《情困之時，我遇上了自稱情性的情聖》: [Case 07－求分作戰] PART 07
當高暉離開左我同Chris既新居之後....
我都係時候要執拾一下...
執拾一下岩岩先搬過黎既野...
望住一箱二箱...一箱二箱...
拎下拎下...放下放下...
將塊鏡仔..我D護膚品...化妝品...仲有幾張相...好唔專心咁都放到新既梳妝檯上...
好唔專心...
再將行李箱裏面既衣物好心不在焉咁都放到入新既衣櫃裏面...
心不在焉...
我好唔專心...好心不在焉咁...
一直都係咁...一直都係咁...
由高暉走左之後，我就一直都好唔專心又好心不在焉...
我個心...就好似跟左高暉走左出去咁...
應該話...我個心...有邊一刻係屬於自己？
我個心...我個心一直都係屬於高暉...
我個心...我個心一直都係高暉手中...
由高暉要出國之時，我個心就一早跟左佢飛去英國...
一直都跟住佢...一直都喺佢手中...
足足九年喇...我個心喺佢手中足足九年喇...
九年之後...又跟住佢由英國返黎香港...
就算我就快要結婚...就快要嫁俾Chris...我個心...我個心都無返過黎...無交到去Chris手中...
我個心...我個心仲係喺高暉手中...
高暉...高暉...
我拎起部電話...打開Whatsapp...
“你而家喺邊丫？”Send句說話俾高暉...
等左一陣...雙灰剔...
“揸梗車返去？”再Send句說話俾高暉...
再等左一陣...雙灰剔...
“返到去未呢？”又再Send句說話俾高暉...
又再等左一陣...雙灰剔...
雙灰剔...討厭既雙灰剔...
如果係雙藍剔都可以話係睇完喺心裏面默不作聲丫...
咁雙灰剔究竟係乜野意思？
喺個Lock機畫面見到係我Send既，連睇都廢事？
究竟係邊個發明雙灰剔呢種讓人灰心既設定？！
當我喺道望住部手機，期望至少都變成已讀不回之時...
“咔”開門聲...
“咔 咔”係大門既開門聲...
我走出廳望一望...
「迦迦～我返黎喇～」我見到Chris正喺道除梗對皮鞋...
『咁快返到黎既？有無小心揸車架你？』我行到Chris身邊，幫佢除一除身上件西裝褸。
現實...又要由回憶...妄想...返黎現實...
「緊係有啦～我好聽你話架嘛～」Chris溫柔咁摸一摸我把長長秀髮...
『係喇係喇～知你聽話喇～斟杯水俾你飲啦～』我就轉身去斟杯水俾Chris...
「唔該晒你丫～係呢～都搬晒過黎喇？」Chris問一問。
『嗯嗯...都搬晒過黎喇...』我一邊斟水...一邊諗返起頭先同高暉一齊搬野過黎...
同高暉一齊...同高暉一齊...
哎呀...諗下諗下...諗到倒到杯水都溢喇...
「高暉呢個兄弟真係唔話得～一問佢得唔得閒黎幫你搬野姐，佢二話不說就過黎幫手～」Chris仲要提一提起高暉...
『嗯...係囉...高暉佢真係...好...』我抹一抹對手，就拎杯水出去俾Chris...
「唔該～」Chris接一接過杯水，飲一口，「佢真係好好架～呢個好兄弟...一聽都我話要同你結婚，就話要立即飛返黎做我既伴郎～」
『係囉...佢同你真係...真係好好兄弟呢...』我唔敢正視Chris...只係望住地板點點頭...
我怕...Chris會喺我眼中...見到既人唔係佢...係高暉...
「都真係好好兄弟～我同高暉...由小學三年級就識到而家...細個就一齊玩～一齊去癲～一齊逃補習去租機打～一齊抄功課～一齊出貓～一齊俾老師罰～咩都一齊～」Chris諗下諗下...
Chris就好似...跌左入回憶既黑洞之中...
就好似平時既我一樣...
