《情困之時，我遇上了自稱情性的情聖》: [Case 12－重來一次] PART 04
「老公～你睇下～你睇下～好得意丫～買返盤返屋企種咯～」老婆拎住盆仙人掌仔喺手～
『點解你會鍾意仙人掌架？又多刺...個樣又奇怪...』我摸下摸下自己個頭，諗下諗...
成個波咁...又長到成個波都係幼身既刺咁...萬一一個唔小心，真係會搞到成手都係刺架喎...
老婆就笑住口咁答：「玫瑰花夠有刺啦～咪又係咁多女仔鍾意～而且我鍾意仙人掌仔係因為佢夠易湊～生命力夠晒強～唔似得你咁丫～鬼死咁難湊～」
『乜我真係好難湊咩...』我扁扁地嘴…
老婆就摸下摸下我個頭：「唔難湊～唔難湊～快D長大就唔難湊喇～」
我要快高長大，等我湊返我最愛既老婆～
「老公～肯定你今早又無幫盆仙人掌仔噴水啦～」老婆拎住盆仙人掌仔喺手，叉一叉住條纖腰望住我...
『丫～係丫係丫…一時唔記得左添...嘻嘻...』我摸下摸下自己個頭，傻笑一下...
「唉～好彩仙人掌仔生命力夠晒強姐～唔係既話，早就魂歸天國喇～」老婆正想幫盆仙人掌仔噴噴水...
『等我黎～等我黎～哎丫...』當我正想幫老婆手，接過老婆手中盆仙人掌仔之時，我又好唔小心咁俾盆仙人掌仔吉親...
「老公～小心D丫～好彩今次唔係吉得太多條姐～」老婆摸一摸我隻手。
『好彩有老婆錫～』我嗲一嗲老婆～
「老公丫～下次記得要小心D丫知道嘛？」老婆放一放低盆仙人掌仔，幫我拔一拔刺...
知道知道～我一定會好小心～唔要老婆再擔心～
「老公～快D一齊去拎野食咯～」老婆拖住我隻手，好心急咁拖到我出去拎野食～
老婆一拎起隻碟，就夾呢樣～夾嗰樣～
唔理係前菜沙律冷盤定甜品都好，都放晒落隻碟道～
載到滿滿咁之後，就返到埋位～
『拎左好多野返黎呢～～～乜都有～乜都有～』我望住老婆隻碟～
「係丫～我一見到想食既野食就忍唔住手拎左先～仲會唔分先後，想食就食架喇～老公～試下呢個丫～」老婆放一放隻生蠔落我隻碟道～
『嗯嗯～好味丫～～～老婆～你都試下我呢個丫～』我又放一放隻蟹腳落老婆隻碟道～
我地每次都會乜都拎～
仲會拎到滿滿咁～好滿足咁～
盡量喺有限既時間，得到最大既滿足～最大既幸福～
“Fly me to the moon And let me play among the stars”
一邊聽住輕快既音樂...
“Let me see what Spring is like”
一邊攬住我最深愛既老婆…
“On Jupiter and Mars”
好溫暖...
“In other words hold my hand”
好溫馨...
“In other words darling, kiss me”
全個世界都好似剩返我同老婆...
“Fill my heart with song”
只有我同老婆既世界...
“And let me sing forevermore”
「老公～我係勁鍾意Olivia Ong架～」老婆攬到我實一實～
『係？唔係應該勁鍾意我先岩架咩？』我都攬到我老婆實一實～
「我緊係勁鍾意你啦老公～不過聽歌既話，我就最鍾意聽佢呢首“Fly me to the moon”～」老婆喺我懷裏嗲下嗲下咁～
『嗯嗯～我都覺得佢唱既版本係最好聽呢～老婆～』我摸下摸下老婆把秀髮～
「仲有仲有～“我願意”又係超正架～」老婆點晒頭咁～
『嗯～佢唱得無咁Sad～』我都點下點頭～
起碼唔似唱到好似唱梗“新不了情”咁～
“You are all I long for”
我攬下攬下老婆...
