《情困之時，我遇上了自稱情性的情聖》: [Case 14－我的米奇] PART 02
今日我一早就起左身～（好彩尋晚好早就瞓著左～）
喺個浴室洗左成個鐘頭白白～
當然就唔少得護下膚～（全身嗰隻～）
拎晒幾個大衣櫃既衫出黎襯下～
做乜野要咁大笨象？
因為今日係...我第一次真真正正接觸飛揚BB既大日子～
為左我既大計可以順利進行，我就扭左爺爺幫我同姑丈講安排我入去佢公司道做～
點解我要入我姑丈間公司？因為飛揚BB都喺入面工作囉～
呢個世界真係多巧合？
乜你仲覺得呢D都係巧合黎架咩？
其實早喺飛揚BB搵工之時，我就已經安排好佢入去我姑丈間公司道工作架喇～
為既都係可以容易D接近飛揚BB～
而且...而家都算順利丫～
至於Amy同James喇喎...
嗰日我交低左我既作戰計劃之後，再寫左兩張三百萬既支票俾佢地做訂金...
事成之後...我自然會俾埋個尾數佢地...
佢地兩個都係聰明人～我可以好放心～
我可以好放心咁做好我要做既事～
接近飛揚BB～
喺塊全身鏡前襯下呢件～試下嗰套～都揀左成個鐘頭衫～
最後我都係決定著件白色既雪紡吊帶長裙去見我既飛揚BB～
都係清純D既衣著襯我多D～
而且第一次見面嘛～自然D都容易親近D～
我再梳一梳好把秀髮～唔需要化妝～唔需要噴香水～再拎一拎個手袋仔～著埋對白色高踭涼鞋之後...
『係時候出發！』
我帶住好興奮加上少少緊張既心情行去車房仔～
“咇”解一解鎖～再揭起鍘刀式車門～
坐一坐上架Metallic Blue色既Lamborghini Aventador LP 700-4 Roadster～
係飛揚BB最鍾意既超跑～
扣好安全帶之後，揭開紅色蓋，按落個發出紅色光既“START ENGINE STOP”字樣既黑色掣道～
“吼！”好快我就可以見到我既飛揚BB喇～
真係好心急呢～
唔知飛揚BB見到我既時候，會有乜野反應呢？
又唔知佢會唔會...會唔會認得我呢？
都係唔好諗咁多～快D開車好過～
“依...”我一俾油，LP 700-4 Roadster就衝住去！
“吼～吼～吼～吼！”
平時揸車我都開得好快～
今次就更加快～
我認我係一個幾性急既人～
之不過性急唔代表唔小心喎～
我係一個又小心～又性急既女仔～
呢種性格好唔好？
我就唔會理人點睇～我只係理飛揚BB點睇我～
我只係想做一個飛揚BB心中最好既女仔～
希望俾飛揚BB既第一個印象唔會太差啦～
“吼～吼～吼～吼！我踩行油咁衝住過到黎旺角～衝到入去朗豪酒店停車場～
泊好架車～再蓋上黑色車套...
『搞掂～』拍兩下對手～
快D去見飛揚BB～快D去見飛揚BB～
我就急急腳咁行去姑丈間公司道～
急還急～我當然都仲好顧住儀態啦～
話晒我都係著裙～仲要著左對有三吋高既高踭涼鞋～
點都要小心D既～
我好小心又急急腳咁黎到公司間大廈～
搭一搭𨋢～
『放鬆D～放鬆D～呼～』總係有少少緊張...
話晒都期待已久丫嘛～緊張少少都好正常姐～
放鬆D～再放鬆D～
上到黎公司...行到黎門口...
『呼～』我再深呼吸一口之後...撳一撳鐘仔～
*叮噹*門鐘響起...
唔使幾秒，我就見到個肥大既身影由公司裏面走左出黎...
