《情困之時，我遇上了自稱情性的情聖》: [Case 02－痴情女子] PART 02
坐喺一間食日本放題既餐廳裏面...
「係咩？真係有咁既事咩？我真係唔記得喎～等等先...」珮琳講唔夠兩句，檯面上部電話又響起Whatsapp既鈴聲。
『喂丫～你可唔可以尊重下我呢位好姊妹，唔好掛住撳電話架？陸珮琳！』我試圖掩住珮琳手上部手機...
「喂喂喂…得得得…你等等先～好快好快～係咯～講到邊話？呀係丫～係唔係真係有發生過咁既事架？唔好呃我喎～」珮琳撳完電話又扮晒傻咁答。
『真係有咁既事架！你唔好借D易又賴落失憶道喎～』我冷眼望一望珮琳。
「咁係丫嘛～我真係無左呢段記憶...等等先...」珮琳講唔夠兩句，檯面上部電話又響起Whatsapp既鈴聲。
『喂丫～唔好掛住睇電話得唔得丫？』我又試圖掩住珮琳手上部手機...
「得得得！等多陣先！覆埋好快～」珮琳拎起部電話撳撳撳...
『你成日掛住覆Message，不如睇下Stella去到邊仲好啦～』我拍一拍珮琳隻手。
「Stella岩岩話差唔多到架喇～你放心喎～Stella有佢個超級貼心男朋友仔送佢過黎～唔會有乜野意外既～」珮琳仲係望住部電話。
『係姐...但係...而家唔駛我地接Stella...總係...有D唔放心...』我嘟一嘟長個嘴...
「哎呀～你要俾多D信心Stella～仲有佢個超級貼心男朋友仔先得架嘛～」珮琳覆完Message後，又放返部電話落檯面。
『都係既…』講就係咁講姐...
之但係...以前同Stella出街，一直都係由我地接送佢出出入入...
而家唔喺Stella身邊...硬係有D唔放心...
「對唔住丫兩位靚女～我遲到～」Stella帶住燦爛既笑容坐喺輪椅上，身後有個精靈又有陽光氣息既男仔推住佢過黎我地呢邊。
『唔緊要～唔緊要～都唔係遲好多姐～』見到Stella安全到步，我就放心晒～
「佢囉～我明明就叫佢行段近D既路，佢就係都要行另一條！兜左個大圈！」Stella谷一谷起塊面豬登，指一指身後位型男。
型男摸一摸Stella把長髮：「你講嗰條路凹凹凸凸架～躉親你咁點算？」
「你話聽晒我話架嘛…」Stella嘟一嘟長個嘴仔。
「係喇係喇～我錯喇～咁多位好對唔住～」型男向住我地作九十度角鞠躬。
「嗯～算你喇～丫～都未介紹～呢個係我男朋友曉揚～呢兩位就係我成日同你提起嗰兩個好姊妹～Carol你見過架啦～另外呢位就係珮琳喇～」Stella終於都肯認認真真咁介紹佢男朋友仔俾我地認識～
無錯喇～早喺兩三個月之前，同雅暖去Stella個畫展之時，已經見過曉揚一次～
「你好丫～成日喺人地口中聽到話係模範男友既曉揚～」我同珮琳賤賤格格咁對住曉揚笑一笑～
「哈哈...兩位好丫...」曉揚尷尷尬尬咁笑一笑～
「喂喂喂！你地唔好亂講丫...無你既事喇～你可以先行退下～」Stella向我地示意唔好講出真相後，摸一摸個曉揚既面頰。
「嗯～咁你食完打俾我，我過黎接你啦～小心D丫～」曉揚以一對溫柔既眼神，望住Stella。
「得喇得喇～Bye～」Stella錫一錫曉揚面頰。
「Bye Bye喇～成日喺人地口中聽到話係模範男友既曉揚～」我同珮琳再一次賤賤格格咁對住曉揚笑一笑，揮揮手～
「Bye～」曉揚再一次尷尷尬尬咁揮揮手，轉身離開。
「喂喂～你男朋友仔又真係四四正正幾Charming架喎～」曉揚都未行出門口，珮琳就急不可待咁笑一笑Stella～
「OK咁啦～不過佢有陣時都管得我幾嚴架～好似頭先咁，我都話左行嗰邊會近D快D，佢就話條路唔平，係都要行另一條鬼咁長既路...之前我都成日行嗰邊架嘛～又唔聽人講...」Stella扮晒嬲嬲地，但好明顯佢嘴角帶住甜絲絲既微笑～
正宗嘴角含春樣～
「咁佢都係著緊你姐～等等先...等等先...」珮琳部手機又發出Whatsapp既聲響。
「又係你個Timothy丫？駛唔駛咁黐纏丫～」Stella冷眼望一望珮琳。
『係囉係囉～你未黎之前，佢部電話都響左成過百次架喇！一D都唔尊重下D姊妹架...正一有異性，無人性...』我趁機話珮琳兩句。
「唉～你地唔好咁啦～你地都唔係唔知，喺我出事之後，個傻佬晚晚Send Whatsapp俾我...Send左足足三百幾個！佢由唔知我出事，到知我出左事，都Keep住晚晚Send...到我而家醒返喇，佢就話要我一收到佢Whatsapp就立即回覆...其實我都好慘架～體諒下我啦～兩位大小姐～」珮琳扮晒無奈咁，但好明顯佢嘴角帶住甜絲絲既微笑～
又一個正宗嘴角含春樣～
「咁又幾時帶埋你個Timothy黎俾我地見下先？」Stella古古惑惑咁既樣...
