《情困之時，我遇上了自稱情性的情聖》: [Case 10－完美男友] PART 07

喺舖頭裏面，我同Timothy已經拍左成朝烏蠅...

至於嗰對搞搞震既狗男女新人呢？

早就已經過左去新舖嗰邊幫手～

走去新舖嗰邊喎～

喺呢段期間丫～嗰對狗男女閃埋一二角鬼混就多～



要佢地做正經野同學下野就真係無幾何～

過到去新舖幫唔幫到手我就真係唔鬼理佢咁多～

我只係知，而家我有D煩惱...

都唔止係有D…

係好鬼煩惱...



我坐喺Counter裏面，呆下呆下...傻下傻下...

「喂～做乜皺晒眉頭咁丫？有心事丫？見完情性好似仲煩左D咁既？」Timothy好似知我有心事咁，走黎Counter前問問我...

『仲好講喎！你介紹嗰個咁既情性俾我丫！講野又有前無後！求求其其問下你邊道唔妥就放下一句走左去！浪費我D寶貴時間！』真係諗起都扯火呀！

「唔…」Timothy諗左一諗，「我之前見佢佢都係求求其其咁放下一句就走左去...但嗰一句話...而家諗返起都好到Point～咁佢同你講左D乜丫？」

『佢同我講左...』我諗左一諗，『“唔好咁無自信喇～”咁囉！乜我好無自信咩？！』



Timothy打量左我幾眼：「你自信心爆炸添啦～」

『咪係囉！咪係囉！我都不知幾咁有自信！』都唔明點解嗰個情性會咁話我！

「除左呢樣呢？仲有無講D乜野丫？」Timothy繼續追問...

『仲有無講D乜丫…唔…』我又諗左一諗，『同我講劉青雲喎...』

「劉青雲？」Timothy一頭問號咁...

『呢～早兩年前，劉青雲咪做左影帝既～佢上台嗰時咪講左段好爆既太空船論既～咪就係嗰段野囉～』我又真係唔係好明我同太空船又有乜關係...

「係嗰段丫…」Timothy諗下諗下...

Timothy都諗得幾耐下...



好耐都無出聲...無晒反應咁...

『喂…喂…喂！！！你又發乜鬼野呆丫？』我推一推發晒呆既Timothy！

「下下？無無無…呃...我諗...你都應該好好咁諗下佢呢句話既箇中含意...」Timothy仲係諗下諗下咁講...

箇中含意？

有乜鬼野箇中含意丫？

Timothy又幾時開始扮晒高深咁架？

「你就係為左呢件事煩惱梗丫？」Timothy又打量一下我...



『唔係唔係…除左呢樣，我仲煩惱梗送乜聖誕禮物俾東日好...』一諗起就頭痛...

話晒都係同東日過既第一個聖誕節...

而且仲係一齊過既第一個節日...

我就緊係想送D有意義D既野俾佢架啦～

不過點先叫得上係有意義呢？

「嘩～你仲未諗丫？仲有一個月多D就到架喇喎～」Timothy好似做好晒準備咁...

十足十D小學雞自己溫晒書走去串身邊D同學咁...

『呢排一放假就忙住幫迦迦搞結婚D野丫嘛～仲邊有時間諗其他野？』我唔係賴皮丫～



「迦迦結婚D野，唔係有佢未婚夫Chris師兄搞掂晒架咩？幾時輪到你忙丫？」Timothy冷眼望一望住我...

『咁有D關於新娘子既野，係要我呢個伴娘先做得架嘛！而且你都唔係唔知我記性唔好架啦～係要用多D腦汁去記架嘛！』仲問喎...仲問喎...又唔係唔知我既缺點係乜...

「係丫係丫～明知你咁無記性都搵你做伴娘既～迦迦呢次真係所託非人喇～」Timothy無奈咁笑笑口，擰擰頭...

『咩姐...我係無記性D...但係好盡責囉好唔好...』我扁扁地嘴…

仲好意思話我既...

你平日D手尾丫...咪又係我幫你執...