「你黎喇～入黎先入黎先～當自己屋企得架喇～」我姑丈就烚熟狗頭咁對住我。
『嗯～』我只係帶住微笑咁點一點頭，跟住姑丈身後。
因為我一直都唔係咁鍾意我姑丈。
唔止我...我爺爺都睇佢唔順眼！
我就係因為覺得呢隻肥豬好鹹濕！
我細細個既時候，佢就借頭借路攬下我...抱下我...
雖然話嗰陣時既我仲細...無乜野好俾佢摸...但我都係覺得佢好似想鹹濕我咁...
當然我都唔係蠢～細細個就好識得保護自己～唔會俾呢隻肥豬埋身～
至於我爺爺點解會睇佢唔順眼？
聽我爺爺既口吻好似都有搵人跟過佢...
又好似話姑丈出面都曾經有過其他女人...
斷斷續續又一個...久唔久又搵一個...
我爺爺其實係好錫我姑姐～但我姑姐由細到大就有D反叛...
爺爺講東～佢就去西～
所以爺爺幾唔鍾意姑丈都好，姑姐係都要嫁俾佢...
就算明知佢喺出面收埋另一個，都要喺爺爺面前扮晒幸福咁～
唉～佢地兩父女既事，我地呢D做細既就唔方便講咁多架喇～
不過我就係撐爺爺既～
因為由細到大，爺爺都好錫我～
仲好寵我添～
「等我黎介紹下先～呢個係我地首席設計師，陳飛揚。以後佢會照顧你架喇。」姑丈個肥大身軀一移，我就見到我朝思暮想既飛揚BB出現喺我眼前～
飛揚BB梳左個栢豪All Back頭～著上一身西裝～
個外表就同D相裏面既佢無乜分別～
一樣係呆呆地～傻傻地～幾可愛咁～
只係...只係原來飛揚BB真人唔係好高～
『你好～我叫李家敏 Emma～請多多指教～』我向飛揚BB伸出右手～
唔好咁緊張～唔好咁興奮～唔好心跳得咁快～
「你...你好...叫我飛揚得架喇...」飛揚BB握一握我隻手～
係飛揚BB隻大手丫～
第一次...係第一次接觸到～
飛揚BB隻手...暖暖地～有D粗～不過就好有安全感～
果然係一個好男人既大手～
呢種安全感...仲令我唔捨得放...好想一直都可以捉住佢...捉實佢...
之不過...睇起上黎...飛揚BB好似唔多認得我...
唔認得我係當年任性既小妹妹...
「咳咳！你握完未呢？」姑丈咳左兩聲...
飛揚BB立即鬆開手：「So9...Sorry...Sorry...我...我尋晚唔係好夠瞓...係喇我尋晚唔係好夠瞓...」
飛揚BB雙手喺自己大髀道搓下搓下咁～
呢個傻瓜～同尋晚夠唔夠瞓又有乜關係丫？
不過講開又講...匯報有提過飛揚BB晚晚都做到好夜先收得工...
真係咁多野做？
真係咁辛苦？
如果係既話...我都真係要好好幫下佢手先得～
「咁我交Emma俾你喇。Emma有咩唔明問飛揚喇。」姑丈交低完就急急腳走入房。
睇黎姑丈都係D好食懶飛既肥豬...
「Emma...你個位喺呢道，隨便坐得喇。」飛揚BB帶我埋去我個位道～
有飛揚BB帶住，總係好安心～
不過地方就真係有D細...好快就黎到自己個位...
我坐一坐低：『咁我要做D乜呢？』
唔知我可以幫到飛揚BB D乜呢～
「ER...你不如先上上我地公司個網，睇睇我地公司既資料先～」飛揚BB又傻下傻下咁既樣～
『嗯～』我開著部iMac～
上公司個網睇公司資料？
呢間公司咁鬼細～有乜資料好睇～
最好睇既資料咪就係有關你既資料囉～傻瓜～
“登”一下沉重既開機聲...
「我仲未幫你做Setting，不如等...」我無等飛揚BB將句說話講完...
