《情困之時，我遇上了自稱情性的情聖》: [Case 14－我的米奇] PART 23

『每個人生於世上，總有一位天使喺你身後，保護住你，守護住你。』我情深意重咁望住飛揚BB...

你知道嘛…其實我一直都喺你身後呢...

「我諗我嗰位天使一定係一個路痴，蕩失左路LUU～」飛揚BB無奈咁笑笑口～

『係你唔留意姐！』我谷一谷起塊面豬登！拍一拍飛揚BB胸口！

我而家大大個喺你面前都留意唔到！



「哎丫...」飛揚BB慘叫一聲～

『好多時都係咁，只係顧住向前行，忽略左背後原來有一位天使望住你。十年...二十年...甚至更多更多年之後，到你驚覺原來一直有位天使曾經默默為你付出，到緣盡之時已經後悔莫及...塵世間最痛苦莫過如此...』我帶住一點點失落擰擰頭...

我一直都喺你背後默默付出...

直到而家...我忍唔住要喺你面前現身...

但你都仲係好似...好似留意唔到我咁...



「唔好睇咁多周星馳啦...睇得多會上腦架...」飛揚BB恥笑住我咁講...

『都唔係周星馳講既～係情性講...』我講到一半...掩住個嘴仔...

死...口快快噏左情性出黎添…

唔知飛揚BB知唔知邊個係情性添架...

「又係嗰個情性丫？乜人黎架？成日都講埋呢D以為好有道理既道理，迷惑人心！」飛揚BB嬲嬲地咁擰擰頭。



『你都有睇過佢個Facebook Page架咩？』我碌大對眼望住飛揚BB！

死喇...飛揚BB會唔會聯想到我搵過情性幫手架？

「無喎～我只係聽過我個細妹講過下咁咋喎...」飛揚BB諗下諗下咁擰擰頭。

『哦...』原來係阿Wing...

咪住先...係阿Wing...唔通...唔通阿Wing都有搵過情性幫手？

唔通...

「唉～總之就唔好睇咁多啦～」飛揚BB望一望住我～

『嗯嗯～你都唔好咁好奇喇～』我真誠咁點點頭！



千祈唔好咁好奇睇情性個Page～

「我絕對唔會對佢有興趣～」飛揚BB又真係好似無乜興趣咁...

如果真係無興趣就最好啦...

你知啦...情性最出名係咩丫？

除左出名似古天樂同吹得水之外，就係幫人解決情困...

如果俾飛揚BB知道情性係幫人解開情困...又知我有留意到情性...飛揚BB會唔會聯想到我搵過情性解開情困？

又會唔會聯想到Ashlynn俾帽佢戴...係同我有關架呢？



“咕咕”兩聲，我個肚仔響起上黎...

「你肚餓？」飛揚BB掃一掃我既秀髮～

『嗯嗯～嘻嘻...』我尷尷尬尬笑一笑～伸一伸條脷仔～

諗下諗下諗到肚仔餓添～

「同你落去食早餐喇～」飛揚BB又摸下摸下我把秀髮～

『嗯～不過...可唔可以俾我沖多次涼，梳洗一下先丫？我習慣朝早會沖涼...』我有少少尷尬...

「嗯～當然可以～我仲有D新既牙刷、面巾。我拎埋俾你～」而飛揚BB就好似好自然咁～

『嗯～唔該～』我起一起身～小心翼翼咁爬返落床～



「小心～」飛揚BB單手扶住我條小蠻腰～

『唔該～』飛揚BB真係好細心～

等到飛揚BB喺個櫃入面搵埋套全新既旅行裝清潔用品出黎～交到我手中之後...