所以話呢，拍梗拖既男仔係特別無心肝架！



尤其係好似Timothy呢種咁黐身既男仔！

「咁迦迦結婚D野搞成點丫？」Timothy繼續追問。

『七七八八～八八九九咁啦～而家最困難既都係要記當日要做D乜野姐...』一講到要記野就頭痛...

「哦～係丫～結婚當日做伴娘既係有好多野做架～你真係要好好記住丫！唔好令人地真係有個“畢生難忘既婚禮”先好丫！」Timothy好認真咁囑咐我！

『知喇知喇！得喇得喇！』俾Timothy咁樣講一講，我都真係驚驚地...

你知架啦...

結婚係人生大事黎架嘛…

人一生只有一次...（好彩既話...）

而且仲要喺咁多親朋戚友面前...

萬一有乜差池，真係記足一世架嘛…

都係著緊D好！

「咁講返你喇～點丫？完全諗唔到送乜野聖誕禮物俾你男朋友好丫？」Timothy打量一下我...

『一D頭緒都無...』有就唔駛咁頭痛啦...

「咁又係～好似你呢D宅宅咁，唔係模型就係動漫～唔係動漫就係打機～一D女人味都無～又點會諗到送乜俾男朋友做聖誕禮物好丫～唔通真係送盒模型俾人咩～～～」Timothy陰陰嘴咁笑一笑…

『喂呀！仲話人！』好過份架！

我呢D都唔係叫做宅...

係D嗜好同一般女仔有D分別咋嘛！

而且丫...都唔係唔知人地無乜愛情經驗架啦...

仲要笑人喎…

過份！過份丫！

「係喇係喇唔話喇～唔話喇～」Timothy仲係恥笑住我咁既衰樣...

『咁你有乜D好建議丫？』就係識得笑...

「送你自己俾佢咪得囉～」Timothy笑到衰衰咁...

『我地係唔會喺結婚之前做嗰D野架好唔好？！』我谷起塊面豬登！

「真係一次都未試過丫？」Timothy打量一下我...

『未呀！』仲問！

「唉～你男朋友真係慘～想洩下慾都唔得～」Timothy成個小丑神咁既樣...

『我有用其他方法幫佢洩慾架囉好唔好！唔好講呢D啦！有無D有建設性D既建議呀？』講甜野你就叻！

「咁丫...親手織條頸巾俾佢囉～」Timothy點下點下頭...

『織…』織條頸巾俾東日？！

親手織條頸巾俾東日…

呢個提議都...唔錯喎～

之但係...

『會唔會老套左D丫...』總係好似有D老土...又無乜新意...

「老咩套姐？正所謂“橋唔怕舊，最緊要受”丫嘛！老老豆豆男仔呢家野，你呢D宅宅識條鐵咩？！」Timothy扮晒看破紅塵咁擰擰頭...

又話我宅宅！

仲要話我識條鐵！！！

咁人地女仔人家唔了解男仔都好正常姐！！！

「男仔丫～只要你親手織條頸巾俾佢～箍實佢條頸～就可以連佢既靈魂都箍埋返黎架啦～仲話自己成日睇愛情小說喎～呢D咁基本既野都唔識～」Timothy又扮晒看破紅塵咁擰擰頭...

『咩姐...咁東日D故大多數都係教男仔點樣追女仔...女仔鍾意D乜...女仔既特性...點樣先會令女仔開心...幸福...會愛上你...都無講過男仔D野既...』係喇係喇...東日D作品，講親都係男追女...

每個故仔都係以男性做第一身視覺...

每個故仔都係講唔同性格既男仔喺唔同既環境下追唔同性格既女仔...

就好似好了解女仔既心咁...

但從來都無講過男仔既心係點既樣...

「係喇係喇係喇～所以我而家咪點醒你囉～」Timothy冷眼咁望住我...

『係丫係丫係丫～我駛唔駛多謝你丫又～之不過...我唔識織頸巾喎...』我咁大個女，都未試過織頸巾俾人...

