《情困之時，我遇上了自稱情性的情聖》: [Case 14－我的米奇] PART 08
我翹起對腳～雙手撳住條短裙仔就坐左喺路邊～
路上都已經好多人～仲有好多工作人員添～
飛揚BB就將佢件西裝褸放到落我既大髀道～
『唔該～』我就輕輕挨一挨落飛揚BB身邊～
有飛揚BB喺身邊保護住，總係可以好放心～
飛揚BB唔止用佢件西裝褸幫我做掩護～仲用上兇狠既眼神怒視住𥄫緊我既色狼～
之不過呢～班色狼仍然肆無忌憚咁繼續𥄫我既...V領下春光...
男人喔～男人對眼總係鍾意𥄫女仔走光既～
仲要係唔會放過每一刻～每一個難得既走光鏡頭～
就算明知個女仔係知道你𥄫佢，都仲係咁唔要面咁走去𥄫～
唉～
就喺呢個時候，飛揚BB隻左手輕輕撳一撳落我個V領道～
飛揚BB呢一下舉動...我對乳房...感覺得到...感覺得到飛揚BB隻手...隻手既溫暖...
飛揚BB隻手好溫暖...而且仲有D粗...
但就係因為有D粗...就更加有安全感...
我望一望飛揚BB既神情...好似有D...有D尷尬咁...
我就自己用手撳一撳...
「Sorry！我唔係想...」我無等到飛揚BB講完...
『我知你想保護我～』我甜絲絲咁對飛揚笑～
我係知道你係想保護我～
我係知道你心痛我俾人𥄫～心痛我蝕底俾其他人～
而我...其實都唔介意俾你摸...
之但係...而家我地既關係...好似仲未係時候...
仲要多D時間...仲要多D相處...
我唔想俾你覺得我係一個隨便既女仔！
其實我已經鍾意左你好耐！
只係...只係你仲未知道...只係...只係你記唔起...
『開始啦開始啦～』我一隻手撳住自己件V領衫～另一隻手拉住飛揚BB～
一連串輕快既音樂，幾隻迪士尼既角色跳下彈下，巡遊就開始喇～
我一直都好聚精會神咁睇～好留意米奇幾時出現～
『黎喇黎喇～Mickey丫～』當我見到米奇企左喺花車上跳舞，我就勁開心咁指住佢～
全個氣氛都好歡天起地、載歌載舞～
有陣時要開心真係好簡單～
只要有最愛既人喺身邊～無論去任何地方～做D乜野都好～都係咁開心～咁幸福～
只要有飛揚BB喺身邊～
一直都有飛揚BB喺身邊～
愛一個人...真係可以咩都唔理...咩都無需要再理...
『好好睇丫～係唔係丫飛揚～』我拍晒手咁問一問飛揚BB～
「係丫...」飛揚BB慢慢起身，「不過我地係時候要走喇。」
我就拉住飛揚BB咁起身，有D唔係幾願意咁：『玩多陣添啦～』
「下次你再搵你男朋友陪你啦～」飛揚BB就好隨便咁放下一句...
『我都無男朋友～』我谷起塊面豬登...
我邊有男朋友姐...
「下？」飛揚BB好似聽完相對論咁既樣...
『正確黎講我都未拍過拖～』初戀都未試過...
「下？點會呀？」飛揚BB一面驚訝咁...
『因為我心有所屬～嗰個人就係Mickey喇～』我指住已經走到遠遠既Mickey～
米奇～米奇～好似遠在花車上～其實就近在我身邊～
只係你呢隻傻下傻下既米奇仲懵然不知姐～
『所以玩多陣先啦～』我再捉住飛揚BB隻手搖下搖下...嗲下嗲下...
『ER...』
『ER即係OK啦～GoGoGo～』我就翹住飛揚BB行去繼續玩～
飛揚BB真係好易心軟～
就喺今日～我就開始發現飛揚BB就係一個咁易心軟既男人～
只係捉住飛揚BB隻手搖一搖～扁一扁嘴～嗲一嗲～飛揚BB就會心都軟埋聽晒我話～
飛揚BB係唔係對每個人都係咁？
定係對每個女仔都係咁？
唔...
