《情困之時，我遇上了自稱情性的情聖》: [Case 10－完美男友] PART 03
坐喺個Counter道拍下烏蠅...
成個朝早都無乜人...
Timothy就係掛住拎住部電話撳撳撳撳撳...
唉～係唔係真係咁黐纏丫～～～
另外嗰一男一女既新同事就喺一二邊打情罵俏咁...
而家D年青人都唔係返工既...
男既就溝女...
女既就等俾仔溝...
唉～
乜我而家好老咩？
做乜講到自己好似好老咁既？
我都只不過係個廿四歲既少女黎姐～
唔老唔老～一D都唔老～
喺Timothy掛住Send Message，嗰對新同事喺道卿卿我我，好似只係得我一個喺道睇舖，好唔容易咁先捱過左成朝～～～
『我地出去食野先喇～』我同嗰兩個新同事交低聲之後，就同Timothy行出舖頭門口～
我拎出部電話，打一打俾東日先～
「嘟...嘟嘟...喂～放Lunch喇？」唔駛幾耐，聽筒就傳黎東日把親切既聲音～
『嗯嗯～岩岩放左喇～』一聽到東日把溫柔聲線，我個心都軟埋～
「嗯～咁我而家過定去搵定位先～你慢慢過黎啦～」
『嗯嗯～等陣見啦～』
「嗯～等陣見～拜～」
『拜～』
有東日去搵定位，咁我地一陣就唔駛食得咁急啦～
唔駛食咁急就無咁易胃痛啦～
所以話一個體貼既男朋友對女仔黎講係幾咁重要架呢～
我再望一望返身邊既Timothy...
Timothy仲係拎住部電話，低住頭咁撳撳撳撳撳...
『喂～話時話喇，我地就咁留低兩個新人睇舖，會唔會唔係咁好丫？你唔好掛住撳先啦！！！』我一手就搶走Timothy手上部電話！
「喂喂喂…俾返黎先！仲未打完架！無問題既～反正都無乜客架啦～」Timothy拎返部電話之後，又低住頭咁撳撳撳撳撳...
『Lunch Time喎...都總會有人入去睇下掛？你聽下我講野好唔好？掛住Send Message！』我拍一拍Timothy背脊！
「喂！痛呀！唔好咁粗魯好唔好？得架啦～得架啦～而家係咩年頭丫～都無乜人會黎買野架啦～就算真係有客入黎丫，都係巡下舖咁架姐～放心啦～放心啦～」Timothy仲係大安旨意咁撳自己部電話...
都係既…
呢一年黎，都真係少左人黎買野...
好多都係入黎巡個圈就走...
不過就係唔知點解公司會派多兩個新人黎...
咦...喂...唔係喎...
係唔係諗住我地Train好嗰兩個新人後，就一腳兜走我地呢D舊人呢？
新人平好多架嘛…
起碼平過我地先啦...
開源節流...D腦細就最鍾意架啦...
死喇死喇...真係越諗就越唔對路...
「喂～喂…喂！」Timothy突然好大聲咁喂起上黎！
『嘩嘩！作死你咩咁大聲！想嚇死人咩？！』我大大力咁拍一拍Timothy隻手臂！
「又咁大力打人...咁人地見你發晒呆咁，咪大聲D叫你囉！點知又要食你一掌！真係好鬼死粗魯架...」Timothy摸下摸下自己隻手臂～
『咁人地諗梗野丫嘛…』我不嬲都唔可以一心二用架啦...
「諗梗乜鬼野丫？諗梗你個超級勁爆完美無瑕既男朋友尚東日丫？」Timothy古古惑惑咁望住我...
『緊係唔係啦！我先無你咁黐纏丫！』講到我好似姣婆守唔到寡咁...
「哦？咁你諗乜諗到咁入神丫？」Timothy打量一下我...
