《情困之時，我遇上了自稱情性的情聖》: [Case 12－重來一次] PART 11

自上次同Zoe睇左套情慾...愛情片之後，都已經過左一個星期...

呢個星期裏面，每日當我放工行出房之時，Ivy嗰Team D燈都熄晒...

已經唔見Zoe...

Zoe都準時收工...

我都係一個人揸車直接返屋企...



放假嗰兩日，Zoe都無搵過我出去...

亦都無打電話黎問下我有關設計上既野...

或者Zoe已經捉到方向，唔駛再打黎請教我掛...

況且仲有Stella...

Stella一定可以幫到佢呢～



我又真係唔駛擔心咁多～

至於食Lunch喇喎，我都無同Zoe一齊食...

因為...

「France～搞成點丫？」因為Lunch都會同大老細一齊食...

無錯喇...我地既大老細陳生已經陪完佢老婆環遊世界返黎～



所以食Lunch都係陪陳生多～

同陳生去食開嗰間法國餐廳～坐喺一個開放式既位置～吹住風～食Lunch～

好高級？

陪大老細食飯係咁上下啦～

反正就係大老細請～

又好奇怪既係，大老細特別鍾意同我撐檯腳...

佢話同老婆去完旅行之後，唔想應酬咁多人喎...

『你係指邊份Project？』我抹一抹嘴，飲啖清水清清喉嚨。



「咩邊份Project姐？我係問你同Zoe丫～」陳生皺一皺眉頭咁問一問。

『唔？！咳咳…無…無…我同Zoe無野搞丫...』聽到陳生咁講，我當堂嚇左一嚇...嚇到飲水都哽親...

「咩話？仲未搞掂？我俾左咁多時間你地都仲未搞掂？喂...你係唔係有心拖住人地架？」陳生冷眼望一望住我...

『唔係唔係…我邊係有心拖住人...我...我...我...』我摸下摸下無名指上隻結婚戒指...

「你摸住隻結婚戒指...係咩意思呢？」陳生好似睇穿左我內心咁...

當然我就唔知佢係唔係真係睇得穿啦...

『唔...』我拎一拎出銀包，再打一打開張相俾陳生睇，『呢個係我過左身既老婆...』



陳生望住張相，輕輕放下一句：「同Zoe好似樣。」

『嗯...同Zoe好似樣...而且都係叫Zoe...』我望一望張相...望一望相中既老婆...

老婆永遠都係笑得咁燦爛...笑得咁甜...

「你係擔心會將Zoe當成你老婆既...代替品？」陳生飲一啖咖啡，問一問。

『唔...』我諗左一諗...『其實又唔可以話係擔心會將Zoe當成老婆既代替品...唔...因為其實Zoe同老婆都...都好唔同...』

「哦？」陳生一頭問號咁...

『唔...點講好呢...即係...雖然話Zoe同老婆既外貌...英文名...仲有一D習慣都真係十分相似...之但係...性格上就有D分別...』我再諗一諗...諗下應該點講好...

「嗯？」陳生飲一飲咖啡，等梗我繼續講落去...



『呃...即係我老婆佢都係一個好樂天既人...但我老婆就好有主見之餘，仲好識得照顧人...但Zoe呢...係一個樂天同都幾有主見既人...但就需要有人從旁協助...呃...唔係話Zoe笨手笨腳...粗心大意...只係...未夠火喉...』我越講越覺得自己1999...

「下？」陳生都聽到一頭霧水咁...

『簡單D黎講...即係我老婆還我老婆...Zoe還Zoe...我分得好開...』咁講夠唔夠簡單？

「唔...」陳生放一放低杯咖啡，「簡單D黎講，你係唔係對人有意思先？」

係唔係對人有意思...

唔...呢層...

『我都唔知...』呢個問題...我都唔敢去問自己...



陳生冷眼咁望住我：「我開始質疑自己俾你坐呢個位既決定係唔係錯...」

『呃...』有乜關係呢...

