[短故]講你都唔信，我而家被困左係一棟舊公屋o既13樓度

[短故]講你都唔信，我而家被困左係一棟舊公屋o既13樓度


1.

是咁的，

我而家身處係一棟舊公屋o既13樓等緊lift，身邊仲有一位靚女同我一齊等緊。

個靚女呢就...就好靚女囉，高高瘦瘦咁，上半身著住件質地硬硬地o既白色外套，





下半身就一條黑色緊身長褲，兩件野都好貼身，顯得個body shape好誘人。

對腳就著住對純白色高踭鞋，上面有個蝴蝶結。

我再偷望下佢個樣...標準靚女樣囉，眼大大嘴細細皮膚白白，細節請自行想像。

拿講明先，呢個唔係溝女故，之後發生o既事完全無糖，想睇甜野o既讀者可以出番去。






係呢種幾廿年樓齡o既舊公屋竟然會遇到咁高質o既靚女，以我o既偵探頭腦一諗就知，

佢一定係黎探望住係度o既公公婆婆爺爺嫲嫲，真係心地善良o既孝順好女仔。

遇到咁好o既女仔唔問佢攞番個電話我就枉為男人啦﹗


「喂，你好﹗」我捉住同佢眼神接觸o既一剎那開口搭訕，同時皺起眉頭chok左個粱朝偉樣。

「你好。」靚女呆左一呆先答我。





「你...做咩一個後生女會黎呢種舊公屋o既？」我咁問。

「關你咩事姐。」佢講完就另埋一邊唔再望我。


好﹗好一個冷酷美人，呢種女先至最能夠勾起我征服o既慾望﹗

講下姐，現實中我一個死毒撚比佢咁疾法仲唔即刻收皮咩。


就係咁，我同佢無再講野，靜靜咁睇住升降機個數字慢慢落到黎13樓。

15...14...13...12...11...





哇屌你飛lift?

我即刻喪禁個lift制，個制舊到已經唔識發光，根本睇唔出有無禁到。

如是者，我同靚女唯有繼續等。

o岩o岩比佢疾完，而家氣氛鬼死咁尷尬，唉早知當初就唔應該開口搭訕，做番個安份o既小毒撚啦。

我地等等下，終於等到架lift再次黎到13樓，然後...屌﹗又飛﹗

跟住落黎你估都估到啦，架lift層層都停，就係唔停我13樓，真係吹脹﹗

不過係呢種幾廿年樓齡o既舊公屋，壞lift都唔係咩出奇o既事，無lift搭咪唯有行樓梯囉。






但係諗深一層，呢個可能係上天唔想我咁早放棄，要比多次幾會我去溝...去認識身邊呢位靚女，

所以整壞架lift等我可以同靚女一齊行樓梯都唔定喎？

天賜良機，我鼓氣勇氣再同個靚女講野。

「喂睇架lift應該係壞左架喇，不如我地一齊行樓梯落去啦。」我一路講一路keep住個粱朝偉樣。

「哦，好啦。」佢考慮左一小陣就答應。


YEAH﹗得米喇，一陣佢行到攰我再黎個公主抱抱佢落樓等佢愛上我再直接抱上酒店開房﹗

唉講下姐。






如是者，我同靚女準備一齊行樓梯落樓。





我點都估唔到，個靚女之後竟然會想殺左我。

唔係講笑，係真係殺豬果種殺。

今次真係仆街鳥。







2.