『我諗梗我地會唔會好快就失業呀！』我好認真咁望住Timothy！
「痴線～無啦啦諗會失業都有既～」Timothy好似無我咁好氣咁...
『咩痴線丫？喂！你諗下喎！而家個市道都唔係咁好，仲請多兩個新人黎喎！你仲話唔係想炒左我地兩個舊人丫？！』我好緊張咁搖Timothy隻手！
「你諗多左喇～你諗多左喇～其實只係出面將會開多間分店～佢地黎我地呢邊Train姐～Train完喇～嗰邊又Settle好喇～咁佢地就會過嗰邊幫手架喇～」Timothy仲係懶懶閒咁...
『係唔係真架…』我總係有D唔放心...
「真架～真架～唔好咁緊張啦～好易有神經緊張架～放鬆D～放鬆D～」Timothy拍下拍下我個頭...
咩神經緊張喎...講到我好似有精神病咁...
「好喇好喇～我行嗰邊丫～珮琳等梗我架～返黎先再傾啦～」Timothy好似好心急咁...
『喂～搵日搵埋你個珮琳出黎食餐飯，介紹黎識下啦～』個名就聽得多喇，人就真係未見過～
「好丫好丫～搵日啦下～一陣見～」Timothy就急急腳咁行左去...
望住Timothy既背影越黎越遠...
唉～呢個Timothy...真係好鬼黐身架～
有時真係唔係好明，點解有D男仔會咁黐身～
你話女仔黐身係因為缺乏安全感姐～
咁男仔呢？
都係缺乏安全感？
我就真係唔知...
但照我就咁睇Timothy...我覺得佢係想俾人照顧多D～
一個需要人照顧既大男孩～
的確，有D女仔母性都比較大～係鍾意呢類型既男仔既～
當係仔咁湊丫嘛～
好彩佢女朋友醒返咋！
唔係都唔知去邊道搵個人黎照顧佢丫～
老實講句，都係一個Happy Ending黎既～
醒得返...真係好難得...
最難得既係醒返都仲肯去照顧呢個大男孩丫嘛～
你話呢D女朋友喺邊道搵丫～
望就望佢女朋友唔會嫌佢煩～一腳兜走佢啦～
唉～
我都係唔好理佢咁多，快D去搵東日好過～
我輕輕一個轉身，就向街市方向行過去～
穿過橫街窄巷～
跳過幾個水氹～
好快就黎到間餐廳～
我一推門入去，就見到東日已經坐定定～
我走到東日身邊，輕輕手咁拍一拍東日膊頭～
正喺道抹梗餐具既東日就帶住微笑望住我：「黎左喇？」
『嗯～』我坐一坐低，『黎左好耐丫？都係Timothy衰啦～捉住人地講埋D無聊野～』
借下Timothy黎過橋先～～～
「都唔係好耐姐～黎在一陣咋嘛～我叫左野食架喇～豆腐火腩飯～凍檸茶丫嘛～」東日抹好晒D餐具之後，好整齊咁放喺我面前～
『嗯～唔該晒～』有人服侍埋真係好～
「駛乜咁客氣丫～」東日摸摸我個冬菇頭～
『嘿嘿～～～』我咪咪嘴咁笑笑口～
我發現，東日都幾鍾意摸我個頭～
一有時間就會摸下我個冬菇頭～
我都幾鍾意俾冬日摸既～
只係俾東日摸好喇～其他既都唔准架～
就只有東日係特許既～
只屬於東日擁有既～
「呢間餐廳都真係幾多人食架喎～」東日橫視一下四周～
『嗯～Lunch時間，呢間野係會爆滿架～你睇下出面，幾咁多人排梗隊等入黎～』我望一望出門口出面～
門外都有唔少西裝友企喺道等梗入黎～
「係喎～出面企左咁多西裝友～而裏面就有咁多地盤佬～咁奇怪咁既～」東日望一望班西裝友，再望一望班地盤佬～
『係丫～呢頭多銀行同有個地盤起梗樓丫嘛～』其實呢個畫面都幾搞笑～
西裝友同地盤佬既外形真係格格不入～
但都會走去同一個地方食野～
無計啦～香港多工程丫嘛～
就連鬧市都可以有幾個樓盤起梗既～
但係點解黎食野既，唔係毒男就係麻甩佬？
因為呢間餐廳係出名有個又靚又索又嫩口既妹妹仔做樓面囉～
男人係咁架啦～
一知嗰個地方有靚女姐，就飛撲埋去架喇～
唉～見慣不怪啦～
一把嬌俏既聲音出現：「一杯凍檸茶～一杯凍咖啡～」
一講貂蟬～貂蟬就到～
『唔該…』我望一望扮晒可愛咁既妹妹仔...