「你一定心諗“有乜關係呢？”。你就連自己既感覺都唔可以肯定既話，咁仲有乜野係可以肯定架呢？」陳生繼續Keep住冷眼咁望住我...

『呃...』好似好有道理咁...

「係鍾意就鍾意。係唔鍾意就唔鍾意。駛乜呃呃哦哦呢？」陳生拎返起杯咖啡，飲一口。

『之但係...心裏面有一個...一直都放唔低既人喺道...係無可能...再真心真意...愛上另一個...』我係知道...我係放唔低我老婆...

陳生聽完我講呢句話之後，就好似定左格咁...拎住杯咖啡...望住杯咖啡...

陳生一直都望住杯咖啡...望住杯Blue Mountain No.1…

究竟陳生手上杯Blue Mountain No.1裏面有D乜野呢？

點解我會喺陳生對眼入面，睇到好似好多影像咁架呢？

陳生就一直望住杯Blue Mountain No.1…望左好耐...望左好耐...

我都唔敢打擾佢...

因為陳生時不時都會咁...

時不時都會好似放空咁...

不論係開大會...定係同我地D員工食飯...

陳生總係會喺某D時候放空...

好多人都話陳生喺呢D時候係Meditation...

Meditation完就會有驚世言論！

之但係好多時等到陳生Meditation完，都只係“嗯”或者“哦”就行左去...

佢心裏面諗梗乜？就真係無人知...

只有佢自己先知...

但普遍大家都認為陳生係諗左一D我地唔會諗到既構思出黎！只係同我地講黎都徙氣～所以唔講...

靜靜咁等...好耐心咁等...

靜靜地好耐心咁等左好一陣子...

望住陳Meditation好一陣子...

「心裏面有一個...一直都放唔低既人...情情愛愛呢家野...我真係識條鐵咩...不過我聽我老婆同細妹講過...話好似有一個叫...叫乜野既人...好似係D乜野愛情專家...乜野咁上下...」陳生諗下諗下...

乜野人？乜野專家？乜野咁上下？

陳生噏梗乜呢？

果然高人係難明D架下...

「丫～係乜野呢？」陳生仲係諗下諗下...

就喺呢個時候...

“很感激 喜歡我十年仍不休”

係鈴聲？係電話鈴聲？

“近日舊同學說我已 耿耿於你心六百週”

陳生喺件西裝褸既內袋裏拎一拎出電話，望一望之後：「喂～喺邊丫？」

望下陳生笑笑口咁講幾句...

「又要我估丫？」陳生好似氹梗小妹妹咁既口吻...

我又望下出面...四圍望一望...

「我只係聽到你好似跑得好急咁姐～」

我就望到陳生身後...正有一個著住白色小背心...黑色短裙仔...

「你唔係跑梗，都係急步梗～」

向住陳生既方向...

「唔...我估你岩岩入左商場～」

即係我地既身處方向...

「唔係？」

衝梗埋黎！

「哥～」個女仔一手就從後攬實陳生條頸！

「喂～咁快黎到既？」陳生嚇左一嚇後，攬一攬住呢個女仔，摸一摸佢把秀髮...

呢個叫得陳生做阿哥既女仔...就係陳生既細妹？

「人地掛住你丫嘛～」陳生個細妹仲要扭下扭下...嗲下嗲下咁...

我再睇清楚D陳生個細妹...仔細D睇清楚D陳生個細妹...

陳生個細妹...不論係髮型...面形...神情...都同Super Girls裏面既Heidi生得一模一樣！

分別只係陳生個細妹把頭髮係黑色...而Super Girls裏面既Heidi多數都係灰灰銀銀...

「係喇係喇～我都好掛住你丫～」陳生氹一氹佢細妹，「點丫？感覺如何丫？」

「我都係鍾意Aventador多D姐～」陳生個細妹喺條裙袋裏面拎左條...Lamborghini車匙出黎...

條車匙上仲有一粒...水晶匙扣？

「嗯～我都估到你架喇～」陳生接一接過條車匙...

