《情困之時，我遇上了自稱情性的情聖》: [Case 01－毒男女神] PART 14
一大班人圍埋一齊燒下燒下，傾下傾下～
除左阿雪同Cyrus之外，其餘在場既七女六男我都唔認識。
見係有見過下既～喺學校裏面～但好多就連叫咩名都唔知...
無計啦～好似我呢D毒撚，平日喺學校唔係上堂，就係打波...
除左自己班同籃球隊之外，好少話識下其他同學...
就算有喺球場上交過手，都唔會無啦啦問人叫咩名...
男仔問男仔叫咩名喎...This Post Is GAY！
雖然話個個都唔識，但佢地好似總會望住我陰險地偷笑...
係我既錯覺？
點解我硬係對佢地幫我同阿雪表白既大計無乜信心咁架呢？
之但係...說話又唔可以咁講既...
『D綿花糖燒好喇～睇熱喎～』我將燒好既綿花糖都遞到去阿雪面前。
「唔該晒～D綿花糖可以燒到外脆內軟咁真係好得意～而且仲好好味添～」坐喺我身邊既阿雪一邊食我幫佢燒既綿花糖，一邊咪咪嘴咁笑～
望住近在咫尺既阿雪...真係好似一個細路女～
可以同阿雪坐得咁近，當然就有賴一班豬扒同毒男既精心安排啦～
佢地一早就唔聲唔聲咁坐定定燒野食～
留返我身邊一個位俾阿雪～
阿雪自自然然不期然咁就入左局喇～
我地咁樣做係唔係好衰？
無話衰唔衰既～當事人都唔知～
如果話當事人察覺到既話，咁就真係衰左D～
但又如果阿雪係察覺到，而唔出聲扮晒傻咁照入局既話...
咁係唔係即係默認接受我地既精心佈局？
「其實綿花糖係點燒架？點解我次次燒親都會著火既？搞到我都唔敢再燒...但又好鍾意食喎！」阿雪谷一谷起塊面豬登望住舊綿花糖...
阿雪呢個樣...真係好可愛～
而家既阿雪，總係有一種...好似細路女扮大人咁...
有少少成熟既氣質，但又帶幾分稚氣～
呢種氣息...總會令男人困惑...
「喂喂～做乜又眼甘甘咁望住人丫～」阿雪又喺我面前揮揮手...
『無無無…我...我諗梗點同你...解釋咋嘛～』我既靈魂又喺不知不覺之間俾阿雪吸走左添...
「係咯～點解既點解既？」阿雪好有興趣咁追問...
『ER…其實我都唔知點解...但如果你鍾意既話，我可以...每次都燒俾你食丫...』我認真咁望住阿雪雙眼...
阿雪對眼...好大...好有神...而且仲好迷人...
阿雪眼定定咁望左我一陣：「你要應承我幾多野先夠丫～傻瓜～」
我...仲要應承你幾多野先夠？
我...真係已經應承左你好多野喇咩？
咁...我又做左幾多樣？又做到幾多樣呢？
「你係唔係會再燒俾我食架？」阿雪一副期待既眼神望住我...
『當然...當然～』我急不可待咁叉多四粒綿花糖！
用心咁燒下燒～燒下燒～
我要為阿雪燒出最外脆內軟勁得意既綿花糖！
「你試唔試下我燒既雞翼丫？」阿雪遞一遞佢手上既雞全翼。
『嗯～好丫好丫～』我急不可待咁放入口中～
「睇熱丫～」阿雪相當溫柔～
『唔熱唔熱～』就算熱死都抵啦～
「好唔好味？」阿雪以期待既眼神打量一下我。
『好味好味～好甜喔～』望住甜美既阿雪，食乜都係咁甜～
「嗯～咁就好喇～你知道嘛～唔係好多人鍾意食雞全翼…所以好多時去BBQ都唔會買雞全翼…好彩今次有買到～仲要有咁多添～可以慢慢嘆喇～」阿雪興高采烈咁繼續叉雞全翼黎燒～
『係咩？識得食緊係食雞全翼啦～我每次都會買架～』我緊係知你鍾意食啦～我好留意你呢～
「係咩？你真係每次都會買咩？之前無我出席既BBQ...」阿雪放一放抵手上支叉，認認真真咁望一望我...
ER…點解阿雪會咁問架呢？
呢條問題...內裏好似充滿...猜疑？
「終於遇到一個同我一樣咁識食既人喇～以後都唔怕無雞全翼燒啦～」阿雪又好樂天咁笑起上黎...