『你俾個WI-FI Password我就得架喇～我自己搞得掂～唔駛照顧我～』我大個女架喇～
「哦咁...哦好喇...咁你自己慢慢...」飛揚BB交低埋個Password俾我之後，就行返埋自己位～
我真係大個女架喇～再唔係之前嗰個任性既小妹妹～
等到飛揚BB坐返埋位之後，我就上下公司個網～睇下飛揚BB既資料～
其實之前我都已經有睇過～仲要係一得閒就會睇下～
講出黎都覺得好害羞喔～
不過女仔係咁架啦～
總會鍾意偷偷地偷睇下深愛既人～
又要望～又要唔俾佢知～但又想佢知～又唔敢俾佢知咁～
又要矜持又要春心蕩漾咁既樣～
我就伸長對腳仔～一路搖下搖下～擺下擺下～一路睇住個Mon～睇住Mon入面既飛揚BB～
睇住個Mon入面既飛揚BB？點解我仲要隔住個Mon呢？
飛揚BB明明就喺我身處既空間之中～喺我眼前啦～
我就偷偷地望過去飛揚BB嗰邊～
由於我地無乜野partition隔開～所以我可以好清楚咁望到飛揚BB...望到飛揚BB對眼...望到飛揚BB對眼望梗...望梗...
『望梗我對腳？』我心諗～
點解飛揚BB會望住我對腳架呢？
我一路搖下對腳仔～一路搓下搓下D腳趾～
我今日洗白白都洗得好乾乾淨淨～一定唔會有老泥既～
一定唔關衛生事～一定唔關衛生事～
我今日有掃到腳甲油...
仲要係白色既腳甲油...
唔通...唔通飛揚BB覺得我掃白色既腳甲油好怪？
望住飛揚BB繼續望住我對腳...好似再望上多小小咁...
我就繼續搖下搖下對腳仔...
點解飛揚BB既神情呆得黎...又好似咁困惑...又好似有D不安咁架呢...
究竟飛揚BB諗梗D乜呢？
係唔係我有D乜野唔妥呢？
我既衣著...有唔妥？
對飛揚BB黎講...會有D乜...
飛揚BB望下望下...
望到上黎...望到上我塊面...
望到我對眼...
我地四目交投...
『我知喇！』都係我心諗！
飛揚BB立即望返落個Mon道～
我知喇～我知喇～係因為我著左有成三吋高既高踭涼鞋呀！
唔怪之得啦...唔怪之得我頭先同飛揚BB握手既時候，總係好似覺得飛揚BB唔係咁高咁啦...
原來係因為我著左高踭涼鞋...
我諗飛揚BB一定係有D介意...
男仔或多或少都會有D介意女仔高過自己...
而我第一次見飛揚BB就高過佢成吋...
死啦...會唔會已經俾左個唔係咁好既印象俾飛揚BB呢...
死啦...點算呢...可以點補救呢...
我緊緊張張咁諗下諗下...
仲要對成日添架...唔通我成日都唔企起身咩...
點算呢...點算呢...
對成日...唔企起身？
無錯喇！
我起一起身...慢慢咁行去飛揚BB面前：『飛揚，我想...出出去...可以嘛？』
「哦...好好...隨便...」飛揚BB又好似顧住忙梗佢既工作咁...
趁住飛揚BB好似唔係好為意...咁我就要快D出去先得喇！
“咔”我急急腳行去開門離開Office...
仲要對住飛揚BB成日...可能仲會有好多企喺佢身邊既機會...
我都係快D出去買返對平底鞋返黎先得！
無錯～就係要買返對平底鞋黎著～
著平底鞋，就唔會高得過飛揚BB啦～
咁就算係企喺飛揚BB身邊，都唔會令佢覺得唔自然啦～
我本來打算走過去朗豪坊嗰邊睇下有乜平底鞋買～
之但係...好似有D遠...所以我都係去左附近既旺中睇睇...
一入到黎旺中…好多舖頭都未開門...
