《情困之時，我遇上了自稱情性的情聖》: [Case 14－我的米奇] PART 25
攬住劍熊喺張大床上碌下碌下...
又用對豐乳壓劍熊落床...
我個心好忐忑不安...
由尋日...到今朝...都係忐忐忑忑咁...
已經過左一個晚上喇...
飛揚BB同羅海月已經喺山上過左一晚喇...
成晚流流長...都唔知嗰個魔女對飛揚BB做過D乜添架...
都唔知飛揚BB會唔會俾佢食左添架...
死啦死啦...越諗就越唔對路...
死啦死啦...會唔會連渣都無得剩架...
我搓下搓劍熊塊面：『早知我就搵隊人跟住佢地上山...有乜事都可以保住飛揚BB安全丫嘛…』
唉...而家就係得我攬住劍熊喺張大床上碌黎碌去...
鬼咁擔心既咁既樣...
有乜用呢...
我就繼續攬下劍熊...又用對豐乳壓下劍熊...又用對大髀夾下劍熊...又用對腳踩下劍熊...
其實自從帶左劍熊返黎之後，呢幾日我都係咁玩隻劍熊～
尤其係喺夜晚瞓覺覺既時候丫～朝早起身賴床既時候丫～諗起飛揚BB既時候丫～悶既時候丫～我都會玩隻劍熊～
無返工有時真係會幾悶～
無飛揚BB陪住喺身邊既日子就更加悶～
所以我都會攬住劍熊～就好似攬住飛揚BB咁～
可以令我個心定落黎...
個心定落黎...
我而家個心就真係好難定落黎...
我真係好怕...好怕羅海月會對...已經對飛揚BB做過D乜...
我好怕...佢地已經喺山上...舊情復燃...
羅海月個心點諗我就唔知...
但飛揚BB個心...我就好清楚...
飛揚BB有幾愛羅海月...真係隔住個Mon都感受得到...
好話唔好聽只要羅海月問飛揚BB一句：「我地不如重新開始咯～」，飛揚BB一定會仆住去Say Yes！
到時就真係Mola Mola…
『唉...無喇無喇...無喇無喇...你話係唔係真係無喇無喇呢...』我舉起隻劍熊...Fing下Fing下...
只見成身都插滿劍既劍熊面有難色咁既樣...
就好似睇到我而家既面色咁既樣...
『唉...都係起身梳洗下...冷靜下好過啦...』我就Dom一Dom隻劍熊落床...自己就行去梳洗...
心亂如麻...心事難下咁梳洗下...
就連褲都無著...只係著住件白色大Tee諗住煮個早餐...
煮下煮下...諗住飛揚BB...同羅海月喺山上...煮下煮下...
唔知佢地喺山上野餐…會唔會好浪漫呢？
會唔會浪漫到撻著呢...
死啦死啦...一男一女喺山上野餐...真係好浪漫架嘛…
仲要係夜晚滿天星星包圍之下...朝早仲有日出睇添...
玩下手見到個雲海就暈晒浪咁...
好易出事架喎！！！
如果真係咁易出事...都已經出左啦...
Mola Mola…真係無得救喇…
就好似我而家喺開放式既廚房煎緊隻雙蛋咁...燶晒無得救喇...
真係燶到成舊炭咁...
兩塊火腿又係...兩條腸仔都係...
燶晒...黑晒...
黑炭早餐咁既樣...
我咁既狀態根本就唔應該走去煎野食...
都係煮個公仔麵食算...
之但係我諗下煮下...諗下諗下...諗下諗下都唔記得左自己煮緊公仔麵...
煮到淋晒...發脹晒...
不過算啦...好既一餐...唔好既又一餐...無心情食野...食乜都係咁架啦...
我就沖埋杯咖啡...隨便食個公仔麵...
但當我飲一口咖啡...
『苦到澀...』我皺晒眉咁...
係唔係心情影響味覺？
因為我而家覺得好苦...所以就連飲杯咖啡都好似苦到澀咁？
可能係啦...應該係啦...無關係啦...無所謂啦...
咩都無所謂啦...我而家只係想...飛揚BB可以平平安安咁返黎咋...