『嗯～以後都有得食好似蜜汁雞全翼咁甜既雞全翼喇～』阿雪...喺任何時候，任何地方，永遠都散發住樂天既氣息呢～
「嗯嗯～」阿雪帶住微笑點點頭，「汽水呢～汽水呢～有D口渴～」
『喺發泡膠箱入面雪梗...等我幫你拎丫～』我立即手快快咁，喺個發泡膠箱入面拎出罐百事，『嗱～』
我記得阿雪喺Instagram入面Post過張相，話過鍾意飲百事多過可口可樂～
所以頭先同Cyrus買野飲既時候，我指明要買多幾罐百事～
「唔...該…」阿雪雙手接過我罐百事之後，點一點頭...
阿雪個樣...好似有D困惑咁既？
唔通係我記錯左？
唔通阿雪唔鍾意飲百事？
『百事唔岩你口味？』我亦都帶上困惑既面容，問一問阿雪...
「唔～唔係丫～我鍾意飲百事多過可口可樂...」阿雪擰一擰頭，甜絲絲咁笑一笑。
『嗯～仲有好多架～一定夠你飲架～』我都話我唔會記錯架啦～
「哈哈～」阿雪掩一掩住個嘴仔大笑幾下，「你想飲肥我咩～」
我打量左阿雪幾眼...由頭到胸...由胸到腰...由腰到大脾...由大脾到小腿...由小腿到腳板...
『乜你會肥架咩...』我認真咁推測過後，點睇阿雪都係D油浸都唔肥既大美人...
天生麗質難自棄丫嘛～
「好難講架～一陣真係突然暴肥...無人要就大件事...」阿雪谷一谷起塊面豬登，擺一擺動身體...
『點會呢點會呢？我相信你就算係突然暴肥，都一定好可愛...好多人愛架！』阿雪變成點，都係咁吸引...咁迷人！
「嘿嘿～口甜舌滑～你都幾識氹女仔架喎～唔怪之得，佢地話你出名啦～」阿雪行返去爐邊...
我本來想立刻澄清我唔係識氹女仔...
我想同阿雪講，我所講既全部都係真心話...
但我更想講既係，佢地話我出名既原因，係因為佢地知道我愛你...一直都愛你...一直都好愛你...
我愛你愛了很久...
可惜既係，縱使全世界都察覺得到，你都仍然未感覺到...未感覺得到我對你既愛有多深...有多重...
“世上最遙遠的距離，不是生與死的距離，不是天各一方，而是我就站在你面前，你卻不知道我愛你。”
係你無心去察覺？定係假裝不知道？
我不知道...我不知道...
我只知道更可惜既係，我望住你既背影，一句說話都說不出...
我們還有多少時間錯過？
我們還有多少機會錯過？
到最後...彼此可否不要錯過？
燒左好幾個鐘後，大家都食到飽～飲到飽～吹水吹到飽～
Cyrus話喺刺激又緊張既遊戲開始之前，大家都係先去返個廁所，放低幾両先喎～
我本來就唔急既，但Cyrus係都要話我急，仲強拉左我入廁所...
「嗱！我地已經準備好晒架喇！等等我地會玩一個叫尋寶遊戲既遊戲～兩個人一組，分組既時候你記得出包就得架喇！」Cyrus一邊企喺尿兜前面震下震下，一邊講...
『點解個遊戲名咁柒架呢？又點解我一定要出包呢？』我仲未好清楚個計劃係點喎...
「個遊戲名柒唔柒都唔係問題！最重要係Work！唔通玩True Or Dare咩？個名係型丫～但次次都用呢招示愛，玩到爛啦～而點解要你出包...你無聽過架咩？」Cyrus諗左一諗，擰個頭過黎望一望我...
『有聽過D乜丫？』我應該要聽過D乜丫？
「根據弗洛伊德所講，女仔玩包剪揼既時候，潛意識之下都會想出包包住人地個揼...就好似用自己既陰道包住男人既陰莖一樣...」Cyrus好認真咁望住自己條蟲仔點一點頭...
『係唔撚係架？』弗洛伊德真係有咁講過架咩？
「聽就係咁聽返黎啦～係唔撚係你就唔好撚理～總之我地已經分好晒，除左你之外，無人會出包架喇～而我地亦都好肯定阿雪會出包既！咁你地就可以照原定計劃同一組喇～」Cyrus Fing一Fing自己條蟲仔之後，拉返好條褲鏈...