係我太早嘛？
可能係...我都無諗過...呢個鐘數應該都無乜人黎行街添...
我就喺個無乜人又暗暗地既商場裏面行下行下...搵下搵下...
上左兩層之後，我終於見到有間有個肥肥地既老闆娘正喺道開梗舖既鞋舖～
我立即急急腳行埋去，帶主笑意問一問：『唔該～我可唔可以入黎睇睇丫？』
個老闆娘嚇左一嚇咁回頭望一望我：「可以～可以～估唔到咁早就有客丫下～」
『打搞晒～』我就喺排鞋架上揀下揀～
「唔打搞～有生意做邊打搞～不過...睇你身光頸靚咁～唔似會睇得上我地呢D爛鬼舖頭仔D爛貨喎～」老闆娘打量我一下～
『無話爛唔爛鬼既～只要係靚係鍾意就係好貨啦～』我就繼續揀下揀下～
都真係有幾多靚鞋架喎～搞到我都唔知買邊對好添～
「靚女～你都幾特別架喎～」老闆娘繼續打量下我～
『嗯？我丫？我好普通姐～都唔算得上特別～有一個人...比我更加特別啦～』藍色好？定係黃色好呢？
「仲有人特別得過你？你男朋友丫？」老闆娘又古古惑惑咁打量住我～
『唔…未係～都唔知會唔會係～』好似白色襯D喎～
「未係都一定好快會係啦～你咁靚女～又咁好身材～我係男人都第一時間俾你迷住啦～」老闆娘勁識氹人～
如果老闆娘係男人既話，一定氹死女啦～
『邊係呢邊係呢～我想要呢對～』我拎起左對平到貼地既花花布料既婆仔鞋～
老闆娘打量下我對腳：「唔...好～等等丫下～」
老闆娘好快手咁喺個櫃裏面拎左對用膠袋包住既婆仔鞋出黎俾我：「見你咁靚女～俾對全新無人試過既你試試～」
『唔該晒～』我接過對婆仔鞋之後，好快手咁除一除對高踭涼鞋～著一著對花花布料既婆仔鞋～
左睇睇～右睇睇～伸直對腳睇睇～行兩步睇睇～彈兩彈睇睇～
『嗯～好舒服～又好靚～就呢對啦～幾錢丫？』我就拎一拎出錢包～
「見你咁靚女～收你十蚊啦～」老闆娘又口甜舌滑咁～
『多謝你～好抵丫～』我就喺個銀包仔道拎個十蚊銀出黎～
你唔好以為我呢D大小姐只係有大紙同Credit Card跟身～我喺日本留學既時候都有帶開散紙出街架～
去D橫街窄巷買野會方便D嘛～
「我多謝你先真～」老闆娘收過我錢之後，「我幫你包起佢啦～」
『唔使唔使～我著住佢得架喇～』我拎一拎起返對高踭涼鞋～
「咁我俾個膠袋你入住你對高踭涼鞋～嗱～」老闆娘遞一遞個膠袋俾我～
『唔該晒老闆娘～你真係好人～』我就入好對高踭涼鞋～
「唔使客氣～多D黎幫襯喇～」老闆娘同我揮揮手～
『嗯～一定一定～』我都同老闆娘揮揮手之後，步出鞋舖～
著住對平到貼地既婆仔鞋都真係幾舒服～
舒服過著高踭鞋好多～
其實我自己就真係唔係咁鍾意著高踭鞋～
人地話著高踭鞋先顯得對腳修長D～靚D～吸引D～
但我就覺得咁樣同裝假狗又有乜分別呢？
所以我都係鍾意著平底鞋多D～
最緊要都係著得舒服～
我就彈下跳下咁彈返上公司～
*叮噹*撳一撳門鐘～
飛揚BB就探頭望一望出黎～
我就帶住微笑隔住玻璃門向飛揚BB揮揮手～
飛揚BB就立即飛撲出黎！
“咔”
「Emma你返黎喇。」仲要好似好期待我返黎咁～
「係丫～唔好意思，我無啦啦話要出一出去就出左成半個鐘～我下次唔會架喇～」我向飛揚BB點一點頭，行返埋位～
都係我衰...仲諗住好快會買完返黎...