我就隨隨便便咁食完個發水公仔麵...再飲埋杯苦到澀既咖啡...又攬住劍熊瞓返喺張大床上...
就喺我拎劍熊身上D劍仔...插下插下...又隊下隊下劍熊個身體之時...
“叮”...
係WhatsApp？
我碌到去床邊...拎一拎起部電話...
『係飛揚BB呀！！！』我勁開心又勁興奮咁嗌出黎！
我立刻解一解鎖～
“Emma～我返左屋企喇～”
飛揚返左屋企喇～
“平安嘛？好玩嘛？”
我已經勁心急咁問下飛揚BB平唔平安～
因為我真係好擔心...好擔心...
“叮” “OK丫～影左好多靚相～有機會俾你睇下丫～”
影左好多靚相...唔通真係純粹上山影靚相咁簡單？
“嗯～好丫好丫～期待睇飛揚大師既傑作～”
如果真係咁簡單就好喇...
“叮” “唔大師啦～新手上路～”
新手上路？哈哈～
“唔係丫～我睇過你之前D相～真係影得好靚～好有大師級既風範～”
飛揚BB又太過謙虛喇～
“叮” “多謝你丫～有你既欣賞，我已經好開心～係呢～你做緊咩呢？”
有我既欣賞已經好開心...
咁係唔係即係話我喺飛揚BB心目中係好重要架？
我又會唔會有D自High呢？
“叮” “等你返黎囉～”
你都唔知我又擔心又不安咁已經等左足足一日一夜喇...
“叮” “傻豬～有乜好等姐～係呢～同爺爺好返未丫？”
我一直都等緊你...係你唔知姐～
同爺爺好返未？
“咩好返未丫？”
我同爺爺有唔好過咩？
同爺爺...同爺爺...
呀！係喎！
“好返啦～好返啦～我地仲好過之前添啦～”
差D唔記得左我係夾埋爺爺扮嬲左爺爺呃飛揚俾我上佢道過夜添！
都怪我太擔心飛揚BB喇...
“爺爺話見你咁老實 將成副身家全部俾晒你～”
我好記得爺爺係有咁講過～
“將個孫女嫁埋俾你～”
仲話要將我嫁埋俾飛揚BB添～
“叮” “咪玩啦Emma～”
飛揚BB好似當我講緊力多廣告咁～
“哈哈哈～我講真架～我爺爺話你係老實人～幾欣賞你喎～”
講真～我都睇得出爺爺係幾欣賞飛揚BB～
唔係因為我深愛飛揚BB而欣賞飛揚BB～
因為爺爺睇人從來唔會俾其他人影響～
佢睇人...睇得好深入...好仔細...
係好既就欣賞～係唔好既...搵人買起佢都似～
“叮” “錯愛喇錯愛喇...”
飛揚BB有D內斂咁～
“得閒約個時間 同佢老人家飲個茶好嘛？”
有機會都想可以翹住飛揚BB去真真正正見一下爺爺～
“叮” “好丫好丫～約個時間丫～”
飛揚BB都好似好樂意咁喎～
“係架喇喎～我相信爺爺都好期待同你再次見面～”
我相信今次見面...應該會好和諧～有講有笑既～
“叮” “嗯～我都好期待丫～不過我而家想去瞓個覺先～琴晚喺山上瞓得唔好～”
琴晚喺山上瞓得唔好？
唔...同羅海月一齊喺山上...瞓得唔好...
“嗯～咁好啦～瞓好D喇～早抖喇飛揚～”
都係唔好諗咁多…都係唔好諗咁多…
“叮” “早抖”
為左令你好瞓D...
我瞓左喺張白色既床上面～攬住左劍熊～單起隻眼仔～𡁯長個嘴仔～假裝錫一錫劍熊～影一張相～
再將張相Send一Send俾飛揚BB～
就當係我喺你臨瞓前錫你一啖～等你好瞓D啦～
飛揚BB就去左瞓覺...
而我呢？
我就喺張大床上碌下碌下...
總係悶悶不樂咁...
究竟飛揚BB同羅海月喺山上除左影相之外...仲搞過D乜呢？
搞過D乜搞到飛揚BB咁攰呢？
始終都仲係未知道...