睇佢個樣真係頂盡都係十七、八歲咁...
真係青春無敵～
皮膚白滑...
細細粒粒但波大大咁...
好女神Feel囉～
真係殺死晒班真毒西裝友同麻甩地盤佬囉～～～
「唔該～」東日都好有禮貌咁同個妹妹仔講聲唔該～
但就係呢一句“唔該”就出事喇！
個妹妹仔眼定定咁望到東日實一實咁，再以一把姣到出水既聲線講：「請問...你係唔係...冬甩丫？」
又黎喇...
「嗯～你好丫～我係冬甩～」東日又好有禮貌咁向個妹妹仔點點頭...
唉～又黎喇...
個妹妹就開心到彈下跳下咁講：「真係你丫？真係可以見到你丫？太好喇～～～我係你既超級忠實Fans黎架～」
講到好似好厲害咁...
要論超級忠實Fans丫～我敢認第二，無人敢認第一囉...
「係丫係丫？多謝支持～多謝支持～」東日怕怕羞羞咁...
做乜要對呢D妹妹仔怕羞喎...
個妹妹仔捉一捉住東日隻手：「我真係好鍾意睇你D故架～你所有既故我都有睇過～真係好好睇～不過D甜位會睇到面都紅囉～」
個妹妹仔仲要捉住東日隻手起勢捽！
又要面都紅晒！又要扭下扭下個身咁！
做乜個個女Fans都咁鍾意捽東日隻手架呢？
仲有你扭乜鬼野屎忽花姐？！
出晒水喇咩？！
「係咩係咩...多謝...多謝...」東日俾個妹妹仔摸到面都紅晒！
做乜面紅丫？！
「可唔可以幫我簽個名丫？」個妹妹仔已經遞左紙同筆埋去...
「哦...好好...你叫咩名丫？」東日拎起支筆...
「阿欣～」個妹妹仔嗲聲嗲氣咁...
阿欣...阿欣...
叫得阿欣都係D以為自己好靚既姣婆！
「嗯～OK～」東日喺張紙上寫左幾隻字之後，就交到個妹妹仔手中...
「可唔可以合照一張丫？」個妹妹仔已經拎出手機，仲坐到上東日大脾道！
又係咁喇！又係咁喇！
點解條條女都係咁架？！
條條女都係咁狼死既！！！
而家D妹妹仔係唔係真係咁Open呀？！
激死我喇！激死我喇！
我已經激到喺咁起勢篤塊檸檬！
篤到爛晒！
酸到隔離檯都聞得到！
其實...又有乜好酸丫...
都唔係第一次架啦...
次次同東日出街，總係會遇到呢D情況架啦...
唔係一大班女女女女女衝過黎輪住同東日影相...
就係一大班女女女女女衝過黎圍住東日摸黎摸去...
東日係大作家黎架嘛～
東日係名人黎架嘛～
多人鍾意都好正常架姐～
由第一日同東日拍拖開始，我就預左會咁架啦～
我而家又葡萄甚麼呢？
「多謝晒你丫冬甩～我會好好保存屬於我地兩個既合照～唔阻你喇～」個妹妹仔好似岩岩潮吹完咁既樣...
