一個人,追一個女神: 第一章 緣份
有人話,媾女最緊要係溝通,無溝通又點媾女呢?悲鳴連日都打唔起精神,因為佢知道佢女神既上堂時間表同自己完全唔一樣,連堂都無得一齊上,何來溝通,何來媾女呢?
悲鳴永遠都係第二個返到課室,永遠第一既就係默默等待大波妹返嚟既言已。「喂,你估下今日大波妹會戴咩色BRA返學?我估黑色。」言已一邊咬住個包,一邊搵悲鳴傾計,「頂你,返學唔係白色就肉色架啦,唔通戴黑色比你個死人咸濕仔睇咩?」悲鳴一邊打開locker一邊回應,「唔係架,可能佢唔戴呢。嘻嘻,真係諗起都性奮呀!」言已用佢最自豪既射術將所有垃圾射入垃圾桶。「如果佢真係唔戴既話你咪學飛機王咁入廁所打番次飛機囉。」悲鳴開始無佢咁好氣。悲鳴行番自己個位到,打開佢最有興趣既小說,慢慢睇。佢睇緊一本男女主角互相鍾意對方仲大團圓結局既書。
「唉,你話我係本小說既男主角咪幾好,有得同女神行街睇戲食飯。而家我呀,連搵佢傾計都唔夠膽呀頂,緣咩份吖,現實邊有咁多緣份比我吖,唉」悲鳴睇睇下不禁感嘆。「你仲未搵你女神傾計呀?去馬啦,等到幾時呀?好似我咁,有feel既咪拿拿臨表白,成功就得米,唔成功既,兩個月後又一條好漢。你在怕什麼呢？」啱啱入課室既公子即刻加入對話,仲用普通話強調重點。「咪係囉，不如我同你鬥快媾到女吖？我就媾大波妹，你就媾你女神。好唔好呀？」言已用佢既尊嚴做賭注，「頂你咩，你想媾嗰個就係你隔離，我想媾嗰個就係隔離班，玩條毛呀？」悲鳴用近乎惱羞成怒既語氣反駁，表示不會參與呢場不公平競爭，然後低頭睇住本書，話：「除非真係有緣份啦．．．．．．」