“All I worship and adore”
我聞到老婆身上既氣味...
“In other words, please be true”
好似有D...
“In other words, I love you”
有D唔同...
呢種氣味係...
「我既氣味可能已經沾左喺你既車廂入面...可能會令你老婆唔鍾意...你可以噴一噴空氣清新劑～清清地既都可以去走我既氣味架喇～」喺我懷抱之中既老婆，突然講出Zoe既一番說話！
我望一望清楚喺我懷裏既老婆...唔係...唔係...
而家喺我懷裏既...唔係老婆...
係…
『Zoe？！』我嚇左一嚇！大嗌左一聲！
驚到我連眼前既Zoe仲未變成灰色之前...
『嗚呀！！！』我就成個彈左起身！！！
『發夢...發夢...發夢姐...發夢姐...點解會發埋D咁既夢架？』我定一定神...
我成身都標晒冷汗咁...
點會咁架...點會發夢同老婆一齊...夢夢下會變左係Zoe架？！
無可能架...無可能會咁架...
咁多年黎，我夢裏面出現既女仔，就只有我老婆一個...
今次點會...點會...
仲要聞到Zoe身上既香味...
每個人身上既體香都唔同...
呢個係真...
就算兩個人有幾相似都好，身上既體香都唔會係一樣...
老婆同Zoe身上既體香...真係好唔同...
雖然話兩個都係清新既香味，但係老婆係有陣陣既幽香...而Zoe係清香...
呢個星期...我都有意無意之間...聞到Zoe身上既清香...
所以我可以好肯定...好肯定Zoe身上同老婆身上既香味係唔同...
或者就係因為咁...我喺夢中聞得到Zoe既體香...
之但係...
我望一望住床頭前...老婆張合照...
『我唔應該俾其他女仔喺我既夢裏出現...對唔住呢...老婆...』
我真係好內疚...
我覺得好對老婆唔住...
我就帶住呢份內疚...呢份對老婆唔住既感覺...梳洗完...食左個早餐...換好衫...做晒早上要做既事...
我就戴一戴上隻結婚戒指...帶住微笑咁望住老婆張相：『老婆...我返工先喇...我一定唔會做D對你唔住既事架～等我今晚返黎再陪你啦～拜拜啦老婆～』
「凌生早晨～」樓下個看更今朝既心情都好似唔錯咁～
『早晨～』我都要提起精神～
抬頭望住個天空，行去停車場。
灰灰黑黑...灰灰黑黑...
總係好似想落雨…想落雨咁...
都已經落左成個禮拜雨...
呢個禮拜都係落雨落不停...
由朝頭早出門，都放工返到黎...仲係Keep住落雨...
時不時仲會有狂風雷暴...
天氣真係變幻莫測...
同時亦都會影響到人既心情...
我而家既心情...總係...忐忐忑忑...
帶住忐忑既心情，行到黎停車場…
行到黎紅色既Ferrari 488 GTB旁...
“咇”解一解鎖…
“咔”上一上返車…
坐喺駕駛座上扣一扣好安全帶...
『仲係有…』Zoe既氣味...
都已經過左成個禮拜...
已經係成個禮拜之前既事...
我送Zoe返屋企...
而且喺呢個禮拜內，我都無再送過Zoe返屋企...
但點解車廂內...會仲殘留住...Zoe既體香架呢？
其實係唔係只係我心理作用呢？
係唔係我疑住疑住...
點解我會疑住疑住呢？
我係唔係應該買返支空氣清新劑噴下呢？
都係唔好諗咁多…
喺個軚盤上按下ENGINE START…
“吼！吼...”
要預返多少少時間返去...
我一駛出停車場...
“灑灑！”就落起大雨上黎...
滂沱大雨之下，我要更加小心揸車...
我都已經夠晒分心...再分心D就真係好易出事...
“吼...吼...吼...吼...吼...”以龜速喺高速公路上行駛...