「客氣～客氣～」東日仲係尷尷尬尬咁...
我就無佢地咁好氣，自己飲自己杯酸到澀既凍檸茶...
東日打量一下我，摸摸頭咁講：「丫～係丫～我知道呢～你黎梗呢個星期五放假喎～所以呢～我就買定左你最鍾意睇既EVA戲飛～我地嗰日一齊去睇EVA～」
係EVA呀！！！
除左高達系列之外，我最喜愛就係EVA架喇！！！
東日喺個銀包道拎出兩張戲飛：「登登登凳～～～」
『係EVA丫～真係EVA既戲飛丫～』我雙眼發青光咁，望實東日手上既兩張EVA戲飛～
太好啦～
難得EVA連續兩年都有戲上～
唔駛拖足幾年先到下一集～
睇黎唔駛勞煩個孫燒個結局俾我，我自己都有機會親眼睇得到～
而今次仲可以同到深愛既人一齊睇添～～～
我真係好幸福呢～～～
「D飛就等我Keep啦～我地而家就好好食餐Lunch先～」等到個侍應放低兩碟豆腐火腩飯，東日就將兩張戲飛收返好～
『嗯～開餐～』我就同東日開開心心咁共進午餐～
同我的最愛輕輕鬆鬆～幸幸福福咁嘆左個午餐後，我就拖住東日隻手，返到黎舖頭～
「咁我等你放工再黎接你啦～小心D喇～」東日又摸摸我個冬菇頭～
『嗯～咁你都小心D喇～拜拜～』我同東日揮揮手～
「嗯～拜～」東日同我揮過手後，轉身離開～
我一直望住東日既背影越行越遠～
東日仲會不時擰個頭過黎同我揮揮手～
一直望住～一直望住～都真係有D唔捨得～
不過唔緊要啦～好快就到放工架姐～
放工咪又可以再見到東日～再同東日相處囉～
好～開工～
我一入到舖頭，就已經見到Timothy坐喺個Counter裏面撳撳撳撳撳撳撳部手機...
『喂～咁快返到黎既？嗰兩個新人呢？』我掩一掩住Timothy部手機～
「縮開縮開！唔好阻住晒！我呢D唔係叫做快！係叫準時！係你遲左姐！佢兩個去左食Lunch啦～」Timothy望都唔望下我...
『好遲咩？好遲咩？遲左三分鐘咋嘛～』講到我好似遲大到咁...
「咁都係遲丫～」Timothy仲係望都唔望下我，只係專注喺佢部手機上...
『喂！你岩岩先同佢食完Lunch咋喎！仲見唔夠？傾唔夠丫？喂！唔好成日望住個芒啦！會盲架！喂！』我又再用隻手掩住Timothy部手機～
真係駛唔駛好似貼身膠布咁呀？
「哎呀！你唔好阻住晒啦！」Timothy Fing一Fing開我隻手，「岩岩先食完Lunch同而家Send Message係無抵觸架喎！唔通你岩岩屙完屎就唔駛屙尿架？」
『有乜鬼野關係丫？！都夾硬黎既！喂！有客人呀！有客人呀！Welcome To 5CM～』我都係唔理Timothy咁多！招呼下客人好過～
我望住兩個打扮時尚，100%港女格既港女行左入黎～
『隨便睇下～返左D新貨喎～』我就隨口噏兩句～
兩條港女就當我透明咁理都唔理下我，直行直過，睇下D衫丫～睇下D裙丫咁～
係咁架啦～都慣架喇～
對住D客，你根本就唔需要多費唇舌～
因為佢地會有佢地自己行下睇下～
你越多口既話，佢地只會覺得你煩架咋～
我就同佢地保持三個身位既距離～等下佢地有乜吩咐咁啦～
我行下企下...跟住喺兩條港女身後行下企下...
