《情困之時，我遇上了自稱情性的情聖》: [Case 06－青梅竹馬] PART 01
「喂～起身喇～」
當我仲沈睡喺美夢中之時...
「快D起身啦～懶瞓豬蕭錦民～」
一把既熟悉...又甜美既女仔聲呼喚梗我...
「朝朝都咁懶瞓架你～再唔起身就遲到架喇～」
我仲感覺到個身不斷咁俾人搖梗...
「快D起身～快D起身～快D起身～快D起身～快D起身～快D起身～」
我個人就不斷俾人搖下搖下...擺下擺下...
『嗯嗯嗯...醒喇醒喇醒喇！！！』搖到就黎散喇...
我一睜開雙眼，就見到頭先喺夢中攬到實一實既Kelly...
「醒喇嘛？醒喇嘛？朝朝都要人地落黎鏟你先識醒～」模模糊糊之下，我面前呢個平陰配上髮長到膊...帶有仙...書卷味既Kelly谷起塊面豬登咁怒視住我...
『張嘉靖丫...張嘉靖...你下次可唔可以溫柔D架？』我瞓喺張床上，冷眼望住仲谷起塊面豬登既Kelly...
「仲要多多要求丫嘛？你去搵個女朋友黎服侍你好喇！」Kelly無我咁好氣，轉身行出房...
女咩朋友姐...晨早流流岩岩起身無啦啦講呢D...
「快D起身刷牙洗面梳洗下啦！我煮埋早餐俾你食丫！」Kelly好似行左入廚房...
『係喇係喇…辛苦你喇...』
我！蕭錦民！Ivan！今年十八歲！
咩話？對我既資料無興趣？
Kelly幾多歲？
Kelly點解會喺我間屋道？
Kelly點解會叫我起身？
我地係唔係同居？
我同Kelly係乜野關係？
你班狗公真係...有人唔做走去做狗...
一見到女就狗衝咁...
好喇好喇好喇...我就滿足下你地班狗公既獸性啦～
Kelly！張嘉靖！同我一樣今年都係十八歲！不過佢就大我一日咁大罷...
我同Kelly既關係...應該由邊道講起呢...
要講既...應該要講返去我地父母嗰一代...
我同Kelly既父母都係年輕時期就相識既朋友～
佢地後生既時候成日都會一齊去玩、去旅行、去遊行～
當大家都搵到個錢既時候，仲買埋同一個屋苑～
Kelly既父母就買左上一層，我地就買左下一層～
大家樓上樓下，有個照應咁話喎～
到佢地話要結婚，就話要一齊結～
到大左肚，又話要指腹為婚～
真係十足十電影橋段呢～
不過又真係電影橋段都無咁橋～
我地既出世時間相當接近～都係只差一日～
而且仲要係一男一女，真係可成一對～
你覺得咁樣就好橋呢？
未算～
我同Kelly兩個又好神奇地咁入到同一間幼稚園～
而且仲要同一班添～
你覺得咁樣就好橋呢？
都未算～
我同Kelly升上小學時又係升上同一間！仲要係讀同一班！
你覺得咁樣就好橋呢？
仲未算～
我同Kelly六年既小學生涯都係讀同一班！
你覺得咁樣就好橋呢？
都仲係未算～
我同Kelly升上中學時又係升上同一間！仲要係讀同一班！直至到讀埋同一科！上埋上同一間大學！讀埋同一個課程！
你話我地兩個係唔係真係天生一對到無懈可擊呢？
係丫～好多人都係咁認為～
我地既父母啦～我地身邊既朋友啦～咁多年黎既同學啦～喺別人眼中，無一不認為我地係命中注定既天生一對！
之但係...
我地從來都無一齊過...
無錯喇...縱使全天下既人都認定我同Kelly係命中注定既天生一對都好，但我地兩個...從來都無一齊過...
我地係唔係唔夾？
都唔係丫…
我地由細到大鍾意既野都好類似～
好似話細細個我地父母帶我地去沙灘BBQ咁，我鍾意堆沙，Kelly就鍾意踢散我堆沙～
我鍾意游水，Kelly就鍾意騎住喺我背上游～
我鍾意露營，Kelly鍾意觀星～
Kelly鍾意睇下書，我就鍾意呆望住Kelly睇書～
Kelly鍾意煮下野食，我就鍾意食下佢煮既野食～
我地兩個都算得上係幾夾丫～
我地夾到就好似嗰種...
有點嘈，有點吵，我地好friend～
一齊嗌交！一齊講心事～一齊去旅行～但係永遠唔會撻著...
你地好似總有D無名既共鳴～人地永遠以為你地一對！
但就係...就係無喺埋一齊...
係我唔鍾意Kelly？
唔係…我係鍾意Kelly...