『OKOK…咁跟住呢？』真係咁簡單就令到我同阿雪一組，跟住既劇情發展又會係點呢？
「分好晒隊之後，我地就要喺黃金海岸嗰邊，搵出阿晨同阿儀預先放好左寫有“阿雪生日快樂”既扭蛋～共有十五個～代表住我地對阿雪既祝賀～邊隊搵得最多就贏～贏左就有阿雪既香吻～」Cyrus一邊洗手一邊講。
『屌你咩～黃金海岸咁大，要搵D扭蛋出黎會唔會太難丫？仲有喎...萬一俾人執左…又或者俾D清潔阿姐掃走左咁點算？仲有阿雪都有份玩架嘛！佢臝左咁點丫？唔通要佢自己錫自己丫？』我冷眼望住Cyrus...
「屌你咩～你唔係真係咁戇鳩以為我地真係有整到D扭蛋呀嘛？我地既目的都唔係要阿雪既香吻～我地就係要你同阿雪單獨相處咋嘛～你唔係真係戇鳩成咁丫嘛？更何況，阿雪都會諗“如果自己贏左，都只係要錫你一個姐...好過錫兩個毒撚丫...”係唔係先？」Cyrus用隻濕淥淥既手搭一搭我膊頭...
『縮開你隻手呀屌你！』我一手Fing開Cyrus隻手，『OKOK...當你講得通喇...咁跟住呢？』
「跟住我地就會立即出發！一個二個都跑去出口！呢個時候，你要扮晒處變不驚咁既樣！同阿雪講“識得行緊係由沙灘嗰邊行過去啦～”」Cyrus扮晒蟹咁點點頭。
『我唔駛扮都係處變不驚架囉好唔好？』唔好講到我成個廢柴咁得唔得？
「OKOK～呢D細節野好死架姐～最重要都係帶阿雪行去沙灘嗰邊！」Cyrus再搭一搭我膊頭...
『跟住呢？』細節野就唔好講咁多啦！講重點啦！
「你就帶住阿雪喺沙灘上，沿住海邊一直向住黃金海岸嗰邊行...一直行...我地已經整好左個心心坑架喇！而喺你地去到之前，我地就會加埋白電油落去！你地一行到去，就照我之前所講咁樣，拎出火機，點著佢！阿雪喺呢個時候，一定好驚訝！你就捉住佢膊頭，同佢講“阿雪，我暗戀左你五年喇...我真係...好愛你”！」Cyrus雙手捉實我膊頭，情深深咁同我講...
『係唔係真係得架？』雖然Cyrus夠晒情深深，但我對佢就無乜信心...
「屌鳩你！都黎到呢步喇！你唔係咁都信唔過我地丫化？定係你信唔過你自己丫？」Cyrus拍一拍我塊面...
我...信唔過我...自己？
我...一直...
『嗯...我明喇！』我一直都係...信唔過我自己...
但...而家唔可以再唔信自己...
唔可以再錯失...機會...
錯失同阿雪一齊既機會！
「嗯！咁上路喇！好兄弟！」Cyrus拍一拍我心口，轉身步出廁所。
上...路？！
讀左咁多年書，有無D好D既動詞架...
出到去，大家都已經準備好～
Cyrus好快咁講解一次遊戲規則～
而阿雪亦果然同意喎！可能正如Cyrus所講，阿雪覺得如果自己贏左，都只係要錫我一個...好過錫兩個毒撚...
又或者好彩D，同到個女仔一組...錫個好姐妹都唔係好蝕...
「包...剪...揼！」
而更出奇地，阿雪真係出左包！
唔通…弗洛伊德講既野真係岩既？！
女人...天生就係想...用自己既陰道...包住男人既陰莖...
如果可以俾阿雪既陰道包住...我條巨棒...
「好！出發！」一班人照住原定計劃，頭也不回咁跑去出口處。
正當阿雪都想起步之時...
『等等...』我捉一捉住阿雪隻玉手...
「嗯？」阿雪回一回頭，望一望我...
『識得行緊係由沙灘嗰邊行過去啦～』我扮到處變不驚...我本身就係處變不驚！
「下？沙灘嗰邊行到過去架咩？」阿雪一頭問號...
『得～緊係得啦～』係喎...死喇...其實我都唔知得唔得...只係聽Cyrus點...
一陣行唔到過去...咪好柒？！
唔係喎...行唔行到過去黃金海岸都唔係問題...最重要都係行到去個心心坑道姐～
「哦～咁快D行喇～唔可以俾佢地贏架～」阿雪立即向住沙灘方向出發！
睇黎阿雪都有D心急...
係因為怕要獻吻俾毒撚？
定係想可以早D獻吻俾我呢？
我咁諗...又會唔會過份自大？
都係唔好諗得咁複雜...呢個遊戲...根本唔存在...
而阿晨同阿儀就坐定定，向我偷偷打左個眼色同俾個LIKE我...