毫無疑問...飛揚BB對佢個細妹就一定係好易心軟...
我仲可以好肯定咁話...飛揚BB一定好錫佢細妹...
唔知佢細妹難唔難相處呢？
唔知又會唔會接受到我呢個阿嫂呢？
你知架啦...好多做細妹既...都會覺得阿嫂係搶走佢哥哥...都會覺得搶走佢哥哥對佢既關心...對佢既照顧...對佢既愛架嘛…
仲嚴重過如臨情敵...
玩下手真係唔鍾意我既話...要飛揚BB夾喺我地兩個女仔既中間...咁咪會令飛揚BB好難做囉...
點算好呢...點算好呢...
其實係唔係我諗多左呢？
又會唔會係我諗早左呢？
係唔係唔使咁早又諗得咁多呢？
唉～呢D野都係到時先算啦～
而家最緊要都係玩得開心D嘛～
我就拉住飛揚BB開開心心走去玩～
同飛揚BB開開心心幸幸福福咁玩下玩下...玩玩下都差唔多黃昏...
我翹住飛揚BB喺美國小鎮大街上面行...
『今日真係玩得好開心～』我翹住飛揚BB行下行下～又有少少嗲嗲地咁～
因為我個心...有D醉醉地...
愛情既感覺果然係可以令人心醉架～
「嗯～如果每日都可以咁開心就好喇...」而飛揚BB都好似好滿足咁～
『如果每日都係咁開心既話就唔珍惜架喇。』之不過...心醉都有三分醒...
習慣左幸福快樂，就忘記左痛苦既滋味...
我地人類就係咁衰...
所以有陣時都要...都要技術性調整一下既...
突然飛揚BB拉一拉停我：「唔記得左要幫老闆買D野添！』
哦？係丫...姑丈好似有叫過飛揚BB幫佢買野架喎...
仲話要買...要買頸鏈…（好似係）
『買野咋嘛～Easy啦～』我就快快手拉住飛揚BB去間水晶店入面～
我左望望～右望望～
又喺唔同既櫃位穿梭下～
睇下邊道有頸鏈賣～
當走到一個陳列頸鏈既櫃位面前，我就見到一條...一條好吸引我視線既...
『就呢條啦～』我指住條Mickey頭形既水晶吊咀～
粒Mickey頭形既水晶的的式式咁～幾得意丫～
「你女朋友真有眼光～呢個款係岩岩新到...」一名女服務員口甜舌滑咁推銷～
聽到我個心都甜甜地～
「我地唔係情侶...」但係飛揚BB就好快咁否認左...
使唔使咁快就否認喎...俾人FF下都唔得～
『我地買俾老闆既情婦～』好啦好啦～你要現實丫嘛～咁我就現實D啦～
只見女服務員尷尷尬尬咁幫我地包起條鏈～
「多謝你八百一十蚊～」
飛揚BB就拎一拎個錢包出黎～又喺個錢包裏面拎一拎張信用卡出黎交到女服務員手中～
「Emma...你又知條鏈係老闆買俾情婦既？」飛揚好似有D興趣咁問一問～
『我姑姐都唔鍾意迪士尼既～』我又翹住飛揚BB行出水晶店～
我姑姐佢對無嘴貓有興趣D～
「咁都唔一定係買俾情婦姐～」飛揚BB又好似好有興趣咁追問落去～
『唔係仲送得俾邊個丫～你地D男人～』我用手指指一指飛揚BB個鼻～
你地D男人丫～就算有個幾好既老婆丫～個心都總係會癢癢地咁架啦～
總係想出去搵下D嫩口既～新鮮既～
想試下唔同嫩肉既味道丫嘛～刺激一下丫嘛～
你當我真係咁天真乜都唔知咩～
尤其係嗰個鹹濕既姑丈！
我爺爺之前一直都有搵人跟開佢...
