《情困之時，我遇上了自稱情性的情聖》: [Case 04－戀兄情義] PART 15
同GiGi一路食譚仔，我就一路喺道講：『好開心丫～好開心丫～可以同到Heidi影合照丫～～～』
GiGi就一路答：「得喇得喇...知喇知喇...其實你自己對住塊鏡影合照咪一樣...」
又點同呢～
哥哥好鍾意Heidi架嘛～
而家我可以將Heidi連埋我一齊送俾哥哥喎～
咁係唔係加倍高興先～～～
不過最重要既都係...唔知哥哥會鍾意邊個多D呢？
我就當然係想哥哥鍾意我多D啦～
之不過...人地Heidi係明星...我又點可能同人比喎...
唔...
算啦算啦～只要哥哥鍾意，咁就乜都無所謂啦～
同GiGi食完個譚仔之後，我地兩姊妹就去行街街～
『話時話...唔知會唔會見到哥哥呢？』我翹住GiGi行下行下...
「你哥哥黎左葵芳咩？」GiGi俾我翹住黎行下行下...
『無丫～不過佢同嗰個Ashlynn姐姐成日都黎葵芳既...』一講起嗰個Ashlynn姐姐就有D嬲嬲地...
「Ashlynn姐姐？你哥哥既女朋友？」GiGi望一望我。
『嗯...正一死港女！』我越講就越嬲！
「死港女…」GiGi望返向前...望住前路...
一講起嗰個Ashlynn姐姐，又令我諗起佢脾氣又臭！又要扮晒索咁！最憎佢就係對哥哥呼呼喝喝丫嘛！
成日以為自己好矜貴咁！
真係正一死港女！
同GiGi行下行下，不過兩個女仔行街街其實都幾危險...
尤其係行葵涌廣場...
因為葵涌廣場又細又窄又多女仔行...
多女仔行又點？
咪會吸引埋D變態叔叔黎搵食囉...
D變態叔叔成日都有意無意借D意行喺你身邊...貼喺你後面...扮晒唔覺意掂下你...撞下你...
有D過份起上黎仲會摸下你...搓下你...
你又唔知嗌唔嗌好...
嗌又好似好尷尬咁…
唔嗌又要蝕底俾D變態佬...
不過如果唔係太過份既，都係算架喇...
多一事不如少一事丫嘛…
俾人摸一摸手仔...屁股仔...都唔算得上好蝕底既...
但當然，有得避就最好避開啦...
而家我同GiGi行下行下，都好似感覺到有個變態佬跟喺我地後面...
仲好似想越行越埋…好似想抽我地水咁...
我都係捉住GiGi行快兩步，逃離葵涌廣場！
『頭先有變態佬跟住我地丫！！！』一過返去新都會嗰邊，我就翹實GiGi！
「嗯...男人真係好鹹濕...」GiGi點一點頭...
唉...如果全世界既男人都係鹹濕既話，點解我又唔可以令哥哥鹹濕我呢？
如果係哥哥既話...我唔介意俾佢鹹濕囉...
就算有乜奇怪癖好，我都樂意配合架...
當我又喺道FF哥哥既時候...
我喺Pacific Coffee既棗紅色梳化上，見到一個既熟悉...又親切既面孔...
『哥哥～』喺我最愛既哥哥丫～～～
哥哥一個回望...
「阿...喂～」我未等到哥哥嗌我個名之時，我就已經撲左埋去哥哥道～攬到實一實～～～
『哥哥～真係可以喺道撞到你喎～』我攬住哥哥搖下搖下～嗲下嗲下～
「係咯…你...地又會黎左葵芳既？」哥哥都有D驚奇咁問～
『GiGi話頭先點半既時候有Super Girls黎做嘉賓～所以我地咪立即走過黎碰碰運氣囉～點知...』我急不可耐咁拎左部電話出黎撳撳撳～
我撳下撳～搵下搵～
『真係俾我同到Heidi合照～你睇下～』我好開心咁俾部電話哥哥睇～
哥哥好認真咁望住個芒...
望住芒裏面兩個差唔多一模一樣既面孔攬住黎合照～
而我偷偷望住哥哥對眼...
哥哥對眼入面...好似...好似只有黑髮面孔...
『Heidi佢好好人架～一聽到我話想同佢影一張合照，佢就攬住我同我影喇～仲話要Add我做Friend添～』唔通哥哥佢...就只係望住我？
「咳咳...」有人咳左兩聲...