『唔該～』我點一點頭，拎齊埋自己D衣物～轉身彈下彈下彈入廁所～

“滴滴滴滴滴滴滴滴”今次係第二次喺飛揚BB既廁所沖涼～

今次都比較自然～無再期待飛揚BB會突然忍唔住衝入黎～

成晚流流長瞓埋同一張床仲要攬都實一實醒左見到自己隻手喺我個豐乳上都可以無野發生過既話，你仲想期待D乜？



我都係好似平日咁平常心咁去梳洗～

好快就梳洗完～舒服晒～

戴返好個粉紅色Bra～著返條粉紅色底褲～再著埋件粉紅色碎花吊帶連身短裙上身～

打量一下自己全身～確保整整齊齊～

“咔”一聲響，我就拎住飛揚BB借俾我D衣物同清潔用品，由廁所行返出去～

飛揚BB行到去我面前：「D用品同D衫俾我得架喇～」

『唔該～』我含羞答答咁將手上既物品交返俾飛揚BB～

有好多人都話香港既男仔好粗心大意粗枝大葉咁～

唔識得照顧女仔～唔識得主動幫手～

講真同飛揚BB相處左咁耐，我又唔覺得港男真係咁差姐～

其實會唔會係香港既女仔要求特別高？

咁就不得而知喇～

始終港男港女呢個問題...唔係單單四十萬字知分曉～

「唔使客氣～我幫你吹乾個頭先～」飛揚BB將D物品放喺枱上，我就好自動自覺咁行左入飛揚BB間房～

我再一次大方得體咁坐喺張下格床上面～雙手放到大髀上～

“颼”飛揚BB再一次企喺我前面～相當溫柔咁撥一撥我把秀髮～

『我真係覺得好幸福～』我含情脈脈咁咬住唇望上去飛揚BB～

又可以俾飛揚BB服侍～

「所以有咁多人都鍾意去Salon洗頭～Set頭囉～」飛揚BB超專業咁～

『咁都要睇下對象既～』我𡁯起個嘴仔～好似條金魚咁～

我就只想俾飛揚BB服侍喇～

「咁我係唔係應該轉行做返Salon？哈哈～」飛揚BB傻傻一笑～

『如果係咁，不如做我既私人髮型師啦～只係可以服侍我一個～』我谷起埋面豬登～

只係服侍我一個～

「係又唔驅丫～就係照顧你一個既話，我得閒好多～」飛揚BB毫無戒心咁答出口～

『你死喇你～你呢句說話唔好俾你細妹聽到添丫～實呷醋死丫～』我對住飛揚BB古古惑惑咁笑～

仲唔俾我陰到你～

「講呢D～佢先唔會咁小氣～」飛揚BB扮晒唔驚咁～

『你唔好話丫～女仔好小氣架真係～越靚既女仔就越小氣添～』你都唔好話...我睇阿Wing喺Facebook又好...喺屋企又好...喺間房裏面都好...都做左唔少野...

向我示威既野...

「咁又唔見你小氣～」飛揚BB打量住我問一問～

『我小氣，你唔知姐～』我陰陰嘴笑～

俾你知道既話...一定會覺得我好恐怖...

「哈哈哈～」飛揚BB又恥笑我！

『笑咩姐～』我谷一谷起塊面豬登～

「無無～你個樣好可愛～哈哈哈～」飛揚BB仲要笑住講～

『多謝～』我咪咪嘴笑一笑～

好啦好啦～既然你都咁講，我就當你係讚我啦～

「咁都要多謝丫？」飛揚BB忍住笑咁問～

『俾人讚係要講多謝先有禮貌架～』我點一點頭～

「你會唔會太有禮貌喇掛？」飛揚BB好奇咁問一問～

『我一直都好努力學習點樣有禮貌～點樣大家閨秀～點樣唔再任性...我真係好努架～』我一對堅定既眼神望住飛揚BB！

我一直都好聽你話...

我一直都好努力學習點樣有禮貌～點樣大家閨秀～點樣唔再任性...

要學做一個好女仔...

要學做一個好女朋友...

做飛揚BB既完美女朋友...

「你已經好有禮貌～好大家閨秀～一D都唔任性～」飛揚BB帶住微笑回應我～

『真係既？多謝～』我都帶住微笑～向飛揚BB回返個禮～

飛揚BB覺得我已經好有禮貌～好大家閨秀～一D都唔任性～

咁係唔係即係...可以做你既女朋友喇？

飛揚BB好細心咁幫我吹完個頭之後...