而家搵人跟佢既任務就交到去我手上～
我仲點會唔知得一清二楚先得架～～～
翹住飛揚BB行下行下～望下望下～
『呀！仲有一樣！你喺道等等我！』我一望到間飾品店就諗起有樣野要做既～
我一衝到入去間飾品店入面就搵下搵～
搵下有無...搵下有無...
有喇！有米奇耳仔頭飾賣丫！
我就快快手手拎起個米奇耳仔頭飾去俾錢～
唔捨得要飛揚BB等我咁耐～唔捨得離開飛揚BB咁耐～
日落西斜...
小鎮大街越黎越黃...
越黎越橙...
我雙手放後～彈下彈下咁喺飾品店門口彈左出去～
『登登登登～你要帶住佢同我影返張相～』當我彈到去飛揚BB面前之後，就由背後拎左個米奇耳仔頭飾出黎～
「下...唔係咁好掛...」飛揚BB就尷尷尬尬咁既樣～
『俾我任性埋呢次咁多啦...』我就𡁯長個嘴...再嗲一嗲飛揚BB～
『好喇好喇...』
我都話飛揚BB好易心軟架啦～
幫飛揚BB帶上頭飾後，我就翹住佢～黐到實一實咁～仲要用對柔軟既乳房壓實佢手臂～
“咔嚓”
『好野～同Mickey影左張合照～』我就好滿足咁望住我同飛揚BB既合照～
立即Set做頭像先～立即Set做頭像先～
呢張合照...係第二張既合照～
估唔到過左咁多年～喺返同一個地方～可以同到我最深愛既米奇再影合照～
分別只係...呢隻米奇更加可愛～我就大個女左～
我大個女左...我已經大個女左...
細個嗰陣就已經諗住大個左一定要做呢隻米奇既女朋友～
我一直都係咁諗...心中有你呢隻米奇...所以從來都無愛上過其他人...
一個都無...半個都無...
一直都係諗住要學乖乖...唔再任性...好好做個好女仔...做你既好女友...
估唔到時間真係過得咁快...一轉眼我就已經大個左...
而家既我都算係乖～都唔算太任性～勉強都算係個好女仔～
但要做你既女朋友...原來唔係咁易...
當黎到你面前之時...原來...原來總有障礙...
原來...原來總有D野...係要解開...
喺兩行樹影下，開始要離開背後既奇幻世界...
『要走喇...要返去喇...』我鬆開左翹住飛揚BB隻手...
開心既時間真係過得特別快呢...
「嗯～係時候返去喇～」飛揚BB帶住微笑咁點點頭...
『今日真係玩得好開心～多謝你～』我都帶住微笑向飛揚BB點點頭～
「我都好開心～」飛揚BB都好滿足咁點點頭～
不過我相信...開心既時間將會陸續有黎～
『應承我～你要帶住個米奇耳仔返到公司～』我向飛揚BB伸出一隻手指尾～
「下...會唔會好奇怪丫...」
「最後一次～俾我任性多最後一次～』我又𡁯長個嘴...又嗲一嗲飛揚BB...
『好喇好喇...』
我都話飛揚BB好易心軟架啦～～～
手指尾一勾，我用隻拇指掂飛揚隻拇指～
就好似當年...同當年一樣～
返去既路途中，我都一直瞓喺飛揚BB既膊頭上～
好好瞓...好好瞓...
瞓喺飛揚BB既膊頭上真係好有安全感～
仲會令我發美夢～發甜夢～
夢見翹住飛揚BB行沙灘～
夢見同飛揚BB跳下舞～
仲要好開心～好幸福～好真實～唔似係夢～
似係…未來既影像～
我同飛揚BB既未來影像～
喺地鐵瞓左一覺好之後，好快就黎到旺角地鐵站出口...
「都差唔多夠鐘放工～你唔使跟我返公司喇～」飛揚BB輕輕放下一句～
唔...我都明...