頭先講到我同個靚女準備行樓梯落樓，不過個title講到明被困左係13樓，又點會真係比我地落到去丫。

要落樓梯先要開左道防煙門，問題係度門開唔到。

「屌你，開唔到o既？」我企係道門前面，又推又拉又撞咁，都係開唔到。

「比我試下？」靚女行埋黎想試下開門。

屌你我開唔到你都無可能開到架啦下化？

「哦，好啊你試下啦。」我咁講。

咁佢當然都係開唔到架啦，公屋D樓梯一般都有兩條，我地又再行去另一邊o既防煙門試下，都係開唔到。

痴撚線兩邊都開唔到，撞鬼你咩，一陣大吉利是發生火警就真係唔慌唔和味囉。

「可能係門後面D雜物卡住左姐，我試下撞開佢，你企開D。」我咁同佢講。

於是乎我出盡九牛二虎之力...其實係一條毒撚之力去撞道門，結果都係撞唔開，仲撞到我好撚痛。

我兩邊都出盡力撞過，但一樣撞唔開。

「唉算喇，唔好勉強，一陣撞爛左要賠錢就唔好啦。」我掃一掃件外套，不失霸氣咁講。

「哦。」條女應左一聲。


跟住落黎又還原基本步，我同靚女行左番去等lift。

又再等左幾輪，架lift都係唔停13樓。

我同靚女都開始等到唔耐煩，靚女突然開口話：

「喂，不如打999啦。」

「下？唔洗下話？落唔到樓姐。」我笑一笑咁答。

「咁唔係點喎，架lift又唔停。」佢話。

「咁你想打你咪打囉。」我同佢講。

「你打啦。」靚女一個傳球。

「點解係我打，又係你話想打o既。」我回傳。

「咁你係男人黎家麻﹗」直線抽射，世界波啊﹗

「好，我打。」我即刻攞個電話出黎禁999，一陣比人告浪費警力都係我o既事，同靚女無關。

如是者，我打左999。

然後，傻o既都估到啦，呢種時候就奉旨打唔通架啦。

「喂無訊號喎，你睇下你部手機有無？」我一邊掃部機一邊講。

於是靚女又攞佢部手機出黎掃。

「我都無訊號，仲連網都上唔到添﹗」靚女話。


「係呢你叫咩名啊？」我突然黎一個底線傳中，等佢防不勝防。

「我叫Suki，叫我Suki得喇。」靚女掃住部手機，心不在焉咁答。

你叫Suki唔通我叫你Mary咩。

「我叫阿傑，睇黎我地仲要被困係度一段時間。」我咁回應。

終於知道靚女個名叫Suki，我同佢o既距離成功拉近左一大步喇﹗

「唉咁而家點喎﹗」佢好唔高興咁話。


確實，而家o既情況一D都唔值得高興，我地仲係被困左係一棟舊公屋o既13樓度。

點算呢？我o既偵探頭腦不斷運轉尋求解決方法。

「啊，我有計﹗」Suki突然開口話，估唔到係Suki早我一步諗到方法。

「咩計？」我固且聽下佢有咩辦法。

「不如你試下係度爬落12樓丫？」Suki指住lift口對出個露台。

露台得米半高，上面裝左條鐵桿防止小朋友爬出去，越過鐵桿就係13層樓高o既bungy jump好去處。

「下？你講笑炸下化？」我行埋去露台度，探頭望落去，13層樓，話高又唔算好高，都夠我跌到變柿餅o既。

「唔係講笑架，爬落一層之麻，你咁高一野就落到去啦﹗」Suki好認真咁講。

我一野豈止落一層，分分鐘落夠18層啊。

「不如我地試下伸個頭出露台大叫求救，睇下有無人聽到？」我提出另一個建議。

Suki諗左一陣就答：「咁好啦，試下啦。」

如是者，我同Suki好似D公屋痴線佬咁對住出面大叫。

不過，又點會有人應我地丫。




3.