我再望一望前面...原來係Ashlynn姐姐...
『Ashlynn姐姐...』我冷冷淡淡咁叫左Ashlynn姐姐一聲...
認真D睇一睇今日既Ashlynn姐姐...
個妝濃到...
你睇下佢對眼化到...大到...巨到...外星人對眼都無佢咁巨大！
再加上個下巴尖到，隊得死人嗰隻！
個鼻D陰影位打到深到呢～個鼻好似阿爾卑斯山山脈咁高！
個嘴唇又紅到呢～岩岩食完人呀？飲完血呀？
一套粉紅色連身短裙，配襯一對透透地既黑絲...
夏天咁熱著乜鬼黑絲喎？！
臭到死！
條短裙差唔多短到上個屁股道...
俾邊個睇丫？想勾引我哥哥去搞你呀？！
再望一望佢對鞋...著左對有小小踭既粉紅色高踭鞋...
高踭鞋都要著粉紅色咁姣...
真係發姣發到落腳趾尾！
「嗯...我以為你見我唔到添～」Ashlynn姐姐黑起塊面...
『我本來真係見你唔到架喎～我只係見到我哥哥架咋～』仲要俾個臭屁臉我睇？！算咩意思？！
「咁講野既？真無家教！」條八婆怒視住我！
『我有無家教都唔輪到你教！』我又怒視住條八婆！
我地兩個既眼神中間，好似有D閃電磨擦梗咁！
就喺快要展開第三次世界大戰之時...
「ER…係呢係呢～你同GiGi行街啦～今晚唔好咁夜返喎～」哥哥向我打左個眼色...
『嗯～哥哥都唔好咁夜返丫～拜拜喇哥哥～』我亦都同哥哥打左個眼色後，翹住GiGi離開～
哼！你估我真係怕左你丫？！
我唔想令哥哥難做，先戰略性離開咋！
死港女！
「嗰個就係你哥哥既女朋友Ashlynn喇？」GiGi問一問。
『嗯！你睇佢個八婆樣！係唔係好港女Feel？！』我仲係嬲爆爆！
「嗯...真係一個死港女...」GiGi點一點頭！
連GiGi都話條八婆Ashlynn係死港女！
咁就無死錯人架喇！
「不過又估唔到...你哥哥會有一個咁既女朋友...而照我睇...」GiGi諗左一諗，「佢地都唔會好得幾耐...」
『佢地唔會好得幾耐？』我疑惑咁望一望GiGi...
「嗯...我直覺話我知...佢地好快會散...」GiGi點一點頭。
佢地好快會散？
哥哥同條八婆Ashlynn好快會散？
係就好喇...我都好想哥哥可以快D脫離港女既魔掌丫...
同GiGi行下街～睇下衫～又食下魚蛋～
「不如今晚上你道煮飯仔好嘛？」GiGi咬下咬下粒魚蛋～
『好丫好丫～～～好耐都無試過兩姊妹玩煮飯仔喇～～～』我又翹一翹住GiGi隻手，嗲一嗲佢～
「嗯...咁我地返去咯。」同GiGi互相抹過嘴仔之後，我地就起行～
不過當我地行到出商場之時，我見到個天黑黑地咁喎...
我抬頭望上天：『好似想落雨咁喎...不如我地買返把遮先咯～』
「嗯。」GiGi抬頭望一望舊大灰雲後，點點頭～
同GiGi去左間賣日用品既店舖，我地第一眼都係睇中左把黃雨傘～
唔知點解呢～
雖然把黃雨傘睇起上黎好似好脆弱咁，但我地兩個都總係好鍾意～
總係有種...個子雖小，但存在住一股不屈不撓既精神喺入面～
同GiGi揀完遮之後，一出到商場門口之時...
『果然真係落起雨黎喇～』我伸出手感受一下外面既雨水...
“滴滴答答 滴滴答答”而且仲要幾密下...
「嗯...仲唔快D行，等陣仲會越落越大...」GiGi望一望上天空...
『嗯～咁我地快D返去喇～』我撐起把黃雨傘，擋住無情既雨水，同GiGi一齊向前行～
喺漆黑既街道上，好多人都無帶遮，狼狽咁喺街上跑...
呢個時候...我又諗起哥哥...
哥哥今日無帶遮喎...唔知佢點呢？
會唔會已經上左條八婆屋企呢？
會唔會同梗條八婆...
當我仲喺道FF梗條八婆點樣吸哥哥既陽氣之時...