又無諗過咁早去到無乜舖頭開門做生意...
搞到咁遲先返黎...
唔知飛揚BB會唔會覺得我好無擔帶呢...
希望唔會印像太差啦...
不過頭先行到去飛揚BB面前，佢又真係高左一截咁～
著住平底鞋既我，果然係矮飛揚少少呢～
好啦～我都係唔好諗咁多～繼續上網睇下飛揚BB D資料先～
我就伸到對腳仔長一長～搖下～擺下～
間唔中又偷偷望下好專心咁工作梗既飛揚BB～
飛揚BB認真工作起上黎...真係好吸引呢～
偷偷望下飛揚BB～又搖下擺下對腳仔～
「喂～各位食飯喇～」姑丈就由房裏面走左出黎。
原來不知不覺間就到左食飯時間～
所以話可以同飛揚BB身處喺同一個空間，時間飛逝都唔覺～
姑丈行到去Office既中間：「為慶祝Emma加入我地呢個大家庭...」
呢個家庭可唔可以無你呢？
可唔可以只係得我同飛揚BB呢？
「我已經Book左吉壽日本料理食放題啦～」姑丈高聲歡呼。
「好野...好野...」飛揚BB拍住手讚好～
呢個飛揚BB真係好鬼死可愛～拍手拍到成隻海獅咁～
「好～我地出發！」姑丈就帶頭走向門口。
「老闆～有無帶銀包丫～」飛揚BB行前兩步，將姑丈叫一叫停。
「呀～係喎係喎～又唔記得左添～真無記性～」姑丈摸摸佢個光頭行返入房。
又唔記得？真無記性？
我睇你又唔似喎...
我睇...你似想出古惑多D...
你唔好以為我唔知～你呢個姑丈除左鹹濕之外，仲鬼咁度縮！
扮晒唔記得拎銀包，實際就係唔想請～
不過好彩我既飛揚BB夠醒目～
「好～出發！」姑丈拎埋銀包出黎之後，就帶頭開門。
我就跟住飛揚BB後面行～
喺飛揚BB身後，望住佢正經既身影行，總係好有...好有安全感～
我總係覺得飛揚BB身上散發住一種...一種溫暖～
呢種溫暖總係會令女仔好安心～好安心咁跟係佢背後～
完全唔需要擔心會俾佢帶左去邊～
可以好放心咁交晒成個人俾佢～
一直都係...以後都係～
「隨便叫～唔好客氣～」姑丈扮晒大方咁。
「多謝老闆～」飛揚BB又好有禮貌咁～
飛揚BB又使乜咁有禮貌～食放題本來就唔係隨便叫架咩？
叫幾多，都係俾咁多架咋嘛～
所以我就話姑丈度縮啦～
唉～我就唔理得姑丈咁多～開開心心咁坐喺飛揚BB隔離～
飛揚BB拎起幾張唔同類型既點菜紙：「Emma，你想食D乜？」
『無所謂，我咩都食～』我就咪咪嘴咁笑住答～
飛揚BB真係好有風度呢～
不過講真一句～我又真係無乜要求架喎～
反正乜都放得入口～
最多咪肚痛～屙完咪無事囉～又唔會死既～
只見飛揚BB對住D紙諗到眉頭緊皺咁～
『我真係無所謂架～你點乜，我就食乜～只要係你點，我都會食～』我就喺飛揚BB耳邊細細聲講～
只要係飛揚BB點既，我都一定會食～
飛揚BB聽到我咁樣講完之後，就喺幾張點菜紙到寫寫寫寫寫Number！
「要唔要D wasabi？」交左張單俾個侍應之後，飛揚都好照顧我～
『少少夠喇唔該～』我就有少少怕怕地羞喇～
始終都係第一次同一直最深愛既人同檯食飯...仲要有佢既照顧...係會有D怕怕地羞架啦～
唔怕羞就唔係女仔啦～
D野食一路黎，我地就一路食～
黎乜食乜～乜都食～有食唔食～罪大惡極～
D野食都算唔錯～都叫得上係新鮮～應該唔會食到肚仔痛掛～
“And you don't seem to understand...”