大叫左一輪，都係無人理；又番去等左幾輪lift，都係唔停13樓。

我又再度嘗試踢開度防煙門，都係踢唔開，道門關到鬼死咁實。

搞左咁耐，天色都已經開始昏暗。

「點算啊，我地會唔會永遠困住係呢度架？」Suki開始展露疲態，踎左係lift門旁邊。

「傻豬黎o既，點會呢？」估唔到我有生之年會有機會對住個靚女講呢句對白。

我仲想補一句「有我陪住你ga ma」，不過淆底無講，我驚講左佢會殺左我。

不過講真，搞到而家都仲未落到樓，我自己都開始心慌慌。

總唔可以再係咁落去，唔通我真係要試下係露台爬落12樓？

呢個時候，Suki突然黎一個踎低抱膝抽泣，呢個動作比一個靚女使出黎殺傷力簡直爆晒燈，

而且對死毒撚系仲有雙倍傷害加乘。

「喂喂喂你唔好喊啦﹗」我即刻走埋去想安慰佢，但又唔知點落手。

Suki無理我，繼續抽泣。

我雖然係毒撚，但點都算係一個男人，見到個靚女咁喊法又豈能不動心呢？

「好喇好喇，我試下爬落12樓求救，你唔好喊啦﹗」我咁同佢講。

佢抬頭望番我，對眼又紅又濕，面色仲好差，好似好辛苦咁，不過D妝竟然一D都無溶到。

「唔...等我幫你丫﹗」Suki企番起身咁話。

如是者，我行埋露台度，準備爬過鐵桿。

「拿你睇實我啊，一陣有咩事記得伸隻手比我拉一拉。」我吩咐Suki，雙手壓住鐵桿，一隻腳跨左過去。

我騎住條鐵桿，再望一望下面...屌原來13樓咁鬼死高，我個心噗噗噗噗咁跳到勁快，好撚驚啊媽咪﹗

Suki企係後面眼仔轆轆咁望住我，睇個勢已經騎虎難下，呢鋪一輸就輸成世架喇﹗

屌那媽，頂硬上﹗

我跨埋另一隻腳，以奧運選手級o既體操動作一野fig左落去，再黎一個完美著地，終於完成左呢次艱鉅o既挑戰﹗

唉，FF下姐。

其實我仲on99生勾勾咁騎左係條鐵桿上面。

「點啊你落唔落去架」Suki o既眼神透露左佢o既想法。

我回望Suki。

「你小心D啊。」Suki咁講。

哇真係多謝關心喎。

我再望一望下面，D風吹埋黎搞到我打晒冷震，今次真係淆到仆晒街啊﹗

「啊係喎﹗」我心中突然萌生一個救我一命o既想法。

「呢度公屋黎ga ma，不如我地逐家逐戶拍門求救啦，話唔定固網電話打得通呢？」我提議。

點解我而家先諗到架，我真係一個慢熱o既天才﹗

「吓？逐家逐戶拍門牙？」Suki嘆一口氣咁話。

吓？點都好過要我搵命搏丫？

「好啦，咁你去果邊我去呢邊啦。」Suki死死氣咁講。





如是者，我總算執番條命仔。

因為如果我真係嘗試爬落去，我一定會無命。

Suki唔會比我有命落到去。



4.

就係咁，我同Suki分頭去逐家逐戶拍門求救。

一層有20個單位，我負責01~10號室，Suki負責11~20號。

我每一戶都有拍門禁鐘，但全部都無人應。

唯獨是1304號室，我無去拍門，因為我知道果度唔會有人住。

1304號室，門戶緊閉，門口放左一個香爐，一籃生果，一D燒肉同零食，一束花，

仲有一D道具，擺左個小小o既祭壇。

其中有D野係我擺o既，另外有D係唔知邊個最近擺o既。

經過1304號室時，我跪低叩左三個響頭。

我黎o既時候都做左同樣o既事。

除左1304號室，我全部其他單位都拍過門禁過鐘，但都無人應。

係試完最後一個單位之後，我聽到Suki大叫。


「阿傑，快D過黎啊，阿傑﹗」


我聽到即刻9秒9衝過去Suki度。

原來Suki試到1314號室，終於有人應門。

「阿傑，睇下，有個阿婆住係度啊﹗」Suki有小小興奮咁講。

咁又係o既，過左咁耐都見唔到其他人影，終於出現左一個阿婆，真係有小小激動架。

「做咩事幹？」阿婆企係半開o既木門後面，含糊不清咁講。

呢個阿婆個樣睇落無90都有85，真係隨時香左都唔出奇個種。

「阿婆，係咁o既，我地有D事，想借你屋企個電話用用啊﹗」我盡可能用溫柔又值得信賴o既聲線同阿婆講。

根本呢種就係騙子最常用o既語氣。

「哦，好，好，入黎啦。」個阿婆又信喎﹗

唔怪得D寶藥黨長做長有啦﹗

咁我地又唔係騙子，入到屋之後我即刻攞左個固網電話黎打...