『哥...』我見到一個背影...一個好似哥哥既背影...
喺密密麻麻既雨絲之中，我好似見到哥哥喺道...喺道慢慢行...淋住雨咁慢慢行...
我再行近D...睇清楚D...
『哥哥！』果然真係哥哥！
我同GiGi就急急腳咁走埋去哥哥身邊！
『哥哥！你做咩係道淋雨丫？』我用把黃雨傘幫哥哥擋擋雨～
哥哥回身一望，眼定定咁望住我同GiGi～
『你無事呀嘛哥哥？』我拎出紙巾，溫柔咁幫哥哥抹去面上既雨水～
哥哥淋到成身都濕晒喇...
「我無事～無帶遮丫嘛～係囉...都估唔到會落雨添...」哥哥擰擰頭，接過我手上既紙巾自己抹...
『真係無事？』哥哥成日都話唔好淋雨...淋雨好易病...
而且我又真係無乜幾何見到哥哥淋到咁濕架喎...
仲有仲有…哥哥既眼裏好似...好似充滿住...委屈？
「唔駛擔心我喎傻妹～你地仲未返去既？」哥哥抹多兩抹之後，一面和藹咁望住我～
『返架啦～GiGi話想上我地道玩煮飯仔～哥...你...一唔一齊丫～定係...要同Ashlynn姐姐...』我唔係好想哥哥成日同嗰條八婆一齊...
「好丫～GiGi唔介意丫嘛？」哥哥望一望GiGi。
「唔介意。」GiGi帶住一絲絲微笑擰擰頭。
哥哥竟然肯唔理嗰條八婆...陪我地一齊食～
太好喇～～～
『好野～有哥哥同我地一齊食晚飯～』我左手翹一翹哥哥，右手翹一翹GiGi，我地三人一齊行～
喺同哥哥仲有GiGi一齊搭車返去期間，窗外一直都有狂風暴雨撥打車廂！
雖然外面風大雨大，但我既內心好平靜...
因為我有好姊妹陪伴之餘，亦有我最深愛既哥哥喺我身邊～
哥哥今日唔駛陪足嗰條八婆全日～
我就好似成功喺妖物手中救返哥哥出黎咁～
好有成功感～亦充滿幸福感～
我算唔算任性呢？
唔...
如果哥哥既女朋友係好既話，我唔介意哥哥陪佢多D～
但如果好似嗰條八婆Ashlynn咁...我真係唔想哥哥再俾佢勞役！
返到入屯門...雨就越落越大...
『哥哥～我同GiGi去買餸先～你都係快D返去抹下個身，換返件衫先啦～唔係既話好易病架～』我推一推哥哥返屋企～
「嗯～咁你地小心D喇～」哥哥都好聽話～快快腳咁走返屋企～
我同GiGi就上左百佳買牛扒～仲有D配料～
當我地買好晒野...總係好似差D野咁架呢？
差D乜呢？
唔...
『丫！GiGi你拎住D餸返上去先～我要去買D重要野～』我交一交D餸菜俾GiGi～
「哦？買D重要野？」GiGi一頭問號咁～
『嗯嗯～～～你上去先啦～我好快返～～～』我急急腳咁走左去～
食牛扒就緊係要配紅酒架啦～
買紅酒就緊係搵根叔啦～
根叔係士多老闆～
由細睇到我大～
而且佢D紅酒又靚又平～
唔搵佢搵邊個喎～
『根叔～～～』我一入到士多，就立即嗲一嗲面前呢個光頭根叔～
「阿Wing？今日做乜咁好口丫～」根叔和善咁笑笑口～
『你今日靚仔丫嘛～』我又再嗲一嗲～
「仲要讚我靚仔添～講～有乜要求？」根叔好似知我想點咁～
『無丫～我想買支...紅酒丫～～～』我又嗲聲嗲氣咁嗲下根叔～
「買紅酒？細路女買紅酒做乜？哦～係唔係同男仔飲？我話俾你哥哥聽～」根叔古古惑惑咁望住我～
『唔係丫～唔係丫～我同個好姊妹仲有哥哥一齊飲咋嘛～～～』我又嗲下嗲下根叔～
「兩女一男？！會唔會好危險架？我指你哥哥丫～」根叔又古古惑惑咁笑一笑～
『邊會危險姐～好啦好啦～賣俾我啦～』我捉住根叔隻手臂搖下搖下～
「好喇好喇好喇怕左你喇～打個半價俾你～靚野黎架～好好品嚐丫～」根叔怕左我～去拎左支紅酒俾我～
『多謝根叔～我都話根叔對我最好架啦～』我再搖下搖下根叔隻手臂～
「傻女～」
會唔會真係好危險？
我都想同哥哥危險下...