『咁好啦～星期五見～』我就同飛揚BB揮揮手～
「星期五見～」飛揚BB亦都同我揮揮手～
莫文蔚話“離別是為了下一次重逢的開始”～
帶住滿足既心情黎到朗豪酒店停車場～
行到黎我架被黑色車套蓋住既Lamborghini Aventador LP 700-4 Roadster前～
我一手打開車套～
今日真係好滿足～
同飛揚BB玩得好滿足～
我坐上真皮跑車座椅～扣好埋安全帶之後～
再掀開紅色蓋～按落個發出紅色光既“START ENGINE STOP”字樣既黑色掣道～
“吼！”一聲響～
我帶住滿足既心情，唔係要返屋企～
因為...我仲有地方要去～
“依...”我一俾油，LP 700-4 Roadster就衝住去！
“吼～吼～吼～吼！”
我要去邊？我要去中環～
去中環做D乜？
是咁的～
尋晚爺爺打黎話好掛住我呢個乖孫女～所以想同我食晚飯喎～
爺爺平時咁錫我，我又咁乖女就梗係第一時間應承啦～
所以我一同飛揚BB去完迪士尼玩...放左工之後，就立即飛車過黎開定壼頂級靚普洱等爺爺過黎～
喺貴賓房裏面坐左一陣...
“咔”房門就打開喇～
當我一望到滿頭白髮～All Back髮型～西裝筆挺～超級有型既爺爺行入黎之時...
『爺爺～咁快就黎到既～』我第一時間就撲到去爺爺身邊～翹實佢隻手～帶佢埋位坐～
「有最乖既乖孫女陪我食飯喎～我又點捨得要你久等丫～」爺爺摸下摸下我個頭～坐一坐低～
『黎黎黎～飲啖暖茶先～你最愛既普洱黎架～岩飲架喇～我仲已經點左菜～等陣就有得食～』我就服侍一下我個好爺爺～
「嗯嗯～乖～乖～睇我個乖孫女心情咁靚，返工一定好順利啦～」爺爺一邊飲普洱～一邊打量下我～
『嗯嗯～都幾開心架～工作總算順利啦～』我甜絲絲咁點點頭～
因為一講起工作，我就會諗起同飛揚BB一齊既時間～
只係屬於我同飛揚BB既二人世界時間～
「肯定唔止工作順利咁簡單啦～仲同佢玩得好開心添啦～」爺爺帶住慈祥既微笑望住我～
『嗯嗯！都真係玩得好開心架～就好似今日咁咋嘛～我就同佢去左迪士尼玩左成...邊個佢姐...』講講下先醒起我係無同爺爺提過有關飛揚BB既事架喎...
點解爺爺又會...
「哈哈哈～」爺爺恥笑我，「仲話“邊個佢姐”喎～你唔係為左男仔丫～又點會叫你讀商唔肯讀，走去日本讀設計～返到黎又唔肯入大公司，要我同你個姑丈講入去佢間公司仔道做～你細細個就已經唔鍾意你個姑丈～又點會想入去幫佢手丫？肯定係為左嗰個叫陳飛揚既後生仔啦～」
『爺爺丫！』我怕怕羞羞咁谷一谷起塊面豬登～
仲要知道全名...