屌你直頭係無聲o既﹗

「阿婆你有無交電話費架？」我問。

「唔知架，我都唔打o既。」阿婆咁答。

Suki入到屋就攤左落張木凳度，個樣好攰咁。

「肚...肚餓食餅乾啦﹗」阿婆係唔知邊度攞左盒餅出黎，放左係枱度。

「哦唔洗喇唔該。」我話。

雖則我都開始餓，但點都唔會飢不擇食到去食呢D唔知咸豐幾年出產o既阿婆餅乾。

「我...我個廁所唔通你幫我通通佢丫...」阿婆突然咁話，佢好似當左我係果D家訪o既義工。

「哦，好，陣間先。」我還掂無野做就幫幫個阿婆啦。

「尋晚歡樂今宵...食剩D餸...我個光管唔著...」阿婆開始九唔搭八。

「哦...係啊...咁咪好囉...羅蜜歐與朱麗葉啊麻...」連我都開始九唔搭八。

就係咁，我同阿婆傾左一陣，我完全聽唔明佢up D咩。

之後我入左廁所幫阿婆通一通個馬桶，順便自己解決埋。

「Suki，個廁所我搞掂架喇，你用啦。」我搞掂出黎就同Suki講。

「唔。」Suki應左一聲。

「阿婆呢？阿婆去左邊？」我問。

「阿婆番房訓左。」Suki講完就入左廁所。

我望入間房，見到阿婆訓左係床上。

「Suki你肚唔肚餓啊？我整D野比你食丫？」我隔住廁所門問Suki。

「好。」Suki答。

「婆婆，借你個廚房用一用啊﹗」我大聲問，阿婆無應到。



於是乎，我走入廚房周圍搵下有咩好食，結果只係搵到一包米粉同幾隻雞蛋。

煎蛋汆米粉，加D雞粉調味，點都好過食阿婆餅乾丫。

就係咁，我係阿婆屋企廚房煮緊米粉。

煮煮下，忽然Feel到背後有一股寒意，我另轉身一望，嚇到差D漏尿﹗

「哇屌，Suki你行路無聲o既？」我轉身望見Suki企正我後面，手上仲拎住把生果刀，嚇到我個心離一離。

好彩頭先o岩o岩柯完，唔係實整濕條底底。

「我...見有蘋果，想問你食唔食之麻。」Suki舉起個蘋果，眼甘甘咁望住我。

「哦，好，等我煮埋D米粉先。」我答。


如是者，我同Suki係廳食左碗米粉同蘋果，呢個時候天色已經入黑。

食米粉時我嘗試開電視，但果然都係開唔到。

阿婆屋企o既電視簡直係童年回憶，都唔知幾耐無見過咁Q大舊o既電視喇。


客廳唯一o既照明就係頭上一支光管，光線忽明忽暗。

天花生晒霉菌，白色o既底漆嚴重剝落。

周圍擺滿陳舊o既木家私，牆上貼左D發黃o既報紙，地下有一部左另右另o既電風扇。

時間...突然流動得好慢......就好似停頓左咁。


可惜Suki無停頓到，唔係就可以玩時間停止系列。


我同Suki不知不覺已經被困左幾個鐘頭，感覺好似與世隔絕左好多年咁。

無辦法離開13樓，打唔到電話，上唔到網，除左個阿婆見唔到其他人...

我忽然覺得好驚，你或者會話我好遲鈍，但我真係到而家呢一刻先忽然覺得，

呢幾個鐘頭發生o既事真係...好唔尋常。

我而家仲生勾勾坐左係度食米粉，但幾個鐘頭後o既我會點？

我覺得我會死。

唔知點解。



可能係報應。



食完米粉，Suki坐左係度掃佢部上唔到網打唔出電話o既手機，我就攞左D碗入廚房洗。

洗洗下碗，Suki突然尖叫。

係尖叫，好似D恐怖電影女主角咁。

我即刻跑出黎睇下咩事，我見到Suki跪左係阿婆間房度。

「Suki﹗發生咩事啊？」我標晒冷汗咁問。

「阿婆...阿婆佢...死左......」Suki望住阿婆，雙手掩面咁講。





5.