突鈴聲響起...
呢首鈴聲...係...Duvet...Serial Experiments Lain既Duvet？！
我望一望身邊既飛揚BB...望住佢望一望部電話...
「女皇？！」飛揚BB好驚訝咁叫左出黎！
女皇？邊個女皇？英女皇丫？
飛揚BB好快速咁立即滑動解鎖！
「喂～BB～瞓醒喇？」飛揚BB換上一把極度溫柔既聲線...
BB？
唔通係…喺嗰條港女八婆Ash...Ash乜鬼野話？
「...作死呀？」我仲隱約好似聽到...聽到電話傳黎吵耳既聲音...
「忙呀…」飛揚BB掩住個電話...細細聲講...
「忙唔駛食飯既？」電話傳黎吵耳既聲大到我可以好清楚聽到條港女八婆講既每一個字...
做乜對我既飛揚BB咁惡？！
作死你呀？！
「今日老闆請食…」飛揚BB再坐離我遠一D...
做咩丫？係唔想俾我聽到？定抑或...
呢個時候，姑丈開口問一門我：「今朝到而家，返工慣唔慣丫？」
岩晒喇…
『嗯～OK丫～』我就專登答得大聲D～
「點解有女仔聲架？！」電話傳黎吵耳既聲大到我可以好清楚聽到條港女八婆既語氣！
「我同...』飛揚立即掩住個電話講...
嘿嘿...仲唔激死你條港女八婆～
「..你解釋...Bye Bye...」飛揚BB急急忙忙咁收線。
望住飛揚BB個面有難色咁既樣...
使唔使咁青丫？
對住一個咁霸道既女人，使鬼驚佢咁多咩？
佢係要惡，你咪惡過佢囉～
佢再惡D，你咪再惡佢多D囉～
反正佢都唔要面同你鬧起上黎，你仲使乜就住就住呢？
不過飛揚BB就係咁～總係對女仔無晒辦法咁～
人太好丫～唉～
不過都係我鍾意你既地方黎既～
收左線之後，飛揚BB都好似無乜胃口食野...
仲係好似悶悶不樂咁...
一直Keep住到埋單...
「多謝你474蚊。」侍應走到埋黎。
姑丈揭一揭個銀包：「哎呀！唔記得撳錢添！呀～飛揚，你出住先～」
嘩！帶左銀包都可以話唔記得撳錢？！
姑丈...你都真係幾厚顏架喎...
「碌卡咪得囉老闆～你張黑金卡飛機都碌到啦～」飛揚BB笑住口咁隊張單俾姑丈。
「無帶卡套嘛！」姑丈又隊返張單俾飛揚BB。
嘩！真係厚顏無恥到一個點喎～
走去做議員丫笨～
我望住佢地兩個隊黎隊去...隊黎隊去...
『新黎新肥肉～不如等我俾啦～我有帶銀包～』我喺我既手袋仔拎個銀包出黎。
都係唔好要我既飛揚BB難做喇...
「唔駛喇～我當儲分～」飛揚BB好豪爽咁夾埋張卡落張單道～
「食嗰500蚊都唔夠都要“爭”住俾錢...」個侍應一邊離開我地個範圍，一邊口噏噏。
500蚊可能真係唔係好多...
之但係...我總係覺得飛揚BB咁樣俾度縮既姑丈屈法...好唔抵囉...
唔...飛揚BB真係人太好喇～
對個個都太好喇～
好到蝕底喇～
蝕底到我都有D心痛啦～
飛揚BB係傻瓜黎架～