我望住佢地點點頭...嗯！多謝你地！我係唔會辜負你地既心血！
我一定要...表白成功...
我一定要同阿雪一齊！
夜空明月影照下，我同阿雪喺沙灘上行下行下...
沙灘上面得幾個人...幾對情侶...
幾個小朋友喺沙灘上同爸爸玩沙～
媽媽都叫爸爸唔好同小朋友玩得咁癲～
大概世上每一對父母都係咁樣～
爸爸總愛盡情玩樂～媽媽總係千般關心，萬分擔心～
而情侶們都總愛坐喺沙灘上，卿卿我我...竊竊私語...
或者只有最深沈既夜幕下，先能夠坦誠地打開心窗。
聽住海浪聲，同阿雪慢步沙灘...
不時與阿雪膊頭撞膊頭...總有一份...戀愛既感覺...
兩小無猜既歲月，輕微既肌膚之親都有好大既FF空間...
總係會猜度下對方既心意...
點解俾我咁撞下撞下都好似唔在意咁架呢？
係唔係都同我一樣，想可以觸撞下對方...感受一下對方既體溫？
奇怪...真奇怪...
而更奇怪既係，阿雪既步伐明顯放慢...
越行越慢...越行越慢...
慢慢喺沙灘上慢步...好似已經唔再趕住去贏個遊戲...
無錯喇...我地表面上唔係要贏個遊戲架咩？
點解阿雪好似唔多著緊咁架呢？
由幾時開始？
又係由邊道開始？
「好舒服呢～」有一段時間無出過聲既阿雪，終於開口。
『唔？』但我唔係好Get到，阿雪所講既舒服係指邊Part...
「吹住海風～聽住海浪聲～慢步沙灘～真係好舒服～」阿雪閉起雙眼，深呼吸一口...
『喺寧靜既環境，浪漫既氣氛之下漫步，真係好舒服～舒服到好似...時間停頓一樣～』特別係同深愛既人一齊～
如果時間真係可以永遠停留喺呢一刻既話...你話幾好呢～
「乜你真係想時間停頓咩？」阿雪古古惑惑咁望住我笑一笑…
點解阿雪會咁問架呢？
『你唔想可以停留喺咁舒服既時刻咩？』我疑惑咁望一望阿雪...
「唔...點講好呢...應該話只有時間一直向前流動，我地先會遇到一次又一次...突如其來既驚喜～」阿雪諗左一諗，點一點頭。
只有向前走，先可以遇到設置喺前路既驚喜？
「而我地只需要捉緊最美麗既時刻，按下快門，將所有難忘與不難忘的，全數攝入記憶卡裏...我地既腦海裏...就已經足夠～」阿雪再點一點頭...
留住最美一刻...
「我地一定要一直向前行...向前行...喺有生之年，搜集更多更美更難忘既影像...回憶...一次都唔可以錯過～」阿雪向我展露甜美既笑容...
嗯...阿雪講得好岩呢...
唔可以錯過...
其實阿雪已經唔係第一次講佢呢一個理論。
我亦相信，呢一個就係阿雪既宗旨。
留住最美一刻...唔可以錯過任何一刻...
而呢一點...我亦都察覺到自己已經被阿雪感染...
我都開始鍾意拎起手機，影低最美麗既時刻。
人地話，兩個人一齊耐左，就會互相影響，互相感染。
但我都未同阿雪一齊，就已經俾佢改變梗...
阿雪真係影響得我好深呢～
我同阿雪一路行，一路好好享受浪漫既氣氛。
我地都行左好耐下，真係行到差唔多到黃金海岸...
但都仲未遇到Cyrus話預先整好既心心坑...
死喇...會唔會係已經行過左都唔知？
唔係喎…Cyrus話沿住海邊行就一定見到架喇喎...
定係俾D仆街死毒撚見到咁撚有情調，葡萄起上黎狠下毒手，摧毀左佢...
屌你唔係咁柒呀化？！
死喇...搞到我個心忐忑不安...如果真係行晒成個沙灘都遇唔到...咁點算？！
有無Plan B呀？！
就喺我六神無主諗梗有無Plan B之時...
「嘩～好大個心心坑丫～邊個男仔咁有心，整咁大個心心氹女仔丫？」阿雪停左落黎，望住沙灘上既大型心心坑！
我望一望...嘩！你地班友真係好有心機...個心心坑都真係又大又工整！
雖然話我都俾個心心坑嚇左一嚇，但呢個時候絕對唔可以發呆！
呢個時候，我第一時間喺個褲袋道拎左個七仔火機出黎！
行前兩步，跪喺個心心坑面前，撻一撻火！
“颼”一聲，火就沿住個坑一路遊走...一路遊走...直到圍出一個心形火坑！
成個心形火坑都發出陣陣藍色火光...