我知我由細到大都鍾意Kelly...
只係...總係好似...差D野...差D野咁...
我都唔知...
我只係知道...
當朋友甚至親人問起，Kelly回答：「我鍾意陽光型運動型感性型開朗型活潑型總之唔係蕭錦民個臭八公型～」
而我亦會回答：『我鍾意陽光型運動型性感型開朗型活潑型總之唔係張嘉靖個臭八婆型！』
我唔知道我地係唔係太過了解...太過相似...
了解到Kelly知我懶瞓到一定要佢落黎鏟我先識起身～
相似到好似對住自己講野咁...
我地又實在太過接近...
大家都係住喺樓上樓下...
由細到大都係一齊返學放學...
我地仲要有對方屋企既門匙...
仲可以隨便進出對方既屋企...對方既房間...
我地仲會經常去對方屋企食飯...
Kelly仲會朝朝落黎我屋企，煮早餐俾我食添...
或者就係咁...或者呢D就係叫做物極必反啦～
或者就係因為我地太過接近...接近到唔可以再行多一步...行出一步...
「你都真係梳洗得好耐下喎！成個女人咁～」一梳洗完出黎，就見到Kelly放梗兩碟早餐喺餐檯上～
『近得你多丫嘛～女人～』我就有理無理話知你咁坐喺張凳上，拎起刀叉～
望一望面前Kelly煮既煎雙蛋、雙腸、火腿...
『咁燶既...』我冷眼咁望住燶到黑晒既腸仔...
「唔好食丫笨！」Kelly燶晒面咁坐低開餐...
『為你好咋！你咁既廚藝，真係想搵人要都難啦！』我咬一咬條腸仔...燶到苦...
雖然話Kelly好鍾意煮野食，但佢既廚藝又真係一直都麻麻地...
你唔好話我要求高丫！
我用麻麻地已經係好俾面架喇！
正確D黎講，Kelly煮既野食真係入唔到口架...
你睇下丫～煎雙蛋、雙腸、火腿呢D咁簡單既西式早餐都可以煮到成舊炭咁...
要佢煮中菜既話...真係...不敢想像啦～
「你駛同我擔心？我都不知有幾多人追丫～」Kelly咬一咬塊火腿...皺一皺眉...
『車～又唔見你話有拖拍～』咁耐以黎，你咪又係同我一樣單身～
「多人追就要拖拍架喇？唔可以揀下先架咩？」Kelly仲係得得戚戚咁既樣！
『揀乜鬼丫揀？個個都三尖八角咁～好似話上次陪～～～你去飲野嗰班，隻隻都好似好耐都無食過野既餓狗咁～搶屎丫～』我而家食Kelly煮既早餐就真係好似食梗屎咁喇～
「好過你啦～想揀都無得揀～」Kelly唔憤氣咁樣～
『咩叫我無得揀丫？係我唔俾機會人埋我身咋～』我冷眼望一望Kelly...
「咁你即係話我隨便啦？！」Kelly用支叉指住我！
『我無咁講過丫～係你自己講架咋～』我用把刀格一格Kelly支叉！
「生得靚係有D咁既煩惱架喇～想擋都擋唔住～你係唔會明架喇～」Kelly又得得戚戚咁既樣！
『D人盲架～睇唔到你最真實既一面～如果俾佢地知你屙屎臭到落樓下幾層都聞得到既話，睇下仲有無人夠膽埋你身？』我半帶恥笑咁笑一笑Kelly～
「靚女唔屙屎架好唔好～」Kelly碌大對大眼仔咁望住我！
『你會屙屎所以你唔係靚女囉好唔好？』我又碌大對眼望住Kelly！
「屎屎屎屎屎！下次就屙舊俾你食！」Kelly由我隻碟上叉走左條腸仔！
『喺人地隻碟上搶走人地D野食咁無禮貌架？！』我又由Kelly隻碟上叉返走塊火腿！
「又係你話難食既～唔好食囉～」
『我食落肚難為自己都唔益你丫～』
「而家係邊個益邊個丫？」
『你有益過我咩？你難為我咋嘛～』
「咁難為就唔好食！」
『喂！點可以咁無品架？你識唔識規矩丫？』
「我話知你咩規矩丫？而家規矩係由我定！」
『喂！唔可以咁唔講道理架！』
「係你唔講道理先既！」
『我邊有丫？』
「你有！」
『我無囉！』
「你有你有！我話你有就你有！」
就係咁～每朝早我地都係差唔多咁既樣～
吵吵鬧鬧～吵吵嚷嚷～
Kelly同一般既女仔好唔同～
或者咁講...Kelly喺我面前同喺其他男仔面前係好唔同～
粗粗魯魯～講埋晒D核突野～
講屎講尿已經係文靜架喇～
有時仲會話俾我聽佢D M血有幾深色...有幾紅…
你有無試過有女仔會咁同你講？
除左Kelly之外，我真係未試過有其他女仔咁樣同我講囉～
不過我又唔覺得反感喎～
反而仲好似好...好親切添...