「我同你一樣咁長情丫嘛～」陳生個細妹再攬一攬實陳生...嗲一嗲...

睇黎陳生同佢細妹都好好感情下...

好感情到...唔知仲以為佢地係情侶...

陳生摸住佢細妹把秀髮：「係呢？GiGi呢？你話同佢一齊黎行街街既？」

「佢呢...」陳生個細妹仲未講完...

「HI。」一把冷漠既女仔聲就由陳生身後傳出...

我望一望陳生身後...正正就有個貌似Super Girls裏面既Yanny既女仔企左喺道...

個著住條黑色吊帶連身短裙既女仔帶住冷漠既微笑...雙手拎住個白色手袋仔...

好一個冷艷美人...

望一望陳生個細妹...再望一望呢個叫GiGi既女仔...唔講仲以為Super Girls喺附近有Function...

「GiGi～」陳生好似有D尷尷尬尬又期期待待咁望住呢個叫GiGi既女仔...

「飛揚。」GiGi望住陳生笑一笑…

而喺GiGi既眼神之中...好似充滿住...充滿住...充滿住D乜呢？

我噏唔出...但就總係好似有好多說話咁...

「咁我地去行街街喇～你今晚記得早D帶埋阿嫂返黎食飯呀！唔好要我地等咁耐丫～」陳生個細妹就翹一翹住GiGi...好似急住走咁既樣...

「喂喂喂！等等先！」陳生拉一拉住佢細妹，「我想問埋你呢～你好耐之前咪講過話網上有個怪人既...」

「下下下？咩怪人丫？」陳生個細妹好似一頭問號咁...

「呢～話咩愛情專家咁架呢？」陳生繼續問～

「下下下？有乜野愛情專家咩？無丫無丫～」陳生個細妹好似有D扮傻咁既樣...

「唔係呢...你有咁講過架～好似話好了解女人咁架～」陳生繼續追問～

「下下下？無丫～邊有人好了解女人姐～無丫無丫～」陳生個細妹越黎越似扮傻咁既樣...

「無咩？唔係喎…我都有聽過你阿嫂講過...好似係同一個人黎架喎...」陳生仲繼續追問～

「下下下？阿嫂同你講過既野，我就更加唔會知啦～」陳生個細妹谷一谷起塊面豬登...

「唔係喎…好似叫乜野…乜野情…情…情…情聖！係喇！係情聖呀！」陳生靈光一閃咁既樣！

「下下下？咩情聖丫？邊個情聖丫？我都無講過有個叫情聖既人講過有關愛情既野～你一定記錯喇～你一定記錯啦～」陳生個細妹又再次扮晒傻咁...

「我有記錯咩...你真係無講過咩...」陳生一頭問號咁既樣...

「你一定記錯喇～你一定記錯喇～我同GiGi行街街先喇～記得今晚丫～拜拜～」陳生個細妹又好似急住走咁～

「拜拜喇飛揚～」GiGi又帶住充滿說話既眼神，望住陳生揮揮手...

「拜拜～」陳生望住兩個靚女揮揮手...

我又望住兩個靚女既背影越行越遠...越行越遠...直至消失喺我眼前...

「喂…你望夠未呀？」陳生冷冷放下一句...

『下下下？我我...我無丫...我無望丫...無無無無無...』我無望丫...我無望丫...我發呆咋嘛…

「仲話無？你唔好以為我無留意到你望住我細妹同GiGi對腳丫...」陳生冷眼望住我...

『我我我我我...我真係無丫...我真係無丫...我只係好奇佢地兩個...一個就好似Heidi...一個就好似Yanny咋...』我真係純粹好奇咋...

「嗯...都係既...阿Wing一直都好似Heidi...而GiGi留返長把頭髮...發育左之後...就越黎越似Yanny...」陳生諗下諗下...

發育左之後？

點解陳生會講到好似...好似同GiGi有D...唔...