後面D車好似想推我尾咁...
尤其係D搵食車...
我都只係行梗中線...又唔係快線撚...唔駛咁惡丫化...
大家都係道路使用者姐...禮讓下都得掛...
喺香港揸車真係一D都唔容易...
唉...
吼～～吼～吼！吼...”好唔容易先返到黎公司既停車場...
“咇”鎖好車之後，望一望手上隻Piaget...
『死喇死喇！就快遲到喇！』估唔到唔覺唔覺遲左咁多！
咁耐以黎，我都未試過返工遲到...
而家大老細唔喺道，我先黎遲既話，大老細一定會覺得我一無人睇住就放肆！
唔得唔得...都係要快D返上去先得！
我急急腳咁離開停車場！
急急腳咁上到黎大堂！
當我喺大堂企左一陣...
喺一大班趕住返工既打工仔之中一齊等𨋢...
「凌生早晨～凌生早晨～」
『早晨～早晨～』
有唔少都係我地公司既同事～
睇黎大家都好似好趕咁...
落雨丫嘛～係會容易D遲到～
等大老細返黎之後，同佢提議下因落雨既關係而遲到既員工可獲得豁免都好喎～
大老細成日都話有商有量架嘛～
真係有得諗～有得諗～
就喺我望住部𨋢諗下諗下之時...
“咯 咯 咯 咯 咯 咯”我聽到幾下急急腳既腳步聲行梗過黎...
呢種腳步聲...
我望一望過去...望一望過去傳黎腳步聲既方向...
我望到正正有一個著住白色連身裙既女仔...撳下撳下條裙咁走梗過黎...
我再望清楚D...望清楚D呢個女仔...呢個成身濕透既女仔...係Zoe...
果然係Zoe...
我只係聽到D腳步聲...都知道係Zoe...
之但係...Zoe又會...濕成咁既？
「早...早晨丫...凌生...」Zoe尷尷尬尬咁...
尷尬都好正常...
因為而家既Zoe...真係好濕...
髮尾都滴梗水...
手臂同對玉腿都佈滿一點點水珠...
條白色連身裙就唔在講啦...成件濕到透晒...透晒成個白色Bra出黎...
下面仲隱隱約約咁見到...見到白色既...底...底裙...
好彩仲未透過條底裙...
唔係既話，真係連條底褲都俾人睇得一清二楚...
而身邊D男人個個都毫不避忌咁望住Zoe...
打量住Zoe全身上下...
十足十視姦梗Zoe一樣！
你話Zoe點可能唔尷尬丫...
『早晨～做乜淋到成身都濕晒丫？』我就除一除件西裝外套，放一放到Zoe肩膀上。
「唔...唔該…」Zoe摟一摟實我件西裝外套，「我岩岩落車嗰陣時勁大雨...」
『出門帶返把遮丫嘛～』落左成個星期雨都唔帶返把遮～
「趕住出門唔記得左帶...」Zoe伸一伸條脷仔～
『咁大頭蝦既～』我恥笑一下Zoe，『咁你落車避避雨先嘛～』
「再避我就遲到架喇！我仲未過Probation架...」Zoe咬下咬下唇咁～
我都明未過Probation係要做好D既～
仲要對住我講既話，就更加尷尬啦～
始終Ivy會俾佢份Appraisal我睇，最終過唔過到都係由我決定...
『但係淋病左要請病假都唔係好事黎架喎～呢幾日都係記得帶返把遮喇～』淋雨好易病～
「嗯～知道～」Zoe帶住微笑點點頭～
我老婆成日都話我～
我成日都好大頭蝦～落雨成日都唔記得拎遮～
所以就放左把縮骨遮喺我個大袋入面～
老婆話：「你成日咁大頭蝦～放左落袋都唔會記得拎返出黎架啦～咁就岩晒喇～以後一落雨就可以喺個大袋道摷把遮出黎用～咁就唔會淋病啦～」
“叮噹”終於都等到有𨋢～
「凌生請～凌生請～」一大班同事就請我入𨋢先～
『Zoe～入去先～』我當然就要俾D風度出黎～讓Zoe入𨋢先～
「唔該～」Zoe就怕怕羞羞咁點點頭，行到入𨋢既角落企定定～
我就企到喺Zoe前面，幫佢遮一遮～
始終...Zoe全身真係好濕...