織俾自己都未試過...

唔好話織俾人或者係織俾自己喇，就連拎起支針穿下野...補下鈕都未試過...

我總係覺得...穿針引線好麻煩...

支針又細又尖...好恐怖...

一個唔小心...搞到成手都係血咁點算？

十指痛歸心丫嘛…

所以話...一個連針線都未掂過既人，又點會識得織頸巾呢？

咪玩啦～～～

「唔識織頸巾咋嘛？咁就易啦～叫珮琳教你咪得囉～」Timothy好有自信咁點點頭...

呢個Timothy...那來的自信？！

『珮琳識織頸巾架？』我好奇咁追問一下～

「識～而且仲織得好靚添～嗱嗱嗱～我而家戴梗呢條頸巾，就係珮琳親手織俾我架喇～」Timothy發晒姣咁摸下摸下自己頸上條黑色為主，有白色線做格仔既頸巾...

男人老狗發乜鬼野姣丫...

之不過...

『真係好靚喎！你唔講我仲以為係我地舖頭裏面D貨黎添呀！』我摸下摸下Timothy頸上條頸巾...

雖然話我唔係好識手織品...

但就咁睇...

織得又夠密...

又夠平均...

十足十機織出黎咁...

「喂喂喂！唔好掂丫！」Timothy拍一拍我隻手，「整污糟咁點算丫？」

『哎丫...戴喺你條頸道就真係整污糟喇！』俾Timothy個死仔打到隻手有D痛...

「你舖話法丫～我都不知幾咁珍而重之呀！」Timothy攬實條溫暖牌頸巾...

『駛唔駛丫...』我冷眼望一望住Timothy...

成個女人咁...

「嗱～所以話一條由女朋友親手織既溫暖牌頸巾，對一個男仔黎講係幾咁重要呢～」Timothy仲係發晒姣咁攬實條溫暖牌頸巾...

『係喇係喇…知道溫暖牌係有幾咁重要喇...之但係...要打搞珮琳...會唔會唔係...咁好意思丫？』自己知自己事啦...

我知自己笨手笨腳...又遲鈍...

自學又學唔掂...

跟人學既話，浪費人地時間就唔係咁好啦...

一陣激到人地發脾氣，我都唔知點算...

「唔怕既～上次佢一聽見你話幫佢約到東日同佢交流丫，佢開心到幾晚都瞓唔著丫～佢知你想學織頸巾既話，一定唔會托手踭既～」Timothy拍一拍我膊頭...

『幫珮琳約東日，都係舉手之勞姐...但要佢教我織頸巾，就唔係舉下手咁簡單架喎...你知我...』我都未將說話講完...

「得喇得喇～信我啦～珮琳好有耐性架～你而家呢，最重要都係揀下D衫...」Timothy行去D女裝衫道...

『揀衫？揀咩衫丫？』我又跟住喺Timothy身後...

「揀D靚衫黎同你既東日慶祝聖誕嘛！第一年一齊過聖誕，衣著都好緊要～」Timothy喺D女裝衫前揀下揀下...

『喂喂喂！開梗工架！而家揀會唔會唔係咁好丫？』我拉一拉住Timothy...

「車～有乜所謂丫？都無客～我地而家唔揀丫，都無人揀架啦～D衫放喺道，咪又係封塵～」Timothy唔多理我，繼續揀下揀…

『係姐...一陣有神秘顧客入黎，我地就收皮架喇...』你知啦，馬柔好難服侍架嘛…

仲要神出鬼沒咁...

一陣真係俾佢捉到正...真係搵定份工都得喇...

「邊鬼道會有神秘顧客呀？！咪鬼睇咁多CCTVB D膠劇啦！」Timothy一於好少理，繼續喺D女裝衫道揀下揀下...

我總係有D擔心...

但Timothy就好似好少理咁...

繼續揀下揀下...

我又八八掛掛咁望住Timothy揀衫...

唔知Timothy會幫我揀D咩衫呢？

只見Timothy拎起一件透透地既白色絲質上衣...

