香港戰場: 浸大篇‧6.嘉頓
6.嘉頓
團隊：張明德、黃海澄、胡洪清、蘇莉、馬惜君、陳元山、嚴利人、周昱明、陳鳴光、陳錫明、郭少東、張伯賢、何北、江國斌、余慶昌
陳元山、嚴利人舉起雙手進內，只見幾個人舉槍向門口，當中有廚師、侍應、警察和學生。
兩人背着槍舉着手，這真是冒險行動，沒有人知道對方是不是自己人。嚴利人見對方是平民和警察，鬆一口氣：「你地被人攻咗幾多輪?」
「四五輪，當中有軍人有警察。」廚師問：「你地係咩人?」
「我地係浸大嘅學生，出面仲有一班自己人，可唔可以叫佢地入嚟?」
「我點知你係浸大學生?」
「我畀學生證你睇。」陳元山拿出學生證，遞了上前。
廚師看一看：「好，你叫其他人入嚟。」
陳元山剛轉身，又再回頭說：「我地班人當中有警察，亦有投降嘅軍人，一陣見到唔好誤會。」
陳元山走了出去，帶領其他人入內，嘉頓餐廳的內頓是人頭湧湧，連廚房內的人也走了出來，包括一個軍裝警員。
周昱明看了看外面的警察屍體，不禁皺眉。
各人簡單介紹自己，周昱明問當前情形。廚師張采指一指旁邊警員：「我地今早正常做生意，突然有警員入嚟話好危險，叫我地關門。現場仲有客人，我地就話等客人離開先，但無幾耐就有軍人入嚟開槍。警察同佢地駁火，兩個軍人死咗，警察就死剩佢一個。」
廚師陳一元接着道：「呀sir叫我地都係唔好亂走，咁啱有學生同街坊經過，就叫佢地嚟避一避。點知安頓好無幾耐，就有幾個警察向我地開槍，解決咗之後過一陣又嚟軍人，如是者嚟咗三四輪，D屍體無地方放，就推係外面。」
周昱明望向軍裝警員：「你做得好正確，向你地開槍嘅警員事先有無講咩野?」
軍裝警員張俊文回答：「佢地嚟到無講過野就開槍。」
周昱明說：「呢一班係警方嘅特別行動組，係一隊精英部隊。」
「但你地警方唔係未收到任何命令咩?」嚴利人問。
周昱明道：「佢地同我地呢D一般警察唔同，佢地收到嘅命令係機密，唔會通過警方電台通知，可能有人收到情報問攻入嚟。」
張俊文說：「SIR，我地除咗呢一度嘅人，仲有幾個人係山上面看守，佢地配備狙擊槍，同我地有聯絡。但如果對方一直進攻嘅話，我地係咪應該離開?」
周昱明點頭：「為咗盡量減少衝突同傷亡，我地應該離開會受到攻擊嘅地方。」
黃海澄望向四個女學生：「你地係邊度嚟?屋企近唔近?」
徐少貞道：「我同何淑敏係英華學生，住泓景臺。」
年輕男子胡添祐說：「我係瑪利亞嘅老師，呢兩位同學趙珊兒、丁子琪，一個住美居，一個住元州邨。如果順路嘅話，我地一齊走?」
黃海澄看看眾人，人是多了一點，不過若分開了就更危險，所以答道：「好啦。」
幾個警察安排離開的時候，遠方有兩輛卡車駛過來。
「沙......沙......警報!有兩架車嚟緊!」
無線電大聲響着，眾人瞬間停止動作。經過一秒寧靜，大家立即舉槍準備。浸大、城大學生從後門走出來，江國斌、余慶昌兩個警員跟隨他們，到附近公園近大埔道的幾株大樹旁伏下。
張明德伏在地上，對黃海澄說：「呢度唔係好嘅埋伏地方。」
他這樣說，是因為後方是大埔道，隨時有車輛從不遠處的彎位轉過來。但時間不容許他們進入美荷樓或上嘉頓山，留在餐廳內又太擠擁，惟有走出來伏下。
「無時間啦!」嚴利人說，「兩架車衝緊過嚟!」
兩輛軍車從欽州街駛至，在前一個路口停下。一輛車有軍人走下來，另一輛車則是持有盾牌的警察。
警察組成一個盾陣，後方軍人向四周舉槍，形成一個前方有盾牌的方陣，一路向嘉頓走去。
彭彭彭彭彭......