「咁你坐一陣喇～我去梳洗下～」飛揚BB交低一句～

『嗯～你慢慢啦～』我就坐定定喺張下格床上面點點頭～

今次我都真係好乖乖咁坐定定～

坐定定喺阿Wing張床上面～

阿Wing張床...呢張一定係阿Wing張床...

同親哥哥瞓埋同一間房...瞓喺哥哥下面...望上去...咁多年...其實喺乜野感覺架呢？

我瞓一瞓喺阿Wing張床上...望一望上去...

會唔會...無左D私隱呢？

兩兄妹瞓埋同一間房...一個瞓下格床...一個瞓上格床...

雖然話...喺青春期間...唔係個個女仔都會自慰...

但係男仔就有機會打J...

睇高登D人成日都話會喺夜麻麻一個人瞓喺床上單手上網...

唔好話喺床上...就算係出去開電腦...都會怕自己細妹突然走出黎撞破啦...

又唔知...阿Wing有無撞破過呢？

又唔知...阿Wing有無撞破過飛揚BB同Ashlynn既好事呢？

唔好話同Ashlynn啦...其他女朋友呢？

我諗...總會有一次半次掛...

咁阿Wing又會點呢？

會唔會呷醋呢？

點解我會諗會唔會呷醋呢？

咁細妹一直都俾哥哥錫...而家哥哥錫第二個女仔會呷醋都好正常姐...

真係好正常咩？

我始終都係覺得阿Wing對飛揚BB既愛並唔止細妹對哥哥既愛咁簡單...

係…我認我係覺得阿Wing係情敵...

就好似佢都應該有當我係會搶走佢哥哥既情敵...

或多或少...都總會有D...

唉～睇黎如果真係做得成飛揚BB既女朋友，我都要好好討好呢個姑仔先得喇～

瞓喺阿Wing張床好一陣子...又諗左好一陣子...

“咔”飛揚BB梳洗完～

我立即起一起身...等到飛揚BB入返黎…

『飛揚丫～我可唔可以幫你揀衫丫？』我雙手放後～搖下搖下個身問飛揚BB～

「哦...可以...可以...」飛揚BB又傻下傻咁既樣～

飛揚BB打一打開個衣櫃～

我就好細心咁逐件逐件揀～

原來飛揚BB都幾多衫架喎～

唔知D衫係阿Wing買俾飛揚BB，定係Ashlynn買俾飛揚BB架呢？

我諗以Ashlynn呢種港女性格...就唔多似會買衫俾飛揚BB喇～

我諗...就只有阿Wing先咁有飛揚BB心架姐～

始終一個傾慕自己哥哥既好細妹係會想哥哥著自己幫佢揀既衫～

有情侶既感覺丫嘛～

我都留意下飛揚BB乜野款式同顏色既衫多～等我第時都可以買岩飛揚BB既心水丫嘛～

留意左一陣，又揀左一陣...

『就咁襯啦～』我將一件心口有袋既白色Tee，加一條黑色既七分褲放左喺阿Wing張床上面～

飛揚BB呆左一呆...

『平時見你恤衫西褲見得多…尋晚見你著便服，感覺好新鮮～所以我就想咁樣襯...OK嘛？』我含羞答答咁擺下擺下身體～

「OK丫～好好睇～」飛揚BB拎一拎起件衫...

眼定定咁...呆晒咁望住件心口有袋既白色Tee...

呆左好耐...呆左勁耐...

『飛揚...飛揚？』我喺飛揚BB身邊叫一叫佢...

「嗯嗯...咁我...換衫先喇...」飛揚BB仲係呆呆地咁...

『嗯～咁...我出去廳道等你啦～』我轉身步出房～閂埋百葉門～

飛揚BB成日都會呆下呆下咁～

唔知飛揚BB今次又呆D乜呢？

唔...或者...一個有經歷既人係多野諗D...

或者...飛揚BB真係有太多經歷...

我知道既...都有一兩個...

我唔知既...可能有一大堆...

不過就算飛揚BB有幾多經歷都好...我都會照單全收～

愛一個人...就係要愛佢既全部～

等左一陣～飛揚BB就換好套衫...

