香港戰場: 結局篇‧7.尾聲

7.尾聲
同一日下午，兩名國際大型傳媒機構記者到達酒店，在周吾的房間內訪問他不單止講出恐嚇事件，還將他被要求寫文件的經過講了出來。新聞很快在網上刊登，翌日即成為全球頭條。
自從聯合國派兵來港，多個反對派發動示威，數日來逾萬人包圍政府總部，建制派同時亦發起群眾遊行支持政府。反對派打出標語「屠殺市民 阻人搵食」，早已吸納不少支持，自從周吾恐嚇事件後，包圍政府人數激增至三十多萬，人群癱瘓金鐘幾條主要道路。自此之後，建制派偃旗息鼓，不知有何盤算。
張明德等人陸續寫好口供，到國際刑事法庭「過堂」，確認口供真確。
這幾日，他們都幾乎同一時間到餐廳。酒店餐廳頗為高級，但現在更似軍隊飯堂。大廚倒是沒有架子，覺得這樣頗有趣，還替這班香港人擔心，特意搬來一部大電視，讓他們收看最新消息。
中午，如常是午飯時間，幾十人浩浩蕩蕩到餐廳去。Mike Johnson已在餐廳，指着電視：「看!快看!」
電視播映香港政府首長講話，配以英文字幕。首長面無表情，照着手中的講稿宣告。

「呢幾日，香港進入咗一個艱難時期。由於軍方嘅行動，令到大家蒙受損失，我係度致以深切歉意。呢次事件，係本港成立獨立軍隊以嚟，首次軍方最高層擅自行動，而我作為香港政府首長，未能盡力阻止事件發生，實在難辭其咎。在此，我宣佈，本人與保安局局長、警務處處長，以及政府軍有決策能力嘅領導層，引咎辭職。我係度要對所有支我嘅支持者，包括團體及個人，講聲『對唔住』，我有負大家嘅期望，未能治理好香港。政府將會向聯合國遞交事件相關嘅文件，而我以及其他需要負責嘅人，將會去到國際法庭應訊。至於香港政府運作，以及下一任首長選舉安排，將會按既定程序，由政務司司長領導嘅臨時政府負責。係度再一次，向廣大嘅市民及支持者，致以最深切嘅歉意。」





餐廳即時開了炸鍋，各方人物一起「嘩嘩嘩」的叫起來。
李佩欣和馬惜君最是激動：「咁都得，將一切責任推晒畀死咗嘅軍方高層，仲要係咪『被自殺』都唔知，咁就算呀?殺人喎而家!」
伍明華搖搖頭：「人性真係卑劣，搞成咁，講句野辭職就算。」
張立仁指着電視：「講完啦?無一句係正面講發生咗咩事喎!仲有，邊鬼個支持你啊?」
何志明望着他們，笑而不語。周偉峰發覺，問：「有咩好笑?」
何志明還是笑着：「你睇下你地，佢呢篇講稿就係要你地將怨氣怒氣轉晒去佢身上。」
何志明一講，全場靜了下來，劉敏霞問道：「點解要咁?」
「選舉呀，」何志明坐了下來，慢慢解釋：「咁嘅情況下，佢無辦法唔落台，對於建制派嚟講已經無利用價值，咁當然要盡早劃清界線最好。近日幾十萬人包圍政府總部，建制派研判後，發覺同佢嘅關係有可能令下一屆選舉失利，所以放棄佢之餘，將民間怨氣轉移到佢一個人身上，再加上佢向支持者道歉，令事件對建制派嘅影響減到最低。」
胡文軒豎起姆指：「好分析。」
何志明續道：「有用就開出各種承諾，到你無用時就置之不理，係佢地一貫做法。當你地仲追住一個無用嘅人嚟打，佢地已經計劃下一輪選舉。政治，其中一個主要嘅工作，就係要引導輿論，引導民情，將人民情緒帶到有利自己個邊，明唔明?」




李佩欣攤開雙手：「咁點呀?我地由得佢搞落去呀?」
何志明崇崇肩：「無計，你同我可以做咩野?唯有上庭指證佢地，等法官判佢地有罪。」

國際刑事法庭得到大量資料，審訊過程很快，幾個月之後已定罪。同時，香港新一屆政府選舉有了結果，反對派大勝，得票七成，建制派只有三成得票率。
甚麼?建制派支持的政府屠殺市民，但選舉竟然還有三成得票率?
你不信嗎?
我信。
（全文完）