不過而家有GiGi喺道...應該好難會危險到...
但如果...我地三個...一齊...飲醉左...會唔會變成...3P？！
我一邊撐起把黃雨傘喺雨中行，一邊喺道諗...我地三個都飲醉左既話...會唔會真係搞起上黎...仲要係3P嗰隻...
不過講真嗰句，FF先有呢D咁瘋狂既情節架姐～
現實總比FF平淡得多呢～
“咔”一下開鎖既聲音...
『我返黎喇～』我就返到入屋企～
「返黎喇～你去左買D咩丫？」哥哥就喺我地間房，急急腳咁走出黎～
我除埋對布鞋，換返對拖鞋：『一支紅酒～我嗲左根叔好耐，佢先肯賣俾我咋～嘻嘻～』
「紅酒？」哥哥成頭問號～
『係丫～食牛扒緊係飲紅酒架啦～識得食一定係咁食～嘻嘻～GiGi呢？』我望下望下～望下GiGi既蹤影～
「我係道丫～」GiGi由我地間房行左出黎～
『哦～你地兩個喺間房行出黎...你地...』我扮晒疑惑咁望住哥哥同GiGi～
「無丫無丫！我地咩都無做過！」哥哥又真係好似有D心虛咁喎～
『哈哈～』我掩住個嘴仔笑，『我緊係知你地無野啦～GiGi好鍾意上你張床架～佢每次上黎都會上你張床道坐下瞓下～佢話佢一直都未試過瞓碌架床喎～所以特別有新鮮感～哥你唔會介意架呵？』
其實我都預左GiGi會上哥哥張床～
只係估唔到...哥哥都會喺裏面...
係咯…點解哥哥都喺裏面架呢？
唔通哥哥介意俾GiGi瞓自己張床？
「唔介意...唔介意...」哥哥又好似唔多介意咁喎～
咁都好既～
最緊要都係哥哥唔介意姐～
你知啦～女仔就實唔鍾意俾人上自己張床～（自己深愛既人除外～）
有時男仔都一樣有相同諗法架嘛～
竟然而家哥哥都話唔介意就最好啦～
我拖一拖住GiGi：『我地入去煮飯仔～哥哥你坐定定等等～』
同GiGi喺廚房裏面搞下搞～
『哈哈～成手都係喇～』
又搞下搞～
『喂丫～好油架～』
又再搞下搞～
「小心D小心D。」
又再喺道搞下搞～
「好似好香咁。」
玩仲多過煮咁～
我用個鑊鏟剷兩下～
GiGi又用個鑊鏟翻幾下～
剷多兩剷～翻多幾下～發現哥哥喺門口偷窺梗我同GiGi！
『哥哥做咩偷窺我地？出返去出返去～』我就推返哥哥出去！
「小心D丫～」哥哥萬般擔心咁叮嚀我地～
『嗯嗯～』我同GiGi回答過後，繼續煮飯仔～
同GiGi玩煮飯仔已經夠開心～
今次仲要係煮埋俾哥哥食～
總係好似...老婆仔服侍老公仔咁～
但係唯一最大唔同既係...仲有GiGi一齊...
唔通真係…齊人之福？！
『有得食～』我同GiGi拎住三碟牛扒，仲有兩個蠟燭台仔～
將所有野都放好晒喺細小既圓木檯上之後...
GiGi點著D蠟燭...
我就去熄埋D燈：『咁先有情調架嘛～』
「咁我會唔會阻住左你地兩個撐檯腳架～」哥哥好似有D唔係咁好意思～
『梗係唔會啦～我地好歡迎你～』我翹一翹住哥哥，又翹一翹住GiGi～
好喇好喇～就俾你享下齊人之福啦～
我地三個坐定定之後，哥哥就為我地兩位小妹妹斟酒～
「你地都係唔好飲咁多…」哥哥真係當正我地細路女咁囉...
我谷起塊面豬登：『仲當我地係細路女丫？GiGi好飲得架！』
次次飲酒既時候，GiGi都比我飲得多～而且仲每次都係佢照顧我～送我返屋企既～
GiGi帶住一絲絲微笑：「我OK架。」
「嗯...」哥哥仲係好似唔係咁放心咁喎...