就好似話...無乜秘密隱瞞對方咁～
Kelly久唔久都會同我講下佢有幾多男仔追～又會搵我陪佢出席嗰D狗公Party～
帶我去幫下眼丫～又會問下我既意見咁～
問下我覺得個男仔點丫～
型唔型丫～
靚唔靚仔丫～
成唔成熟丫～
係唔係玩玩下嗰D丫～
玩唔玩得過丫咁～
而我見親Kelly問起嗰D狗公，唔係好似高登上所講嗰D呃蝦條既死MK，就係呃蝦條既西裝友！
總之就唔係好印象啦！
都唔知Kelly呢D係乜野眼光！
問親都係壞男人！
不過又好彩，Kelly都幾聽我既意見既～
我一話個男仔唔係好人姐，Kelly都會立即避開嗰D壞男人～
所以話呢～你又叫我點放心Kelly自己一個呢～
講返轉頭～話就話無乜秘密隱瞞對方，但或多或少有D野都唔係隨便講既～
就好似有關性方面既野咁...
雖然話我地細嗰既時候，都有一齊訓～仲試過一齊沖涼添～
仲要真係赤裸裸鳩Fing Fing嗰隻喎～
我都可以話真係清清楚楚咁睇清晒Kelly全相～
同樣地，Kelly都睇過我鳩Fing Fing既天真樣～
之但係到我地開始長大，開始大個，開始吸收到性知識之後，我地都總係有D野係唔會同對方講既...
好似話...我從來都唔會同Kelly講打丁既野啦...
始終打丁呢家野...真係有D難為情既...
不過呢，Kelly又會肯講佢既三圍數字俾我聽架喎～
喺Kelly發育期間，佢久唔久都會話俾我聽佢度完三圍～
仲會話我知上圍大左少少～
不過我就次次都恥笑佢係微波仙子～
點發育都仲係胸無幾両肉咁～
而Kelly總係唔憤氣，係都要喺我面前挺起個胸～谷起個胸話自己有波～
到左而家，Kelly久唔久都仲會話自己Keep住發育～
對波仲越黎越大～
之前買落既Bra越黎越窄～
真係諗起都覺得好笑～
不過講下講下...又諗下諗下...
諗下諗下...唔敢同對方講有關性既野...會唔會只係...得我唔敢...同Kelly暢所欲言呢？
同Kelly與日常一樣，你一句我又一句咁食完個早餐之後...
「你換衫可唔可以快D架？成個女人咁！」Kelly就隔住道房門係咁催我...
『係你換衫快過男人姐！』一D女人味都無！
「仲講？再唔快D就真係遲到架喇！」Kelly越講越大聲...
又係你自己講先既...
有時都真係唔係好明，係唔係個個女人都咁鍾意管呢樣，管嗰樣架呢？
其他女人我就真係唔知...因為除左老母同Kelly之外，我都好少接觸其他女性生物...
但同Kelly相處呢十八年間，我就覺得Kelly仲煩過我老母...
朝朝俾佢鏟醒就唔在講啦～
就好似而家換衫咁，都要催三催四咁...
大姐丫...俾你咁催法...容乜易調轉條底褲黎著架？
人地話，大過自己既女人都總係有種姐姐或者係母性存在住喺內心深處...
佢地總係當正身邊細過佢地既男仔係小朋友咁湊...
我就真係唔知係唔係真...
就算當佢係真，Kelly都只不過大我一日咁大罷姐～又駛唔駛煩過我老母呢？
不過又講真嗰句，我又真係幾享受既...
有女人仔管下你～煩下你～哦下你咁～有陣時都幾過癮既～
呢種咁既情況...係自虐...還是被虐？
唔知呢...
不過Kelly又唔係時時都咁煩既～
佢久唔久都有依賴人既時候～要我幫忙既時候～
我一換好衫，打開門，就見到Kelly口黑面黑咁企左喺道...
「換好喇嘛？換咁耐咪又係Tee加短褲！都真係唔明點解你朝朝都可以換咁耐架！」Kelly翹住手轉身行去大門方向...
『我著西裝仲可以耐D添呀！』實等到你發脾氣～
「你著上西裝都唔慌Man得去邊架啦～」Kelly著一著對白色布鞋仔。
『一定成個洪永城咁型！』之前Grad Din都不知幾型！
「你上次Grad Din嗰陣時咪著過囉～Gary仲叫我拖住你行，扮洪永城同黃翠如丫嘛～不過講真句...你邊忽似洪永城丫？！」Kelly冷眼望一望我...轉身行去開大門...
