香港戰場: 前傳‧2

2.
回到課室。
張明德看着軍營，發覺近日軍人活動漸少，但營內人數似乎有增加。
在遠處看自然看不到細節，只能有一個印象。張明德心中有強烈的感覺─這是暴風雨的前夕。
沒有真憑實據，也不能做甚麼，唯有回宿舍去。
走出走廊，電梯剛剛從自己一層走了，唯有行樓梯。張明德走到三樓，剛巧有人推門入來。
是傳理學院老教授陳我，張明德也上過他的課，這時他有點神不守舍，等了兩秒才發現樓梯有人。
「教授你好!」
「啊，是你，應該上完堂啦?」
「係呀，而家返宿舍。」




「近排有人挑起爭端，指香港人講廣東話，係歧視講普通話嘅人，你有無聽過?」
「有呀，有次行過軍營，聽到入面D軍人咁講。」
「我覺得呢次係有組織嘅行動，目的係挑撥雙方情緒，煽動仇恨，將兩批人放係對立面。呢種講法仲要係大學出現。」
「係?我又唔覺喎，同學之間無呢D事發生。」
「我指嘅唔係學生層面，學生之間無就好，唔好畀有心人挑撥離間。你留意有無咁嘅情況出現，一有發現就要制止。」
「知道。」

張明德回到宿舍，黃海澄、胡洪清正在做功課，從中國來的留學生蘇莉也來了。
「你地有無聽過，近排有人講，香港人講廣東話，歧視講普通話嘅人?」張明德邊說邊關門。
「無呀。」三個人齊聲說。




「好奇怪，頭先見到陳我教授，佢話學校內有人講咁嘅說話，但又唔係學生層面。」
蘇莉接着說：「即是教授之間有咁嘅傳聞啦!我地中港學生成日係埋一齊，都無聽過呢D野。」
黃海澄放下原子筆：「咁就更加奇怪，教授對住各種學生，又成日出席活動，應該好清楚中港學生之間根本無呢D事發生。」
胡洪清道：「你又唔好咁諗，每個人都有自己立場，無論學歷高低，都有可能傾左傾右，可以支持政府、支持在野黨，甚至支持軍方。立場同學歷無關係，無論咩立場，一個人帶咗有色眼鏡，睇嘅野就有偏頗。」
蘇莉接着問：「但教授唔係應該明辨是非咩?香港人歧視中國人，呢種諗法無根據，點解要傳開去呢?」
張明德道：「唔好以為教授一定識得分，佢地係自己擅長嘅學科係好勁，但係講到其他範圍，其實同常人無分別。連你都覺得舊can唔好食，但係你見幾多教授食得幾滋味?講到底，大家都係正常人啫。」
黃海澄想了想，問：「咁......邊個教授有咁嘅諗法呢?」