好易會引到D色狼犯罪...
可以保護到Zoe既...我都會盡量保護佢...
唔係因為我有私心呀！
呢D都係老婆教架！
老婆話對住邊個女仔都好，都要好有風度～要盡量保護～
咁先係一個好男人！
我真係有聽老婆話架！我真係好聽我老婆話架...
一直都係...一直都係...
返到上公司...
「唔該晒你丫～」Zoe就尷尷尬尬咁除返件西裝外套俾我，自己就用對前臂遮一遮住個胸。
我接一接過件西裝外套：『唔駛客氣～你都去Restroom整理一下先～唔係既話，公司D冷氣都幾凍下～好易冷親架～』
「嗯嗯...咁...我去個Restroom先...」Zoe尷尷尬尬咁指一指Restroom既方向，轉身行左去。
我望住Zoe既背影...
全身仲係濕透既背影...
仲有水珠喺手臂同雙腿之上既背影...
濕成咁...要點先可以整得乾呢？
有時候，男人總係唔會明白女人～
女人自然有佢地自己既方法搞掂～
仲要比起男人搞得乾乾淨淨～徹徹底底～
當我著一著返件西裝外套上身之時...
『咦...呢種香味...』先發現原來我既西裝外套...已經沾滿左...沾滿左Zoe既...Zoe既體香！
原來...原來就喺頭先既時候...
或者係因為我太耐無借過外套俾女仔...
我就只有借過外套俾我老婆...
我竟然忘記左...我竟然忘記左...
我實在太過大意喇！
我竟然會忘記外套係會吸到女仔既體香！
我而家著上件外套...著上件沾滿Zoe香味既外套...成個人都俾Zoe既體香所包圍...
我立即將件外套除返出黎！急急腳咁行返去我間房！
「凌生早晨～」
『早...早晨...』一路同D同事講早晨...
「凌生早丫～」
『早...早...』一路急急腳咁行過同事既位...
「早晨丫～凌生～」
『早晨...早...早晨...』衝住入房...
當我一入到房，我立即將西裝外套掛喺個衣架上，放正喺個風口下吹吹風！
好危險！真係好危險！
一個男人俾一個女仔既體香包圍下...真係極危險！
好多時D意志堅定既男人都係咁樣出事！
我都係唔好理咁多…由得件西裝外套繼續吹下風...我就要專心咁工作！
我一坐埋位，就好專心咁對住部電腦工作...工作...再工作...
做到個腦都實晒既話，都只係望下老婆張相～放鬆一下～
好快就做左成個朝早～好快又到Lunch Hour～
我就拎返起件吹左成朝既西裝外套...聞一聞...
『無晒D味喇～不過就有D凍...唔怕啦～著一著上身就暖～出去食返個Lunch先～』我就著返件凍凍地既西裝外套，行出房門～
當我行下行下，行到去Pantry既時候...
我見到Zoe坐左喺入面，對住個盒飯盒發呆...
點解Zoe會自己一個坐喺Pantry入面食飯盒既？
點解佢唔同D同事一齊出去食既？
唔...
我入去問下佢...會唔會太八卦呢？
唔...
咁了解下同事之間係唔係有乜不滿...都係我既責任黎既...
了解多D...平息糾紛...對公司既運作都會有良好幫助丫嘛～
嗯～大老細係咁同我講既～
我都係照住大老細既宗旨去做姐～
無私心既～無私心既～
好～就去關心一下同事啦～
我行一行入Pantry，好隨便咁同Zoe講左句：『咦～做乜一個人喺到食飯盒丫？唔同D同事一齊出去食？』
Zoe好似俾我嚇左一嚇咁：「下下...我？無無...我...我唔知男朋友幾時得閒，所以諗住留D時間俾佢～點知...結果到最後都係要叫外賣～嘻嘻...」
原來係俾男朋友放飛機...