『我都唔覺得你有邊忽似黃翠如囉好唔好？』如果我係洪永城，你係黃翠如，咁咪無得喺埋一齊囉...
「緊係啦～因為我靚過黃翠如丫嘛～～～」
『咁我一定Man過洪永城啦～～～』
「哦。」
『哦。』
同Kelly落樓行去巴士站等巴士。
都已經過左返工時間，巴士站都唔係話好多人等梗車。
『嗚呀～～～』當我擘大個口，打喊露打到一半既時候...
「你打喊露可唔可以掩住個口架？」Kelly就一手拍左埋我個口道...
『是旦啦...又唔係俾邊個見到...』打個喊露都唔可以自由奔放...
「喺路邊擘大個口打喊露咪會吸晒D廢氣囉！」Kelly將佢手上沾有我既口水都抹返晒落我件衫上...
『喂喂喂！污糟丫！』女仔之家咁嗱渣架？！
「D口水你架！」Kelly仲要繼續抹...
又係你自己要撳住我個嘴既...
「有車有車！上車上車～」當架巴士一駛到埋黎，Kelly就拎定個銀包仔出黎。
Kelly喺個銀包仔道摷下摷...
「我知你八達通未增值架喇～幫你俾住先啦～」Kelly拎左堆散紙入落個箱道...
“叮叮噹噹”
係喎…都唔記得左尋晚放學搭車返黎既時候就已候負梗錢添...
『你知我八達通負梗錢，頭先又唔提我去增值左先？』我跟住Kelly行上上層...
望住佢對腳...
望住Kelly對修長既美腿...
又白又滑咁…
「你頭先搞咁耐先出到門丫～仲叫你去增值丫？實上唔到呢班車啦～上唔到呢班車就實遲到啦～」Kelly一邊坐喺平日坐開既座位，一邊口噏噏咁話我...
『又係我問題～』我坐到Kelly身邊，故意撞一撞佢～
「唔通我丫？」Kelly又故意咁撞一撞返我～
Kelly真係...打橫黎講架～
仲要…粗聲粗氣咁...
真係呢...唉～
「點丫你？溫左書未丫？」
『未喎～』
「咁等陣點Quiz丫？」
『抄你咪得囉～』
「抄抄抄抄抄...由幼稚園抄到而家喇！你用下自己個腦得唔得架姐？」
『唔抄都抄左十五年啦～唔差在啦～』
「要抄都得～今晚請食飯～」
『請你食碗飯～』
成程車都係同Kelly你一句我又一句咁你來我往，好快就返到黎Campus～
而當我地一踏上大門前既樓梯姐...
「喂～Kelly～咁岩又會喺呢個時候一齊返到黎喎～」有個身影撞一撞開我...
『哎呀...』我頂你個臭肺...邊撚個仆街丫？
我再望清楚D呢條撞開我後黐埋喺Kelly身邊既仆街係...
Simon Chan？！
正所謂十個Simon，九個西人！尤其係姓陳！
你睇破風都知，個仆街Simon Chan嗰句“我知道點幫你破風架喇”幾咁狗賤！
而喺我面前呢條死仆街Simon Chan正一係厹之中既厹！
我屌你老母呢條死仆街Simon Chan同我地同科既！
OCamp嗰陣時就已經?到Kelly實一實！仲要死黐住Kelly黎玩！
而家又成撚日一見到Kelly就狗衝過黎扮晒熟咁！
又講東～又講西～
扮晒智者咁款！
我真係屌你老母頂你唔撚順！
「係囉～乜咁岩既～食左野未丫？」但Kelly就好似好受落咁...變成一個體貼友善既友誼小姐咁...
「食左喇～不過自己一個人食就無乜Mood囉～如果下次可以同到好似你呢D靚女一齊食就好喇～」嗰條Simon Chan仲要厚顏無恥過民賤聯！
「嗯～好丫～下次一齊食丫～」但Kelly仲要向條厹展露親切既笑容...
「咁係架喇喎～下次約你你唔准Say No架～」條Simon Chan仲要好似心懷不軌咁淫笑左幾聲...
「嗯～你約得我，我又點捨得Say No喎～」Kelly仲要向條Simon Chan打左個眼色...
眉來眼去，拋眉弄眼咁...
約乜鬼野丫約？約戰呀？！
大庭廣眾喺大學校園裏面約戰咁唔知醜！
奸夫淫婦！奸夫淫婦呀！
人黎呀！捉晒佢地兩個去浸豬籠！！！
真係聞者火滾，見者火爆！
火滾...火爆...
我做乜要火滾又火爆呢？
係咯…我做咩要咁火呢？
因為...因為我...葡萄？！