「我地乜都一齊...仲諗住結婚都要一齊搞～初時仲諗住要佢等埋我～點知...估唔到我同你要結婚喇，佢都仲未有拖拍...」Chris捉一捉住我隻手，情意綿綿咁望住我笑一笑…
『世事既野…往往就係咁出人意表...唔係既話...又點夠驚喜？點夠精彩？』我望一望住Chris...心裏面總係有D無奈...
驚喜？
精彩？
而家咁既我，又算唔算得上係驚喜，精彩？
我總係覺得...好多野都係迫於無奈...
有好多野都無可奈何...
你話係我自己揀？
乜我有得揀咩？
你話俾我聽，有乜野可以俾我揀？
路...我只係見得一條...
一條我唔願走...但非走不可既路...
定係你要我跳落懸崖？
粉身碎骨...
網絡上D人成日都話：「人類總要重複同樣的錯誤。」
但點解我就唔可以狠狠咁錯一次呢？
「或者真係...我可以同到深愛既人一齊...可以做到你男朋友...可以同到你結婚...可以做到你丈夫...真係夠晒...夠晒出人意表...」Chris帶住濃情蜜意既眼神...望住我...
我望住Chris對溫柔既雙眼...同佢四目交投...
我可以好清楚喺Chris既雙眼之中...望到我自己...
好清楚...好清晰可見..Chris眼中既人...係我自己...
而喺Chris眼中既自己...好似越黎越近...越黎越接近...越黎越貼近...
貼近到就黎...就黎...
『你都係快D幫我Set好部電腦先啦～唔係今晚返黎無時間Set丫～』我笑笑口咁推一推Chris...
「係既係既～聽晒你話～」Chris帶住微笑點點頭，行去個放有電腦同電視既紙皮箱前...
我望住Chris既背影...
我唔係好接受到...我越黎越接受唔到...同Chris一齊既時候...望住Chris既時候...我會諗起...高暉...
Chris一路好細心咁幫我Set返好部電腦...
我就一路望住Chris既背影...
望住Chris幫我Set電腦既背影...又令我諗起高暉...
而家我眼前既背影...就好似頭先喺舊屋既時候，高暉幫我執電腦時既一模一樣...
喺我眼裏面既...根本唔係Chris...
係高暉...
Chris既背影...並唔算得上似高暉...
不論係髮型衣著...無一樣野係一樣...
但點解我會將Chris既背影...睇成高暉一樣架呢？
只能說我太想念高暉...
呢份想念之情...不單止在心裏...就連眼裏也只有高暉一個...
「好～搞掂～」Chris拍一拍雙手，起一起返身。
『係唔係真係搞掂架？』我行到埋部電腦前，開一開機。
“嘟”一聲響，電腦就開著左。
「我辦事，你仲唔放心咩？」Chris捉一捉住我對手。
『放心放心～都咁多年咯...仲點會唔放心丫？』我望一望住Chris...
Chris又望一望住我...望到我實一實...
Chris總係好鍾意咁樣...咁樣望實我...
就好似話俾我知...佢既視線...永遠都停留喺我身上...喺我面上...喺我雙眼之中...
當Chris柔情蜜意咁望住我，正想拉一拉我到佢懷裏之時...
『沖返個涼先啦～再唔去準備下就遲到架喇～』我推一推Chris...
「嗯嗯...時間都唔早喇...都係時候...咁不如...」我無等Chris講埋落去...
『不如你而家快D入去沖～沖完到我喇～快D快D快D快D快D快D～』我擰轉Chris，一直推住佢背脊...
「嗯嗯...好啦好啦...我聽晒你話～」Chris就俾我推到入去浴室裏面。
“咔”幫Chris閂埋道門之後...
我企左喺出面諗左一諗...
我知道你係想話不如一齊沖...
之但係...我...仲未有呢個心理準備...
幫Chris喺個衣櫃裏面，揀定一陣出席冼Sir同Yuki既結婚晚宴既服裝...