唔方便咁直接問清楚飛揚BB...
就連探下口風...都做唔到...
點好呢...我點先可以知道佢地之間既關係有無改變到呢？
有無回到當時...猶如情侶熱戀的那時呢？
我唔知...我乜都唔知...
我可以...點先知？
佢地兩個之間既事...就只有...佢兩個先知...
佢兩個...羅海月...
係喎！我可以問下羅海月架喎！
我可以直接問羅海月佢地兩個而家究竟係乜野關係！
之不過...羅海月又會唔會答我呢？
以佢咁有個性既性格...我走去直接問佢...咪又係俾個機會佢串我...
到時就真係面就人地俾...架就自己丟喇...
唉...
就喺我苦無對策...又攬住劍熊喺張大床上碌下碌下之時...
“And you don't seem to understand”
電話響...
我拎一拎起部電話一睇...
『羅海月？！』我驚訝咁大叫起上黎！
“A shame you seemed an honest man”
羅海月...羅海月竟然會主動搵我...
“And all the fears you hold so dear”
佢搵我做乜呢？
“Will turn to whisper in your ear”
會唔會係打黎向我...示威呢？
“And you know what they say might hurt you”
示威...係示威咁又點丫...唔通我會驚你呀？！
我咁大個女...從來都未驚過架！
我立即滑動解鎖：『喂！』
我呢一下喂有D大聲...
大聲都好似話左俾人聽我好驚...
「李家大小姐～你而家得唔得閒丫？」羅海月好輕鬆咁問一問...
『我...我得閒呀！點會唔得閒呀！搵我有咩事呀？』唔好講咁多！有乜野就開門見山！
「我想約你出黎見見面～唔知你想喺邊道見呢？」羅海月仲係從容自若咁問...
『就你屋企啦！你方唔方便丫？』正所謂輸人唔輸陣！直接深入敵陣！（我喺道講緊咩？）
「我屋企？無所謂丫～你鍾意既咪上黎囉～」羅海月直頭中門大開咁既樣...
『好丫！你等我！我一個鐘之內一定到！』又係唔係真係咁容易丫葉師傅...
「OK～唔使急喎～我會等你～」羅海月信心爆炸咁既樣...就好似一切都掌握之中咁...
『嗯...拜...』而我...的確係有D怯...
「拜～」
其實...都唔係有D...
我係好怯...
對住呢個羅海月...我好怯...好怯...
唔知點解...打從第一次見面...我對住佢總係有D怯...
羅海月既神情同氣息都唔係充滿霸氣既烈女...
相反...喺嗰種...氣定神閒...目空一切...
就好似話俾你聽...你所做既所有所有...都寫左喺佢手上本劇本裏面...
你...所做既...一切一切...都只係跟住佢劇本發展...
羅海月...就係一個咁高深...又可怕既...魔女...
難怪就連爺爺都話佢太厲害...我係無可能鬥得贏佢...
鬥唔贏...鬥唔贏...
既然鬥唔贏...而我而家又要走去佢屋企...我呢D係唔係就係請君入甕...自己送上門？
『唉呀...李家敏丫～李家敏～枉你英明一世～就係笨實一時～你叫我情何以堪呢～～～』
我喺張大床上再慨嘆多兩聲之後...都係快快手手換返套衫...準備出發...
免得俾羅海月察覺到我有所動搖...
我就換上一件飛揚BB最鍾意既黑色一字膊連身短裙...配上一對黑色平底涼鞋...
俾返多D信心自己！喺羅海月面前有返D戰鬥格！
『劍熊！你都會支持我架呵！』我再搓多兩搓劍熊塊面！
帶住勁緊張！又驚青既心情行去車房仔！
“咇”解一解鎖！再掀開鍘刀式車門！
坐一坐上架Metallic Blue色既Lamborghini Aventador LP 700-4 Roadster！
扣好安全帶之後，掀開紅色蓋，按落個發出紅色光既“START ENGINE STOP”字樣既黑色掣道！
“吼！”
氣勢！氣勢！
“依...”我一俾油，LP 700-4 Roadster就衝住去！
“吼～吼～”衝呀！
“吼～吼！”殺呀！
而家面臨大敵！衝鋒陷陣！唔可以退縮架！
我要俾嗰個羅海月知道...我李家敏係有幾厲害！
“吼！”我踩行晒油！
“吼～吼～吼～吼！”LP 700-4 Roadster一直衝！
“吼～吼～吼～～～”好快又黎到屯門...