我再回身望一望阿雪...
阿雪明顯咁俾個心形火坑嚇到呆左...
望住阿雪呢個驚訝表情...我知道...我知道...機會黎喇！
我立即行到去阿雪面前，用雙手捉實佢肩膀：『阿雪...其實我...一直都...我一直都...一直都好鍾意你...鍾意左你好耐好耐...』
此時既阿雪聽到我話“鍾意”呢兩個字，先識得望住我...
『我一直暗戀左你...暗戀左你好耐...好耐...我...我...我愛你...』我用盡所有真誠，望住眼前既阿雪...
阿雪雙眼有D遊離...有D飄忽...而且仲不知不覺咁...向後...向後...向後！
就喺呢個時候，阿雪向後退左兩步之時，唔知係唔係Click到D野...
「嘩！」一聲後，喺夜空明月影照下，我將阿雪推倒喺沙灘上！
喺四周無人既沙灘上，我雙手壓住阿雪既膊頭，仲要露出條白色Bra帶...
男上女下咁望住阿雪一對不安、驚訝、甚至係恐懼既眼神...
個嘴仲要O到好似平時用開嗰隻初音Mary咁...
我仲感覺到，阿雪既呼吸開始急速...
「嗄...嗄...」阿雪胸前一對乳房起起伏伏...
我開始有D後悔...後悔向阿雪講出嗰三隻字...
阿雪既面容話俾我聽，佢唔單止係驚訝...仲係好撚驚！
呢種表情就好似話俾我聽：「唔好搞我呀！」
就好似判左我死刑一樣...
無喇…無喇…
點解丫...點解我要咁衝動丫...點解我要向阿雪表白呀？！
我唔同阿雪表白...都仲叫可以喺阿雪身邊...可以陪伴阿雪經歷難忘與不難忘...驚險與不驚險...美麗與不美麗的...
而家...無啦...無啦...乜撚都無喇！！！
就喺我仲喺道自怨自艾之時...
「嗯...嗯...哈哈...哈哈哈～」阿雪笑起上黎...
阿雪...阿雪笑...阿雪笑？
「你終於肯講出口啦咩？」阿雪帶住微笑望住我...
『我...』終於？！
「唔...見你都幾有誠意...好啦～就當俾次機會你啦～」阿雪甜絲絲咁點一點頭...
俾...俾次機會我？！
「但係...你仲想壓住我壓到幾時喔？」阿雪推一推我...
『對對對...對唔住丫！』我立刻彈返起身！
「仲唔扶返我起身？係唔係仲要我教你丫？」仲瞓喺沙灘上既阿雪向我伸出雙手...
『哦哦哦...』我立即溫柔咁拉阿雪起身！
阿雪拍一拍身上D沙之後，向我伸出手：「拖住我啦～男朋友～」
『哦哦...』我呆呆滯滯咁拖住左阿雪...
阿雪隻手...好滑...好暖...
阿雪仲叫我做...男朋友...男朋友！
真...真的嗎？！我同阿雪拍拖喇！
但...點解好似咁突然咁架呢？
「做咩咁困惑咁既樣丫？」阿雪拖住我，打量一下我...
『ER…我係唔係發梗夢...好似咁突然咁...』你知啦...通常呢D時候...眼前既影像都會慢慢變成灰色...粉碎...飛散架嘛...
「哈哈～你唔係已經暗戀左我五年喇咩？五年喇...可以暗戀一個人五年...已經唔突然啦～」阿雪輕鬆帶出重點...
係…五年喇...好漫長既五年喇...但...
『點解你會...接受我？』當我問完呢條問題之後，我覺得自己問得好戇鳩...
阿雪聽到我咁問之後，停左落黎，打量左我幾眼：「或者係因為...某D時候...某D角度...你都真係幾似...有幾分相似...」
幾分相似？
雖然呢一刻我唔係好明阿雪既意思...但...
「我地行多幾圈咯～男朋友～」阿雪繼續拖住我，繼續喺夜空明月影照下，繼續喺四周無人既沙灘上，繼續喺浪漫既氣氛，繼續喺美麗既時刻，繼續慢步...繼續慢步...
呢一刻...我覺得...原來要同自己深愛既人一齊，並唔係想像中咁難...咁複雜...
只要有心...只要你敢踏出一步，向你所愛既人講出你既心意...
你就可以同你所愛既人開始了...
我同阿雪...開始了。
Case 01 ｜ Close File