Chris有好多好多件西裝～
可能係因為工作關係啦～
Chris總要著西裝返工既～
只有放假既時候，先會著得隨便D～著得輕鬆D～
我都有問過Chris，會唔會覺得成日著住恤衫西褲皮鞋會好唔舒服～
Chris話過，都習慣晒～唔覺得係乜野一回事喇～
唔似得高暉咁～由中學開始，就唔鍾意著恤衫西褲～
到佢去到英國生活，都唔會喺佢個Facebook道見佢著既～
佢話喎，恤衫西褲實在太束縛喇～
到左今次返黎，做Chris既伴郎，佢都同Chris講：「唔係因為你，我都唔會著西裝丫～」
高暉就係一個咁自由自在既人～
高暉...高暉...我又諗起你喇...
“咔”唔駛幾耐，Chris就已經沖完涼，由浴室行返出黎...
我望住赤裸裸既Chris...
健碩既身形...濃密既陰毛...軟左都仲係咁粗壯既陰莖...
『快D著返衫先啦～凍丫～』我就將岩岩幫Chris揀好既衣物遞到上佢面前。
始終...我都會尷尬...
尷尬見到咁赤裸裸既Chris...
「嗯～你真係好體貼～」Chris好似好幸福咁接過我手上套衫...
我體貼？
我諗...都唔夠你對我既千分之一…
Chris著返好套衫...我再幫佢吹一吹乾個頭...打好條領帶...
「我能夠娶到你...真係我十世修來既福氣...」Chris一雙安慰既眼神望住我...
『口花花丫你～』我轉一轉身，行去拎套晚裝...
「我口花心不花架～」Chris好緊張咁接住講。
『知喇知喇～我去沖涼先喇～』我就攬住套晚裝，行入浴室...
始終我都仲未有赤裸裸喺Chris面前既心理準備呢...
著上一套淺紫色晚裝...
Chris坐定定咁望住我化妝...
『做乜眼甘甘咁望住人姐？』我喺塊鏡仔裏偷偷望一望坐喺我後面既Chris。
「因為你真係好靚～好迷人～」Chris仲係痴痴迷迷咁望到我實一實。
『今日之後...你就有更加多時間望啦～怕且會望到厭添丫～』平日都成日對住Chris...
今日之後...大家都一齊住...見既時間就更加多…
「點會呢點會呢！百看不厭架！」Chris好緊張咁擰晒頭，揮晒手咁～
『係咩係咩？』呢個Chris丫...咁大個男人，仲成個小朋友咁～
Chris對我既好...有陣時...都幾可愛既...
有陣時…我都希望呢“有陣時”可以Keep得耐D...Keep得長D...Keep到永遠...
簡簡單單咁化左個淡妝之後，我同Chris就起程～
坐上Chris架Mini Cooper，感覺真係好唔同...
同坐高暉架車既感覺...
雖然話我經常坐Chris架Mini Cooper出出入入...
但有對比之下先發現...Chris手車...真係好定...
Chris總係好小心...萬分小心...
車速慢...與前車起碼有四秒距離...切線都會打燈睇清睇楚...
而且都唔會多說話，好專注喺路面上...
坐Chris架車...真係...好安心...
呢種安心既感覺...係唔係就係...我地D女人成日講既安全感呢？
我地成日都講想個男朋友有安全感...
但當人地問起點樣先為之有安全感呢？
我地又答唔出口...
往往都係話：「安全感係一種感覺黎架喎～」
感覺係講唔出口...
只能用心去感受...
但當你感受到個男人有安全感之後，又好似唔多珍惜咁...
總係覺得...好似又缺少左D野...
缺少左另一種感覺...
缺少左一種叫做...刺激感...
當你提心吊膽既時候，又會想有安全感...
當你安穩落黎久了，覺得悶了，又會想追求刺激感...
人係唔係就係咁？係唔係總要充滿矛盾咁生存先安樂呢？
或者係啦...或者真係啦...或者我地真係咁...犯賤啦...