“吼～～～吼！”好快就黎到羅海月居住既地方...
“吼！吼～吼～吼...”泊好架車...
上到羅海月住既樓層...
行到去羅海月屋企既門口...
『呼～』深呼吸一口...
“叮～噹～”手震震咁撳一撳個鐘仔...
唔使幾耐...
“咔”木門打開...
我隔住個鐵閘...再次望住呢個長有黑色既頭髮髮長過肩...平陰...嬌小既身段...雪白既肌膚有如夜空明月照人既羅海月...
「真係唔使一個鐘就黎到喎～睇黎你真係好心急呢～入黎先～」羅海月都係用上一對帶著點點哀愁既眼神...打開鐵閘...請我入去...
『我！我係守時...我係講得出就做得到...並唔係心急！』我跟住羅海月身後...行入佢屋企...
呢個羅海月...總係好似一眼就可以睇穿人地個心咁...
但佢自己呢...就總係好似唔會俾人睇得穿咁...
唔俾人睇得穿...
係唔係真係咁…
我係唔係...可唔可以...開始叫做...了解羅海月...呢個怪人？
「隨便坐～」跟住羅海月入左佢間屋之後，佢就行左去個開放式廚房...
我就八八卦卦咁...行一行埋去...行埋去部Mac機道...
部Mac機打開左...打開左...iPhoto...
一張又一張...好多好多張...星空...
好壯觀...真係好壯觀...
成個夜空...都係星光閃閃咁...
俾整個星空包圍住...擁抱住...
我而家只係望住D相...都可以感受得到嗰刻既浪漫...
真係好有感染力...
我唔係未見到D咁有感染力既相...
好似話…岳飛既作品...
我睇過唔少...
亦都好難忘...
之但係...而家見到羅海月既...真係有過之而無不及...
岳飛係攝影大師就話姐...
估唔到...羅海月都可以影到...大師級既作品...
「點丫？OK嘛？」羅海月拎左杯...咖啡俾我...
『OK丫...OK丫...』我呆下呆下咁接過羅海月杯...黑色咖啡...
係…黑咖啡...
「你都話OK呢～」羅海月莞爾一笑…
點解我會覺得...好似...俾羅海月陰左咁架呢？
『D相...係你同飛揚...上山影架...』我尷尷尬尬咁問一問...
「係丫～我同飛揚上山影既～我呢堆相...絕對影得好過佢～」羅海月好有自信咁點點頭，飲一飲手中杯咖啡...
『我就好有信心...飛揚會影得比你好...唔！』當我飲一口羅海月幫我沖既黑咖啡之時...
呢種味...呢種咖啡味...
甘而不苦...濃而不澀...
係一杯…令人印象深刻既咖啡...
我已經可以肯定...以後當我再飲咖啡...都會令我諗起...呢杯咖啡既味道...
羅海月...沖既咖啡...既味道...
「喺你眼中...飛揚做乜都係完美～」羅海月又莞爾一笑…
『係你睇唔上眼姐...』我有D醋意咁講...
「係咩…或者...」羅海月帶住絲絲笑意擰擰頭...
我唔係好了解羅海月所講既”或者”係或者D乜...
我亦都無打算問出口...
因為我知道...就算係我問出口...羅海月都唔會直接答我...
佢呢個人...將所有所有都收埋喺內心深處...內心深處...
呢種人...呢種將所有野都收埋喺內心深處既人...好似好熟悉...又好陌生...喺我身邊...好似有好幾個...
『你同飛揚...喺山上...只係影相？』我尷尷尬尬咁問一問...
我知我唔應該咁問...
我知我問得好唐突...
但我唔咁問既話...我個心總係會忐忑不安...
「唔係你覺得我地喺山上仲會做D乜？」羅海月對我莞爾一笑…
我都估到架喇...