「喂～你知唔知丫～你個冬甩呢～遲D有本小說會拍電影喎～」其中一個港女突然提起東日...
咩你個冬甩呀？！東日係我架！
另一條港女就一邊睇下睇下D衫，一邊講：「我知丫～我又點會唔知喎～《完美男友》丫嘛～上年出書～今年就話開拍～我既冬甩真係好叻架姐～」
條港女一講到“我既冬甩”既時候，仲要咬晒唇咁...
都話東日係我架咯！唔知醜！
另一條港女又一邊睇下D短裙，一邊講：「係喇係喇～知你既冬甩叻喇～不過之前睇YouTube見到D宣傳片話呢～有勁多𡃁模拍架喎～」
勁多𡃁模？
我都有聽過東日講佢遲下可能會有D忙...
忙住去搞有關將《完美男友》拍成電影既事...
但就唔聽佢講過，話套戲會搵好多𡃁模拍喎...
另一條港女好大反應咁接住講：「勁多𡃁模咁又點姐？都無個有我咁靚女啦～早知試鏡既時候就走去試試佢啦～」
另一條港女又接住講：「就算俾你做到女主角都無用啦～冬甩佢又唔係自己演～」
另一條港女又接住講：「係囉～我都唔明既～冬甩又型又靚仔～又180咁～點解唔自己演男主角呢？」
另一條港女又接住講：「係囉係囉～如個男主角係冬甩，女主角係你既話，就可以同你既冬甩親熱下啦～」
一直喺兩條港女身後...
「係囉係囉係囉～本小說有好多甜位架嘛～真係FF下都腳軟丫～」
聽住佢地你一句...我一句咁...
「係囉係囉～再講我面都紅喇～」
FF同自己男朋友點點點甜...
「係囉係囉～我有少少濕添喇～～～」
都真係幾…幾咁...幾咁扯火！
我緊握拳頭...
行近嗰兩條港女兩步...
『你...』正當我要將“你兩條八婆同我收聲啦”之時...
「你地有乜需要，可以吩咐我架～」Timothy拉一拉住左我隻手，拉一拉我向後，自己行到去嗰兩條港女身邊...
「嗯嗯～好丫～」嗰兩條港女打量一下Timothy後，好似幾滿意咁...
幾滿意D乜？
我就真係唔知～
但就可以用一種情況黎形容...D闊太揀鴨...
Timothy背住我，揮一揮手，向我示意行入Counter...
我就行入Counter...偷偷拎部手機...開一開YouTube...睇一睇有關《完美男友》既宣傳片...
成套宣傳片除左大賣係東日既作品之外...就係一大班雞...𡃁模...
一大班𡃁模黐住喺東日身邊影相...攬住東日黎影相...
個個𡃁模都著到鬼咁少布...
個個都係賣肉賣性感...
個個都好似想食左東日咁！
東日…我既東日…
隔住個螢幕...望住我既東日...
我總係有一種...覺得自己好似好渺小既感覺...
相比起仲係冬甩Fans既我…仲未同東日拍拖既我...更加渺小...
點解會咁架呢？
點解一齊左之後...個感覺反而係...反而係...
「喂～你無野丫嘛～」Timothy行一行埋黎Counter前...
『我！我...我無野～』我似會有乜野...
「真係無野？」Timothy打量一下我...
『無丫～真係無野丫～嗰兩條港女呢？』我望一望舖面。
「繞場一周後走左啦～運吉既都～」Timothy笑笑口咁擰擰頭。
『唉～都預左架啦～』上個星期都係咁上下～
「係丫？真係預左丫？」Timothy打量下我。
『係丫～預左架啦～』都習慣晒喇～
「係預左就唔好諗咁多喇～」Timothy拍一拍我個頭，又拎起部手機撳撳撳撳撳...
點解我會覺得Timothy所指既“預左”，同我所指既“預左”唔係同一樣野咁架呢？
乜真係...唔係講梗同一樣野咩？