呢D咁既絲質上衣真係透到裏面著乜款色Bra都可以睇得一清二楚...

Timothy再拎一拎起件超緊身黑色Tee...

呢D超緊身黑色Tee真係緊到無波都凸起晒雙峰出黎...

個Bra薄身D既話，真係飛釘話咁易...

Timothy再揀下揀下...又拎左條深紅色既超迷你短裙仔...

呢D超迷你短裙仔真係短到行步路都俾人睇到你著咩色底褲...

Timothy再揀下揀下...又再拎再條黑色超窄身熱褲仔...

呢種熱褲仔...唔單止窄到成個Gap形都出晒黎...

條邊仲要修一修，緊緊包住個屁股...

真係唔著T-back都唔得架喎...

我唔係真係要...著呢D出街丫嘛？

我喺Timothy身後，睇住佢幫我揀一件又一件...

一件又一件唔係勁短...就係勁窄...

唔係勁窄...就係勁少布既...

唔係勁少布...就係勁透既...

呢D衫...自己喺屋企著俾自己睇...都尷尬啦...

仲話要著出街？點著丫？

「拎住～攞入去試試先～」Timothy遞左堆衫俾我...

『唔係真係要試丫嘛？咁性感...點著丫？』我拎一拎起D衫褲...件件都咁性感...

「試左先啦～行啦～」Timothy推住我入試身室...

『唔係丫嘛…唔好掛...』我就半推半就咁俾Timothy推左入去試身室...

“啪”Timothy幫我閂一閂埋道門...

「試清楚丫～」Timothy就喺門外嗌入黎...

試清楚？

你叫人點試喎...

呢件又鬼咁窄身...

嗰件又鬼咁透...

呢條短到呢...

我望下望下手上堆衫...

再望下望下面前塊鏡...望下塊鏡裏面既自己...

既然都入左黎...

唉～試就試啦～

我Dom一Dom堆衫落張梳化上，再將自己身上既長袖Tee同牛仔褲都除晒出黎...

只係得返個白色Bra同白色底褲...

試邊件先好呢？

唔...

就試下件超緊身黑色Tee同條黑色超窄身熱褲仔先...

我拎一拎起件超緊身黑色Tee穿一穿上身...

嘩！望一望塊鏡，我對波形都凸晒出黎！

其實我對波都唔算係大...但著左呢件超緊身Tee之後...真係又圓又挺！

唔怪之得D𡃁妹仔咁鍾意著呢D超緊身Tee啦...

真係引死仔...

等我再著埋條超窄身熱褲仔先...

『丫...丫...唔...唔...嗄...』好唔容易之下，我先著到條熱褲仔上身...

我都唔係肥架啦...但條熱褲仔真係太過窄喇！

而且仲...仲...

先莫講話我成個Gap形露晒出黎...就連白色既底褲邊都露埋出黎...

唔得唔得...著呢種熱褲真係要著T-back先得...

唔得唔得...都係試過另一套...

我再望住堆衫...試下呢件...又試下嗰條...

試下嗰條...又試下呢條...

件件條條都搞到我勁性感咁...

十足十思春梗既𡃁妹仔咁...

好唔自然囉...

當我試到件透透地既白色絲質上衣同條深紅色既超迷你短裙仔...

件上衣包住左我個屁股...梗梗露出條短裙仔邊...

下面就好似空蕩蕩咁...涼陣陣咁...好無安全感...

除左中學時代會著校裙之外，我都未試過再著過裙...

著裙呢種感覺真係...好奇怪...好奇怪...

咁無安全感…點解仲有咁多女仔鍾意著裙？

「喂～試成點丫？著出黎睇下啦～」Timothy突然喺出面嗌入黎...

『下？著出黎？』唔係掛...

我而家望住塊鏡裏面既自己，都覺得好尷尬喎...

「係丫～著出黎睇下先啦～你唔係怕羞丫嘛？」Timothy既語氣有D輕浮！

『怕咩羞呀？！我駛怕羞？！』我先唔會怕羞呀！

我一打開道門，Timothy就打量一下全身...