「下次啦下次啦～下次叫埋你個曉揚一齊Gathering啦～」珮琳又古古惑惑咁既樣...
「下次下次～你下次左兩三年喇！」Stella谷一谷起塊面豬登...
「係咩係咩？之前既野我唔記得架喇～」珮琳有D扮傻咁既樣...
『點左野食先啦..好肚餓喇...』睇住眼前呢兩個春風滿面（春心蕩漾！）既少女...內心總有淡淡的葡萄味...
「好啦好啦～邊點邊講啦～」珮琳左手拎起支筆，右手拎起點菜紙。
「我要三文魚～我要三文魚～大量大量～甜蝦～大量大量～仲有吞拿魚～仲有仲有...」Stella興致勃勃咁叫～
「哈哈哈～」珮琳突然笑起上黎，「唔得唔得...我突然諗起Timothy成日話只有港女先會放D生勾勾既野入口～我地三個一定係港女啦～哈哈哈～」
「哈哈哈～」Stella又跟住笑起上黎，「咁岩既～曉揚都成日咁講～佢話我地D港女唔會明咩係男人既浪漫～哈哈哈～」
兩位春風滿面既少女又再一次嘴角含春...
唉...有愛情既滋潤下既女仔，係唔係特別甜美架呢...
「喂喂～」Stella拍一拍珮琳隻手，「我地都係要照顧下我地既Carol先得喇～你阿哥點丫？不如介紹俾Carol識啦～」
珮琳既阿哥...唔好喇掛...
「佢丫？唉～唔好提喇...佢而家俾個妹妹仔玩梗～玩到殘～可以既話，我都想Carol拯救下佢丫～」珮琳擰一擰頭...
『我無能為力喇...』唔好搞我啦...珮琳個阿哥...唔係話唔好既...但...總係唔夠成熟咁囉...
你睇佢細妹話佢而家仲俾妹妹仔玩梗就知啦...
「喂～唔好咁啦～男神都結左婚～你係時候要開始新既路途架喇～等等先...」珮琳一邊交張點菜紙俾服務員，一邊撳手機...
「係咯～」Stella認真咁點一點頭，「有陣時唔踏出一步...你係唔知前面有人等緊你架～」
唔...珮琳同Stella都講得岩既...
始終，佢地兩個而家都係沐浴喺幸福既愛河之中...
仲要就快淹死嗰隻...
之不過...
『男神結唔成婚…』事實總係與推算有出入...
「下？你之前唔係話你男神要結婚架咩？」Stella既反應比較大。
『嗯...聽講佢既未婚妻悔婚喎...』所有野都係聽返黎...
「等等先...」珮琳放一放低電話後，諗左一諗，「你係話，你男神既未婚妻悔婚？」
『嗯...聽係咁聽啦...』我都唔喺現場...
「發生喺結婚當晚？」珮琳疑惑咁問一問...
『好似係…』聽係咁聽啦...
「喺晚宴既時候？」珮琳再疑惑咁問一問...
『好似係…』聽係咁聽啦...
「唔係咁橋丫嘛…」珮琳驚訝咁諗左諗...
『下？』
珮琳靜左一靜，又諗左一諗...
「喂～唔好講D唔講D～扮晒懸疑咁啦～有咩咁橋丫？」Stella搖一搖珮琳隻手...
『喺咯喺咯！有咩咁橋丫？』我都搖一搖珮琳隻手...
直覺上...我總係覺得...有大事公佈！
「等等先...」珮琳又拎起手機，睇一睇，又撳左幾下，「個新娘係唔係姓郭架？」
『我唔知丫...我只係知男神叫佢做迦迦...』我只係見過佢一次...Chris係咁樣介紹佢...
至於姓乜...好似有提過...但...我又點忍得住痛，將情敵既資料放喺心入面呢？
「唔...」珮琳再諗左一諗，撳左幾下手機，「你男神姓乜架話？」
『歐陽！』一個好型既複姓！
「唔...」珮琳又再諗左一諗，撳左幾下手機，「咁就應該係喇...」
「應該係D乜丫？講清楚D啦～」Stella比我更心急！
『係咯係咯！唔好故弄玄虛啦！你識得男神架？！』直覺話俾我知，珮琳係知道男神同佢未婚妻既事！
「唔...」珮琳擰一擰頭，「識就唔算得上識...只係聽Timothy講過，上個星期出席佢朋友既婚宴，發生左D好爆既事...」
唔係真係咁橋丫嘛？
『Timothy識得男神？男神係Timothy個Friend？』世界唔係真係咁細丫嘛？
珮琳擰擰頭：「Timothy識得既係新娘子...」
珮琳既男朋友...識得...新娘子？！
「唔係真係咁橋丫嘛？」Stella碌大對大眼睛。
「係囉...真係估唔到又會咁岩得咁橋...」就連珮琳自己都有D唔係好敢相信。
『咁你嗰晚有無去到丫？知唔知究竟發生左咩事丫？』我比較想知內情！
「嗰晚我無去到丫...」珮琳擰一擰頭，「只係聽返Timothy講，話佢個Friend...即係新娘子...突然拖住伴郎走左去...」
呢一點，我之前喺阿Ling既手機裏面條片都有睇過...