餐廳內傳出槍聲，由於警察盾牌不夠大，有餐廳內的人專門射頭和腳，有幾個警察倒下。
警察和軍人立即還擊，一時間槍聲不絕。
警察方陣內有人舉起催淚彈發射器，還未發射，頭就中彈。原來嘉頓山的狙擊手，專門針對方陣中間準備發射催淚彈的警察來開槍。
張明德等人在旁邊放冷槍，但不多久對方已發現他們，向他們射擊。
持盾警察人數漸漸減少，突然全隊快速推進攻堅。
就在此時，山上與餐廳內亂槍掃射，張明德等人都持槍向警察狂掃。對方亦不停開火還擊，一時間止住對方攻勢。
對方似乎未料到嘉頓火力之猛，軍人人數漸少，不一會退到軍車旁，被狙擊手了結。
張明德等人見前方已安全，都起來走回餐廳。但回頭一看，胡洪清、嚴利人中槍。
胡洪清已氣絕身亡，嚴利人中了兩槍，離死不遠。
蘇莉抱着嚴利人的頭，嚴利人用盡氣力，只能細聲叫她快走。說罷未等蘇莉回答，嚴利人也死去。
後門推開，廚師張采走出來叫道：「周sir死咗呀!」
外面所有人進入餐廳一看，都呆了。整個餐廳滿佈子彈孔，地上有幾條屍體。
江國斌和余慶昌，首先看到周昱明警司和其他人的屍體。旁邊的是「瑪利亞雙妹」趙珊兒、丁子琪，接着是廚師陳一元，以及早就在嘉頓協助的警員張俊文。
其他不少人受輕傷，沒受傷的人連忙為他們包紮。瑪利亞學校老師胡添祐，此時坐在地上，默默望着兩個跟他走出來的學生屍體。
軍人陳錫明走過來坐下，拍一拍胡添祐的肩：「警察軍人聯手開槍，自己保到條命算唔錯，唔好太過傷心。」
另一軍人張伯賢找到無線電對講機，與山上的人對話。
「收唔收到?」
「收到，請講。」
「餐廳內有五個死者，外面有兩個死者，剩低十六個人，大部份輕傷，包紮過後會轉移陣地。」
「你地會去邊度?」
「暫時未知，你地有幾多人?可以先落嚟集合。」
「山上八個人，而家收拾，五分鐘後落嚟，預計十五分鐘內嚟到。」
「收到。等你。」
「我地而家可以去邊度?」何淑敏問。
張明德首先發言：「不如大家畀意見。我地其中一個地點係德貞女子中學，即係西九四小龍附近，近長沙灣。直行嘅話有深水埗公園、長沙灣遊樂場，都係無咩防守可言嘅地方。所以我想先去明愛醫院，睇下有無咩醫療物資或者情報，再落去德貞。」
陳鳴光說：「會唔會遠咗D?直行欽州街，再向西沿住西九龍走廊或者深旺道，好快就到德貞。」
「係喎，咁嘅話兩條大街，好快行到去。」馬惜君看着電話內的地圖說。
軍人何北見她看着地圖，問她借來看看。
陳元山想了想：「西九龍走廊危險，大型車輛可能會經過，即係話有機會遇到軍車。」
「我地經醫院去啦。」鄉音一出，眾人望過去，原來是看着地圖的何北：「欽州街太長太闊，遇到軍人無地方路躲避，而且前面應該有出入口由西九龍走廊下來，即是說遇到軍車嘅機會較大。往明愛醫院再走雖然較遠，但道路較短，遇到人可以轉入其他路再前進，咁行較安全。」
住泓景臺的學生徐少貞接着道：「另外，順寧道保安道有唔少後巷，必要時可以穿過去另一條街。」
眾人覺得有理，於是決定往明愛醫院。