Timothy打量左我對腳好一陣子...又望住我個胸好一陣子...

「唔...唔...幾好...幾好...哈哈哈哈～」Timothy大笑起上黎！

『你笑乜鬼野呀？！』叫人著出黎睇下，又要笑人！

「Sor丫Sor丫～唔...唔...哈哈哈～但真係忍唔住...忍唔住要笑出黎～」Timothy仲要繼續笑...

『好囉喎！再笑Friend都無得做呀！』我谷起塊面豬登，怒視住Timothy！！！

「我係未見過你著得咁女仔姐～但真係好好睇～真係好靚～」Timothy扮晒認真咁點點頭...

『我真係唔鬼信你呀！』我閂返埋道門，準備換返套衫！

「喂～信我啦～你著呢套衫既話，東日一定扯晒旗！」Timothy仲要喺出面嗌入黎...

我先無你咁好氣！

我快快手手咁換返自己套衫，出返去Dom返堆衫俾Timothy：『你執返好佢呀！』

「喂喂～真係OK架喎～」Timothy仲要死唔斷氣！

『咁OK你自己著啦！』我就坐返入Counter，唔鬼理佢！

今日舖頭都真係無乜人黎幫襯～就連入黎巡舖都無～

而Timothy就成鬼日喺我身邊話“真係OK架喎～買啦買啦～”咁...

我本來就真係唔鬼想理佢！

但...口裏說不，身體卻很誠實...

最後我都係買左透透地既白色絲質上衣同條深紅色既超迷你短裙仔...

「真係OK架喎～返去著黎影返張相俾我J呀～」Timothy企喺舖門前同我揮揮手...

『我J你個死人頭呀！』我背住Timothy揮揮手行～

今日我都早走過Timothy～

留返Timothy一個人睇舖～

因為我今日係有D野要做～

今日係東日既新書簽名會～我做女朋友既，就緊係要去捧下場啦～

而且個會場仲黎我舖頭好近添～

唔駛行幾步，我就黎到喇～

我已經見到有條好長好長既人龍～

而且個個都係女仔黎添～

小妹妹又有～熟女都有～

個個攞左個簽名後，都爭住要同東日影相～

又攬又箍咁...

而家D女仔...真係好熱情呢...

唉～我都係唔好執輸～排隊攞冬甩既簽名先～

我排下排下，又望下望下...

望下D女仔有幾咁熱情...

望下D妹妹仔有幾咁姣...

望下D豪放女點樣抽我既東日水...

排下排下，望下望下...差唔多排左又望左大半個鐘...

『唔該～』我遞一遞本書去東日面前～

「嗯？！」東日好愕然咁，「點解你會喺道既？唔係話今晚收夜等我黎接你放工架咩？」

『你有簽名會喎～我緊係要過黎支持下啦～』雖然唔駛我黎都已經夠晒多人～

「傻豬黎架～你一直都喺我身邊支持梗我架啦～」東日摸下摸下我個冬菇頭～

『喂～多人丫～』我有D唔係咁好意思...

始終俾東日D Fans見到唔係咁好既...

「怕咩姐？你係我既女朋友黎架嘛～」東日仲要喺咁摸～

『好喇好喇～簽左個名先～我喺嗰邊等你啦～』我都係唔係咁好意思咁叫東日幫我簽左個名先～

因為我已經感覺到背後充滿住殺氣...

「嗯嗯～女朋友叫到，簽幾多個名，寫幾多隻字都無問題～」東日好用心咁幫我簽個名～

『嗯～咁我去嗰邊等你～你搞掂就過黎搵我啦～』我接一接過東日幫我簽好名既新書～

「嗯嗯～好快好快～」東日點一點頭，繼續做佢要做既事～

我就攬住本書，行埋一邊～

望住東日再次俾D女仔抽水…

我再打一打開本書...睇下東日寫左D乜先～

“我最深愛既阿儀 我愛你 你最深愛既東日”