「不過我警告你呀！唔好對佢地兩個有乜野無謂既FF呀！」陳生怒視住我！

『唔會唔會！一定唔會！況且只係見一面姐...邊道會有FF丫...』陳生咁兇既樣...我都係第一次見...

「唔止一次...下年仲會日日見...」陳生諗左一諗...

『下？』我唔係好明陳生既意思...

「佢地下年就會黎我地公司工作...會入你既部門...到時你會有好多機會見到佢地兩個...」陳生又諗下諗下...

『哦...哦...』入黎我地公司工作...

仲要係入我既部門...

唔係咁大鑊呀化？！

雖則...話就話我對佢地兩個無興趣...

一定唔會對佢地兩個有乜野FF...

之但係佢兩地個同公司既大老細有著咁密切既關係...呢點本來就已經夠晒麻煩...

而且仲要生得咁靚女…

仲要咁似明星…

唔好話就係我地既Department...俾其他Department既同事見到...都一定會瘋狂愛上...

俾咁多狂蜂浪蝶纏住呢兩個大美人既話，大老細就緊係唔Like啦...

咁我就一身蟻...

「到時你要好好咁幫我睇住佢兩個。唔好俾D無謂既人煩住佢地。知道嘛？」陳生用上大老細既口吻...

『知...知道...知道...』仲要開到口要我睇住佢兩個添...

要做好呢D咁艱鉅既任務...今次真係死得喇…

「記住記住…千萬唔好打佢地兩個主意...唔係既話...我實唔會放過你。」陳生目露凶光咁...

『唔敢唔敢...你真係好錫你細妹呢...』要睇住佢兩個唔俾D狂蜂浪蝶纏住已經夠煩...我仲點敢打佢兩個主意...

不過講開又覺得奇怪...

你話大老細緊張佢個細妹，所以唔想俾其他男人接近佢細妹就話姐...

但睇嗰個叫GiGi既女仔...應該就係大老細個細妹既好姊妹...

點解大老細又會咁緊張呢個女仔呢？

究竟大老細同呢個GiGi...又有乜野關係呢？

唔通...

無理由架…大老細咁愛佢老婆…又點會...

講開大老闆娘...

『係呢～同老闆娘環遊世界開心嘛？好玩嘛？』大老細返左黎成個星期，我都未問候過佢添...

「都真係幾開心幾好玩架～不過都係有D急～我老婆話下次要再預多D時間喎～唉～唔駛返黎睇住公司咩真係～不過無辦法啦～老婆大人叫到～我就睇下下年有無時間同佢再遊一次長D時間架啦～」陳生笑得好幸福咁～

其實陳生真係好錫佢老婆～

不過又難怪既～

撇除左大老闆娘係超級有錢女之外，仲要係一個超級大美人～

雖然我唔係見過大老闆娘好多次～都只係兩三次～

但大老闆娘真係超級靚女～

而且身材仲好好～

除左外在美，亦有內在美～

大老闆娘真係超級大好人～

又有禮貌又友善～

對住我地呢D員工又無架子～

仲親民過大老細～

同我地傾既話題又貼地～又經常帶住親切既笑容～

大家閨秀得黎又平易近人～

唔講真係唔知佢係一個生於豪門既名門之後～

所以話又好難怪大老細咁愛佢老婆～咁錫佢老婆既～

『咁你地打算幾時生返個小朋友丫？』我又隨便咁問一問～

「生小朋友？哈～我都想～之不過我老婆唔肯同我生呢～」陳生無奈咁笑一笑～

『點解丫？怕痛？怕身材會走樣？』我諗呢D都係女人唔願生BB既最大原因～

「唔係唔係～佢係話怕幫我生左個囡囡出黎既話，我只會錫囡囡唔錫佢喎～」陳生又好無奈咁擰擰頭～

『下？唔係丫嘛？竟然會係因為呷自己個囡醋？』我又真係唔係好敢相信會喺因為呢個原因～

點睇老闆娘都唔係D咁大醋意既女人喎～

「唉～你唔好話丫～女人既妒忌心真係好重架～再大方既女人，都會有葡萄既時候～」陳生又好無奈咁笑一笑，望住手上條Lamborghini車匙...望住車匙上既...水晶...

