份 自大狂! 

㊣唔需要法寶.大雄： 
16:14 係呢 之前你咪話我可以有個願望既 
16:14 ummm 我想要... 

我： 
16:14 要乜呀haha 你平時咁厚面皮 唔洗依家先黎怕羞喎 

㊣唔需要法寶.大雄： 
16:15 你可唔可以親手織一條頸巾比我? 

頸巾！？我之前都未織過，一織就要花好多時間... 

我： 
16:16 Sorry呀 大雄 
16:17 唔係我唔想織... 
16:17 而係呢排比較忙 UT完左好快又exam啦 

㊣唔需要法寶.大雄： 
16:17 我都明既... 
16:17 nvm la 我諗過其他野 

我： 
16:18 不如 我織手繩比你haha 不過可能好樣衰 

㊣唔需要法寶.大雄： 
16:18 好呀!!!!!!!!!! 唔好走數喎 
16:19 幾樣衰我都要既 

話咁快又過左一個星期。自從調左位之後，我同丁當一日都唔知有無講夠五句野。一黎係坐得遠左，二黎我一搵丁當，Kelly就會望實我，搞到我周身唔聚財。 

相反，大雄坐左係我隔離之後，唔知點解我會好有安全感，佢時時刻刻都陪住我，個班MK花痴妹都唔夠膽再搞我。 





「藍藍，聽日就係哈老喂啦，好興奮呀！」 

「我都係呀，因為我好期待睇到你比鬼嚇親果個狼狽樣哈哈」 

「我郭雄仁天不怕地不怕，我諗你要失望啦！」 

「睇下點！」說話就咁講，其實我驚到想死，由細到大都好怕呢D野，有時夜晚一個去廁所都淆哂底。 

「我聽日同你一齊去啦，我過黎海濱接你再一齊行去西站啦。」 

「都好！」 

第二日準時六點，我同大雄已經係OP大門口，而一直都未見到丁當同Kelly。 





「有無搞錯嫁佢地？連丁當都唔聽我電話！ 」 

「唔好咁啦，藍藍。佢地唔黎我地咪過二人世界囉哈哈 」 

「你就想！」 

「Sorry呀！我地遲到。」一轉身就見到丁當同Kelly跑緊過黎。嘩嘩嘩！乜Kelly變得咁西利既！？

佢除左眼鏡，戴左副con，仲化左個淡妝，齊陰既佢成個日本娃娃咁。平時讀書樣，又唔點出聲，一打扮起上黎原來咁靚女。佢仲要著左件螢光黃既性感小背心  ，再加條白色既超短迷你裙，身材好到不得了！難怪丁當... 

「我地行啦！」Kelly之後一手就拖實丁當行入去，好似都唔多想理我同大雄，丁當都有少少尷尬咁望住我。 

「不如坐纜車上山先，果邊個D好似刺激D！」唔係呀嘛，大雄一黎就玩想玩刺激D！！睇黎佢真係一D都唔驚... 

「都好呀，反正我都好耐無搭纜車。你想唔想呀丁當？」 





「你地話點就點啦，我無乜所謂。」之後就一齊去等纜車，條隊長到不得了。 

等左好耐終於下一個到我地啦。 

「小姐，請問你地幾多位？」職員哥哥好友善咁問我地。 

「兩位呀，唔該。」Kelly即刻答。兩位！？ 咁我同大雄呢？ 

「藍藍，你同大雄搭下架啦。我同丁當行先，陣間見！ 」跟住佢就死捉左丁當上車。 

我同大雄亦都無可奈何咁上左後面個架。