『靚仔晒～』我雙眼發光咁望住飛揚BB～

飛揚BB著我親手揀既衫真係超級靚仔～

「邊係呢...」飛揚又怕怕羞羞咁～

『咁我地行咯～』我勾一勾起對粉紅色既平底布鞋仔～著好鞋之後行埋飛揚BB身邊翹住佢～

「嗯嗯...呀！等等！」飛揚BB拎出一個木盒...

喺個木盒入面拎出一舊啪啪紙...

再拆開裏面D綿花...

「支筆係你爺爺架～麻煩你幫我俾返佢丫～」飛揚BB手震震咁拎住支筆...

我望一望：『哦？乜原來佢漏左支筆喺你道丫？唔聽見佢講既...OK丫～我幫你交返俾佢丫～』

我接過飛揚BB手上支犀飛利後，放入個手袋仔入面～

話說呢支犀飛利其實都係我送俾爺爺既～

佢漏左喺飛揚BB道都唔講聲俾我聽既～

唔...總係覺得爺爺好似古古惑惑咁...

總係覺得爺爺好似為老不尊咁～

唉～我都係唔好咁多心好～

我翹住飛揚BB手臂～恩恩愛愛咁喺屋邨行下行下～

享受同飛揚BB二人世界既時光係最幸福既～

「Emma～今日你又想食D乜呢？」飛揚BB好體貼咁問一問～

『嗯～～～我想食魚蛋河～』我用食指掂下掂下自己個嘴仔～

諗下諗下都真係好耐無食過魚蛋河喇～

聽人講喺舊邨既魚蛋河係特別好味～特別有風味～

既然一場黎到，就梗係要試試啦～

「魚蛋河？岩喇～我知呢頭有一間魚蛋河好正～有時放假都會同細妹去食～」飛揚BB講到好雀躍咁～

一講起佢細妹就鬼死咁雀躍...

係丫～我認丫～我認我係有少少呷醋丫～

唔得咩？

美女相忌你無聽過咩？

『嗯嗯～帶我去帶我去～』我搖下搖下飛揚BB隻手臂～

「跟我來～我知道路～」飛揚BB就興致勃勃咁帶住我行～

我要嗲飛揚BB多～

我要佢個心有我多D～

就算唔係全部...都要大部份～

飛揚BB帶到我去麵店入面～

「除左想食魚蛋河之外，你想飲D咩丫Emma？」就搵到張同個西裝男人搭檯既位坐～

我一坐低姐，個西裝男人突然噴麵！

而家D打工仔壓力真係大～食個麵都唔可以好好控制～

見到佢咁...都真係覺得佢幾可憐...

唔知之前飛揚BB會唔會都係咁架呢？

食個早餐都唔可以專專心心咁食呢？

『我要飲可樂～』我笑瞇瞇咁望住飛揚BB～

「唔得！無益！唔健康！揀過第二樣～」飛揚BB扮晒嚴父咁既口吻...

『唔～好啦好啦～俾我飲啦俾我飲啦～一啖啦～一啖啦～』我又扁晒嘴咁捉住飛揚BB隻手臂搖下搖...嗲下嗲...

十足十成個嗲緊爸爸既囡囡咁～

「好喇好喇...我叫罐可樂...俾你飲啖...你再叫一杯暖野飲～」飛揚BB心都軟晒咁～

『好野～飛揚對我最好～咁...我要杯熱檸賓啦～』我拍拍手～扮晒乖乖小朋友～

嘿嘿...飛揚BB已經完完全全喺我股掌之中～

飛揚BB就叫個靚仔侍應過黎：「唔該～一碗魚蛋河...一碗牛腩粗...一杯熱檸賓...一罐可樂～」

『兩個都多青丫唔該～』我向靚仔侍應打左個眼色～

個靚仔侍應跌左支筆落地～執筆既時候仲好似𥄫一𥄫我對修長美腿～𥄫到面都紅晒～

望一望我對腳都面紅？

俾你望埋裙底會唔會鼻血都噴埋架？

而家D男仔真係丫～

「Emma～你都鍾意食多青架咩？」飛揚BB一邊抹筷子～一邊問～

『OK架～』我就坐定定～做個乖乖小朋友～

「女仔多數都會走青架喎～你咁得意既～」飛揚BB再抹得乾淨D～

『但我覺得多青都唔錯～我幾鍾意陣味～』我咬一咬唇～

D味濃D～無咁清丫嘛～

「係丫？咁你又知我鍾意食多青既？」飛揚BB望一望我！

弊！俾飛揚BB發現左添！

一時都無留意到...飛揚BB從來都無講過佢鍾意多青...