再大方既女人...都會有葡萄既時候...

係唔係真係咁架呢？

係唔係全世界既女人，都係一個大醋酲黎架呢？

唔知呢～真係唔知呢～

望住陳生手上條Lamborghini車匙...望住粒水晶搖下搖下...

而家睇清楚D先知...原來粒水晶係...

『係米奇？』粒水晶係粒米奇頭黎架？

「嗯？」陳生望一望住我。

『原來係粒米奇頭黎架？你粒鎖匙扣都幾特別架喎～好似...吊咀咁既？』真係十足十一條吊咀吊左喺條車匙上面～

「嗯...其實...本來就係一條米奇吊咀...」陳生眼定定咁望實粒米奇頭...

原來...原來真係吊咀黎...

但點解...點解陳生會將條吊咀...吊喺車匙上呢？

『究竟我地幾時先會...再有機會...再見呢...』陳生一直情深深咁望住粒吊咀...

從陳生既眼神之中，我既腦海中突然閃出一首歌...

“燦爛的晶瑩 代表絲絲愛意

暗裡隨著閃閃光輝 映照得奪目耀眼

幻像似的愛情 始終會消失去

那幻影卻一一再現我心底”

究竟粒吊咀暗藏著D乜野？

我就唔方便開口問...

之但係由陳生既眼裏可以睇得出，一定係一段刻骨銘心...永不磨滅…抱憾終生既過去...

點解我會知？

或者係因為...我都係一個有過去既人...

同陳生食完個Lunch，又吹左一陣間水之後...我就同陳生黎到停車場。

同陳生行到埋黎架“Argento Centenario”色（其實即係銀色...）既Lamborghini Centenario Roadster LP 770-4旁邊...

“咇”陳生撳一撳手中條車匙，解一解鎖...

「我知一定又俾班員工話我唔知去邊道威架喇～不過呢個客...我唔親自去係唔得...鬼叫我同佢係咁多年既好兄弟咩～嗱～大馬呢單生意一到手，全公司上上下下都有人工加～仲要幾可觀添～之不過...你知好喇！唔好講出去丫！乜人都唔講得架！免得佢地個個掛住發夢唔做野！知道嘛？」陳生大大力拍一拍我膊頭...

『嗯嗯...知道...知道...我一定唔會講出去...』唔想我講出去就唔好同我講啦...

D老細就係咁麻煩...

又要忍唔到口…又要講俾你知但又唔俾你講俾其他人知...

「嗯～」陳生打一打開鍘刀式車門...

陳生上一上車，坐一坐上駕駛座後...望一望客座位...

「嗯？係...GiGi既耳環？」陳生拎起隻銀色既耳環仔望下望下...

係一隻純銀既耳環...

「呢個GiGi丫...」陳生笑一笑，袋一袋起隻純銀耳環...

“吼！”6.5L V12引擎怒吼一聲！

「喂～記得我同你講過既野丫～」陳生再提一提醒我...

『哦哦...我會記得唔同任何人講加薪件事...』你唔提我都唔記得有呢件事啦...

「唔係丫！」陳生冷眼望住我...

『下？』唔係呢件又邊件丫？

「我係話搵嗰個情聖呀！」陳生繼續冷眼望住我...

『哦...哦...』搵情聖...

「嗯...盡快搞掂，唔好拖人咁耐丫。女人既青春好寶貴架！」陳生再三叮嚀...

『嗯嗯...知道...』

「咁好啦～拜～」陳生閂一閂車門...

『嗯嗯...慢行...』

“吼！吼！吼～吼～～吼～～～”望住刻有‘CENTENARIO’ 6 di 20既Lamborghini Centenario Roadster LP 770-4絕塵而去...

搵…情聖…