香港戰場: 城大篇‧16.海輝道天橋

16.海輝道天橋

團隊：林志剛、李顯明、周偉峰、何明發、李佩欣、黎德文、伍少國、龍子維、余日明、沈多聞、張藍、陳明德、鄭麗嫻、王子計、唐蔭聰、鄧四海、田子龍、金韋昭、古越明

眾人背上裝備，從宿舍後方天橋出發。平日不少大型車輛出入的深旺道，此時只有幾輛貨車靜靜地泊在一旁。鄧四海、田子龍等警察行在前頭，帶領市民轉入海輝道。要到浪澄灣海邊，必先從海輝道經迴旋處穿過西九龍走廊，這條路長而直，沒有退出口，遇上政府軍只能死戰到底。
而迴旋處等待的，是水警。

「喂，伙記，」鄧四海等人拿出證件，「你地負責守呢度?」
一個水警答：「係，上頭話呢度要派人守住，來往嘅車都要檢查。你地去邊?」
鄧四海道：「有班市民要去浪澄灣，我地保護佢地到目的地。」




有水警指着人群：「點解佢地有槍架?」說罷其他水警大為緊張。
田子龍說：「唔使緊張，我地過嚟嘅陣係軍車派嘅，有d就係我地宿舍派嘅。」
水警問：「你檢查清楚佢地身份未?」
田子龍答：「都係一d老師學生同埋街坊，無咩特別。有幾個後生仔都係學生，檢查過學生證。」
水警讓出一條路：「上頭睇得好緊，要檢查所有人，你地自己小心d啦。」
這時伍少國走上前問：「我地都係休班緊，最近上頭有咩指示?」
「最新嘅就係話，政府軍將九龍新界分成一區區，逐區搜查，我地就係要制止d人亂咁跨區，以免走甩暴徒。你地搜過無野就最好啦，萬一有咩人混咗入去，會連累埋我地。」
「呢層你可以放心，」鄧四海說：「加入嘅市民都檢查過，無咩可疑。我地送咗佢地過去就會返宿舍，成日咁緊張都未唞過。」
「係啦辛苦晒，快d搞掂單野就最好啦。」





車內的水警走出來，對他們的指揮官說話。
「政府啱啱公佈，動用第197章。」
指揮官皺眉：「有咁嘅必要咩?佢有無講咩原因?」
「佢地話要盡快恢復秩序，並有利物資分發喎。」
鄭麗嫻見水警神色凝重，細聲問：「咩係197章?」
「197章即係《基要服務團條例》，大約係1950年制定，目的要係緊急情況下支援及維持各種基本服務，例如能源、運輸、政府運作，同埋保障社會安全。」站在旁邊的唐蔭聰答她，「佢地開支由立法會畀，與警隊有同樣權力，行使職權唔使負刑責，如果市民妨礙佢地就係違法。」
鄭麗嫻瞪大對眼：「嘩，咁你都知!」
「之前有人話要用嚟對付示威者，咪上網搵資料囉。」唐蔭聰答，「作為一個IT人，呢單野之前好hit，點都會睇睇。」
「咁即係話，政府可以用呢條條例，招募退休警察或其他人嚟維持秩序?」何明發搭嘴。
「係，可以招募任何人，包括黑社會。招募返嚟嘅人同警察一樣有權力，但如果佢地利用呢d權力去搶野，甚至殺人，可能一句執行職務就可以免刑責。」唐蔭聰解釋。




鄭麗嫻說：「或者唔係咁呢，你地唔好咁諗先啦。」說完，身旁幾個人同時搭嘴：「你信政府呀?」
田子龍說：「既然動用197章，即係進入緊急狀態，我地要快d去到安全地方。」
眾人心領神會，一起離開水警駐守處。