「阿婆...阿婆佢...死左......」Suki望住阿婆，雙手掩面咁講。

阿婆死左。

我行埋去床邊，見到阿婆訓左係度，一D氣息都無。

我摸下阿婆手腕，摸下條頸，嘗試摸個脈搏出黎。

但係，咩都摸唔到，連體溫都無。

阿婆真係死左。


「點會咁架...」Suki變到好激動，雙手掩面喊左出黎。

呢次可能係佢咁大個女第一次親眼見證人類o既死亡。

「Suki，你係點發現阿婆死架？」我盡可能保持冷靜咁問。

「我...我想問阿婆有無平安鐘之類...可以聯絡其他人...但係問極都無反應，咁我咪......」

Suki已經喊到無辦法講得清楚。

「你出番去先啦。」我係褲袋攞左包Temple比Suki抹眼淚，扶左佢出廳，然後番入房，關上左房門。

我開始檢查阿婆o既遺體，我無除佢衫，只係仔細睇下身上有無D咩可疑o既地方。

我唔係懷疑Suki...只係...以防萬一姐。

阿婆身上無任何明顯傷痕，周圍亦都無掙扎痕跡，根據我偵探頭腦o既分析，阿婆應該係死於自然。

檢查完之後，我用床上張被蓋過左阿婆o既遺體，然後出番房。

Suki已經喊完，坐左係廳度發呆。

我閂埋房門，坐左係廳，同Suki一齊發呆。

除左發呆，我仲可以做D咩？

發現屍體，一般黎講，我知發現屍體好唔一般，但一般黎講應該打999丫？

但係我地而家叫天不應，叫地不聞，就連唯一應我地門o既阿婆都死埋。

我覺得心o中既希望都同阿婆一齊消失左。

我應該點做好？



係發左唔知幾耐呆之後，我同Suki講：

「我再出去睇下搭唔搭到lift，仲係搭唔到o既話，我地今晚可能要係度過夜。」

如是者，我再出去試下，架lift如我所料地依舊唔停13樓。

我又順便去踢左道防煙門一腳，踢唔開。

我再望一望出露台，條街已經黑晒，只得依稀燈火。

我大叫左幾聲，但都係無人理。

番入阿婆屋企，我係房個衣櫃搵到兩張棉被，我攞左出黎拍兩拍，當做床舖咁用。

估唔到我有生之年，可以同咁高質o既靚女共度良宵，只不過係要訓地板，同埋隔黎房有條屍姐，無傷大雅。


就係咁，我同Suki今晚要係阿婆屋企過夜。

我用棉被包住身體，訓左係地板上，條被有陣怪味，好難頂。

Suki訓左係廳o既另一側，似乎無意同我發展進一步o既關係。


我訓左係地，腦海不停思考今日所發生o既事。

所有事都好離奇，但我覺得，我可能知道呢一切一切點解會發生。

我可能知道今日所有事情發生o既原因。

所有事情o既罪魁禍首，就係我。

其實我，唔係好人。

我係殺人兇手。





6.