「下？！個新娘子拖住個伴郎走左去？！佢拖錯人咋嘛？！」Stella繼續Keep住碌大對大眼睛。
「一定唔會啦！你係唔係搞爛Gag丫？蘇穎霖！」珮琳冷眼望一望Stella，「聽返Timothy講，好似話新娘子同伴郎之前係讀同一間中學...」
『即係話佢地喺好耐之前就已經有野？』我既第六感又突然湧現！
「咁就真係唔知喇...不過佢地翻睇左回憶片好幾百次，由佢地有一齊出現既中學相中查探，又唔覺得佢地嗰陣時有野喎...」珮琳疑惑咁擰擰頭。
唔係由中學生涯開始既？
「不過Timothy察覺到...新娘子喺中學年代係笑得最甜、最自然、最燦爛...過左中學年代之後，新娘子眼裏總有一種...一種...」珮琳諗左一諗...
「一種咩丫？」Stella好有興趣咁追問...
『係咯…一種咩姐？』我心裏總有幾分緊張...
「唔識講～」珮琳伸一伸脷...
『車！』我同Stella同時作出相同反應！
「咁Timothy係咁講架嘛～」一講起Timothy，珮琳又嘴角含春咁既衰樣...
『仲有呢仲有呢？咁知唔知Chris...新郎佢點丫？有無好驚訝...唔開心...傷心...失落...崩潰？！有D乜野異樣？』我都係比較在意Chris既情況...
「新郎…你既男神...我都唔係好清楚丫...雖然話...Timothy同你個男神係讀同一間中學...但佢地都唔識既...真係唔多清楚喇...不過Timothy就話，新郎遇上呢種情況，竟然出奇地冷靜！而且仲可以好好咁親自處理整個晚宴...收捨殘局！有D匪夷所思...」珮琳認真咁諗左一諗...
「嘩…遇到呢D事都仲可以咁冷靜？Carol...你究竟愛上左一個咩既人丫？」Stella一頭問號咁望住我...
『唔...我都唔知點講好...呢個星期...男神照上返工...照上帶住親切既笑容...照上自自然然...照上關心我地每一個同事...照上...照上...好似咩都無發生過一樣...』我一路講，腦裏面就一路閃出Chris既笑容...
Chris喺呢一個星期，真係同悔婚事件發生之前完全無分別...
都係一個好好既上司...好好既同事...好好既...男人...
「照咁睇...」Stella一面認真咁打量左我幾眼，「都未嘗唔係一件好事喎...」
『唔？點解咁講呢？』Chris呢種情況，我總係覺得佢係有D...失常...
「Stella講得岩丫～而家既情況...對你黎講...應該可以稱得上係有利...」珮琳望住Stella點點頭。
『有利？』對我黎講？
「嗯～」Stella點一點頭，「你唔係好愛你既男神架咩？本來已經跌入棺材既男神，而家突然由墳墓爬返上黎...呢個仲唔係機會咩？」
『機會？』點解我會覺得眼前天真無邪既Stella，突然有D鬼鬼地咁既？
「無錯喇～」珮琳點一點頭，「呢個好明顯就係一個乘虛而入既大好機會黎啦～」
『乘虛而入？』咪住先...點解我會覺得就連眼前高貴大方既珮琳都鬼鬼地咁既？
佢地兩個係想話...
『趁男神情傷之時...向佢表露心意？』
「緊係啦～仲駛問？！」Stella同珮琳異口同聲咁回答...
咁衰架！趁人地大受打擊，走去乘虛而入...
唔係喎...諗真D...Stella同珮琳都講得幾有道理...
本來已經絕望既心，而家又重燃希望之火。
之不過...
『講就易咯...但要點表白先得架？』唔通兜口兜面同人講“我鍾意你”咩？
女仔黎架嘛…好唔要面姐...
「咪住先...講開又講～我好似聽過曉揚講過有個叫...」Stella諗左一諗，「情聖既人...話可以教人點樣表白架喎～」
情聖？
「依？我都聽Timothy講過...」珮琳又諗左一諗，「有個自稱情聖既人好似話咩咩...咩...所有情困都可以解開架嘛～」
可以解開情困既情聖？
「好似係丫～好似係丫～嘩！終於有野食！食野先～」當服務員放低生勾勾既刺身後，Stella等唔切咁拎起對筷子...
「契弟食得摩～我都唔執輸～」珮琳亦都拎起對筷子夾刺身...
出自兩位好姊妹口中既情聖...究竟係何方神聖？