我先唔會理咁多～
今晚就要放心飲～放膽飲～
因為今晚身邊有兩個令我可以好安心既人～
我最愛既哥哥～同埋我最好既姊妹～
「Cheers～」碰過杯後，開始我地既三人燭光晚餐～
哥哥細味一口：「好食喎！」
『梗係啦～我同GiGi家政A+架～』我同GiGi打左個眼色～
成間學校，就只有我同GiGi煮既野可以放得入口～
其他人煮既...你預左Call白車啦～
「如果可以日日都食到你地親手煮既野就真係幸福死喇～」哥哥滿心幸福咁既樣～
「你想既話，我都可以多D黎同阿Wing煮俾你食。」GiGi飲一啖紅酒，展露一絲絲微笑～
『嗯～如果哥哥得閒既話，我都好樂意親自下廚～』我亦都飲一啖紅酒，甜絲絲咁笑一笑～
「嗯...」哥哥點一點頭～
我...我真心想做足一世你既煮飯婆～
晚晚都煮定飯，等哥哥返黎～
食飽同哥哥一齊沖涼～一齊瞓～
多麼幸福呢～
『哈哈～拍拖究竟係咩感覺？』
「被幸福淹死既感覺～對女仔黎講～」
「男仔唔可以都一樣被幸福淹死架咩？」
『哥哥只會窒息而死～』
「或者係一刀一刀被刺死...」
「總有人可以修補呢個傷痕。」
「就算有人修補，都唔會補到天衣無縫...」
『咁就要睇下邊個補啦～哥哥～』
「你拍過拖啦咩～」
『我無～不過我有戀愛既感覺呀～哥哥...』
「縱使無拍過拖，都好清楚自己既愛向住邊個方向。」
『為真愛飲杯～Cheers～』
我地不停咁飲～
但就係哥哥飲得最多...
哥哥就好似唔想俾我地兩個女仔飲得咁多咁，自己係咁飲...係咁飲...
『咁快飲晒既？』我倒一倒轉支紅酒...
「你飲左好多架喇～」哥哥拍一拍我...
『唔～我仲要飲～』我一邊講，一邊行去個木櫃...
我記得...我記得個木櫃道...有支V.S.O.P....
係哥哥上次去完...去完婚宴之後拎返黎...
「阿Wing唔好喇～溝酒飲好易醉架...」哥哥試圖由我手上放返低支V.S.O.P....
『唔緊要啦～又無其他人～醉左都無所謂啦～』我已經好似...Wing Wing地...
「聽日你地仲要返學架...起身頭痛死你地架...」哥哥仲係阻止梗我...
『哥哥～』我嗲一嗲哥哥...
GiGi接過我手上既V.S.O.P.，開一開...
斟晒三杯之後...
『Cheers～』
「Cheers…」哥哥就半推半就咁繼續飲...
我地三個飲多兩飲，哥哥就好似...好似...
『哥哥～你做咩眼濕濕～』我指一指住哥哥...
「無丫～有兩位靚女陪我飲酒...我感動到喊囉～」哥哥口花花咁...
『嘿嘿...你衰喇～你睇中左GiGi！』我笑笑口咁指住哥哥同GiGi...
你地兩個...兩個...
「阿Wing你醉喇。」GiGi拎過我杯酒，一啖就飲左落肚...
『我無醉～我都不知幾清醒～嘿嘿...』我搖一搖...擺一擺...就挨左落哥哥身上...
「阿Wing～你真係醉喇～」哥哥扶一扶我...
『我無醉喔～我無醉喔～』我就越挨越實...
哥哥喔...哥哥...
我好想...一直都好想...好想同哥哥...哥哥...
「夜喇，我都係時候返屋企。」GiGi擺左一擺企左起身。
「我送你返去丫...」哥哥扶一扶我之後，又企左起身...
「唔駛喇，你睇住阿Wing啦。」GiGi拎齊佢D野...
「唔好既，你一個女仔，仲要飲左酒...危險丫...等我送你返去...」哥哥好有紳士風度咁...
都係既…
我都飲都Wing下Wing下咁...要GiGi一個...一個女仔返去既話...
『嗯～你就俾我哥哥送你返去啦～』要GiGi一個返去既話...太危險...
「嗯。」GiGi點點頭...
『哥哥～我等你返黎喔～』
目送住哥哥同GiGi出門口後...我好快就...好快就...失去知覺...