對我黎講，呢棟舊公屋，並唔係陌生o既地方，o岩o岩相反，呢度係我充滿回憶o既地方，

呢度係我細個住過o既地方。

我仲讀緊小學o既時候，係住係呢度o既13樓1303號室，隔黎1304號室住左我兩個老友o既家庭。

佢地係兩兄弟，大佬叫大B，細佬叫細B，佢屋企姓何，所以個個都叫佢地何B仔。

何B仔住我隔黎，讀同一間小學同一班，我地由細玩到大，由番學玩到番屋企，係世上最要好o既朋友。

我細個果陣係一個on9仔，終極on9仔，如果on9有極限咁個極限就一定係我。

我好中意整估人，渣人春袋，千年殺殺入人屎眼係每日必做，仲成日諗D新花臣去搞人。

何B仔兩兄弟成日同我一齊整估人，我亦都成日整估何B仔佢兩個。

收埋人地個筆盒，丟人個書包落街，買臭彈上堂放，你諗得出小學雞會做o既on9野我地都做過，

你諗唔出o既我地都極可能已經幫你諗埋再實行埋。

大B份人比較惡死，比我整估完之後會追住我黎打，視乎嚴重情度決定打手、打肚、打面定打賓周。

細B就比較林善，比我整估完淨係識笑，重來唔會還擊。



小學六年班果年，有一次我無意中發現煤氣原來好鬼臭。

我果陣時根本唔知煤氣係咩黎，淨係知只要整鬆廚房煤氣爐後面條管就會有臭氣放出黎。

我為左整估何B仔，係去佢屋企玩果陣偷偷入廚房整鬆左煤氣爐後面條管。

果陣時佢屋企無大人。

我以為果D只係臭氣黎。

我以為你地比我臭完就會黎追住我打。

我真係唔知會搞成咁架。

對唔住...對唔住啊﹗

我永遠都會記得果次睇新聞，報導員講話：「...消防員係起火單位內發現兩具男童焦屍......」

我喊得好西利。

我老母摸我個頭安慰我，我推開我老母隻手。

唔好安慰我，我唔值得人地安慰，

我係殺人兇手。

大家都以為係何B仔貪玩搞到火警，

其實罪魁禍首係我，

我係殺人兇手啊﹗



我成日都會發同一個噩夢，夢見何B仔追住我黎打，追追下，追追下，

佢地燒著左，變左黑炭，

得番我一個，繼續跑，繼續跑，

佢地條屍愈黎愈遠，

然後我就會驚醒。




我驚醒左。

我係阿婆屋企，又再發左果個噩夢。

但我醒番之後，感覺好似未醒咁，因為眼前所見o既景象實在太過唔真實。

我眼前係一片火海。

火海啊屌你老母，火築啊﹗

我即刻彈起身，想叫Suki，但Suki已經不見人影，留底一條燒到一半o既棉被。

大門已經完全著晒火，想要由正門逃走已經係不可能，客廳已經充滿濃煙，我一吸氣即刻咳到痴肺。

我下意識走左入阿婆間房，閂埋房門阻止濃煙湧入黎，但咁做無異於自掘墳墓。

阿婆o既遺體仲訓左係張床上面。

屌我唔要做羅密歐啊﹗個朱麗葉仲要係個阿婆？

咳到甩肺o既我即刻撲埋去窗口度吸氣，呢個時候我見到一線生機，

窗口個窗花已經舊到爛左一半，只要拆左個窗花爬出去，可以立足於窗下面果條石屎結構，

咁就可以避開火同濃煙﹗

我即刻起勢拆鳩左個窗花，然後爬出窗外。

呢個時候，房門竟然被打開左，一股熱氣撲面而來，濃煙之中出現Suki o既身影。

「哇Suki你仲未死架﹗」我未經思考就大叫。「快D過黎，捉住我隻手，爬出黎避下啦﹗」

Suki即刻衝埋黎，捉住我隻手，但佢唔係想爬出窗，佢係想推我落街﹗

「哇屌你Suki你做咩啊﹗唔好啊喂﹗咪玩啦喂﹗」我即刻反捉住Suki，穩住身體。

但Suki完全無手軟，一直出力想推我落街，如果我鬆手就實會跌到粉身碎骨﹗

「Suki﹗停手啊﹗Suki﹗」我死捉住Suki唔放，佢塊面已經比煙燻到黑晒，面目非常猙獰，

眼神極度凶狠，就好似我係佢殺父仇人咁。

「你係咪嬲我整米粉果陣收埋塊午餐肉比自己啊？對唔住囉﹗唔洗攞我命下化？」我老虎蟹咁唔放手捉住Suki，

Suki推我o既力度不減反增。

我同Suki不斷糾纏。

糾纏其間，我好似明白左一D事情。

「對唔住啊﹗」我咁講。

我好似係Suki臉上，見到大B追住我黎打果時個樣。

「對唔住啊何B仔﹗係我衰，係我賤，係我抵死......」

以前比大B打，只要咁道歉佢就會原諒我。

「對唔住啊何B仔﹗對唔住﹗對唔住﹗」

我流晒馬尿咁向Suki，向何B仔道歉。

Suki o既動作有一瞬間停左落黎。

但一瞬間之後，佢又繼續想推我落街。

「對唔住，對唔住啊大B﹗」

睇黎今次大B真係唔會原諒我。

咁又係o既，血債就梗係血償架啦。

我又真係抵死o既。

正當我準備放棄o既時候，Suki突然鬆左手。

係有人係後面拉住Suki，逼佢鬆手。

有人？呢度點可能仲有人？除非......

無錯，阿婆翻左生，從後抱住Suki，拉開左佢，救左我一命。


無幾耐之後，消防車黎到，救息左D火，用雲梯救左我落黎。

我終於逃離左舊公屋13樓。









7.

經過一波三折，屌唔撚只三折，經過一波N折之後，我總算逃出生天。

以前大B嬲到火遮眼，追我打到唔停手，細B就會拉住大B，求大B原諒我。

我諗果陣時救番我o既，就係細B。

出事果日係何B仔死忌，佢地死左已經13年。

我果日帶埋祭品上去拜佢地，其實我年年死忌都有去，唔知點解係今年先出事。

可能佢地一路有練功想搵我報仇，練左13年先夠power。

我認我抵死，果次如果真係死左我都唔會有怨言，但我真係唔想死住。

死，真係好可怕，無論燒死焗死定跣死，仲係處男之身就死真係好慘，

所以我之後去拜佢地時仲特登帶多幾本鹹書，何B仔冥壽計落都滿18歲好耐啦。


Suki佢都大難不死，訓左一個禮拜醫院，醒番後連我係邊個都唔認得。

後尾先知原來Suki係何B仔o既堂家姐，果日同我一樣係去拜何B仔o既。

可能因為血源關係近，容易比大B上身，所以佢先賴野。


事後我有請到一大班道士幫我超渡何B仔，道士話果度怨氣好重，應該係之前D法事做得唔夠撤底。

總之，唉，對唔住啊，何B仔。

真係好對唔住。





全故完