『咁丫...不如一齊食啦～反正我都係一個人食～平時就話陪大老細一齊食～之但係大老細放梗大假～我都係一支公無人陪既～』就係話做高層只會同更高層一齊食～（有大食大）
而大老細唔喺道，個個高層都自己食自己～
所以話呢～烏托邦唔Work架～
「之但係...」我無等到Zoe繼續講落去...
『唔好之但係啦～食飯盒無益架～呢餐我請啦～』我就拉住Zoe行出Pantry～
同Zoe行下行下～行出公司門口～行到去商場～我先發現Zoe件白色連身裙都乾透晒～身上都無水珠～
都係既～都過左成朝～仲係濕既話就真係大件事～
我亦都唔好深究Zoe點樣整得乾件衫喇～
『想食乜野丫？』我隨便問一問～
「你請你話事啦～」Zoe都隨便咁答一答～
『唔...咁就去我同大老細去過嗰間餐廳食啦～』我都估到Zoe會咁答～
「好丫～」Zoe就跟住我行～
我總係覺得...Zoe就係咁爽朗～
就好似老婆一樣...又係同老婆一樣...
同Zoe入到去同大老細平時食開既法國餐廳裏面，好快手咁點好晒野食～
我就話Zoe夠晒爽朗架啦～
『係呢～你男朋友做邊行架？』我就隨便問問Zoe～
「佢？佢...做生意既～」Zoe都隨便咁答一答～
『哦～唔怪之得咁忙啦～咁你唔去佢嗰邊做既？』其實我都係隨口噏～
做生意有幾忙？其實我又唔覺得我地既大老細有幾忙～
而且...我都唔知Zoe既男朋友做乜野生意～都唔知適唔適合Zoe做～
「唔…唔係咁方便既…係呢～好似你咁年輕就做到Director，真係好厲害呢～」Zoe好似有心轉一轉移話題。
『我？都唔係既～只要你勤力做好自己要做既事，你都有機會～』大老細成日都咁同D員工講～
「我？邊有咁好彩丫～Probation都未過～」Zoe拎起隻杯，搖下搖下。
『其實唔難～唔...喺呢個香港...其實充滿住千里馬～只係...無幾多個伯樂出現～所以好多都懷才不遇～屈就喺D無能既上司同無腦既腦細之下～』呢個係事實！
香港人才輩出～但愛才既君主又有幾多個？
『而我地既大腦細，就係難得一遇既伯樂～』呢樣都係我地C-Moon出名既地方～
「唔...都係既～喺呢一行，個個都講梗入C-Moon係最有發展既空間～最有進升既機會～仲好過入蘋果～個個都Mon住C-Moon～所以喺任何季節，只要C-Moon一請人，都會有一班人黎In～我入到黎做，都真係好好彩～」Zoe點下點下頭～
『嗯嗯...』你好彩？定係我好彩？
或者...唔可以話係邊個好彩...
或者...一切都係天意...
「好野～有野食～好似好好味咁喎～」當男侍應放低兩碟頭盤之時，Zoe就流晒口水咁～
『Ok架～試下丫～』見到Zoe流晒口水咁，我都食慾大增～
「嗯！真係好正呀！」
『正既話咪多D黎食囉～』
「睇起上黎好似好貴...我呢D小職員邊食得起...」
『你賞面既，餐餐由我請又點話～』
「咁邊好意思丫？」
『你做好你既工作就OK喇～』
「係唔係真係咁著數丫？」
『唔著數架喇～員工做好自己既工作，我就少D野做～又唔會俾大老細抽插～』
「乜你好怕大老細架咩？」
『有邊個打工仔唔怕大老細架？』
成個Lunch裏面，我地都講公司野多～
亦都無再提起過Zoe既男朋友...