其實都係因為我之前喺私家偵探得返黎既資料留意飛揚BB既生活習慣先知佢鍾意多青...

但我而家無理由話俾飛揚BB聽我一直都有搵私家偵探查佢架嘛…

點好呢...點答好呢...

『我...我有睇過你Facebook，唔記得你幾時有影過一張勁多青既牛腩麵丫嘛～嘻嘻...』我只好扮晒傻咁笑笑口...

咁講會唔會太牽強呢？

飛揚BB又會唔會相信我呢？

「係咩？其實我平日都唔記得叫多青～好多時都係我細妹幫我叫先有得食多青...」飛揚BB諗下諗下咁點點頭...

『係咩係咩？你細妹對你真係好喇～嘻嘻...』咁...咁算唔算過到骨丫？

只見飛揚BB諗下諗下...

好似有D猶猶豫豫咁...

好似唔係幾信咁...

但又唔開口問清楚咁...

係因為飛揚BB諗唔到有乜唔妥？

定係諗到有唔妥但又唔想開口講...免得尷尬？

「可樂，熱檸賓。」個靚仔侍應放低D野放得特別慢～

「Hunny！做野啦！掛住𥄫！唔使你做呀？！」坐喺收銀既老闆出聲鬧個靚仔侍應～

𥄫我𥄫到俾老闆鬧？

真係陰公～

其實使乜𥄫得咁辛苦丫～

拎部電話出黎偷偷地影我幾張相，想幾時睇睇幾多次睇黎做乜都得啦～

『可樂～可樂～可樂～可樂～可樂～』我就一於好少理～好似隻雛鳥咁吱吱叫～

「等等先～唔好咁心急～」飛揚BB就好細心咁抹乾淨罐可樂～

再插埋支飲管落去～

「嗱～一啖…一啖…一啖...喂...喂...喂喂喂！好奸架你～」我就起勢咁啜～

『嘿嘿～』我咪咪嘴笑～

好好味～

有飛揚BB服侍之下，就連飲罐可樂都覺得特別甜～特別好味～

其實幸福真係可以好簡單～

只要同心中所愛一齊～有佢既照顧～就已經係最大既福氣～

至於點解Ashlynn好似一直都唔知足？

或者...Ashlynn真係唔係咁愛飛揚BB啦...

所以我好肯定自己無做錯架～

除左話為左飛揚BB好...我都總算幫左Ashlynn...

幫Ashlynn離開一個唔係佢最愛既男人...

至於Ashlynn既未來係點樣？

我唔知...

我係可以控制...但我唔會控制...

因為我關心既...始終都係飛揚BB一個...

Ashlynn既命運...就由佢自己發展啦～

飛揚BB幫我篤下篤下D檸檬～又攪下攪下～

「嗱～飲過可樂就要乖乖地飲返D暖野架喇～」飛揚BB又扮成嚴父既口吻～

『唔該～』我好有禮貌咁點點頭～

你明明就係一個慈父黎架啦～扮咩野嚴父丫～

嚴父唔岩你架～你都係乖乖地做返個慈父好喇～

睇見飛揚BB呢個扮晒嚴父但實際係慈父樣就真係擔心～

擔心D咩？

咪就係擔心第時假如如果萬一有機會真係咁唔好彩幫飛揚BB生個女既話，飛揚BB一定俾個女烚死啦～

到時寵到個女壞晒，咁咪辛苦到我呢個做媽媽既？

對個女惡，個女又話媽媽唔錫囡囡...

又話唔鍾意媽媽咁惡...又話鍾意爸爸多D...爸爸錫囡囡多D...

結果我就變左個大魔王～飛揚爸爸就係救世主～

你話丫～公平咩？