我都估到羅海月一定會反問返我...
我都估到羅海月睇穿我心裏面諗緊D乜...
我早就俾羅海月睇穿晒...
就好似赤裸裸喺佢面前一樣...
「咁又真係唔止既～」羅海月諗下諗下...
唔止？！
飛揚BB同羅海月喺山上...真係唔止影相咁簡單？！
「仲有行下山啦～煮下野食啦～瞓下覺啦～聚下舊啦～解下心結啦～」羅海月又對我莞爾一笑…
解下心結？
我已經無理到佢地瞓覺係各自各定係一齊瞓...
因為我已經完完全全Focus左喺“解下心結道”...
「解下心結…我唔可以話...我已經幫佢解開心結...或者...要幫佢解開心結...最後一步...要睇你喇...」羅海月莞爾一笑…點一點頭...
最後一步...要睇我？
羅海月既意思係...叫我同飛揚BB表白？
我諗應該係...
我諗...羅海月講得出最後一步...就係要我同飛揚BB表白...
但真係會...成功嘛？
羅海月都會覺得...我同飛揚BB表白既話...就可以解開飛揚BB既心結嘛？
而羅海月做左咁多…咁多...
『你做左咁多野...想要幾多？開個價...』我喺個手袋仔裏面拎出本支票簿...
就當我唔想欠左你...
「哈～你地D有錢人真係...窮得就只有錢～乜都係用錢去做交換～」羅海月又莞爾一笑…
我地D有錢人...唔係用錢...仲可以用咩？
「要有錢既話...我有好多方法～所以你都係慳返啦～而如果你係唔想欠左我既話...」羅海月諗下諗下...「就答應我一件事～」
『隨便講！你要乜我都可以俾到你！』講到咁大仁大義...到最後咪又係講利益～
「答應我...要成為飛揚心中既青鳥...」羅海月用上笑面裏帶著點點哀愁望住我...
我望住羅海月呢個笑容...一時間俾唔到反應...
羅海月係想我...係要我...成為飛揚BB心中既青鳥？！
我...我...
『我應承你...』我點一點頭...
「嗯～」羅海月又再一次笑面裏帶著點點哀愁咁點點頭...
或者...或者羅海月呢個唔係要求...唔係請求...
或者...或者只係一個...渴求...
或者羅海月都睇得出...睇得出我心裏...
喺羅海月既屋企坐左一陣...傾多一陣...
「我諗我地唔會有機會再見～」羅海月送到我出門口...
『嗯...應該唔會再見...』無必要再見...
「記得你應承過我既野～」羅海月閂一閂埋道門...
『嗯...』我對住道木門點一點頭...
我知道...莫講話要取代你...要代替你...我就連做你既替代品都做唔到...
就連我著上飛揚BB最愛既黑色...亦都比唔上你...
你...先係飛揚BB最愛...
縱使係咁...我都已經決定左！
我已經決定左！
“吼～吼～吼～吼！”返屋企既沿途上，我都好有決心！
就算到我返到屋企...換好晒衫...食埋野沖埋個靚涼...我都好有決心！
今次去見羅海月，令我更明白爺爺嗰句”同一個心裏面有一個人喺道既人一齊既心理準備”...
因為...你俾到我...一種感覺...
係飛揚BB既感覺...
我終於明白...點解飛揚BB無可能將你忘記...
因為你就係飛揚BB喺呢個世界上...命中注定要尋覓既青鳥...
可惜既係...飛揚BB唔係你喺呢個世界上...命中注定要尋覓既青鳥...
世事...就係咁諷刺...
你係明白...你亦都知道...
所以你只可以渴求...渴求我可以成為飛揚BB心中既青鳥...
你係知道...你係知道我心裏面點諗...
你係清楚咁感受到...我無信心...無信心成為飛揚BB心中既青鳥...
但我應承得你...就算做唔到...都要做得好好睇睇！
我立刻拎起部電話...
打開WhatsApp...
喺飛揚BB既Chat Room裏打入“聽日 十一點 迪士尼見 不見不散！”
好有決心咁Send左出去之後...我大字形瞓喺張大床上...
『我要表白！！！』