「唉～女生外向丫～女生外向丫～睇你姑姐就知啦～係估唔到連孫女都係生外向架姐～唉～」爺爺好似呷呷地醋咁～
『爺爺～我幾時都係咁乖咁聽你話咁嗲你架嘛～』我就嗲一嗲爺爺～
「係喇係喇係喇～咁大個女都仲係咁嗲既～真係嗲到個心都軟埋～」爺爺又摸下摸下我個頭～
『爺爺咁錫我～我唔嗲爺爺嗲邊個喎～』我就繼續嗲下嗲下～
「係喇係喇係喇～得喇得喇得喇～又有乜要求丫？」爺爺好似睇穿我個心諗緊乜咁～
真係無野瞞得過爺爺既法眼架～
『邊係有要求姐～只係...只係...今日呢...要見客喎...嗰個姓葉既鹹濕佬對我摸手摸腳丫！佢丫...個女都有我咁大架喇嘛…仲走黎鹹濕我...我幾咁難堪丫...』我扮晒委屈咁扁晒嘴～
「豈有此理！竟敢侵犯我最錫既乖孫女？！呢個姓葉既真係買板唔知地！我一定要十倍奉還！」慈祥既爺爺突然變成想殺人一樣既惡魔～
『嗯嗯～嗯嗯～一定要十倍奉還～』嘻嘻～得罪本小姐係無好下場架～
由細到大，爺爺都係咁錫我既～
真係當正我係掌上明珠咁架～
爺爺仲為左可以全心全意照顧我～睇住我成長～仲提早退休～交晒所有業務俾我Daddy打理～
至於我媽咪啦喎～就日日都要同我既嫲嫲去埋D乜野太太會丫～女人會丫～八婆會丫～應酬下喎～
所以最親既都係爺爺架喇～
『係喎～嫲嫲呢？』講下講下先醒起唔見嫲嫲既～
「你嫲嫲咪又係同左你媽咪去左嗰乜野八婆會館同一大班八婆吹水囉...月聚喎...個個月都有幾十次呢D聚會...來來去去都係嗰班八婆...都唔知有乜好聚...」爺爺嬲得黎又有D無奈咁～
『唔緊要啦～唔緊要啦～有我陪你嘛～』我就氹一氹返我個好爺爺～
「都係Emma最乖最抵錫～」爺爺又摸下摸下我個頭～當正我仲係細歲大既小妹妹咁～
由細到大～爺爺都當正我係長唔大既小妹妹咁愛錫我～愛護我～寵壞我～
我就梗係要孝順爺爺多D啦～
『爺爺有野食喇～～～呢個師傅既刀功好好架～片親D皮都可以好薄好薄～』
「係咩係咩？咁就真係要欣賞下啦～」
同爺爺開開心心快快樂樂咁食餐晚飯～
我地都傾左好多野～
傾左好多家事啦～當中都有傾下姑姐既事啦～姑丈既事啦～姑丈個小三既事啦～
雖然話爺爺吩咐左我要查姑丈個小三既野...之但係...其實都未有乜野進展～
鬼叫我成日掛住飛揚BB D野咩～
不過我就應承左爺爺會查多D有關姑丈個小三既事～
同爺爺食飽飽之後...
「揸車要小心D丫～」爺爺好唔放心咁望住我上車～
『知道知道～好小心～』我又扮晒乖乖聽話咁～
「多D返黎食下飯丫～」爺爺仲係好唔捨得咁～
『知道知道～多D返黎一齊食飯～』我繼續扮晒乖乖聽話咁～
「好啦～返去早D沖涼早D休息啦～」
『嗯～你都快D返去抖下喇～拜拜爺爺～』
「嗯～拜拜喇乖孫女～」
我錫一錫爺爺面頰之後...
“吼～吼～吼～吼！”揸住LP 700-4 Roadster衝返屋企～
返到屋企沖返個靚涼～吹乾埋個頭之後，我就赤裸裸咁攤喺張大床上～
好攰丫～好攰丫～今日真係玩得好攰丫～
不過真係玩得勁開心～
同飛揚BB...玩得勁開心～
我攬住個枕頭...諗住飛揚BB...碌下碌下...當正個枕頭係飛揚BB咁攬到實一實咁碌下碌下～
唔知飛揚BB放左工未呢～
唔知飛揚BB有無戴住個米奇耳仔返公司呢？
都係Send個Message問下佢先～
我就喺床頭拎起部電話～
“有無失信未返到公司就除左個米奇耳仔？唔准講大話～”
過左一陣，飛揚BB就Send左張相過黎～
相入面係影住佢坐喺架...小巴裏面...戴住左個米奇耳仔～仲影到後面幾個人用上好奇異既目光望住佢添～
呢個飛揚BB真係丫～
“你仲戴緊丫？哈哈哈～你真係好特別～星期五見啦～早抖^3<”
星期五見喇～我的米奇～